Yesu nɛ Samaarɩɩ halʋ pɔ-tɔm
4
1 Kɩpaɣlʋ Yesu kanɩwa se peheyi Farɩsɩ ñɩma se ɛyaa mba ɛlakaɣ *lɩm sɔʋ sɔnzɩ yɔ, pakɩlaɣ ɖɔʋ Yohanɛɛsɩ ñɩma. 2-3 Pʋ-yɔɔ ɛkʋyɩ Yudee egeetiye taa nɛ ɛpɩsɩ Galilee ñɩnɖɛ taa. Toovenim lɛ, pɩtɛkɛ ɛnʋ lakaɣnɩ-wɛ-sɩ, ɛlɛ, ɛ-tɔmkpɛlɩkɩyaa lakaɣna. 4 Pʋcɔ ewolo Galilee lɛ, pɩɩwɛɛ se ɛtɩŋnɩ Samaarɩɩ egeetiye taa. 5 Ɛɖɛɣaɣ lɛ, ɛtalɩ Samaarɩɩ egeetiye taa tɛtʋ ndʋ payaɣ se Siicaarɩ yɔ tɩ-taa. Tɩwɛ hayɩm mbʋ Yakɔɔbʋ ha ɛ-pɩyalʋ *Yozɛɛfʋ yɔ pʋ-cɔlɔ. 6 Ɛtalɩ peeye lɛ, pɩtalɩ ɛzɩ wɩsɩ siɣu yɔ. Pɩɩnɩ-ɩ ɖɔɖɔ, nɛ ɛcaɣ Yakɔɔbʋ lɔkɔ nɔɔ.
7-8 Ɛhɛzaɣ mbʋ lɛ, ɛ-tɔmkpɛlɩkɩyaa wolo tɔɔnaɣ yabʋ. Alɩwaatʋ ndʋ lɛ, Samaarɩɩ halʋ nɔɔyʋ wolo lɩm luu nɛ Yesu pɔzɩ-ɩ se: “Ha-m lɩm nɛ mɔñɔɔ.” 9 Peeye halʋ ɛnʋ ɛpɔzɩ-ɩ se: “Ŋkɛ Yuda tʋ lɛ, ŋcalɩ ña-taa se we nɛ ŋsʋlʋmʋʋ-m lɩm?” Halʋ ɛnʋ, ɛpɔzɩ-ɩ mbʋ, mbʋ pʋyɔɔ yɔ, Samaarɩɩ ñɩma nɛ Yuda ñɩma paacaɣ ɖama.
10 Ɛlɛ Yesu heyi-i se: “Ye ŋŋsɩm mbʋ Ɛsɔ haɣ yɔ nɛ ŋtɩlɩ ɖɔɖɔ weyi ɛsʋlʋmʋʋ-ŋ lɩm yɔ yɔ, ñaasʋlʋmɩnɩ-ɩ, pʋbʋ ɛɛha-ŋ lɩm mbʋ pɩhaɣ wezuu yɔ.” 11 Ɛlɛ halʋ ɛnʋ eheyi Yesu se: “Ɖajaa! Lɔkɔ wɛ cukaŋ pɩtɩɩfɛyɩ, ŋgʋ ŋfɛyɩnɩ tɔka ŋga poluuni lɩm yɔ. Ɛzɩma ŋpɩzɩɣ ŋhiɣ lɩm mbʋ pɩhaɣ wezuu yɔ? 12 Ɖɔ-cɔzɔ Yakɔɔbʋ yebinini-ɖʋ lɔkɔ ŋgʋ. Ɛ nɛ e-piya nɛ e-wondu pɔñɔ kɩ-taa lɩm. Ŋmaɣzɩɣ se ŋkɩlɩ Yakɔɔbʋ yaa we?” 13 Peeye Yesu cosi-i se: “Weyi ɛñɔʋ lɩm pʋnɛ yɔ, lɔkɔtʋ tasɩɣ-ɩ ɖɔkʋʋ. 14 Weyi ɛlɛ ñɔʋ lɩm mbʋ ma mahaɣ-ɩ yɔ, lɔkɔtʋ ɛɛtasɩɣ-ɩ ɖɔkʋʋ wiɖiyi kaʋ. Lɩm mbʋ, pʋwɛɣ ɛ-taa ɛzɩ hiɖe nɖɩ ɖɩ-taa lɩm mbʋ pɩhaɣ wezuu pɩɩtɛŋ yɔ pɩlɩɣnɩ tam yɔ.” 15 Peeye halʋ ɛnʋ ecosi-i se: “Ɖajaa! Ha-m lɩm mbʋ nɛ lɔkɔtʋ ɛtaatasɩ-m ɖɔkʋʋ nɛ mantasɩ kɔm cɩnɛ se moluu lɩm.”
