Lawar yestu kambe
3
Curo lǝmanna karaaye Kǝmande alakcǝna ngaman,
kadiro burwoa wo bawo.
Kadiye kamudǝro:
«Jire wa Ala nandiro jǝrwudǝn bare tada kǝska fi yayeye ngǝruwwi cǝnnadǝ?»
2 «Tada kǝskawa jǝrwuyedǝa andiro kǝmboro amarsaana,
3 amma tada kǝska fal dawu jǝrwuyedǝa Kǝmandeye yeno bare ngǝriyende bi leniyende,
ronde rayiyenaa.»
4 «Ngai gǝni,
fagat nuwwawo!
5 Aladǝma dam nojǝna:
Tada kǝskayedǝa ngǝruwwaro walyenoa,
simndo kade ti gairo walluwe ranguwe awo ngǝla-a diwi-a nonuwi.»
6 Kamudǝ tadawa kǝskayedǝa kirunniya,
kǝmboro ye kǝji,
kuroro ye ngǝla.
Koro ilmu fando yero luwapkadadǝ,
njakce gigǝro.
Kwanju nanjun dǝganadǝro ce,
ti ye gigǝro.
7 Sim tayi yindisoye kade tayi bowuro asujane kalu kura kǝska laaye ngojane cadude asǝrnja jakkera.
8 Kajiri sa kasam samsu fijidǝn,
kamdǝ-a kamudǝ-a Kǝmandea curo jǝrwuyen dadaji fangeranniya,
tiro curo kǝskawayen gǝraaadara.
9 Kǝmande kamdǝa bowoje:
«Nda ni?»
10 «Curo jǝrwuyedǝn mojinǝm fangekkǝniya,
wu asǝrni kaada nangadǝro rikke gǝraadakko.»
11 «Wundu niro asǝrnǝm kaada wulnjuwo?
Ra,
tada kǝskaye niro damnjǝgǝkkǝnadǝa lenǝme gigǝrǝm?»
12 «Kamu wuro kǝlsǝgǝmmadǝ,
tima wuro tada kǝskayedǝa se gigǝrǝkko.»
13 Daji Kǝmandeye kamudǝro:
«Attǝ awi dim?»
«Kadi diye wua jambase gigǝrǝkko.»
14 Kǝmandeye kadidǝro:
«Kǝla adǝa dimmayen,
curo lǝmanna fadoye-a karaaye-a ngasoyen nima baskuwada wo.
Nganjin gǝrdǝmi,
cidi ye bumi ngai duwon,
har kawunǝm daji.
15 Katte ni-a kamudǝ-ayero duwun yakkǝkki.
Koro katte kaduwu kaanǝm-a kaanju-ayero duwun yakkǝkki.
Kaduwunjudǝ kǝlanǝm guwacce falji,
ni ye gudugudunju callǝmi.»
16 Kamudǝ yero:
«Kǝndambilan kuttunǝm yirgakki,
jaunin duwon njuɍi yambǝmi.
Nankamunǝm na kwanǝmben dǝgai,
koro tima kuranǝm wo.»
17 Adam yero:
«Ni mana kamunǝmbe fanǝme tada kǝskaye niro damnjǝgǝkkǝna adǝa ngǝrǝmmadǝ,
kǝla niyen cidi baskuwada.
Har kawu dunia kollǝmisoro,
jauro ngǝnǝptǝme cidi kidanǝme duwon kǝmbo fandǝme bumi.
18 Cididǝ niro kaɍiyi so,
ngiwi so njuttuluwi,
koro awo kulolan ɍijǝnaso bumi.
19 Ngǝnǝptǝme tiyinǝm nga kǝmuwu ngojǝnni duwon,
bǝrima fandǝme bumbawo,
har kawu cidi nia tilaman njǝdandǝkkǝnadǝro wallǝmiro.
Awoa caman ni cidi,
koro cidinǝm cayero wallǝmi.»
20 Adam kamunjuro cu Auwa kekko,
dalilnjudǝ adamgǝna sammaye tima ya wo.
21 Kǝmande Adam-a Auwa-aro kajǝmu karawiye cǝdde tayia jakkeno.
22 Kǝmandeye:
«Kam andi gai awo ngǝla-a diwi-a nojǝnaro waljǝna.
Bare kǝska ro fandoyedǝ yero mukkonju sajiye njakce jǝgǝre har abadaro roa dǝganniro,
cidi tia tilaman ngokke tandǝkkǝnadǝa lejo barejo!»
23 Daji kamdǝa curo jǝrwu Yidennen kittuluwo.
24 Tia duyenniya,
kǝska ro fandoyedǝro naduwu tiro daptuwuro,
Ala malaiyawa martawaa laa-a kannu naptu kashagar gai kanji kanjiro kalaktiyi-a juwajiye fuwu jǝrwu Yidennen dayera.