Kɔɔrnɛɛyɩ lɛɣzʋʋ wɛtʋ yɔ
10
1 Abalʋ nɔɔyʋ kɛwɛ Sezaaree, payaɣ-ɩ se Kɔɔrnɛɛyɩ. Ɛɛkɛ Room sɔɔjanaa tikaɣ ŋga payaɣ se Itaaliyɛɛ yɔ ka-ñʋʋ tʋ. 2 Ɛlakaɣ mbʋ Ɛsɔ liu wɛɛ yɔ nɛ ɛ nɛ ɛ-hɔʋ taa ñɩma tɩŋa payɩ pañaŋ Ɛsɔ. Ɛsɩŋaɣnɩ Yuda ñɩma kʋñɔndɩnaa siŋŋ nɛ ɛpaŋ Ɛsɔ sɛʋ. 3 Nakʋyʋ wiye pʋkɔma ɛzɩ ɖanaɣ wɩsɩ wɛlʋʋ yɔ lɛ, eɖozi se ɛna Ɛsɔ *tiyiyu nɔɔyʋ sʋ ɛ-tɛ nɛ ɛyaa-ɩ se: “Kɔɔrnɛɛyɩ!” 4 Peeye ɛcɔnɩ tiyiyu ɛnʋ nɛ sɔɔndʋ kpa-ɩ nɛ ɛpɔzɩ-ɩ se: “Kɩpaɣlʋ! Alaafɩya lɛ?” Ɛlɛ cosi-i se: “Ɛsɔ nɩ ñe-tenduu nɛ ɛna sɩnaʋ mbʋ ŋsɩnɩ kʋñɔndɩnaa yɔ, ɛɛsɔʋ ñɔ-yɔɔ. 5 Pʋ-yɔɔ lɛ, kʋsɩ ɛyaa lɛɛlɛɛyɔ nɛ ŋtiyi-wɛ Yopee nɛ powolo payaa abalʋ weyi payaɣ se Siimɔɔ nɛ pakʋm-ɩ hɩɖɛ se Pɩyɛ yɔ. 6 Ɛwɛ naataŋgbala kanɖʋ weyi payaɣ se Siimɔɔ yɔ ɛ-ɖɩɣa taa teŋgu nɔɔ.”
7 Ɛsɔ *tiyiyu weyi ɛyɔɔdɩnɩ Kɔɔrnɛɛyɩ yɔ, ɛɖɛwa lɛ, ɛlɛ tɩkʋsɩ ɛ-tʋmlaɖaa naalɛ nɛ ɛ-sɔɔjanaa mba ɛ nɛ wɛ pamalɩnɩ ɖama yɔ pa-taa lɛlʋ weyi ɛlakɩ mbʋ Ɛsɔ liu wɛɛ yɔ 8 nɛ ɛkɛdɩ-wɛ mbʋ pɩtɩŋa payɩ pɩlaba yɔ nɛ etiyi-wɛ Yopee.
9 Tɛʋ fem-wɛ nʋmɔʋ taa nɛ pɔkɔɔ pɔñɔtɩnɩ Yopee lɛ, Pɩyɛ ñaakpa kuduyuu ñʋʋ taa se ɛsɛɣ Ɛsɔ, pɩɩmaɣ ɛzɩ wɩsɩ siɣu yɔ. 10 Pɩkɛdaa lɛ, ñɔɔsɩ kpa-ɩ nɛ ɛyɔɔdɩ se palabɩ-ɩ tɔɔnaɣ. Palakaɣ-kɛ lɛ, eɖozi se 11 ɛna ɛsɔdaa tʋlaa nɛ pʋyʋ nɔɔyʋ lɩɩ ɛzɩ pɩsaʋ sɔsɔʋ nakʋyʋ yɔ nɛ pitiki tataa. Patam kɩ-pama naanza taa. 12 Kpɩna wena awɛnɩ naŋgbanzɩ naanza naanza yɔ atɩŋa payɩ nɛ tɛtɛ ñɩtʋ tɩŋa nɛ sumasɩ ndɩ ndɩ paawɛnɩ kɩ-taa. 13 Peeye ɛnɩ pʋyɔɔdʋʋnɩ-ɩ se: “Pɩyɛ! Kʋyɩ ŋkpa nɛ ŋkʋ nɛ ŋtɔɔ!” 14 Ɛlɛ, Pɩyɛ cosi se: “Pɩlɩ! Kɩpaɣlʋ, wiɖiyi mɔntɔtɔɔdɩ mbʋ ŋɖʋwa se pataatɔɔ yɔ yaa mbʋ pɩfɛyɩ cɩɖɩcɩɖɩ yɔ.” 15 Peeye pɩtasɩ-ɩ heyuu se: “Taakpaɣ mbʋ Ɛsɔ tɔm se pʋwɛ cɩɖɩcɩɖɩ yɔ se pɩfɛyɩ cɩɖɩcɩɖɩ.” 16 Pɩla mbʋ nɛ pʋɖʋ tozo nɛ pɩtɩkʋsɩ pɩsaʋ ŋgʋ yem nɛ pɩkpazɩ-kʋ ɛsɔdaa.
