Wadawa kǝla kam njejo bi laruduyen
5
12 «Kam duwon kamba bakce roro cejiya,
ti yea ceyeso.
13 Kam njejo karwunjun bawo duwon,
kam bakcǝnadǝye kawu daje bawoyenoa,
amargǝkke na fuwun nayiro fǝlenjagakkidǝn lejo dǝga.
14 Amma kam duwon karwunjun kam njejo mbeji nangalan kam kejoa,
laya duwaduram Fado Alayero ngǝrǝmje lejǝnaman tia taiwo yejowo.
15 Kam yanju bi bawanjua bakciya,
tia roro yejowo.
16 Kam duwon kam ndaljiya,
tia roro yejowo,
kam ndaljǝnadǝa cǝladǝna yen kal,
nanjun rojǝna yen kal.
17 Kam duwon yanju bi bawanjua bassiya,
tia roro yejowo.
18 Am yindi jagadǝne,
falnja kamanjua kaunin bi ngǝlwun bakce roro cejǝnni lorujiya,
gana ngaje kanin lejiro waljiya,
bare kam tia lorujǝnadǝa roro yejuwwi.
19 Amma kam lorudǝnadǝye yim kida cǝdǝnni sammaa biyajo,
koro tiro karwun majuwo har ngajo.
20 Kam duwon kaɍeanju bi kirnjua kanin bakce roro cejiya,
tia shara cǝda.
21 Amma sa bakcǝnadǝn nunni,
kawu tilo bi yindi cǝdǝna duwon kanoa,
bare kǝmadǝro awima yidduwwi.
Wowomnjudǝ kaɍeanju bi kirnju cuwatkǝnadǝmaro waljo.
22 Am jagadi duwon falnja kamu curoaro gǝmdiye kamu adǝ baɍi cǝde kuttu gade tia cuwandǝnnia,
kwa kamu adǝye kam adǝa cakko wuɍi cuworǝnadǝa sharama ye kasacciya biyajo.
Amma kuttu gade ye kamu adǝa kiwandoa,
kam adǝa wowom cǝda.
23 Kejoa,
tia yejowo.
24 Sim fal kittuluwoa,
tiye ye sim fal tuluwowo.
25 Loruyenoa,
ti yea lorunowo.
Namgenoa,
ti yea nammowo.
26 Kam duwon kaɍeanjuye bi kirnjuye sim fal cuttuluwiya,
simnju cuttuluwuna nangaro tia salamjo.
27 Timinju fal namgenoa,
timinju namjǝna nangaro tia salamjo.
28 Dalo duwon kongwa bi kamua kangadin jaje roro cejiya,
dalodǝa kaunin roro ceyeso.
Bare da dalo adǝyedǝa jagarǝnni.
Kǝmanjua biwu cǝdaiwawo.
29 Amma kureman dalodǝ amba kangadin culukce,
koro kǝmanjuro marmarea caddǝne,
kǝmadǝ tiro kissǝgǝnni duwon,
kam gade jaje roro kejoa,
dalo adǝa kaunin roro ceyeso.
30 Koro kǝmanju yea wowom karmoye cǝda.
Kǝmadǝa bare ceyesǝnniro saa gǝnajagane biyajo yeraa,
awo caworǝna sammaa co.
31 Dalo tada kongwa bi fero roro kejoa,
wowom karmoye tia cǝda.
32 Dalo kaɍea bi kir roro kejoa,
kǝma daloyedǝ kǝma kaɍea bi kirredǝro cungo fiakku co,
koro dalo adǝa kaunin roro ceyeso.»