Pɔɔlɩ lɩzʋʋ ɛ-tʋmɩyɛ tɔbʋʋ yɔ
10
1 Ma Pɔɔlɩ manawa se mɔn-tɔm ɛyaa yɔɔdʋʋ se mɛwɛɣ pɔ-cɔlɔ lɛ, mañaŋ pɛ-ɛza. Mɛnɖɛɣ poliŋ lɛ, mañazɩɣ-wɛ. Ma-maɣmaɣ mantɩŋɩɣnɩ Krɩstʋ leleŋ nɛ ɛ-camɩyɛ lakasɩ pɔ-yɔɔ nɛ mentendiɣ-mɩ se: 2 ɩtaala nɛ mañazɩ-mɩ alɩwaatʋ ndʋ mɔnkɔŋ mɩ-tɛ yɔ. Mbʋ pʋyɔɔ yɔ, mansɩm ɛzɩma mbʋ mɔnkɔŋ ñazʋʋ mba pamaɣzɩɣ se ma nɛ man-taabalaa ɖɩcakɩ wezuu ɛzɩ kedeŋa ñɩma yɔ.
3 Toovenim lɛ, ɖɩwɛ kedeŋa yɔɔ, ɛlɛ, ɖɩɩlakɩ you ŋgʋ kedeŋa ñɩma lakɩ yɔ. 4 Mbʋ pʋyɔɔ yɔ, pɩtɛkɛ hɔzɩŋ weyi kedeŋa ñɩma lakɩnɩ you yɔ ɖɩlakɩna. Ɛlɛ, weyi ɩlɩnɩ Ɛsɔ cɔlɔ yɔ ɖɩlakɩna. Ɩwɛ ɖoŋ, ɩpɩzɩɣ ɛyɔkɩ Ɛsɔ koyindinaa ɖɩmɛlɩyɛ. Ɩnʋ ɖiɖiziɣni cɛtɩm tɔm. 5 Ɩnʋ ɖɔɖɔ ɖɩyɔkʋʋnɩ mbʋ tɩ kpazɩyaa ɖɩkɩnɩ ɛyaa nʋmɔʋ se pataatɩlɩ Ɛsɔ yɔ. Ɖɩpaɣ ɛyaa se pɛlɛɣzɩ pa-lɩmaɣza nɛ paña Krɩstʋ. 6 Ɖɩɖaŋ kpam se ye ɩtɛzɩ ñam nɛ pɩsɛɣ mɩ-taa nabɛyɛ yɔ, ɖɩhɔ pa-nɩŋgbaaŋ.
7 Ɩnaɣ wondu ɛza yɔɔ yem. Ye nɔɔyʋ ɛna ɛ-maɣmaɣ se ɛkɛ Krɩstʋ tʋ lɛ, pɩlabɩ ɛzɩma ɛɛnaɣ se: ɖa ɖɔɖɔ ɖɩkɛ Krɩstʋ ñɩma ɛzɩ ɛnʋ yɔ? 8 Paa maakɩlɩ kʋndɩnaʋ ɖoŋ weyi Kɩpaɣlʋ ha-ɖʋ yɔ yɔ, fɛyɛ ɛɛkpaɣ-m. Mbʋ pʋyɔɔ yɔ, ɛha-ɖʋ-ɩ se ɖɩsɩnɩ-mɩ nɛ ɩpɩɩ Ɛsɔ nʋmɔʋ taa. Ɛlɛ, ɛtaha-ɖʋ-ɩ se ɖɩɖʋzɩnɩ-mɩ. 9 Maacaɣ se ɩmaɣzɩ se mamaɣ-mɩ takayɩsɩ se sɔɔndʋ ɛkpa-mɩ. 10 Nabɛyɛ yɔɔdʋʋ se: “Takayɩsɩ nzɩ Pɔɔlɩ maɣ yɔ sɩwɛ kaɖɛ, sɩ-tɔm wɛ ɖoŋ. Ŋgʋ ɖa nɛ ɩ ɖɩwɛɣ lɛ, ɛwɛ ɛjandʋ, tɔm ndʋ ɛyɔɔdʋʋ yɔ tɩɩwazɩɣ pʋyʋ.” 11 Pʋwɛɛ se weyi ɛyɔɔdʋʋ mbʋ yɔ, ɛtɩlɩ camɩyɛ se: tɔm ndʋ ɖɩmaɣ-mɩ alɩwaatʋ ndʋ ɖɩfɛyɩ mɩ-cɔlɔ yɔ, tɩfɛyɩ ndɩ nɛ mbʋ ɖɩlakɩ alɩwaatʋ ndʋ ɖɩwɛɣ mɩ-cɔlɔ yɔ.
12 Ɖɩɩcazɩɣ ɖa-tɩ kpaɣʋ se ɖɩkɛdɩna yaa ɖɩmaɣzɩnɩ mba pawɩlɩɣ pa-tɩ yem yɔ. Pa-ñʋŋ taa fɛyɩ yɔɔ pɛkɛdɩɣnɩ pa-tɩ yaa pamaɣzɩɣnɩ pa-tɩ nɛ pa-maɣmaɣ. 13 Ɖa lɛ, tʋmɩyɛ nɖɩ Ɛsɔ cɛlɩ-ɖʋ yɔ, ɖi-ɖeke ɖɩkʋndʋʋna. Ɖɩɩkʋndʋʋnɩ nabʋyʋ ɖɔɖɔ. Ɛsɔ ɖʋzɩ ɖe-nesi taa tʋmɩyɛ nɖɩ yɔ, nɖɩ lɛ se halɩ ɖɩkɔɔ ɖooo mɩ-tɛ. 14 Pʋ-yɔɔ lɛ, ɖɩkɔnaʋ Krɩstʋ Laŋhɛzɩyɛ Tɔm mɩ-tɛ yɔ, ɖɩtɛɖɛɛ kamaɣ ŋga Ɛsɔ ɖʋ-ɖʋ yɔ kɔ-yɔɔ. Mbʋ pʋyɔɔ yɔ, ɖɛkɛnɩ kajalaɣ ñɩma mba pɔkɔnɩ-mɩ-tʋ yɔ. 15 Ɖɩɩkʋndʋʋnɩ lɛlaa tʋma. Ɛlɛ, ɖɩtaɣ liu se ɩtɛzɩɣ lidaʋ wɛnaʋ Krɩstʋ yɔɔ. Peeye ɖɩpɩzɩɣ ɖɩla tʋmɩyɛ mɩ-hɛkʋ taa nɛ pɩɖɛnɩ ɛsɩndaa. Ɛlɛ, ɖɩɩlakɩ nɛ pɩɖɛɛ mbʋ Ɛsɔ ɖʋ-ɖʋ yɔ pʋ-yɔɔ. 16 Pʋwayɩ lɛ, ɖɩpɩzɩɣ ɖiwolo ɖisusi Laŋhɛzɩyɛ Tɔm ajɛɛ wɛna akɩlɩ poliŋ mɩ-ñɩnɖɛ yɔ a-taa. Pɩfɛyɩ se ɖɩkʋndɩnɩ mbʋ lɛlaa tɛm labʋ yɔ.