Yesu kuluu abalʋ weyi palʋlɩ-ɩ nɛ yʋlʋmtʋ yɔ ɛ-ɛza yɔ
9
1-2 Yesu nɛ ɛ-tɔmkpɛlɩkɩyaa pɔɖɔŋaɣ. Pɩkɛdaa lɛ, pana abalʋ nɔɔyʋ, palʋlɩ-ɩ nɛ yʋlʋmtʋ. Peeye pɔpɔzɩ-ɩ se: “Wɩlɩyʋ! Pɩlabɩ ɛzɩma palʋlɩ abalʋ ɛnɛ nɛ yʋlʋmtʋ mbʋ? Ɛ-maɣmaɣ ɛ-kɩwɛɛkɩm yɔɔ yaa mba palʋlɩ-ɩ yɔ pa-ñɩmbʋ yɔɔ?”
3 Ɛlɛ ecosi-wɛ se: “Pɩtɛkɛ ɛ-kɩwɛɛkɩm yɔɔ yaa mba palʋlɩ-ɩ yɔ pa-ñɩmbʋ yɔɔ. Ɛyʋlʋmɩ mbʋ se ɛyaa ɛpɩzɩ pana ɛzɩma mbʋ Ɛsɔ tɩŋɩɣnɩ ɛ-yɔɔ nɛ ɛla ɛ-tʋmɩyɛ yɔ. 4 Pʋwɛɛ se ɖɩla weyi etiyi-m yɔ ɛ-tʋma alɩwaatʋ ndʋ tɛʋ fema yɔ. Mbʋ pʋyɔɔ yɔ, ɖoo kɔŋ yuu nɛ nɔɔyʋ ɛɛpɩzɩɣ ɛla tʋmɩyɛ. 5 Alɩwaatʋ ndʋ mɛwɛ kedeŋa yɔɔ yɔ, ma lɛ ɛyaa kpeekpe ñalɩmɩyɛ.”
6 Ɛtɛm yɔɔdʋʋ mbʋ lɛ, ɛtɔ ndaatʋ tataa nɛ enuuti tɛtʋ nɛ ɛtaa yʋlʋm ɛnʋ ɛ-ɛza 7 nɛ eheyi-i se: “Wolo ŋkɔ lɩm Siloowee kujomuu taa.” Siloowee tɔbʋʋ se Tiyiyu. Ewobi ɛkɔ mbʋ nɛ ɛpɩsɩ lɛ, ɛ-ɛza kuli.
8 Mba pɛ-tɛ ñɔtɩnɩ-ɩ yɔ, paawɛ peeye. Pa nɛ mba paana-ɩ ɛsʋlʋmaɣ yɔ, pana-ɩ mbʋ lɛ, pɔtɔŋ se: “Pɩtɛkɛ abalʋ ɛnɛ ɛɛcaɣna nɛ ɛsʋlʋmʋʋ yaa we?” 9 Nabɛyɛ se: “Ɛnʋ.” Lɛlaa se: “Pɩlɩ! Pɩtɛkɛ ɛnʋ, ɛlɛ, ɛlɩ-ɩ kɩlɩʋ.” Peeye abalʋ ɛnʋ ɛ-maɣmaɣ ecosi-wɛ se: “Ma lɛ yeli.” 10 Pɔpɔzɩ-ɩ se: “Ɛzɩma pɩlaba nɛ ñɛ-ɛza kuli yɔ?” 11 Ecosi-wɛ se: “Abalʋ weyi payaɣ se Yesu yɔ, ɛlabɩnɩ ahɔya pazɩ nɛ ɛtaa mɛ-ɛza yɔɔ nɛ eheyi-m se: ‘Wolo Siloowee nɛ ŋkɔ lɩm.’ Peeye mowobi mɔnkɔ-pʋ nɛ mɛ-ɛza kuli.” 12 Ɛlɛ pɔpɔzɩ-ɩ se: “Abalʋ ɛnʋ ɛwɛ le?” Ecosi-wɛ se: “Mantatɩlɩ.”
Farɩsɩ ñɩma nɛ abalʋ weyi pokuli ɛ-ɛza yɔ
13 Peeye pakpaɣ abalʋ weyi pokuli ɛ-ɛza yɔ nɛ powoni Farɩsɩ ñɩma cɔlɔ. 14 Mbʋ pʋyɔɔ yɔ, *kɩyakʋ kɩhɛzʋʋ nakʋyʋ wiye Yesu kalabɩ ahɔya nɛ ekulini ɛ-ɛza. 15 Peeye paba ñɔpɔzɩ-ɩ ɖɔɖɔ ɛzɩma mbʋ pɩlaba nɛ ɛ-ɛza kuli yɔ. Ɛlɛ eheyi-wɛ se: “Ɛta mɛ-ɛza yɔɔ ahɔya pazɩ nɛ mowolo mɔnkɔ lɩm nɛ manpazɩ naʋ.”
