*Nɔɔ haʋ kɩfam tʋmlaɖaa tɔm
3
1 Ɖɩyɔɔdʋʋ mbʋ yɔ, pɩwɩlɩɣ se ɖɩɖaɣnɩɣ ɖa-tɩ wɩlʋʋ naa we? Yaa pʋpɔzʋʋ se pama takayɩsɩ ɛzɩ lɛlaa lakʋʋ yɔ nɛ pawɩlɩnɩ-mɩ mbʋ ɖɩkɛwa yɔ? Ɖɩɩpɔzʋʋ-mɩ ɖɔɖɔ se ɩma takayaɣ nakɛyɛ nɛ ɩwɩlɩnɩ-ɖʋ lɛlaa. 2 Mɩ-maɣmaɣ ɩwɛ ɛzɩ takayaɣ ŋga Krɩstʋ mawa yɔ. Ŋga wɩlɩɣnɩ ɛyaa mbʋ ɖɩkɛnaa yɔ. Kɛwɛ ɖɔ-hɔ taa. Ɛyaa tɩŋa payɩ pɩzɩɣ pasɩm-kɛ nɛ pakalɩ-kɛ. 3 Mɩwɛnɩ ɛzɩ takayaɣ ŋga yɔ. Mbʋ pʋyɔɔ yɔ, ɖɔ-yɔɔ Krɩstʋ tɩŋnaa nɛ ɛma-kɛ. Pɩtɛkɛ tɔlɩm ɛmanɩ-kɛ, ɛlɛ, Ɛsɔ wezuu tʋ Kalɩzaɣ ɛmanɩ-kɛ. Pɩtɛkɛ pɩtaahɛlɛnzɩ yɔɔ ɛma-kɛ, ɛlɛ, ɛyaa laŋa taa ɛmawa.
4 Ɖɩyɔɔdʋʋ mbʋ, mbʋ pʋyɔɔ yɔ, Krɩstʋ yɔɔ pɩtɩŋnaa nɛ ɖɩtaa Ɛsɔ liu. 5 Mbʋ pʋyɔɔ yɔ, ɖɩnawa se ɖɩɩpɩzɩɣ ɖɩla tʋmɩyɛ nɖɩ nɛ ɖa-maɣmaɣ ɖo-ɖoŋ. Ɛlɛ, Ɛsɔ yebina se ɖɩpɩzɩ ɖɩlabɩ-ɖɩ. 6 Eyeba ɖɔɖɔ se ɖɩkɛ *nɔɔ haʋ kɩfam tʋmlaɖaa. Nɔɔ haʋ kɩfam mbʋ pɩtɛkɛ paɣtʋ ndʋ paamawa yɔ. Ɛlɛ, pɩkɛ mbʋ pɩlɩnɩ Ɛsɔ Kalɩzaɣ cɔlɔ yɔ. Mbʋ pʋyɔɔ yɔ, paɣtʋ yeki nɛ ɛyaa sɩkɩ. Ɛlɛ, Ɛsɔ Kalɩzaɣ ñahaɣ wezuu.
