Lawar nanguro ngawo Hamanne
9
Bune adǝ Mai Ahasarasso kǝnǝm katkerǝnniya,
gǝrgamnjudǝa cawudo tiro kǝrajaa yeno.
2 Kǝrajai kǝrajai duwon,
na lamar Biktana-a Teres-a cinna gureduwu yindi jiɍi Maia njejo majana duwon,
Mordekai asǝrnja kajǝnayedǝa tiro kǝrayeyeranniya,
3 Maiyedǝ wolodianjuro:
«Daraja fi Mordekairo cado?»
«Daraja falma tiro cadǝnni.»
4 «Wundu balballan?»
Caman Haman balballa mairiyedǝro isǝna.
Amari Mordekaia kǝska koktǝnadǝro roduwuye fandoro kadinniya,
5 wolodiyaye:
«Haman diye balballan.»
«Bowonowo,
ngawo!»
6 Haman kǝrgaanniya,
Mai Ahasarasse:
«Haman,
awi kam daraja njo raakkǝnaro yiddǝkki?»
Haman karwunjun:
«Wundu wun kasǝnno Mai daraja cidǝ?»
7 Daji Mairo:
«Barganǝmmin,
ngo awo kam daraja njo raammaro yiddǝmidǝ:
8 Kalwu maimai lunǝmmadǝ-a fǝr bamma kǝlanjun jawa maimai tuwadaa-a cawudo.
9 Kalwudǝ-a fǝrdǝ-a mukko fuwuma cidinǝmbe kura laayero casakko.
Lejo kam daraja njo raammadǝro lujuwo,
tia kǝla fǝrdǝyero ngojuwo fuwunjuro kojo,
jejo farsam bǝrniyen ngai yiljiaro dadajo:
"Ngo adǝgai kam Mai Ahasaras daraja njo cǝraanadǝro caddi."»
10 «Duwaduwan lene,
wullǝmmadǝ gai kalwudǝa ngone fǝrdǝa jene,
Mordekai yaudi cinna mairiyen napkadadǝro ngai yidde!
Awo wullǝmmadǝlan bare falma kollǝmmi.»
11 Haman kalwudǝa ngoje fǝrdǝ yea jeje leyenniya,
kalwudǝa Mordekairo lujiye tia kǝla fǝrdǝyero ngojiye farsam bǝrniyero cade:
«Ngo adǝgai kam Mai Ahasaras daraja njo cǝraanadǝro caddi.»
12 Walladaranniya,
Mordekai cinna mairiyen napkeno.
Amma Haman nanguro ngaanadǝ,
fǝkkanju jakce dǝgalje fannjuro leyeno.
13 Awo tia cuwandǝna ngaa kamunju Jeres-a sawawa sawariwunju samma-aro wulyeyenniya,
«Mordekai,
kam nia fallo yamnjǝgǝnadǝye fǝrdunju yaudidǝ,
tia rangǝmbawo.
Fagat,
nasardi!»
14 Jandejai duwon,
wolodiya Maiye isane gangadaro Hamanna masǝna dioro na Estayero kesado.