17 Pɩyɛ kɛwɛɛ ɛmaɣzɩɣ se ɛnɩɩ e-ɖoziye tɔbʋʋ. Alɩwaatʋ ndʋ tɩ-taa ɛyaa mba Kɔɔrnɛɛyɩ ketiyaa yɔ pɔpɔzɩ ka ka nɛ pɔkɔɔ patalɩ Siimɔɔ ɖɩɣa nɔnɔɔ taa. 18 Patalaa lɛ, payaa nɛ pɔpɔzɩ se: “Weyi payaɣ se Siimɔɔ nɛ pakʋm-ɩ hɩɖɛ se Pɩyɛ yɔ, ɛ-tɛ lɛ cɩnɛ yaa we?”
19 Pɩyɛ maɣzaɣ se ɛnɩɩ e-ɖoziye tɔbʋʋ mbʋ lɛ, Ɛsɔ Kalɩzaɣ heyi-i se: “Na! Ɛyaa naadozo nabɛyɛ kɔm pañɩnɩɣ-ŋ. 20 Kʋyɩ ŋtii nɛ ña nɛ wɛ ɩkpaɣ nʋmɔʋ, taahʋʋ natʋyʋ. Mbʋ pʋyɔɔ yɔ, mentiyini-wɛ ña-wayɩ.” 21 Peeye Pɩyɛ tibi ɛyaa mba pɔ-cɔlɔ nɛ eheyi-wɛ se: “Ma lɛ weyi ɩñɩnɩɣ yɔ. Alaafɩya lɛ?” 22 Pocosi-i se: “Sɔɔjanaa ñʋʋ tʋ Kɔɔrnɛɛyɩ tiyini-ɖʋ. Ɛkɛ ɛyʋ kʋtʋʋzʋ, ɛñaŋ Ɛsɔ nɛ Yuda ñɩma tɩŋa lɩzɩɣ aseɣɖe kɩbanɖɛ ɛ-yɔɔ. Ɛsɔ *tiyiyu nɔɔyʋ heyi-i se ɛya-ŋ nɛ ŋwolo ɛ-tɛ nɛ ŋheyi-i ña-taa tɔm.”
23 Peheyi Pɩyɛ mbʋ lɛ, ɛsʋnɩ-wɛ ɖɩɣa nɛ pasʋʋ ɛ-tɛ puwiye nɖɩ. Kifema lɛ, ɛ nɛ wɛ pakpaɣ nʋmɔʋ. Yopee taabalaa nabɛyɛ kasɩ-ɩ. 24 Kɩyakʋ ŋgʋ ki-kifemuu patalɩ Sezaaree. Alɩwaatʋ ndʋ lɛ, Kɔɔrnɛɛyɩ kaya ɛ-ñɩma nɛ e-cewaa nɛ pacaɣ paɖaŋ-wɛ. 25 Pɩyɛ talaa se ɛsʋʋ lɛ, Kɔɔrnɛɛyɩ kʋyɩ ɛkatɩ-ɩ nɛ eluŋ ɛ-tɛɛ nɛ ɛsɛɛ-ɩ nɛ ñamtʋ siŋŋ. 26 Ɛlɛ Pɩyɛ kʋsɩ-ɩ nɛ eheyi-i se: “Kʋyɩ, mɛnkɛ ɛyʋ ɛzɩ ña yɔ.” 27 Ɛlɛ Kɔɔrnɛɛyɩ kʋyɩ nɛ ɛ nɛ Pɩyɛ papazɩ yɔɔdʋʋ nɛ pasʋʋ ɖɩɣa nɛ pamaɣnɩ ɛyaa sakɩyɛ kpeɣlaa.
