Paɣtʋ fɛyɩnɩ ɖoŋ weyi ɛsɩba yɔ ɛ-yɔɔ
7
1 Taabalaa, ɩtɛm sɩm tɔm ndʋ meheyiɣ-mɩ yɔ, mbʋ pʋyɔɔ yɔ, ɩsɩm paɣtʋ: ɩsɩm mbʋ se alɩwaatʋ ndʋ ɛyʋ wɛɣ wezuu yɔ pʋwɛɛ se ɛɖɔ tɩ-yɔɔ. 2 Ɩcɔnɩ ɩna, halʋ weyi ɛwalaa yɔ, paɣtʋ yekina se ɛ nɛ ɛ-walʋ pataayasɩ ɖama alɩwaatʋ ndʋ ɛlɛ wɛnɩ ɛ-ɛza yɔ. Ɛlɛ, ye walʋ ɛnʋ ɛsɩba yɔ, puholi halʋ ɛnʋ nɛ paɣtʋ ndʋ tɩɩwɛ ɛ nɛ ɛ-walʋ pɛ-hɛkʋ taa yɔ tɩ-taa. 3 Ɛlɛ, ye ɛ-walʋ ɛwɛnɩ ɛ-ɛza nɛ ɛkʋyɩ ɛ-yɔɔ nɛ ɛɖɛɛ ɛwalɩ nɔɔyʋ yɔ, payaɣ-ɩ se hayiɣa. Ɛlɛ, ye ɛ-walʋ ɛsɩba yɔ, puholi-i nɛ paɣtʋ ndʋ ti-nesi taa. Ɛpɩzɩɣ ɛwalɩ abalʋ lɛlʋ, paatɔŋ se ɛkɛ hayiɣa. 4 Man-taabalaa, mbʋ ɖɔɖɔ pʋwɛnɩ-mɩ. Paɣtʋ tatasɩ wɛnaʋ ɖoŋ mɩ-yɔɔ, mbʋ pʋyɔɔ yɔ, ɩwɛ ɛzɩ sɩɖaa yɔ. Mbʋ pʋyɔɔ yɔ, mɩ nɛ Krɩstʋ weyi ɛsɩba yɔ, ɩkpɛndaa nɛ ɩwɛɛ e-nesi taa. Ɛnʋ lɛ weyi ɛsɩba nɛ Ɛsɔ fezi-i yɔ. Ɖa nɛ ɩ ɖɩkpɛndaa se ɖa-tʋmɩyɛ ɛwɛɛ Ɛsɔ wazaɣ. 5 Toovenim lɛ, alɩwaatʋ ndʋ ɖɩlakaɣ ɛzɩ ɖe-liu wɛʋ yɔ, paɣtʋ yɔɔ pɩtɛzaɣ-ɖʋ labʋ liu se ɖɩla kɩwɛɛkɩm. Ŋgʋ, pɩtɛŋnɩ-ɖʋ sɩm. 6 Ɖooo lɛ, ɖɩɩwɛ ɛzɩ yomaa yɔ paɣtʋ nesi taa. Ɛlɛ, lɛɛlɛɛyɔ ɖɩwɛ ɛzɩ sɩɖaa yɔ nɛ tɩtatasɩ ɖoŋ wɛnaʋ ɖɔ-yɔɔ. Ɛsɔ lɩzɩ-ɖʋ ti-nesi taa. Pʋ-yɔɔ ɖɩlɛɣzɩ ɛzɩma mbʋ ɖɩlakaɣ Ɛsɔ tʋmɩyɛ yɔ ɛzɩ Ɛsɔ Kalɩzaɣ wɩlʋʋ-ɖʋ yɔ. Ɖɩɩtasɩɣ-ɖɩ labʋ ɛzɩ paɖʋʋ paɣtʋ taa yɔ.
Paɣtʋ wɩlʋʋ-ɖʋ mbʋ pɩkɛ kɩwɛɛkɩm yɔ
7 Se we ɖɩɩyɔɔdɩ yɔ? *Mooyiizi paɣtʋ kɛ kɩwɛɛkɩm naa we? Pɩtɛkɛ mbʋ kpem! Ɛlɛ, tɩ-yɔɔ pɩtɩŋnaa nɛ mantɩlɩ mbʋ pɩkɛ kɩwɛɛkɩm yɔ. Mbʋ pʋyɔɔ yɔ, ye pataaɖʋ tɩ-taa se: “Taaɖʋ ɛzɩyɛ lɛlʋ ñɩm yɔɔ” yɔ, mantaatɩlɩ mbʋ ɛzɩyɛ ɖʋʋ kɛnaa yɔ. 8 Peeye kɩwɛɛkɩm tɩŋnɩ waɖɛ nɖɩ ɖɩwɛ mbʋ paɖʋ paɣtʋ taa yɔ pɩ-taa nabʋyʋ yɔɔ nɛ pɩkpa ɖoŋ man-taa nɛ piyele manɖʋʋ ɛza wondu ndɩ ndɩ yɔɔ. Mbʋ pʋyɔɔ yɔ, paɣtʋ ɛfɛyɩ yɔ, kɩwɛɛkɩm fɛyɩnɩ ɖoŋ. 9 Ɖooo mantaatɩlɩ paɣtʋ lɛ, maawɛ wezuu. Ɛlɛ, mansɩm-tʋ lɛ, kɩwɛɛkɩm kpa ɖoŋ man-taa 10 nɛ mantɩpɩsɩ ɛzɩ sɩɖʋ yɔ: paɣtʋ ndʋ pɩɩwɛɛ se tɩha-m wezuu yɔ, tiwoni-m sɩm taa. 11 Mbʋ pʋyɔɔ yɔ, waɖɛ nɖɩ ɖɩ-yɔɔ pɩtɩŋnaa nɛ kɩwɛɛkɩm tɩŋnɩ mbʋ paɖʋ paɣtʋ taa yɔ pʋ-yɔɔ nɛ pɩcɛtɩ-m nɛ pʋkʋ-m.
