Yohanɛɛsɩ 17

Yesu tenduu Ɛsɔ ɛ-tɔmkpɛlɩkɩyaa yɔɔ yɔ

¹ Yesu tɛm yɔɔdɩnaʋ ɛ-tɔmkpɛlɩkɩyaa lɛ, ɛkpazɩ ɛza ɛsɔdaa nɛ ɛtɔ se: “Caa! Alɩwaatʋ talaa. Yele nɛ ña-Pɩyalʋ ma, ma-hɩɖɛ sɛɛ nɛ meyele ɖɔɖɔ ña-ñɩnɖɛ sɛɛ. ² Mbʋ pʋyɔɔ yɔ, ŋha-m waɖɛ ɛyaa tɩŋa yɔɔ se maha mba patɩŋa payɩ ŋɖʋzɩ me-nesi taa yɔ wezuu pɩɩtɛŋ. ³ Ŋgʋ, wezuu pɩɩtɛŋ lɛ se patɩlɩ weyi ña ñe-ɖeke koŋ lɛ Ɛsɔ siŋŋ yɔ nɛ ma Yesu Krɩstʋ weyi ŋtiyaa yɔ. ⁴ Meyeba nɛ ña-hɩɖɛ sɛɛ tataa cɩnɛ nɛ mɛntɛzɩ labʋ tʋmɩyɛ nɖɩ ŋɖʋ-m yɔ. ⁵ Pʋ-yɔɔ lɛ, Caa! Lɛɛlɛɛyɔ, mɔnpɔzʋʋ-ŋ se ŋyele nɛ ma-hɩɖɛ sɛɛ ñɔ-cɔlɔ ɛzɩ ɖɩɩsɛʋ nɛ pʋcɔ ŋla kedeŋa yɔ.

⁶ Meyeba nɛ ɛyaa mba ŋlɩzɩ kedeŋa kanɛ kɔ-yɔɔ nɛ ŋɖʋzɩ me-nesi taa yɔ, pasɩm-ŋ. Ñaatɩnɩ-wɛ nɛ ŋɖʋzɩ-wɛ me-nesi taa nɛ pɔɖɔŋ ñɔ-tɔm yɔɔ. ⁷ Lɛɛlɛɛyɔ, panawa se mbʋ pɩtɩŋa payɩ ŋɖʋzɩ me-nesi taa yɔ, ñɔ-cɔlɔ pɩlɩnaa. ⁸ Mbʋ pʋyɔɔ yɔ, meheyi-wɛ tɔm ndʋ ŋheyi-m yɔ nɛ petisi-tʋ. Pana toovenim se ñɔ-cɔlɔ malɩnaa nɛ petisi se ñetiyini-m.

⁹ Mentendiɣ-ŋ pɔ-yɔɔ. Maatendiɣ-ŋ kedeŋa ñɩma yɔɔ, ɛlɛ, mba ŋɖʋzɩ me-nesi taa yɔ, pɔ-yɔɔ mentendiɣ-ŋ. Mbʋ pʋyɔɔ yɔ, ñatɩnɩ-wɛ. ¹⁰ Mbʋ pɩtɩŋa payɩ mɛwɛna yɔ, ñatɩnɩ-pʋ nɛ mbʋ pɩtɩŋa payɩ ña ñɛwɛna yɔ, mantɩnɩ-pʋ. Mba yekina nɛ ma-hɩɖɛ sɛɛ. ¹¹ Maatasɩɣ wɛʋ kedeŋa yɔɔ, ɛlɛ, mba ñɛwɛ kɔ-yɔɔ. Ma lɛ, mɔnkɔŋ ñɔ-cɔlɔ.

