Lawar alaktu duniaye
1
Badiduramnin Ala dunia-a same-a alakkeno.
2 Duniadǝ fasal bawo curo bowua,
sai ingi dadu bawoa duwu ye cǝlǝm fǝdǝk tia dirije kǝljǝna,
koro Ruhu Alaye toɍi ingidǝyen mareaji mbeji.
3 Daji Alaye:
«Nda nur yojo!»
Sadǝman nur yoyeno.
4 Ala nurdǝa kirunniya,
tabbat nurdǝ ngǝla.
Daji nurdǝ-a duwudǝ-a firyeno.
5 Nurdǝro Alaye kausu cǝne,
duwudǝro bune yeno.
Dunia lǝmje wayeno,
adǝ kawu burwoye.
6 Koro Alaye:
«Nda katte ingidǝyen naa farakko waljo,
ingidǝa faɍaijo!»
7 Adǝgaima Ala na farak cǝde katte ingi cidiyaye-a toɍiye-a yakkeno.
8 Na farakdǝro Alaye same yeno.
Dunia lǝmje wayeno,
adǝ kawu yindiye.
9 Koro Alaye:
«Nda ingi cidiyayedǝ na tiloro capta,
cidi ngamdu culuwo!»
Ngai wakkayeno.
10 Cidi ngamdudǝro Alaye lardu cǝne,
ingi na tilon captanadǝro bǝrǝm yeno.
Adǝa kirunniya,
tabbat ngǝla.
11 Koro Alaye:
«Nda cididǝ cakko awo kǝɍi kǝɍiso ɍija,
kajim kasunia so,
kǝska tadaa so jiɍi jiɍi ɍija!»
Ngai wakkayeno.
12 Cididǝ cakke awowa kǝɍiso keluwo,
kajimkajim kasunia-a kǝskakǝska tadaa-a jiɍi nguson keluwo.
Ala adǝa kirunniya,
tabbat ngǝla.
13 Dunia lǝmje wayeno,
adǝ kawu yakkuye.
14 Koro Alaye:
«Nda samen awowa nur cadi yoja,
yindikatte bune-a kausu-aye yakca,
15 koro alama jamanne-a saaye-a yimbe-a sanju cǝdiya,
noduaro walja,
samedǝn duniaro nur cado!»
Ngai wakkayeno.
16 Adǝgaima Ala wasturam kura kura yindi alakkeno.
Kuramadǝ kausu cunodi,
ganama ye bune cunodi.
Koro sillowuwaso yea alakkeno.
17-18 Duniaro nur cado,
bune-a kausu-a canodo,
yindikatte nur-a duwu-aye yakcaro,
Ala tayia samen gǝnayeno.
Koro Ala adǝa kirunniya,
tabbat ngǝla.
19 Dunia lǝmje wayeno,
adǝ kawu dewuye.
20 Koro Alaye:
«Nda alauwa roa ingidǝa cappo casǝmbǝɍo cawulǝkca,
koro ngudowa ye nda samelan fafarja!»
21 Adǝgai Ala alauwa mafǝndi bǝrǝmbe-a alau roaso kǝwu kǝwu ingidǝa casǝmbǝɍǝna samma-a ngudowaso jiɍi jiɍi-a alakkeno.
Ala adǝa kirunniya,
tabbat ngǝla.
22 Ala tayiro barga dǝpciye:
«Kasuniaro wallowo ngǝwunowo bǝrǝmdǝa yimbǝɍowo,
ngudowaso ye lardulan ngǝwuja!»
23 Dunia lǝmje wayeno,
adǝ kawu uwuye.
24 Koro Alaye:
«Nda cididǝ bayimba jiɍi nguson cuttuluwo,
lǝmanna fadoye-a karaaye-a kuran ganan jiɍi nguson cija!»
Ngai wakkayeno.
25 Ala lǝmanna fadoye-a karaaye-a kuran ganan alakkeno.
Adǝa kirunniya,
tabbat ngǝla.
26 Daji Alaye:
«Nda alama naptu kaandedǝ gairo kam tandiyo,
koro tia kolliyo buni-a ngudowa-a lǝmanna kuran ganan-a sammanjasoye mainjaro waljo!»
27 Ngaima Ala kamba alama naptu tiye gairo alakkeno.
Kongwa-a kamu-aro kam alakkeno.
28 Ala tayiro barga dǝpciye:
«Kaduwuaro wallowo ngǝwunowo,
dunia yimbǝɍowo!
Duniadǝa nodowo,
buniya bǝrǝmbe yen kal,
ngudowa samelan farjai yen kal,
alauwa cidilan lejai yen kal,
sammanjaye mairo wallowo!»
29 Koro Alaye:
«Kǝla lardu ngayen kǝska kuran ganan bi tadaa bi kasunia sammaa kǝmboro nayiro amarnjagakkǝna.
30 Koro ngudowa-a lǝmanna kuran ganan-a awo biya roa sinjai sammasoro awo kǝɍi kǝmboro amargǝkkǝna!»
Ngai wakkayeno.
31 Ala awowa alakcǝna ngaa kirunniya,
tabbat samma jauro ngǝla.
Dunia lǝmje wayeno,
adǝ kawu arakkuye.
32 Adǝgaima same-a dunia-a awowa curonjaye-a samma alakkada.
Kawu tulurre kidǝnniya,
kida cǝdi samma cot cerǝnadǝ,
Ala tuskeno.
Daji Ala kawu tulurredǝro taganasso barga dǝpciye yimnjuro kido,
dalilnjudǝ yimdǝman kidanju alaktuye samma cere tuskeno.