Lawar wadu ngoda Alaye
11
20 «Musa,
malaiya nodǝkke nayia burwonjane kǝla jawallen njaɍiwi.
Nayia lardu nayi nangaro yasakkǝnaro njaadi.
21 Hangal gǝnanowo,
tia ngǝlaro kǝrǝnnowo.
Bare tia kambiwunuwwi.
Nan'ansindo kasacciwawo,
wua wakkilsi nangaro.
22 Tia ngǝlaro kǝrǝnnuwe awo wulnjagakkǝna sammaa diwiya,
wu Kǝmando kǝlado kǝladowandoyero wallǝkki,
koro lawalama lawalawundoyero wallǝkki.
23 «Malaiyadǝ fuwundoro koje lardu am jiɍi gadegade arakkuyero njaade,
wu ye tayia baworo dikki.
Amma bare sǝnǝmbanjaa Alaro ngonuwe tayia gawwi.
24 Bare adinnja diwwi.
Ngǝlanjudǝ sǝnǝmba caarǝna-a kauwa sǝnǝmsǝnǝm kokcana-a tǝtǝmballowo nanammowo.
25 Wu runi tok Kǝmando Aladǝmaa sǝgaiwo.
Daji barga dǝmnjagakke,
kǝmbo-a ingi-a njadǝkke,
koro kasuwaro njakkaakki.
26 Lardundon kamu curo fijiwaworo dikki,
koro kamu fi yaye cambiro dikke,
yakkǝkke dunian ngǝwuro dǝgawi.
27 «Lardu Kan'anayero ngawuwiya,
yakkǝkke karwu jama lardudǝn dasaanaye dama baworo kamde,
na lejaimaro nojanniro cagasi.
Kǝladowando fuwundon ngǝrǝmjai.
28 Lardu adǝro ngawuwiya,
curo Hiwiwu-a Kan'anawu-a Hittiwu-ayero ridu yakkǝkke fuwundon ngǝrǝmbo caluwi.
29 Saa falnin gǝni tayia fuwundon dukki,
bare lardudǝ bowuro walje bundiya karaaye ngǝwujane nayiro naptu damnjaganniro.
30 Gana ganayen tayia fuwundon dukki,
har nayi ngǝwunuwe lardu ngaa ranguwe mowuwi.
Lardundoro kaɍangi yiddǝkki.
31 Nankura lardundoye bǝrǝm Malian tamiya bǝrǝm Mediteraneyero cadi,
koro karaa Sinaiyen tamiya bǝrǝm Yufarattero cadi,
dalilnjudǝ am lardu adǝyedǝa mukkondoro yakkǝkke tayia fuwundon dunuwi nangaro.
32 Bare tayi-a nayi-a aman ndǝmmuwwi,
bi sǝnǝmbanja-a ndǝmmuwwi.
33 Bare tayia kolluwe lardundon dasaanni.
Adǝ gǝnia,
nayia njasakke wuro biwu sǝdduwi.
Sǝnǝmbanjaa Alandoro ngoyewwa,
nayia njasakke sǝnǝmguro walluwi.»