16 Pʋ-yɔɔ pa-taa nabɛyɛ tɔŋaɣ se: “Abalʋ weyi ɛlabɩ mbʋ yɔ, ɛɛpɩzɩɣ ɛlɩnɩ Ɛsɔ cɔlɔ, mbʋ pʋyɔɔ yɔ, ɛɛɖɔŋ kɩyakʋ kɩhɛzʋʋ paɣtʋ yɔɔ.” Lɛlaa se: “Ɛzɩma kɩwɛɛkɩm laɖʋ pɩzɩɣ ɛla hama lakasɩ mbʋ?” Peeye pɩtayɩ pɛ-hɛkʋ taa. 17 Ɛlɛ Farɩsɩ ñɩma tasɩ pɔzʋʋ abalʋ ɛnʋ se: “Nɛ ña yɔ, ŋyɔɔdʋʋ weyi ekuli ñɛ-ɛza yɔ ɛ-tɔm se we?” Ecosi-wɛ se: “Ɛkɛ *lɔɔyaɣ tʋ.”
18 Paa mbʋ yɔ, Yuda ñɩma awiya caɣaɣ se panɩɩ ɛ-ñɩma nɔɔ taa nɛ pʋcɔ petisi se ɛɛyʋlʋmaa nɛ lɛɛlɛɛyɔ ɛnaɣ. Pʋ-yɔɔ paya-wɛ 19 nɛ pɔpɔzɩ-wɛ se: “Mɩ-pɩyalʋ weyi ɩtɔŋ se ɩlʋlɩ-ɩ nɛ yʋlʋmtʋ yɔ, ɛnʋ yɔ yaa we? Ɛzɩma pɩlaba nɛ lɛɛlɛɛyɔ ɛnaɣ?” 20 Ɛ-ñɩma cosi-wɛ se: “Ɖɩsɩm-ɩ se ɛkɛ ɖa-pɩyalʋ, ɖɩlʋlɩ-ɩ nɛ yʋlʋmtʋ. 21 Ɛlɛ, ɖɩtana se ɛzɩma pɩlaba nɛ lɛɛlɛɛyɔ ɛ-ɛza kuli. Ɖɩtasɩ ɖɔɖɔ weyi ekuli ɛ-ɛza yɔ. Ɩpɔzɩ-ɩ, ɛtɛkɛ pɩɣa, ɛ-maɣmaɣ ɛpɩzɩɣ ecosi-mɩ!” 22 Sɔɔndʋ kpaɣaɣ-wɛ nɛ Yuda ñɩma awiya yɔɔ pɔyɔɔdaɣ mbʋ. Mbʋ pʋyɔɔ yɔ, paanɩnɩ ɖama se: “Ye nɔɔyʋ ɛyɔɔdaa se Yesu lɛ *Weyi Ɛsɔ Lɩzaa Yɔ yɔ, paɖaŋ-ɩ se ɛtaatasɩ wobu Ɛsɔ ɖɩsɛyɛ taa.” 23 Pʋ-yɔɔ abalʋ ɛnʋ ɛ-ñɩma tɔm se: “Ɛtɛkɛ pɩɣa, ɩpɔzɩ-ɩ!”
24 Peeye Farɩsɩ ñɩma tasɩ abalʋ ɛnʋ yaʋ nɛ peheyi-i se: “Ɛsɔ ɛsɩndaa ŋwɛɛ, yɔɔdɩ toovenim. Ɖa lɛ, ɖɩnawa se weyi ekuli ñɛ-ɛza yɔ, ɛkɛ kɩwɛɛkɩm laɖʋ.” 25 Ɛlɛ ecosi-wɛ se: “Mantana se ɛkɛ kɩwɛɛkɩm laɖʋ naa ɛtɛkɛ. Ɛlɛ, pʋyʋ kʋɖʋm mansɩma: maayʋlʋmaa, ɛlɛ, lɛɛlɛɛyɔ manaɣ.”
