Lawar alaktu Nawi Adam-a Auwa-aye
2
4 Akko lawar dunia-a same-aye sa alaktanadǝn.
Sa Kǝmande dunia-a same-a alakcǝnadǝn,
5 lardulan kǝska ye ɍijǝnni,
kajim ye ɍijǝnni,
dalilnjudǝ Kǝmande ingi sameye larduro cuduruwunni,
koro wunduma cididǝa bareduma bawo.
6 Amma kǝlangu cidilan cije kǝla lardudǝyea kǝɍiro cǝdi.
7 Daji Kǝmande cidi ngoje kam kidando.
Kinjanjuro sindu roye fujiye roaro walyeno.
8 Adinnamnin curo lardu tiro Yiden caniyen Kǝmande jǝrwu kido.
Kam cǝdandǝnadǝa ngoje curo jǝrwudǝyero kekko.
9 Ala cakke cididǝn kǝskawa jiɍi nguson ɍijana.
Kǝskawadǝ kuroro ngǝla ye,
kǝmboro kǝji ye.
Dawu jǝrwudǝyen kǝska ro fandoye mbeji,
koro kǝska hangal awo ngǝla-a diwi-a noduye ye mbeji.
10 Bǝrǝm Yidenne jǝrwudǝa catti.
15 Kǝmande jǝrwudǝa barejo ngissuworo,
kamdǝa ngoje curo jǝrwu Yidennedǝro kekko.
16 Tiro wada ce:
«Curo jǝrwudǝyen tada kǝska fi yayeye kǝmboro niro amarnjǝgǝkkǝna,
17 amma tada kǝska hangal awo ngǝla-a diwi-a noduyedǝa boro amarnjǝgǝkkǝni.
Bare ngǝrǝmmi!
Yim ngǝrǝmmadǝn fagat numi!»
18 Koro Kǝmandeye:
«Kam runju kǝndǝgadǝ ngǝla gǝni.
Banama tin kalkal yittandǝkki.»
19 Daji cidi ngoje lǝmanna samma-a ngudowa samma-a cǝdande,
kamdǝ tayiro cu cakkoro nanjuro kiwudo.
Cu filan yaye kamdǝ alau roa bowojiya,
adǝma cunju wo.
20 Adǝgaima lǝmanna fadoye-a karaaye-a ngudowa-a sammanjaro cu kekko.
Adǝ yaye kamdǝ banama tin kalkal cuwandǝnni.
21 Daji Kǝmande kamdǝa kǝnǝm kuruwuro kekko.
Kǝnǝm cǝdi duwon,
Kǝmande sillanju sisiye fal cuttuluwe nadǝa dalan jakkeno.
22 Silla adǝlan kamu cǝdande kamdǝro kikkudo.
23 Kamdǝye:
«Yauwa,
adǝma camunni wo!
Sillaa,
sillani.
Daa,
dani.
Sisi kwanjuyen tuttuluwunadǝro,
tia kamun bowoja!»
24 Adǝma nangaro kwa yanju-a bawanju-a kolje kamunjuro kǝrdiye kam fallo waljaidǝ.
25 Kamdǝ-a kamudǝ-a tiyinja de,
kattenjan nangu bawo.