Tʋma Labʋ 24

Yuda ñɩma cɛtɩnaʋ Pɔɔlɩ taa yɔ

¹ Pɩlabɩ kɩyakɩŋ kagbaanzɩ lɛ, cɔjɔnaa ñʋʋ tʋ Anaanɩyaasɩ nɛ ɛjaɖɛ taa sɔsaa nabɛyɛ nɛ tɔm loluyu Tɛrtuluusi patalɩ Sezaaree wiyaʋ sɔsɔ Feliksɩ tɛ se pakʋyɩ Pɔɔlɩ yɔɔ. ² Peeye wiyaʋ tiyaa nɛ payaa Pɔɔlɩ. Ɛkɔma lɛ, Tɛrtuluusi kʋyɩ ɛ-yɔɔ: eheyi wiyaʋ se: “Ɖajaa wiyaʋ sɔsɔ! Ñɔ-yɔɔ ɖɩwɛ laŋhɛzɩyɛ taa siŋŋ. Ñɔ-lɔŋsɩnɖɛ yɔɔ pɩtɩŋnaa nɛ pɛlɛɣzɩ wɛtʋ sakɩyɛ ɛjaɖɛ ɖɩnɛ ɖɩ-taa se piɖeni-ɖɩ. ³ Ɖɩsɛɣ-ŋ siŋŋ mbʋ pɩtɩŋa ŋwɛɛ ŋlakɩ alɩwaatʋ tɩŋa paa le yɔ pʋ-yɔɔ. ⁴ Ɛlɛ, maakɩlɩɣ-ŋ lesuu alɩwaatʋ. Pʋ-yɔɔ monkuluu-ŋ hulaɣ se ña-camɩyɛ lakasɩ yɔɔ lɛ, ŋwelesini-ɖʋ pazɩ yem nɛ ŋnɩɩ ndʋ ɖɩkɔmnaa yɔ. ⁵ Abalʋ ɛnɛ, ɛkɛ kɩdɛkɛdʋʋ: ɛwɛɛ eyozuu Yuda ñɩma tɩŋa kedeŋa kpeekpe yɔɔ. Ɛkɛ Nazarɛɛtɩ ñɩma ɛgbɛyɛ ɛzaɣʋ ñʋʋ tʋ. ⁶ Halɩ ɛcaɣaɣ se episi Ɛsɔ ɖɩɣa, ɛlɛ ɖɩkpa-ɩ. [Ɖɩcaɣaɣ se ɖɩhʋnɩ-ɩ tɔm ɛzɩ paɖʋʋ ɖa-paɣtʋ taa yɔ. ⁷ Ɛlɛ, Sɔɔjanaa ñʋʋ tʋ Lisiyaasɩ tɩkɔm ɛlɛɣ-ɩ nɛ ɖoŋ ɖe-nesi taa ⁸ nɛ eheyi-ɖʋ se ɖɩkɔɔ ñɔ-cɔlɔ.] Ɖajaa, ña-maɣmaɣ ŋpɔzʋʋ-ɩ lɛ, eheyiɣ-ŋ mbʋ pɩlaba nɛ ɖɩkʋyʋʋ ɛ-yɔɔ yɔ pɩtɩŋa.”

⁹ Tɛrtuluusi yɔɔdɩ mbʋ lɛ, Yuda ñɩma mba patɩnɩ ɛ-yɔɔ se toovenim mbʋ ɖeyi ɖeyi pɩlaba.