26 Peeye pɔpɔzɩ-ɩ se: “Ɛbɛ ɛlabɩ-ŋ? Ɛzɩma ekuli ñɛ-ɛza?” 27 Ecosi se: “Mɛntɛm-mɩ heyuu, ɛlɛ ɩtanɩnɩ-m. Pɩlabɩ ɛzɩma nɛ ɩcaɣ se mantasɩ yɔɔdʋʋ nɛ ɩnɩɩ yɔ? Mɩ ɖɔɖɔ, ɩcaɣ se ɩpɩsɩ ɛ-tɔmkpɛlɩkɩyaa naa we?”
28 Peeye patʋ-ɩ nɛ peheyi-i se: “Ñɛkɛnɩ ɛ-tɔmkpɛlɩkɩyʋ! *Mooyiizi tɔmkpɛlɩkɩyaa ɖa ɖɛkɛnaa. 29 Ɖɩnawa se Ɛsɔ yɔɔdɩnɩ Mooyiizi. Piyele ɛnʋ yɔ, ɖɩtatɩɩsɩm ɖenɖe ɛlɩnaa yɔ!” 30 Abalʋ ɛnʋ ɛpɩsɩnɩ-wɛ se: “Mbʋ pɩɖɩɣzɩɣ-m yɔ lɛ se: ɩɩsɩŋ ɖenɖe ɛlɩnaa yɔ, ɛlɛ, ekuli mɛ-ɛza! 31 Ɖɩnawa se Ɛsɔ ɛɛnɩɣnɩ kɩwɛɛkɩm laɖaa, ɛlɛ, weyi ɛñaŋ-ɩ nɛ ɛlakɩ mbʋ e-liu wɛɛ yɔ, ɛnʋ ɛnɩɣna. 32 Ɖooo yɔ, ɖɩtanɩdɩ se nɔɔyʋ kuli weyi palʋlɩ-ɩ nɛ yʋlʋmtʋ yɔ ɛ-ɛza kaʋ. 33 Ye abalʋ ɛnɛ ɛtaalɩnɩ Ɛsɔ cɔlɔ yɔ, ɛtaapɩzɩ ɛla nabʋyʋ.” 34 Ɛlɛ papɩsɩnɩ-ɩ se: “Ɖooo ɛzɩ palʋlʋʋ-ŋ yɔ, kɩwɛɛkɩm taa ŋwɛ ñatɩŋa pilim. Ñacaɣnɩ se ŋkpɛlɩkɩ-ɖʋ yaa we?”
Peeye pɔɖɔɔnɩ-ɩ Ɛsɔ ɖɩsɛyɛ taa.
Mba puhuuzi pa-lɩmaɣza yɔɔ yɔ
35 Pɔɖɔɔnɩ abalʋ ɛnʋ mbʋ lɛ, Yesu nɩɩ. Pɩkɛdaa lɛ, ɛkatɩ-ɩ nɛ ɛpɔzɩ-ɩ se: “Ŋwɛnɩ lidaʋ *Ɛyʋ Pɩyalʋ yɔɔ yaa we?” 36 Ecosi-i se: “Kɩpaɣlʋ! Ɛnʋ lɛ anɩ? Heyi-m nɛ mɛwɛnɩ lidaʋ ɛ-yɔɔ.” 37 Yesu cosi-i se: “Ɛnʋ ɖaɣnɩnɩ-ŋ yɔɔdɩnaʋ nɛ ŋnaɣ-ɩ mbʋ yɔ.” 38 Peeye ɛtɔm se: “Kɩpaɣlʋ! Mɛwɛnɩ lidaʋ ñɔ-yɔɔ.” Ɛlɛ eluŋ Yesu tɛɛ nɛ ɛɖʋ-ɩ hɩɖɛ.
39 Peeye Yesu tɔm se: “Mɔnkɔm kedeŋa yɔɔ cɩnɛ se mahʋnɩ ɛyaa nɛ mba paanaɣ yɔ, pana nɛ mba paba naɣ yɔ, payʋlʋmɩ.” 40 Farɩsɩ ñɩma nabɛyɛ kɛwɛ peeye. Panɩ mbʋ lɛ, pɔpɔzɩ-ɩ se: “Ɖa ɖɔɖɔ ɖɩkɛ yʋlʋmaa naa we?” 41 Peeye ecosi-wɛ se: “Ye ɩɩkɛ yʋlʋmaa yɔ, mɩ-kɩwɛɛkɩm taawɛɛ mɩ-yɔɔ. Ɛlɛ, ɖenɖe ɩtɔŋ se ɩnaɣ yɔ, mɩ-kɩwɛɛkɩm wɛɣ mɩ-yɔɔ mbʋ.”