Wadawa kǝla nanbarwu-a kamba asarro njakko-ayen
6
33 «Kam bǝlaa jakkadaa kaje koljǝna,
bi tima tia laje jakcǝnni duwon,
dalo bi koro cukkure nuiya,
34 kǝma bǝlaayedǝ kǝma lǝmannedǝro taman lǝmannjuye co,
ɍiwadǝ kaanjuro waljo.
35 Dalo kam laaye dalo kam gadeye kangadin jaje roro cejiya,
dalo roadǝa tayi yindi calado wuɍidǝ-a lǝman nunadǝ-a rokko dagarja.
36 Caman dalo adǝ lǝmannaa kangadin culukci duwon,
koro kǝmanju tiro kissǝgǝnnia,
kǝma adǝ dalo nunadǝa cǝrǝmbo,
ɍiwadǝ kaanjuro waljo.
41 Kam dalo,
bi dimi,
bi kani ndalje duwaje bi cǝladiya,
kǝma lǝman adǝyero dalo uwu,
bi dimi dewu,
bi kani dewu cujudǝro co.
42 Bune barwu dunon fado laa kaje ngayi duwon,
fadujane tia bakcane roro ceyesiya,
bare kam tia cejǝnadǝa sharaye cǝdanni.
43 Amma awo adǝ dunia kausu wakkayenoa,
kam adǝa kamcejiro ngoja.
Barwu fi yaye awo ndaljǝnadǝa cǝrǝmbo.
Barwudǝ awima cǝdannia,
tia calado wuɍidǝn awo ndaljǝnadǝa carǝmbo.
44 Lǝman,
dalo,
koro bi dimi ndaljǝna duwon nanjun kewandoa,
lǝman yindi cujunjuro co.
45 Kam lǝmannju kolje kulo bi jǝrwu kam laayen banna cǝdiya,
kulonjuye bi jǝrwunjuye nema ngalwodǝa cuju bannadǝyero co.
46 Kam kannu fuje kolje coccoɍi laa cǝdane tǝtǝpce leje kǝla algamaye tikkerǝna,
bi algama kalajanni,
bi kulo sammaa juwuiya,
kam adǝ awo kannu juwunadǝa cǝrǝmbo.
47 Kam laa kamanjuro ajaro wuɍi bi kare ce cade fannjun duwon ndaljaiya,
barwudǝ tǝdanaa,
awo ndaljǝnadǝye kawak yindi cǝrǝmbo.
48 Barwudǝa cawandǝnnia,
kǝma fadomadǝ fuwu Alayero lejo,
nambarwudǝa ti bi ti gǝni cǝdoro Ala isanojuwo.
49 Am kǝla awo faccǝgǝnayen kambiwu cadiya,
dalo yen kal,
koro yen kal,
dimi yen kal,
kani yen kal,
kalwu gari yen kal,
bi awo gade faccǝgǝna yen kal,
"Ti adǝma,
diye!"
caniya,
shara madaro naniro isaiya,
kam duwon wuye:
"Tima barwudǝ wo!"
nǝkkǝnadǝ awo ndaljǝnadǝye kawak yindi cǝrǝmbo.
50 Kam laa kamanjuro ngistuwuro koro,
bi dalo,
bi dimi,
bi kani,
bi lǝman gade ce lǝman adǝ kanoa,
bi larudiya,
bi ndaljane wunduma curunnia,
51 ti lǝmandǝro kistuwumadǝ cu Kǝmandeyen ti gǝni ngojoro kansi juwo.
Kǝma lǝmanmadǝ kam cu Kǝmandeyen kansi juwunadǝa kasacco bare tia biyajǝnni.
52 Amma lǝman adǝa nanjun duwon ndalyeraa,
cuju lǝman adǝye gade kǝmadǝro co.
53 Bundi laa lǝman adǝa kejoa,
shedaro gaptowo lǝmannedǝa cuwudo.
Bare lǝman bundi cejǝnadǝa cǝrǝmbǝnni.
54 Kam lǝman kamanjuye sarujǝna,
kǝmadǝ bawo duwon,
lǝman adǝ larudiya,
bi kanoa,
kamdǝ kǝma lǝmanmaa cǝrǝmbo.
55 Amma kǝmadǝ menna duwon wakkayenoa,
bare awima tiro cinni.
Lǝman adǝa agǝriyenoa,
kǝmanjuro wuɍi agǝriye cinadǝ cǝdo.