3 Musa Ala-a tadoro kǝla kau kuruwuyedǝro tatkeno.

Toɍi kaudǝyen Ala tia bowoje:

«Musa,

Israyilawuro wulgǝne:

4 tayima caruna gǝna awo Masarwuro yiddǝkkǝnadǝa?

5 Koro nojana,

jiɍi kowu ngarmu tadawanju kǝla fefedonjuyen ngojidǝ gai,

tayia kǝlewa salainin naniro kiwudǝkko.

Kǝrma wua taldu bawoaro saane amanni ngǝlaro kedaa,

curo jamawa duniaye sammayen tayima jama jaumaro raakkǝna kakkero ngokkǝnaro waljaidǝ wo.

Dunia samma kakke yaye,

6 tayi jama naptu wakkille katte wu-a jamawa gade-aro waljai,

koro jama tayirro waljai.

Wulgǝne adǝa Israyilawuro.»

7 Musa kau kuruwudǝn jǝpce amwurawa Israyilawuyedǝa samma bowoje mana Kǝmandeye sammaa tayiro wulyeyeno.

8 Daji jama samma kǝla tilonna:

«Awo Kǝmande wuljǝna sammaa diye.»

Musa jaawunjadǝa Kǝmandero kikkado.

9 Caman Kǝmandeye:

«Musa,

akko wu curo keyera cǝlǝm fǝdǝkken nanǝmbo isǝkke,

wu-a ni-a jandeniye,

Israyilawu fansa,

nia sawisoro mǝrsanja nangaro.»

10 Musa jaawu Israyilawuyedǝa Kǝmandero kikkadǝnniya,

Kǝmandeye:

«Waldǝne Israyilawuro wulle,

ku-a baɍi-a tayirro walja,

kajǝmunja tulja!

11 Waarero dabbarda,

yim adǝ kǝla kau kuruwu Sinaiyero jǝmmǝkke jama samma wua sarui.

12 Dirinǝmkǝlle kau kuruwudǝyen ci dajaidǝa tayiro fǝlegǝne,

ngai wulgǝmiaro:

"Bare kau kuruwu adǝro tadduwwi,

bi tia karǝnnuwwi.

Kam duwon kau kuruwu adǝro si gǝnajǝgǝnamadǝa roro yejowo.

13 Kam yen kal,

lǝman yen kal,

bare roa dǝganni.

Bare tiro mukko gǝnagǝwwi,

amma tia kaunin bi kǝniwulan yejowo.

Sai kangadi ngǝlaroye nukciya duwon,

Kǝmande kasacce am laa cawandǝne kau kuruwu adǝro taccai."»

14 Musa kau kuruwudǝn jǝpce na jamanjuyero kadio.

Tayia cakke tayirro waljane kajǝmunja tulyeranniya:

15 «Waarero dabbardǝnowo,

bare kamuwandoa gǝrenuwwi!»

16 Waareyenniya,

suwa keyera gǝrje mǝmǝlǝkkeno.

Keyera cǝlǝm fǝdǝk kau kuruwudǝa jakce,

kowo kura kangadi laaye nukce fangera.

Jama samma riduro loloyera.

17 Musa jama sammaa Alaa naduwuro na dasaanadǝn cuttuluwe,

fǝrdu kau kuruwudǝyero lejane dayera.

18 Kau kuruwu Sinaiyea kange jakcǝna,

dalilnjudǝ Kǝmande kǝladǝro curo kannuyen jǝpcǝgǝna nangaro.

Kangedǝ tǝɍǝn ciji kange koraye gai,

koro kau kuruwudǝ dama baworo loloji.

19 Kowo kangadidǝye dama baworo kuraji.

Musa Alaro jandejiyi,

Ala ye curo keyera gǝrjiyen tiro kalakciyi.

20 Kǝmande loiloiram kau kuruwu Sinaiyero jǝpkeyenniya,

Musaa bowoje tatkenniya:

21 «Jǝmme jamaro wulgǝne,

bare wua sarui cane naniro isanni.

Kadiraa,

curonjan am ngǝwu sanui.

22 Am wu nangaro bu fidawu wua karǝnsaidǝma tayirro walja.

Waljannia,

ngǝwu curonjan ronja fuccai.»

23 «Jama kǝla kau kuruwu Sinaiyero taccaiwawo,

nima andiro na takkaniyewaworo noduwuram yiddiyo,

koro kau kuruwu adǝa darajaan taiyo yem.»

24 «Jǝmme,

ni-a Haruna-a arowo.

Amma am bu fidawu-a jama-a bare na noduwuram yidduwwadǝa kojane naniro taccane isanni,

bare curonjan ngǝwu ronja fuccanniro!»

25 Daji Musa kau kuruwudǝn jǝpce jamaro jandeyeyeno.