Pɔɔlɩ hʋʋ ɛ-tɔm wiyaʋ sɔsɔ Feliksɩ ɛsɩndaa yɔ

¹⁰ Pʋwayɩ lɛ, wiyaʋ sɔsɔ wɩlɩ Pɔɔlɩ nesi se ɛyɔɔdɩ nɛ ɛlɛ kaɖɩ se: “Ɖajaa, manawa se pɩnzɩ sakɩyɛ yɔ ŋhʋʋ tɔm ɛjaɖɛ ɖɩnɛ ɖɩ-taa. Mbʋ yebina nɛ mɔyɔɔdʋʋ mɔn-tɔm nɛ laŋhʋlʋmɩyɛ. ¹¹ Ña-maɣmaɣ ŋpɩzɩɣ ŋpɔzɩ nɛ ŋna, maawobu Ɛsɔ tɛɛ luŋuu Yeruusalɛm yɔ, pɩtɛɖɛɛ kɩyakɩŋ hiu nɛ naalɛ. ¹² Wiɖiyi nɔɔyʋ takatɩ-m Ɛsɔ ɖɩɣa taa yaa Yuda ñɩma Ɛsɔ ɖɩsɛyɛ naɖɩyɛ taa yaa tɛtʋ taa se ma nɛ nɔɔyʋ ɖiɖiɣni tɔm hɔm yaa mansazaɣ samaɣ se kalɩɩ ɛyaa wayɩ. ¹³ Lɛɛlɛɛyɔ, paa ŋpɔzɩ ɛyaa mba yɔ, paapɩzɩɣ pɔyɔɔdɩ nɛ pawɩlɩ-ŋ mbʋ malaba nɛ pakʋyʋʋ mɔ-yɔɔ yɔ. ¹⁴ Ɖajaa, ndʋ mankaɖɩɣ ñɛ-ɛsɩndaa yɔ lɛ se: ɖɔ-cɔzɔnaa Ɛsɔ tɛɛ moluŋuu, mentisiɣ tɔm ndʋ tɩtɩŋa payɩ pama *Mooyiizi paɣtʋ nɛ lɔɔyɩsɩ tɩnaa pa-takayɩsɩ taa yɔ. Moluŋuu ɛ-tɛɛ ɛzɩ mba payaɣ se ɛgbɛyɛ ɛzaɣʋ yɔ palakʋʋ yɔ. ¹⁵ Pa-maɣmaɣ liu ŋgʋ pataɣ yɔ, ŋgʋ mantaɣ ɖɔɖɔ. Ŋgʋ lɛ se: ɛyaa kʋtʋʋzaa nɛ kɩtatʋʋzɩŋ mba pasɩba yɔ, pɔkɔŋ fem. ¹⁶ Pʋ-yɔɔ mañakɩ pana se man-taa ɛwɛɛ ɖeu Ɛsɔ nɛ ɛyaa pɛ-ɛsɩndaa tam yɔɔ.

¹⁷ Pɩlabɩ pɩnzɩ cabɩ yɔ, mɛnfɛyɩ Yeruusalɛm. Pʋ-yɔɔ manpɩsaa mɔnkɔɔ se maha mɛn-tɛ ñɩma haɖɛ nɛ malaa kɩlaʋ. ¹⁸ Alɩwaatʋ ndʋ malakaɣ mbʋ yɔ, pana-m Ɛsɔ ɖɩɣa taa, ɛlɛ, maatɛm cɩɖɩcɩɖɩ wɛtʋ sɔnzɩ labʋ. Ñaɖʋʋ yaa you nakʋyʋ taawɛɛ. ¹⁹ Ɛlɛ, Yuda ñɩma nabɛyɛ lɩnɩnɩ Aazii egeetiye taa nɛ pɔkɔɔ pamaɣnɩ-m. Ye mba ɛɛwɛnɩnɩ natʋyʋ se pakʋyʋʋ mɔ-yɔɔ yɔ, mba pɩɩmʋnaa se pɔkɔɔ ñɔ-cɔlɔ. ²⁰ Yaa mba pɛwɛ cɩnɛ yɔ, pa-maɣmaɣ pɔyɔɔdɩ nɛ ɖɩnɩɩ se pahʋnɩ-m tɔm hʋyaa *sɔsaa cɔlɔ lɛ, kɩwɛɛkɩm mbʋ pana mɔ-yɔɔ? ²¹ Mantala nabʋyʋ nɛ pɩfɛyɩ ɖeu nɛ pɩtasɩnɩ tɔm kʋɖʋmtʋ kɔŋ ndʋ mansɩŋ pɛ-ɛsɩndaa nɛ moholi yɔ. Ndʋ lɛ se: ‘Mantaɣ liu se sɩɖaa kɔŋ fem. Pʋ-yɔɔ sɔnɔ pahʋʋnɩ-m mɩ-ɛsɩndaa ɛzʋnɔ.’ ”