16 Ɛlɛ Yesu heyi-i se: “Wolo ŋyaa ña-walʋ nɛ ña nɛ ɩ ɩkɔɔ.” 17 Peeye halʋ heyi-i se ɛfɛyɩnɩ walʋ. Yesu cosi-i se: “Ŋwɛnɩ toovenim se ŋtɔ se ŋfɛyɩnɩ walʋ, 18 mbʋ pʋyɔɔ yɔ, ŋtɛm walʋʋ abalaa kagbaanzɩ nɛ abalʋ weyi ña nɛ ɩ ɩwɛ lɛɛlɛɛyɔ yɔ, ɛtɛkɛ ña-walʋ. Ŋyɔɔdɩ toovenim.” 19 Halʋ ɛnʋ ecosi-i se: “Ɖajaa! Manaɣ se ŋkɛ *lɔɔyaɣ tʋ. 20 Welesi ŋnɩɩ, Samaarɩɩ ñɩma ɖa, ɖɔ-cɔzɔnaa luŋaɣ Ɛsɔ tɛɛ pʋʋ kʋnɛ kʋ-yɔɔ nɛ mɩ Yuda ñɩma mɩtɔŋ se Yeruusalɛm pʋwɛɛ se poluŋ ɛ-tɛɛ. Ña ñamaɣzɩɣ se we?”
21 Peeye Yesu heyi-i se: “Halʋ ña! Tisi se alɩwaatʋ natʋyʋ kɔŋ nɛ paatasɩɣ Caa Ɛsɔ tɛɛ luŋuu pʋʋ kʋnɛ kʋ-yɔɔ yaa Yeruusalɛm. Ɛlɛ, poluŋuu ɛ-tɛɛ paa le. 22 Samaarɩɩ ñɩma mɩ! Ɩɩsɩŋ Ɛsɔ weyi ɛ-tɛɛ iluŋuu yɔ. Ɖa Yuda ñɩma lɛ, ɖɩsɩm weyi ɛ-tɛɛ ɖiluŋuu yɔ: ɖɛ-hɛkʋ taa ñʋʋ yaɖʋ lɩɣna. 23 Ɛlɛ, alɩwaatʋ natʋyʋ kɔŋ, halɩ tɩtɛm talʋʋ. Tɩ-taa Caa Ɛsɔ tɛɛ luŋiyaa tɩŋɩɣnɩ ɛ-Kalɩzaɣ yɔɔ nɛ poluŋ ɛ-tɛɛ nɛ toovenim. Mba poluŋuu ɛ-tɛɛ mbʋ yɔ, mba ɛñɩnɩɣ. 24 Ɛyaa ɛɛnaɣ Ɛsɔ. Pʋ-yɔɔ lɛ, pʋwɛɛ se ɛ-tɛɛ luŋiyaa ɛtɩŋnɩ ɛ-Kalɩzaɣ yɔɔ nɛ poluŋ ɛ-tɛɛ nɛ toovenim.”
