Wada kura kura mewu amandǝye
2
Akko kawuɍi Ala jama Israyilawuyero cǝddǝnadǝ:
2 «Wuma Kǝmando Ala curondon dǝgakkǝnadǝ wo.
Wuma nayia Masarnin na nankaɍea diwilan njattuluwukkǝnadǝ.
3 Bare wuro kajia Ala gade gawwi.
4 Bare sǝnǝm bi awo laa samen,
cidin,
bi curo ingiyen dǝganaye jiɍinju tanduwwi.
5 Bare fuwu sǝnǝmba-a jiɍi awowa aniye-aro sujada yidduwwi.
Bare tayia Alandoro ngonuwwi.
Wu Kǝmando Ala curondon dǝgakkǝnadǝ,
wuma Ala wo,
kemi falma kasaddǝkkiwawo.
Am wua wasanadǝ,
tayi-a kaduwuwanja-aro diwun diwurinno wowom gǝnagǝkki.
6 Amma am wua saraana awo wullǝkkǝna jagaidǝ,
tayi-a kaduwuwanja jaman tiloa-aro har ci gadegade dǝwuro kǝrawoni fǝlegǝkki.
7 Bare cuni kǝla bowuyen tawwi,
wu Kǝmando am awo adǝa cadidǝa bowu kollǝkkiwawo nangaro.
8 Yim tustuyedǝa yimmiro dewo.
9 Kawu arakkun kidando sammaa dewo,
amarnjagakkǝna.
10 Yimbe tulurradǝ,
yim tustuye,
wu Kǝmando yim adǝa yimmiro kidǝkko.
Yim adǝ nayi bi yallando,
bi kaɍeando,
bi kirndo,
bi lǝmannando,
bi sikudo curondon dǝgana,
bare wunduma kida cǝdǝnni.
11 Dalilnjudǝ kawu arakkun same-a cidi-a bǝrǝm-a awo curonjan dǝgana samma-a tandǝkke,
yimbe tulurradǝ tuskekko nangaro.
Adǝma nangaro wu Kǝmando yim tustuyedǝro barga dǝpkǝkke,
koro yim adǝa yimmiro kidǝkko.
12 Yando-a bawando-aro daraja yowo,
lardu wu Kǝmando Ala nayiro njadǝkkidǝn ngǝwuro dǝgaiworo.
13 Bare ro kambe tuluwuwwi.
14 Bare kǝnjǝna diwwi.
15 Bare nambarwu diwwi.
16 Bare kamandoro sheda bowuye yidduwwi.
17 Bare kamandoye kare mangarnuwwi,
fannjun kal,
kamunjun kal,
kaɍeanjun kal,
kirnjun kal,
dalonjun kal,
koronjun kal.»
18 Jama Israyilawuye gǝgǝrdu keyeraye-a kowo kangadiye-a fanjane mǝmǝlǝktu keyeraye-a kange kau kuruwudǝa jakcǝna-a kerunniya,
riduro lolojane kuruwunin dajane:
19 «Nawi Musa,
nima andiro jandesagane kǝrnjiye,
bare Ala kǝlanju andiro jandesagane nuiyende!»
20 «Bare rinuwwi.
Ala na adǝro isǝnadǝ,
nayia rijapturo,
koro kǝrmainju ruiwo tia rinowo biwu wanowo nangaro.»
21 Jama kuruwunin daada duwon,
Musa runju tok keyera cǝlǝm fǝdǝk Ala curon dǝganadǝa karǝngeno.