7 Ɖooo lɔŋ Ɛsɔ kama paɣtʋ piye piye pɩtaahɛlɛnzɩ yɔɔ nɛ e-koboyaɣ ñɩlɩzɩ. Mbʋ pʋyɔɔ yɔ, eeyeba nɛ *Mooyiizi ɛsɩndaa ñɩlɩzɩ siŋŋ nɛ Izrɛɛlɩ ñɩma tapɩzɩɣ se pɔcɔnɩ-ɩ. Ŋgʋ, koboyaɣ ŋga kɛtɛwɛɣ tam yɔɔ. Ye paɣtʋ ndʋ tiyeki nɛ ɛyaa sɩkɩ yɔ, tɩwɩlɩ-wɛ ɛzɩma mbʋ Ɛsɔ koboyaɣ paɣlaa yɔ lɛ, 8 ɛzɩma Ɛsɔ Kalɩzaɣ tʋmɩyɛ ñaawɩlɩɣ koboyaɣ ŋga ka-paɣlɩka kpem nɛ pɩkɩlɩ mbʋ yɔ? 9 Ye paɣtʋ ndʋ tiyeki se Ɛsɔ ɛhʋnɩ ɛyaa nɛ ɛkʋ pɔ-tɔm yɔ, tɩwɩlɩ-ɖʋ ɛzɩma mbʋ e-koboyaɣ paɣlaa yɔ lɛ, ɛzɩma *nɔɔ haʋ kɩfam mbʋ piyeki se Ɛsɔ eɖezi-ɖʋ yɔ, pɩɩwɩlɩɣ e-koboyaɣ paɣlɩka kpem nɛ pɩkɩlɩ mbʋ? 10 Halɩ ɖɩpɩzɩɣ ɖɩtɔ se koboyaɣ ŋga kaañɩlɩzaa yɔ, kaatasɩɣ ñɩlɩzʋʋ ŋga kañɩlɩzɩɣ lɛɛlɛɛyɔ yɔ kɔ-cɔlɔ. 11 Toovenim lɛ, ye mbʋ pɩɩwɛɣ tam yɔ, pɩwɩlɩ ɛzɩma mbʋ Ɛsɔ koboyaɣ paɣlaa yɔ lɛ, ɛzɩma mbʋ pʋbʋ ñɛwɛɣ tam yɔ, pɩɩwɩlɩɣ-kɛ kpem nɛ pɩkɩlɩ mbʋ?
12 Ɖɩyɔɔdʋʋ kaalɛyɩtʋ, mbʋ pʋyɔɔ yɔ, ɖɩtaɣ liu mbʋ pʋwɛɣ tam yɔ. 13 Ɖɩɩlakɩ ɛzɩ *Mooyiizi kohuuzuu ɛ-ɛsɩndaa kɛtɛɛka yɔ. Ehuuzaɣ-kɛ se Izrɛɛlɩ ñɩma ɩtaana ɛzɩma mbʋ ɛ-ɛsɩndaa ñɩlɩzʋʋ mʋkɩ yɔ. 14 Pa-ñʋŋ taa kakpa ɖoŋ nɛ halɩ nɛ sɔnɔ ye pakalɩɣ *Nɔɔ Haʋ Kɩbɩm Takayaɣ yɔ, paanɩɣ kɔ-tɔbʋʋ. Pʋwɛ ɛzɩ kɛtɛɛka ŋga kohuuzi pɛ-ɛsɩndaa tam yɔ. Weyi nɛ Krɩstʋ pɛkpɛndaa yɔ, e-ɖeke koŋ ɛ-ɛsɩndaa kɛtɛɛka ŋga kamʋkɩ. 15 Halɩ nɛ sɔnɔ, ye pakalɩɣ Mooyiizi takayɩsɩ yɔ, pʋwɛ ɛzɩ kɛtɛɛka ŋga kohuuzi pa-lɩmaɣza yɔɔ mbʋ yɔ. 16 Ɛlɛ, pʋwɛ ɛzɩ pamaʋ Ɛsɔtɔm Takayaɣ taa se: “Alɩwaatʋ ndʋ nɔɔyʋ yeki ɛ-nʋmɔʋ nɛ ɛpɩsɩnɩ Kɩpaɣlʋ yɔɔ yɔ, kɛtɛɛka ŋga, kamʋkɩ ɛ-ɛsɩndaa” yɔ. 17 Ŋgʋ, Kɩpaɣlʋ ɛnʋ lɛ Ɛsɔ Kalɩzaɣ. Nɛ ɖenɖe Kɩpaɣlʋ Kalɩzaɣ wɛɛ yɔ, peeye ñɩma wɛ pa-tɩ yɔɔ. 18 Pʋ-yɔɔ lɛ, mba ɖa ɖatɩŋa payɩ pokuli ɖɛ-ɛza yɔɔ kɛtɛɛka ŋga yɔ, ɖɩnaɣ Kɩpaɣlʋ koboyaɣ tam nɛ ɖɩtɛzɩɣ wɛʋ ɛzɩ ɛnʋ yɔ. Mbʋ yebina nɛ pɩtɩŋɩɣnɩ ɛ-Kalɩzaɣ yɔɔ nɛ e-koboyaɣ tɛzɩɣ ɖɔʋ ɖɔ-cɔlɔ.