2
1 Pʋ-yɔɔ manɖʋwa se maakɔŋ mɩ-tɛ nɛ mantasɩ mɩ-hɔ pɩsʋʋ. 2 Ye mɔnkɔm mɩ-tɛ nɛ mɩ-hɔ pɩsɩ lɛ, apɩzɩɣ eyele nɛ ma-laŋɩyɛ hʋlʋmɩ yɔ? Pɩɩkɛɣnɩ mɩ! Mbʋ pʋyɔɔ yɔ, mɩtɩŋa payɩ mɩ-hɔ pɩsaa. 3 Pʋ-yɔɔ mama-mɩ takayaɣ lɛɛka ŋga se mantalaa lɛ, mɔ-hɔyɛ ɛtaapɩsɩnɩ mba pɩɩwɛɛ se peyele ma-laŋɩyɛ hʋlʋmɩ yɔ. Ŋgʋ, manawa se mɩtɩŋa payɩ mɩ-laŋa hʋlʋmʋʋ alɩwaatʋ ndʋ ma-ñɩnɖɛ hʋlʋmʋʋ yɔ. 4 Mama-mɩ takayaɣ ŋga nɛ ɛsɛñɩŋɩyɛ siŋŋ nɛ laŋpɩsɩyɛ nɛ ɛzɩtɛɣlɩm. Mantama-mɩ se mɩ-hɔ ɛpɩsɩ. Ɛlɛ, mancaɣaɣ se ɩtɩlɩ ɛzɩma mbʋ mɔnsɔɔlɩ-mɩ siŋŋ yɔ.
Pʋwɛʋ se pekpeɣ weyi ɛyʋsaa yɔ
5 Toovenim lɛ, ye nɔɔyʋ eyeba nɛ ɛyaa hɔ pɩsɩ yɔ, pɩtɛkɛ ma-maɣmaɣ mɔ-hɔyɛ ɛpɩsaa. Ɛlɛ, mɩtɩŋa payɩ mɩ-hɔ ɛpɩsaa. Yaa pʋcɔ mantaaɖɛlɛsɩ niye lɛ, mɩ-taa nabɛyɛ hɔ ɛpɩsaa. 6 Ɛzɩma mbʋ mɩ-taa ɛyaa sakɩyɛ tɛm hɔm pʋdʋ nɩŋgbaŋʋʋ yɔ, pʋɖɔwa. 7 Lɛɛlɛɛyɔ, pʋwɛɛ se ɩtɛzɩ-ɩ kpeɣu nɛ ɩhɛzɩ ɛ-laŋɩyɛ. Pɩtɛkɛ mbʋ, pʋkɔŋ pɩkɩlɩ ɛ-hɔyɛ pɩsʋʋ nɛ ɛlɔ liu. 8 Pʋ-yɔɔ lɛ, mentendiɣ-mɩ se ɩla mbʋ pɩwɩlɩɣ se ɩsɔɔlɩ-ɩ yɔ. 9 Mbʋ piiyeba nɛ mama-mɩ takayaɣ ŋga yɔ lɛ se: me-liu wɛɛ se mantakɩ-mɩ nɛ mana se ndʋ meheyiɣ-mɩ yɔ, ɩlakɩ tɩtɩŋa tɩ-yɔɔ yaa ɩɩlakɩ. 10 Ye nɔɔyʋ ɛyʋsaa nɛ ikpeɣ-i yɔ, ma ɖɔɖɔ menkpeɣiɣ-i. Ma lɛ, ye pɩɩwɛɛ se menkpeɣ nɔɔyʋ yɔ, mɛntɛm-ɩ kpeɣu mɩ-yɔɔ ɛzɩ pʋmʋnaʋ se mala Krɩstʋ ɛsɩndaa yɔ. 11 Malabɩ mbʋ se *Kañadʋ Satanɩ ɛtaawɛnɩ waɖɛ ɖɔ-yɔɔ. Mbʋ pʋyɔɔ yɔ, ɖɩtɛm sɩm mbʋ ɛcaɣ labʋ yɔ.
Mbʋ pɩlaba nɛ Pɔɔlɩ taa fɛyɩ leleŋ Trowaasɩ yɔ
12 Alɩwaatʋ ndʋ mantalɩ Trowaasɩ se monsusuu Krɩstʋ Laŋhɛzɩyɛ Tɔm yɔ, Kɩpaɣlʋ kaha-m nʋmɔʋ. 13 Ɛlɛ, man-taa taawɛɛ leleŋ, mbʋ pʋyɔɔ yɔ, mantaana taabalʋ Tiiti. Peeye mankʋyɩ Trowaasɩ ñɩma mba pɔ-cɔlɔ nɛ mowolo Masedonii egeetiye taa.
Pɩtɩŋnaʋ Krɩstʋ yɔɔ nɛ ɖɩwakɩ yɔ
14 Pʋwɛɛ se ɖɩsa Ɛsɔ se eyeba pɩtɩŋna ɖa nɛ Krɩstʋ ɖɛ-kpɛndʋʋ yɔɔ nɛ ɖɩwakɩ tam. Mbʋ pʋyɔɔ yɔ, eyeki se pɩtɩŋnɩ ɖɔ-yɔɔ nɛ ɛyaa sɩm-ɩ paa le ɛzɩ tɩlaaɖɩ sɔzɩŋ ñɛyʋʋ yɔ. 15 Toovenim lɛ, ɖɩwɛ ɛzɩ tɩlaaɖɩ kɩbaŋgʋ ŋgʋ Krɩstʋ ha Ɛsɔ yɔ. Kʋ-sɔzɩŋ ñɛyɩɣ mba Ɛsɔ yakɩ pa-ñʋʋ yɔ nɛ mba peleki yɔ pɛ-hɛkʋ taa. 16 Mba peleki yɔ, sɔzɩŋ ɛnʋ ɛkɛnɩ-wɛ sɔŋ weyi ɛkʋʋ ɛyaa yɔ. Mba Ɛsɔ yakɩ pa-ñʋʋ yɔ, ɛkɛnɩ paba sɔzɩŋ weyi ɛhaɣ ɛyaa wezuu yɔ. Pʋ-yɔɔ lɛ, apɩzɩɣ se ɛla tʋmɩyɛ nɖɩ? 17 Ɖɩfɛyɩ ɛzɩ ɛyaa sakɩyɛ mba pakpakɩɣ Ɛsɔtɔm nɛ palakɩnɩ tadɩyɛ yɔ. Ɛlɛ, ɖa lɛ mba Ɛsɔ tiyaa nɛ ɖɩyɔɔdʋʋ toovenim ɛ-ɛsɩndaa ɖa nɛ Krɩstʋ ɖɛ-kpɛndʋʋ taa yɔ.