Pasɩŋʋʋnɩ Krɩstʋ ñɩma yɔ
9
1 Pɩfɛyɩ se mancazɩ-mɩ maʋ nɛ meheyi-mɩ liidiye nɖɩ ɖitiyiɣnɩ Ɛsɔ ñɩma yɔ ɖɩ-tɔm. 2 Mbʋ pʋyɔɔ yɔ, manawa se mɩ-maɣmaɣ mi-liu wɛɛ se ɩsɩŋnɩ-wɛ. Pʋ-yɔɔ mansam-mɩ Masedonii ñɩma cɔlɔ nɛ meheyi-wɛ se: “Akayɩ egeetiye taa Yesu ɛgbɛyɛ taa ñɩma ñɔɔzɩ pa-tɩ ɖooo pinde se pahaɣ. Mɩ-pana ñaɣʋ labɩnɩ pa-taa ɛyaa sakɩyɛ hʋnʋm se paha.” 3 Paa mbʋ, mentiyi Tiiti nɛ taabalaa mba mɩ-tɛ se samtʋ ndʋ ɖɩsam-mɩ haɖɛ nɖɩ ɖɩ-yɔɔ yɔ, tɩtaakɔɔ tɩsayɩ yem. Me-liu wɛɛ se ɩñɔɔzɩ mɩ-tɩ nɛ ɩɖaŋ kpam ɛzɩ meheyuu-mɩ yɔ. 4 Pɩtɛkɛ mbʋ yɔ, ye ma nɛ Masedonii ñɩma ɖɩkɔm ɖɩmaɣnɩ-mɩ nɛ ɩtɔñɔɔzɩdɩ haɖɛ nɖɩ yɔ, fɛyɛ kpaɣ-ɖʋ liu ŋgʋ ɖɩɩta-mɩ yɔ kʋ-yɔɔ. Pɩkpaɣ-mɩ ɖɔɖɔ. 5 Pʋ-yɔɔ mamaɣzaa nɛ mentendi Tiiti nɛ ɛ-taabalaa mba se pañaɣ pana pɛɖɛ-m nɔɔ nɛ pɔkɔɔ mɩ-tɛ nɛ pɔñɔɔzɩ haɖɛ nɖɩ ɩɩɖʋwa se ɩhaɣnɩ mɩ-laŋɩyɛ tɩŋa yɔ. Maatalɩɣ lɛ, pɔñɔɔzɩ pɩtɩŋa pasɩɩ. Mbʋ wɩlɩɣna se ɩhanɩ sɔɔlɩm, pɩtɛkɛnɩ kɩcɛyʋʋ.
6 Ɩtaasɔɔ se weyi eɖuu pazɩ yɔ, ɛkʋŋ pazɩ nɛ weyi ɛlɛ ɖuu sakɩyɛ yɔ, ɛkʋ sakɩyɛ. 7 Pʋwɛɛ se paa weyi ɛha ɛzɩ ɛɖʋʋ ɛ-taa yɔ. Ɛtaahanɩ laŋpɩsɩyɛ yaa kɩcɛyʋʋ. Mbʋ pʋyɔɔ yɔ, Ɛsɔ sɔɔlɩ weyi ɛhaɣnɩ laŋhʋlʋmɩyɛ yɔ. 8 Ɛsɔ pɩzɩɣ ɛha-mɩ pɩtɩŋa payɩ nɛ pɩkɩlɩ. Peeye ɩwɛɣnɩ mbʋ pɩtɩŋa payɩ pʋpɔzʋʋ-mɩ yɔ alɩwaatʋ tɩŋa nɛ ɩlabɩnɩ tʋma kɩbana sakɩyɛ. 9 Mbʋ pama Ɛsɔtɔm Takayaɣ taa se:
“Ɛsɔ labɩ kʋñɔndɩnaa kʋjɔŋ nɛ ɛ-laŋɩyɛ tɩŋa.
Ɛ-camɩyɛ lakasɩ wɛ tam yɔɔ.”
10 Ɛsɔ cɛlɩɣnɩ haɖʋ ɖomaɣ se eɖuu nɛ ɛhaɣ-ɩ tɔɔnaɣ se ɛtɔɔ. Ɛnʋ kɔŋnɩ-mɩ cɛlʋʋ ɖɔɖɔ mbʋ pɩtɩŋa payɩ pʋpɔzʋʋ-mɩ yɔ. Eyeki nɛ puhuu nɛ mɩ-camɩyɛ lakasɩ tɛzɩ ɖɔʋ. 11 Eyeki nɛ ɩwɛnɩ ñɩm sakɩyɛ tam yɔɔ nɛ ɩpɩzɩ ɩwɛɛ kʋjɔŋ labʋ yɔɔ nɛ mɩ-laŋa tɩŋa. Peeye ɛyaa sakɩyɛ saŋ Ɛsɔ kʋjɔŋ weyi ɩlakɩ-wɛ nɛ ɖɩcɛlɩɣ-wɛ yɔ ɩ-yɔɔ. 12 Mbʋ pʋyɔɔ yɔ, kʋjɔʋ ŋgʋ, pɩtɛkɛ Ɛsɔ ñɩma ɖeke kɩwazɩɣ. Ɛlɛ, kiyeki nɛ ɛyaa sakɩyɛ sɛɛ Ɛsɔ nɛ pasam-ɩ kʋ-yɔɔ ɖɔɖɔ. 13 Sɩnaʋ mbʋ ɩsɩŋnɩ-wɛ yɔ, pɩwɩlɩɣ mbʋ ɩkɛnaa yɔ. Peeye ɛyaa sakɩyɛ saŋ Ɛsɔ ɛzɩma mbʋ ɩɖɔŋ Krɩstʋ Laŋhɛzɩyɛ Tɔm yɔɔ yɔ pʋ-yɔɔ. Pasaŋ-ɩ ɖɔɖɔ ɛzɩma mbʋ mɩ nɛ wɛ nɛ lɛlaa tɩŋa payɩ ɩtayɩɣ mɩ-ñɩm nɛ laŋhʋlʋmɩyɛ yɔ pʋ-yɔɔ. 14 Pɔsɔɔlʋʋ-mɩ siŋŋ nɛ pɛsɛɣ Ɛsɔ mɩ-yɔɔ lootiye sɔsɔɖɛ nɖɩ ɛlabɩ-mɩ nɛ ɖɩfɛyɩ kaɣmaɣ yɔ ɖɩ-yɔɔ. 15 Ɖɩsa Ɛsɔ ɛ-kʋjɔʋ ŋgʋ kɩkɩlɩ pɩtɩŋa payɩ yɔ kʋ-yɔɔ!