Abraham wɛnaʋ lidaʋ Ɛsɔ yɔɔ yɔ
4
1 Ɖɩyɔɔdʋʋ ɖɔ-cɔzɔ Abraham tɔm se we yɔ? Ɛbɛ ehiɣ Ɛsɔ cɔlɔ? 2 Toovenim lɛ, ye Ɛsɔ ɛɛpɩsɩ Abraham kʋtʋʋzʋ tʋma wena ɛlaba yɔ a-yɔɔ yɔ, pʋbʋ ɛɛkʋndaa. Ŋgʋ, pɩtamʋnɩ mbʋ Ɛsɔ ɛsɩndaa. 3 Ɛlɛ pama Ɛsɔtɔm Takayaɣ taa se: “Abraham wɛnɩ lidaʋ Ɛsɔ yɔɔ yɔɔ, ɛlɛ kpaɣ-ɩ se ɛkɛ kʋtʋʋzʋ.” 4 Ŋgʋ, weyi ɛlabɩ tʋmɩyɛ nɛ pɛhɛyɩ-ɩ yɔ, paatɔŋ se kʋjɔʋ palabɩ-ɩ. Ɛlɛ, ɛ-kɩmɩyɛ pɛhɛyɩ-ɩ. 5 Weyi ɛlɛ ñaalakɩ naɖɩyɛ se papɩsɩ-ɩ kʋtʋʋzʋ, ɛlɛ, ɛwɛnɩ lidaʋ Ɛsɔ yɔɔ yɔ, ɛpɩsɩɣ kʋtʋʋzʋ ɛ-ɛsɩndaa. Mbʋ pʋyɔɔ yɔ, Ɛsɔ pɩsɩɣnɩ kɩwɛɛkɩm laɖaa kʋtʋʋzaa. 6 Mbʋ ɖɔɖɔ Daaviidi yɔɔdɩ weyi Ɛsɔ pɩsɩ-ɩ kʋtʋʋzʋ yɔ ɛ-tɩ hiɣu tɔm. Ŋgʋ, ɛlɛ taakpaɣ ɛ-tʋmɩyɛ nɛ ɛyaa pʋyʋ. Ɛyɔɔdaa se:
7 “Mba payʋsaa nɛ Ɛsɔ kpeɣ-wɛ nɛ ehuuzi pa-kɩwɛɛkɩm yɔɔ yɔ, pehiɣ pa-tɩ!
8 Weyi Kɩpaɣlʋ takpaɣ ɛ-kɩwɛɛkɩm nɛ ɛyaa pʋyʋ yɔ, ehiɣ ɛ-tɩ!”
9 Mba pɛpɛlɩ-wɛ yɔ, pe-ɖeke pa-tɩ hiɣu tɔm pɔyɔɔdʋʋ mbʋ yaa we? Pɩtɛkɛ mbʋ! Kɩtɛpɛlɩŋ hiɣ ɩ-tɩ ɖɔɖɔ. Mbʋ pʋyɔɔ yɔ, ɖɩyɔɔdɩ lɛɛlɛɛyɔ se: “Abraham wɛnɩ lidaʋ Ɛsɔ yɔɔ yɔɔ ɛlɛ kpaɣ-ɩ se ɛkɛ kʋtʋʋzʋ.” 10 Ɛzɩma ɛɛwɛ alɩwaatʋ ndʋ Ɛsɔ kpaɣ-ɩ mbʋ yɔ? Paapɛlɩ-ɩ yaa we? Pataapɛlɩ-ɩ. Ɛɛkɛ kɩtɛpɛlʋʋ. 11 Pʋwayɩ pɛpɛlɩ-ɩ nɛ pɩkɛnɩ-ɩ yʋsaɣ: ŋga wɩlɩɣna se Ɛsɔ kpaɣ-ɩ se ɛkɛ kʋtʋʋzʋ lidaʋ ŋgʋ ɛɛwɛna nɛ pʋcɔ pɛpɛlɩ-ɩ yɔ kʋ-yɔɔ. Mbʋ yebina nɛ Abraham kɛ mba pɛtɛpɛlɩ-wɛ nɛ pɛwɛnɩ lidaʋ Ɛsɔ yɔɔ nɛ ɛlɛ kpaɣ-wɛ se pɛkɛ kʋtʋʋzaa yɔ patɩŋa payɩ pɔ-cɔzɔ. 12 Ɛkɛ ɖɔɖɔ mba pɛpɛlɩ-wɛ yɔ pɔ-cɔzɔ. Ɛlɛ, pɩtasɩnɩ pɛ-pɛlʋʋ ɖeke, pɛwɛnɩ lidaʋ ɖɔɖɔ Ɛsɔ yɔɔ ɛzɩ ɖɔ-cɔzɔ Abraham kɛwɛnaʋ nɛ pʋcɔ pɛpɛlɩ-ɩ yɔ.