²² Feliksɩ kɛtɛm sɩm Yesu wayɩ tɩŋʋʋ tɔm camɩyɛ. Pʋ-yɔɔ eheyi ɛyaa mba se pekpe nɛ kɩyakʋ ŋgʋ sɔɔjanaa ñʋʋ tʋ Lisiyaasɩ ɛkɔma lɛ, ɛɛtazɩ pɔ-tɔm taa nɛ ɛna. ²³ Ɛlɛ eheyi sɔɔjanaa ñʋʋ tʋ weyi ɛɖaŋaɣ Pɔɔlɩ yɔɔ yɔ se ɛcɔnɩ ɛ-yɔɔ, ɛlɛ, ɛha-ɩ waɖɛ. Ɖɔɖɔ lɛ, eyele ɛ-taabalaa nɛ pasɩnɩ-ɩ.

Powonaʋ Pɔɔlɩ wiyaʋ sɔsɔ Feliksɩ nɛ ɛ-halʋ pɔ-cɔlɔ yɔ

²⁴ Pɔɔlɩ wɛ peeye mbʋ nɛ pɩla kɩyakɩŋ cabɩ lɛ, Feliksɩ nɛ ɛ-halʋ Druusiili pɔkɔɔ nɛ etiyi se payaa Pɔɔlɩ. Halʋ ɛnʋ ɛkɛ Yuda tʋ. Ɛlɛ kɔma lɛ, Feliksɩ heyi-i se ɛkɛdɩ-ɩ Krɩstʋ Yesu yɔɔ lidaʋ wɛnaʋ tɔm. Peeye ɛpazɩ-ɩ-tʋ kɛdʋʋ. ²⁵ Ɛkɛdaɣ-wɛ ɛzɩma mbʋ pʋwɛɛ se ɛyʋ ɛcaɣ wezuu kʋtʋʋzʋʋ Ɛsɔ ɛsɩndaa yɔ nɛ tɩ ɖɔkʋʋ nɛ ɛzɩma mbʋ Ɛsɔ kɔŋ ɛyaa tɔm hʋnaʋ yɔ pɩtɩŋa pʋ-tɔm. Peeye sɔɔndʋ kpa wiyaʋ sɔsɔ Feliksɩ ɛnʋ nɛ eheyi-i se: “Lɛɛlɛɛyɔ, ŋpɩzɩɣ ŋɖɛɛ nɛ kɩyakʋ ŋgʋ mehiɣ alɩwaatʋ lɛ, maaɖaɣnɩ-ŋ yaʋ.” ²⁶ Ɖɔɖɔ lɛ, Feliksɩ maɣzaɣ se pʋtɔmaɣ yɔ, pɩkɛdɩɣ Pɔɔlɩ ha-ɩ liidiye. Mbʋ labɩna nɛ ɛpaŋ-ɩ yaʋ se ewolo nɛ ɛ nɛ ɩ pala faawɩyɛ.

²⁷ Pɩnzɩ naalɛ kɔm sɩɖɛɛ lɛ, abalʋ weyi payaɣ se Pɔɔrsiyuusi Fɛstuusi yɔ, ɛlɛɣzɩ Feliksɩ lone taa nɛ ɛkɛ wiyaʋ sɔsɔ. Feliksɩ caɣaɣ se pɩla Yuda ñɩma leleŋ lɛ, eyele Pɔɔlɩ salaka taa mbʋ.