Wadawa kǝla jawal sharayen
10
«Bare mana kǝla bawoa diwwi,
bi biwuma laa-a ci kǝlluwe sheda bowuye diwwi.
2 Bare jama ngǝwuro kǝldǝgǝwe niadiwi diwwi.
Jawal sharayen bare shara bannaduro kanji am ngǝwuayero konuwwi.
3 Bare curo sharayen kam adǝ mukko dea nuwe tia ngurnonuwwi.
4 Dalo bi koro kǝladondoye faccǝgǝna ruwiya,
gaddowo tiro yikkadowo.
5 Kam nayia wanjanaye koro kǝlan karea curǝna ruwiya,
bare kolluwwi,
lenowo kǝmadǝa banagǝnowo koronju cǝsango.
6 Jawal sharayen bare amndo mukko dearo mukko dea nuwe shara diwi yidduwwi.
7 Bare curo kattuwuyero ngawuwwi.
Bare shara karmoye kam awima cǝdǝnni bi kam jǝrearo yidduwwi,
dalilnjudǝ wu Kǝmando kam shara jǝrenambuye adǝa cǝdǝnadǝa kam awima cǝdǝnniro ngokkiwawo.
8 Bare ci gǝrǝptaa mowuwwi,
ci gǝrǝptaamadǝ jǝremaa cakke jǝre waje shara diwi cǝdi.
9 Bare sikudoa basarnuwwi,
nayima naptu sikudoyea nonuwwa,
Masarnin tia diwwa nangaro.
10 Saa arakkuro kulowando barenuwiya,
11 saa tulurredǝn kollowo tussa.
Curo jamandoyen am mukko deadǝ awo curo kulondoyen cawandǝnadǝa jawo,
gapcǝnadǝa lǝmanna karaaye ye jawo.
12 Saa arakkuro tadawa kǝska inabbe-a jaitunne-a doruwiya,
saa tulurredǝn kollowo tayi ye tussa.
Kawu arakkuro kida dewo,
amma yimbe tulurradǝ kida sammaa kollowo,
dalowando-a korowando-a kaɍeawando-a kirrando-a sikudoso-a ye tussa nangaro.
13 Hangal gǝnanowo,
awo wu Kǝmando wulnjagakkǝna sammaa dewo.
Bare Ala gadeso koruwwi,
bare cunja cindon caluwunni.
14 Saa fi yaye yakkuro naniro arowo wu nangaro ngǝmǝri gadegade yakku dewo.
15 Ngǝmǝri burwoyedǝ ngǝmǝri burodi yis bawoaye.
Curo kǝndawu njaimuyen sanju cǝdiya,
wulnjagakkǝnadǝ gai kawu tulurro burodi yis bawoa buiwo.
Curo kǝndawu adǝyeman Masarnin kiluwuw.
Bare wunduma naniro mukko dea isǝnni.
16 Koro sa awo naduwwadǝa kaladu badinuwiya,
ngǝmǝri kalaye dewo.
Biyila kojiya,
sa kida kuloye tǝgǝmbo yeruwe nema ngaa fadoro kuduwiya,
ngǝmǝri nemaye dewo.
17 Saan yakkuro kongwawadǝ na wu Kǝmando Alayero isa.»