Abraham wɛnaʋ lidaʋ nɛ Ɛsɔ labɩ-ɩ mbʋ ɛɖʋwa yɔ
13 Toovenim lɛ, pɩtɛkɛ paɣtʋ yɔɔ ɖɔm yɔɔ pɩtɩŋnaa nɛ Ɛsɔ heyi Abraham nɛ ɛ-sayɩnaa se pɔkɔŋ tɩɣyʋʋ kedeŋa kpeekpe. Ɛlɛ, ɛwɛʋnɩ lidaʋ nɛ Ɛsɔ kpaɣ-ɩ se ɛkɛ kʋtʋʋzʋ yɔ, pʋ-yɔɔ pɩtɩŋnaa. 14 Ye mba pɔɖɔŋ paɣtʋ yɔɔ se Ɛsɔ ɛkpaɣ-wɛ se pɛkɛ kʋtʋʋzaa yɔ ɛɖʋwa se patɩɣyɩ-kɛ yɔ, pʋbʋ pɩɩwɩlaa se lidaʋ nɛ mbʋ ɛɖʋwa se ɛlakɩ yɔ, pɩɩwazɩɣ pʋyʋ. 15 Mbʋ pʋyɔɔ yɔ, paɣtʋ kulusuu Ɛsɔ pana. Ɛlɛ, ɖenɖe tɩfɛyɩ yɔ, paatɔŋ se pɔtɔɖɔ tɩ-yɔɔ ɖɔɖɔ.
16 Pʋ-yɔɔ lɛ, lidaʋ ŋgʋ ɖɩwɛnɩ Ɛsɔ yɔɔ yɔ, kʋ-yɔɔ ɛɖʋwa se ɛlakɩ-ɖʋ pʋyʋ. Ɛlakɩ-ɖʋ-pʋ falaa se pʋwazɩ Abraham sayɩnaa tɩŋa payɩ. Pɩtɛkɛ mba pɛcɛlɩ-wɛ paɣtʋ yɔ, pe-ɖeke pʋwazɩɣ. Ɛlɛ, pɩkpɛndɩnɩ mba pɛwɛnɩ lidaʋ ɖɔɖɔ ɛzɩ ɖɔ-cɔzɔ Abraham yɔ, mbʋ pʋyɔɔ yɔ, ɛnʋ lɛ ɖatɩŋa payɩ ɖɔ-cɔzɔ. 17 Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: “Malɩzɩnɩ-ŋ se ŋkɛ ajɛɛ ndɩ ndɩ taa ñɩma cɔzɔ.” Ɛkɛ ɖɔ-cɔzɔ Ɛsɔ weyi ɛwɛnɩ ɛ-yɔɔ lidaʋ yɔ ɛ-ɛsɩndaa. Ɛnʋ feziɣni sɩɖaa nɛ ɛyɔɔdʋʋ nɛ mbʋ pɩtaawɛɛ yɔ, pʋwɛɣ. 18 Abraham kɛwɛnɩ lidaʋ nɛ ɛɖaŋ nɛ ɛkɔɔ ɛkɛ ajɛɛ ndɩ ndɩ taa ñɩma cɔzɔ ɛzɩ Ɛsɔ keheyuu-i yɔ. Eeheyi-i se: “Mbʋ ña-sayɩnaa ɖɔʋ.” 19 Abraham kɛwɛna ɛzɩ pɩnzɩ mɩnʋʋ yɔ. Ɛlɛ, pɩtaalabɩ-ɩ ɛjandʋ e-lidaʋ wɛnaʋ taa, ŋgʋ, ɛɛñɔtɩnɩ pɩlaʋ kpam. Ɖɔɖɔ lɛ, ɛɛnawa se ɛ-halʋ Saara tapɩzɩɣ se ɛlʋlɩ. 20 Paa mbʋ, ɛcɔnɩ mbʋ Ɛsɔ ɖʋwa se ɛlakɩ-ɩ yɔ lɛ, ɛtapʋtɩ. Ɛlɛ, e-lidaʋ yele nɛ ɛkpa ɖoŋ nɛ ɛsa Ɛsɔ. 21 Ɛnawa kpem se Ɛsɔ pɩzɩɣ ɛla mbʋ ɛɖʋwa se ɛlakɩ yɔ. 22 Pʋ-yɔɔ ɛlɛ kpaɣ-ɩ se ɛkɛ kʋtʋʋzʋ. 23 Ɛlɛ, tɔm ndʋ pamawa se: “Ɛsɔ kpaɣ-ɩ se ɛkɛ kʋtʋʋzʋ” yɔ, pɩtɛkɛ e-ɖeke ɛ-yɔɔ pama-tʋ. 24 Mba ɖa ɛpɩsɩ-ɖʋ kʋtʋʋzaa yɔ, ɖɔ-yɔɔ ɖɔɖɔ pama-tʋ. Mbʋ pʋyɔɔ yɔ, ɖɩwɛnɩ lidaʋ Ɛsɔ weyi efezi ɖa-Kɩpaɣlʋ Yesu nɛ sɩm yɔɔ yɔ ɛ-yɔɔ. 25 Ɖa-kɩwɛɛkɩm yɔɔ eyeba nɛ pakʋ-ɩ, ɛlɛ, efezi-i se ɛpɩsɩ-ɖʋ kʋtʋʋzaa.