12 Pʋ-yɔɔ lɛ, Ɛsɔ ɖʋnɩ paɣtʋ, ɛnʋ ɖʋnɩ ɖɔɖɔ mbʋ pʋwɛ tɩ-taa yɔ. Mbʋ wɩlɩɣnɩ-ɖʋ mbʋ pʋtʋʋzaa yɔ, pʋwɛ ɖeu. 13 Mbʋ pʋwɛ ɖeu yɔ, pɩpɩsɩnɩ mbʋ pʋkʋʋ ma yɔ yaa we? Pɩtɛkɛ mbʋ kpem! Kɩwɛɛkɩm kɔnɩnɩ-pʋ. Mbʋ kɩwɛɛkɩm wɩlɩ pɩ-maɣmaɣ pɩ-tɩ keɣlee: pɩtɩŋnɩ mbʋ pʋwɛ ɖeu yɔ pʋ-yɔɔ nɛ pʋkʋ-m. Mbʋ pɩtɩŋnɩ mbʋ paɖʋ paɣtʋ taa yɔ pʋ-yɔɔ nɛ kɩwɛɛkɩm tɛzɩ pɩ-tɩ wɩlʋʋ kpaagbaa keɣlee se pɩfɛyɩ ɖeu kpem.
Weyi ɛwɛ kɩwɛɛkɩm nesi taa yɔ
14 Ɖɩna toovenim se Ɛsɔ Kalɩzaɣ ɖʋnɩ paɣtʋ. Ɛlɛ, ma mɛnkɛ ɛjam weyi kɩwɛɛkɩm yabɩ-ɩ nɛ ɛwɛɛ pi-nesi taa ɛzɩ yom yɔ. 15 Mbʋ pʋyɔɔ yɔ, maanɩɣ man-tɩ tɔm. Maalakɩ mbʋ me-liu wɛɛ yɔ. Ɛlɛ, mbʋ maacaɣ kpem yɔ malakɩ. 16 Ye malakɩ mbʋ maacaɣ yɔ yɔ, mentisaa se paɣtʋ wɛ ɖeu. 17 Ye mbʋ, pɩtɛkɛ malakɩnɩ mbʋ. Ɛlɛ, kɩwɛɛkɩm mbʋ pʋwɛ man-taa yɔ pɩlakɩna. 18 Mbʋ pʋyɔɔ yɔ, manawa se mbʋ pʋwɛ ɖeu yɔ, pɩfɛyɩ man-taa: pʋ-tɔbʋʋ se wɛtʋ ndʋ tɩ-taa mɛwɛɛ yɔ. Toovenim lɛ, me-liu wɛɛ se mala mbʋ pʋwɛ ɖeu yɔ. Ɛlɛ, maapɩzɩɣ. 19 Maalakɩ ɖeu mbʋ me-liu wɛɛ yɔ, ɛlɛ, malakɩ ɛzaɣtʋ ndʋ maacaɣ yɔ. 20 Ye malakɩ mbʋ maacaɣ yɔ yɔ, pɩwɩlɩɣ se pɩtɛkɛ malakɩnɩ-pʋ. Ɛlɛ, kɩwɛɛkɩm mbʋ pʋwɛ man-taa yɔ pɩlakɩna. 21 Pʋ-yɔɔ mana man-taa se: alɩwaatʋ ndʋ tɩtɩŋa mancaɣ se mala ɖeu yɔ, ɛzaɣtʋ ɖeke manpɩzɩɣ labʋ. 22 Ma-maɣmaɣ man-taa hʋlʋmɩnɩ Ɛsɔ paɣtʋ. 23 Ɛlɛ, manaɣ se nabʋyʋ wɛ man-taa ɖɔɖɔ, pʋ nɛ mbʋ pɩkɛdɩnɩ-m ma-lɩmaɣza taa yɔ palʋkɩ. Mbʋ pɩsɩɣnɩ-m kɩwɛɛkɩm mbʋ pʋwɛ man-taa yɔ pu-yom. 24 Mɔn-tɔm wɛ pʋtɔdɩyɛ! Mon-tomnaɣ yɔɔ lɛ, mansɩkɩ. Alɩzɩɣ-m ka-taa? 25 Ɛsɔ lɩzɩɣnɩ-m! Ɖɩtɩŋnɩ ɖa-Kɩpaɣlʋ Yesu Krɩstʋ yɔɔ nɛ ɖɩsam-ɩ!
Ye mbʋ, ma-maɣmaɣ manpɩzɩɣ mɔnɖɔ Ɛsɔ paɣtʋ yɔɔ ma-lɩmaɣza taa. Ɛlɛ, mɛ-wɛtʋ ñɔɖɔŋ kɩwɛɛkɩm nʋmɔʋ taa.