28 Peeye Pɩyɛ heyi-wɛ se: “Ɩtɛm sɩm se pɩtaha Yuda tʋ nʋmɔʋ se ɛ nɛ ɛgɔm nɔɔyʋ paɖʋ taabalɩyɛ yaa ɛsʋʋ pʋdʋ tɛ. Ɛlɛ, Ɛsɔ ñeheyi-m se mantaakpaɣ nɔɔyʋ se ɛtɛkɛ kɩbanʋ yaa ɛfɛyɩ cɩɖɩcɩɖɩ se powolo ɛ-tɛ. 29 Mbʋ labɩna nɛ itiyaa se paya-m lɛ, mankʋyɩ mɔnkɔɔ, mɔntɔcɔɔ ñʋʋ. Lɛɛlɛɛyɔ, mɔnpɔzʋʋ-mɩ se alaafɩya lɛ ɩya-m mbʋ?”
30 Ɛlɛ Kɔɔrnɛɛyɩ cosi-i se: “Pɩlabɩ kɩyakɩŋ naanza yɔ, maawɛ mɛn-tɛ nɛ mɛnsɛɣ Ɛsɔ, pɩɩmaɣ ɛzɩ ɖanaɣ wɩsɩ wɛlʋʋ yɔ. Pɩkɛdaa lɛ, abalʋ nɔɔyʋ tɩlɩʋ mɛ-ɛsɩndaa yem. Esu wondu nɛ tɩñɩlɩzɩɣ 31 nɛ eheyi-m se: ‘Kɔɔrnɛɛyɩ! Ɛsɔ nɩ ñe-tenduu nɛ ɛna sɩnaʋ mbʋ ŋsɩŋnɩ kʋñɔndɩnaa yɔ. 32 Pʋ-yɔɔ lɛ, tiyi nabɛyɛ Yopee nɛ payaa Siimɔɔ weyi pakʋm-ɩ hɩɖɛ se Pɩyɛ yɔ. Ɛwɛ naataŋgbala kanɖʋ weyi payaɣ-ɩ se Siimɔɔ yɔ ɛ-tɛ teŋgu nɔɔ.’ 33 Kpaagbaa mbʋ lɛ, mankʋsɩ ɛyaa se pɔkɔɔ paya-ŋ. Pɩlabɩ-m leleŋ se ŋkɔma. Lɛɛlɛɛyɔ, ɖatɩŋa ɖɩwɛ cɩnɛ Ɛsɔ ɛsɩndaa nɛ ɖiwelesiɣ se ɖɩnɩɩ ndʋ ɛnʋ Kɩpaɣlʋ etiyi-ŋ se ŋkɔɔ ŋheyi-ɖʋ yɔ.”
Tɔm ndʋ Pɩyɛ yɔɔdɩ Kɔɔrnɛɛyɩ tɛ yɔ
34 Kɔɔrnɛɛyɩ yɔɔdɩ mbʋ lɛ, Pɩyɛ tɔ se: “Toovenim lɛ, lɛɛlɛɛyɔ manawa se Ɛsɔ tɔsɔɔlɩ nabɛyɛ nɛ eyele lɛlaa: 35 paa weyi ɛkɛ le tʋ nɛ ɛñaŋ-ɩ nɛ ɛlakɩ mbʋ pʋtʋʋzaa yɔ yɔ, pʋdʋ tɔm kɛdɩɣnɩ-ɩ. 36 Ɩtɩlɩ se Ɛsɔ tiyini Yesu Krɩstʋ se ɛkɔɔ eheyi *Izrɛɛlɩ ñɩma Laŋhɛzɩyɛ Tɔm. Yesu Krɩstʋ ɛnʋ lɛ ɛyaa tɩŋa payɩ Kɩpaɣlʋ. 37 Paa pɩɩla ɛzɩma, ɩtɛm nɩʋ mbʋ pɩlabɩ Galilee egeetiye taa nɛ puwolo Yudee ñɩnɖɛ tɩŋa taa alɩwaatʋ ndʋ Yohanɛɛsɩ susi ɛyaa *lɩm sɔʋ sɔnzɩ tɔm yɔ. 38 Ɛsɔ kɛwɛ Nazarɛɛtɩ tʋ Yesu cɔlɔ nɛ eyele ɛ-Kalɩzaɣ tii ɛ-yɔɔ nɛ kaha-ɩ ɖoŋ. Pʋ-yɔɔ ɛcɔwaɣ lona ndɩ ndɩ taa nɛ ɛlakɩ ɛyaa ɖeu nɛ eholuu mba patɩŋa payɩ pɛwɛ *Kañadʋ Satanɩ nesi taa yɔ.