Ɛsɔ Caabiyuu! Ño-ɖoŋ taa lɛ, ɖɔkɩ-wɛ nɛ pala nɔɔ kʋɖʋmaɣ ɛzɩ ma nɛ ŋ ɖɩlabʋ yɔ. ¹² Alɩwaatʋ ndʋ ma nɛ wɛ ɖɩɩwɛɛ yɔ, ño-ɖoŋ taa mɔncɔnɩ mba ŋɖʋzɩ me-nesi taa yɔ pɔ-yɔɔ: mohuuzi pɔ-yɔɔ nɛ pa-taa nɔɔyʋ tele nɛ pɩtasɩnɩ weyi pɩɩwɛɛ se ele nɛ tɔm ndʋ pama Ɛsɔtɔm Takayaɣ taa yɔ, tɩla yɔ. ¹³ Ɛlɛ, lɛɛlɛɛyɔ mɔnkɔŋ ñɔ-cɔlɔ. Mɛwɛ kedeŋa yɔɔ yɔɔ mɔyɔɔdʋʋ mbʋ se pa-taa ɛtɛzɩ hʋlʋmʋʋ ɛzɩ ma yɔ. ¹⁴ Mawɩlɩ-wɛ ñɔ-tɔm nɛ kedeŋa ñɩma paɖɩɣ-wɛ, mbʋ pʋyɔɔ yɔ, pa nɛ wɛ patakaa lɩmaɣza ɛzɩ ma nɛ kedeŋa ñɩma mba ɖɩwɛʋ nɛ ɖɩtakaa lɩmaɣza yɔ. ¹⁵ Maatendiɣ-ŋ se ŋkʋsɩ-wɛ kedeŋa yɔɔ, ɛlɛ, mentendiɣ-ŋ se ŋcɔnɩ pɔ-yɔɔ nɛ *Kañadʋ Satanɩ ɛtaalabɩ-wɛ pʋyʋ. ¹⁶ Pa nɛ kedeŋa ñɩma patakaa lɩmaɣza ɛzɩ ma nɛ wɛ ɖɩwɛʋ nɛ ɖɩtakaa lɩmaɣza yɔ. ¹⁷ Yele se pɩtɩŋnɩ toovenim yɔɔ nɛ pɛkɛ ña-ñɩma pilim. Ñɔ-tɔm lɛ toovenim. ¹⁸ Mentiyi-wɛ kedeŋa yɔɔ ñɩma hɛkʋ taa ɛzɩ ŋtiyuu-m kɔ-yɔɔ ñɩma hɛkʋ taa yɔ. ¹⁹ Pɔ-yɔɔ lɛ, mɛncɛlɩɣ-ŋ ma maɣmaɣ man-tɩ se pɩtɩŋnɩ toovenim yɔɔ nɛ mba ɖɔɖɔ pɛkɛ ña-ñɩma.

²⁰ Pɩtɛkɛ mɔn-tɔmkpɛlɩkɩyaa yɔɔ ɖeke mentendiɣ-ŋ. Ɛlɛ, mentendiɣ-ŋ ɖɔɖɔ mba pɩtɩŋɩɣnɩ tɔmkpɛlɩkɩyaa mba pɔ-tɔm susuu yɔɔ nɛ pɛwɛnɩ lidaʋ mɔ-yɔɔ yɔ pɔ-yɔɔ. ²¹ Mentendiɣ-ŋ se ŋyele nɛ patɩŋa payɩ pala nɔɔ kʋɖʋmaɣ. Caa! Yele ɖa nɛ wɛ ɖɩwɛɛ ɖama taa ɛzɩ ma nɛ ŋ ɖɩwɛʋ ɖama taa yɔ. Mbʋ wɩlɩɣnɩ kedeŋa ñɩma se ñetiyini-m. ²² Maha-wɛ koboyaɣ ŋga ŋha-m yɔ se pala nɔɔ kʋɖʋmaɣ ɛzɩ ma nɛ ŋ ɖɩlabʋ yɔ. ²³ Mbʋ ma nɛ wɛ ɖɩwɛ ɖama taa nɛ ma nɛ ŋ ɖɩwɛɛ ɖama taa. Mentendiɣ-ŋ se ŋyele nɛ pala nɔɔ kʋɖʋmaɣ siŋŋ nɛ kedeŋa ñɩma tɩlɩ se ñetiyini-m. Ɖɔɖɔ lɛ, ŋsɔɔlɩ-wɛ ɛzɩ ŋsɔɔlʋʋ-m yɔ.

²⁴ Caa! Ñaɖʋzɩnɩ-wɛ me-nesi taa. Me-liu wɛɛ se pɛwɛɛ ɖenɖe mɔnkɔŋ wɛʋ yɔ nɛ pana mon-koboyaɣ. Ñahanɩ-m-kɛ, mbʋ pʋyɔɔ yɔ, ŋŋsɔɔlɩ-m nɛ pʋcɔ ŋla kedeŋa. ²⁵ Caa kʋtʋʋzʋ! Keɖeŋa ñɩma tasɩm-ŋ. Ɛlɛ, ma mansɩm-ŋ nɛ mba ŋɖʋzɩ me-nesi taa yɔ, patɩlɩ se ñetiyini-m. ²⁶ Meyeba nɛ pasɩm-ŋ, mɛwɛɣ pʋ-yɔɔ tam. Peeye pɔsɔɔlʋʋ ɖama ɛzɩ ŋsɔɔlʋʋ-m yɔ nɛ ma nɛ wɛ ɖɩwɛɛ ɖama taa.”