39 Ɖɩkɛ mbʋ pɩtɩŋa payɩ ɛlabɩ Yeruusalɛm nɛ Yuda ñɩma ɛjaɖɛ tɩŋa taa yɔ pɩ-aseɣɖe tɩnaa. Pakpa-ɩ nɛ pakam-ɩ *kaamaŋkaɣ yɔɔ nɛ ɛsɩ. 40 Ɛlɛ, Ɛsɔ fezi-i kɩyakɩŋ naadozo wiye nɛ eyele se ɛlɩzɩ ɛ-tɩ 41 nɛ ɛwɩlɩ mba Ɛsɔ ɛnʋ ɛɛlɩzaa se pɛkɛ pɩ-aseɣɖe tɩnaa yɔ pe-ɖeke koŋ. Efema lɛ, ɖa nɛ ɩ ɖɩtɔɔ nɛ ɖɩñɔɔ. 42 Ɛnʋ ɖʋnɩ-ɖʋ se ɖɩcɔɔ ɖisusi ɛyaa nɛ ɖiheyi-wɛ kpayɩ se ɛ-maɣmaɣ Ɛsɔ lɩzaa se ɛhʋnɩ ɛza tɩnaa nɛ pɩkpɛndɩnɩ sɩɖaa. 43 Lɔɔyɩsɩ tɩnaa tɩŋa lɩzɩ ɛ-aseɣɖe se: weyi ɛwɛɣnɩ lidaʋ ɛ-yɔɔ yɔ, pɩtɩŋɩɣnɩ ɛ-yɔɔ nɛ Ɛsɔ kpeɣ pʋdʋ ɛ-kɩwɛɛkɩm.”
Ɛsɔ Kalɩzaɣ tibu mba pɛtɛkɛ Yuda ñɩma yɔ pɔ-yɔɔ yɔ
44 Pɩyɛ tosulidi ɛ-nɔɔ lɛ, Ɛsɔ Kalɩzaɣ tii ɛyaa mba patɩŋa pewelesaɣnɩ-ɩ yɔ pɔ-yɔɔ. 45 Peeye pɩlabɩ Yuda ñɩma mba pɛwɛnɩ lidaʋ Krɩstʋ yɔɔ nɛ paasɩ Pɩyɛ yɔ piti pɩŋŋ nɛ ɛzɩma mbʋ Ɛsɔ ha ɛ-Kalɩzaɣ mba pɛtɛkɛ Yuda ñɩma nɛ eyele ketii pɔ-yɔɔ yɔ. 46 Mbʋ pʋyɔɔ yɔ, panɩɣaɣ ɛyaa mba pɔyɔɔdaɣ kʋnʋmɩŋ lɛɛŋ nɛ pasaŋ Ɛsɔ. Pʋ-yɔɔ Pɩyɛ tɔm se: 47 “Ɛzɩma papɩzɩɣ pekizini mba Ɛsɔ ha-wɛ ɛ-Kalɩzaɣ ɖɔɖɔ ɛzɩ ɖa yɔ se pataalabɩ-wɛ *lɩm sɔʋ sɔnzɩ?”
48 Peeye ɛha nɔɔ se palabɩ-wɛ *lɩm sɔʋ sɔnzɩ Yesu Krɩstʋ hɩɖɛ taa. Pʋwayɩ lɛ, petendi-i se ɛcaɣ pɔ-cɔlɔ kɩyakɩŋ cabɩ nɛ pʋcɔ ekpe.