25 Ɛlɛ halʋ ɛnʋ eheyi Yesu se: “Manawa se *Weyi Ɛsɔ Lɩzaa yɔ ɛkɔŋ, ɛnʋ payaɣ se Krɩstʋ. Ɛkɔŋ lɛ, ɛlɩzɩ-ɖʋ pɩtɩŋa payɩ pʋ-tɔbʋʋ.” 26 Peeye Yesu cosi-i se: “Weyi ma mɔyɔɔdʋʋnɩ-ŋ yɔ, ma lɛ pɩtɛ ɛyʋ.”
27 Yesu tɔmkpɛlɩkɩyaa pɩsaa lɛ, pamaɣnɩ ɛyɔɔdaɣnɩ halʋ ɛnʋ mbʋ nɛ pɩɖɩɣzɩ-wɛ yem pɩŋŋ. Ɛlɛ, pa-taa nɔɔyʋ takatɩ nɛ ɛpɔzɩ se: “Ɛbɛ ŋcaɣnɩ-ɩ?” yaa “Pɩlabɩ ɛzɩma nɛ ŋyɔɔdʋʋnɩ-ɩ?”
28 Peeye halʋ ɛnʋ eyebi ɛ-lɩm peɣa nɛ ɛpɩsɩ tɛtʋ taa nɛ eheyiɣ ɛyaa se: 29 “Iwolo ɩna abalʋ weyi eheyi-m mbʋ pɩtɩŋa payɩ malaba yɔ. Yaa ɛnʋ lɛ *Weyi Ɛsɔ Lɩzaa Yɔ?” 30 Eheyi-wɛ mbʋ lɛ, palɩɩ tɛtʋ taa se powoki Yesu cɔlɔ.
31 Alɩwaatʋ ndʋ tɩ-taa Yesu tɔmkpɛlɩkɩyaa tendaɣ-ɩ se: “Wɩlɩyʋ! Kɔɔ ŋtɔɔ tɔɔnaɣ.” 32 Ɛlɛ, ecosi-wɛ se: “Mɔntɔkɩ tɔɔnaɣ ŋga yɔ, ɩtasɩm-kɛ.” 33 Peeye tɔmkpɛlɩkɩyaa mba pɔpɔzaɣ ɖama se: “Yaa nɔɔyʋ woni-i tɔɔnaɣ?” 34 Ɛlɛ Yesu heyi-wɛ se: “Mɔn-tɔɔnaɣ lɛ se mala mbʋ weyi etiyi-m yɔ e-liu wɛɛ yɔ nɛ mala tʋmɩyɛ nɖɩ ɛɖʋ-m yɔ nɛ mɛntɛm-ɖɩ.”
35 Ɛtasɩ-wɛ heyuu se: “Mɩ mɩtɔŋ se pɩsɛɣ fenasɩ naanza nɛ pakʋ tɔɔnaɣ, ɛlɛ, ma meheyiɣ-mɩ se ɩcɔnɩ camɩyɛ, tɔɔnaɣ tɛm pɩʋ hayɩm taa se pakʋm-kɛ. 36 Halɩ pɛtɛm kʋnɖʋ hɛyʋʋ nɛ ɛkʋŋ tɔɔnaɣ*fb* nɛ ekpeɣliɣ-kɛ se kehiɣ wezuu pɩɩtɛŋ. Pʋ-yɔɔ ɖuyu nɛ kʋnɖʋ pa-laŋa kpɛndɩɣ hʋlʋmʋʋ. \fm b \fr (4.36) Tɔɔnaɣ: \f hɔɔlasɩ sɩnɛ sɩ-taa lɛ, ɛyaa pamaɣzɩnɩ tɔɔnaɣ. 37 Mbʋ pʋyɔɔ yɔ, eduuye nɖɩ potuwaa se: ‘Lɛlaa ɖuu nɛ lɛlaa kʋŋ’ yɔ, ɖɩkɛ toovenim. 38 Mentiyi-mɩ nɛ iwolo ɩkʋ hayɩm mbʋ pɩ-taa ɩtala tʋmɩyɛ kaʋ yɔ. Mbʋ lɛlaa labɩ tʋmɩyɛ nɛ mɩ mɩwaa pɔ-yɔɔ.” \f*
39 Halʋ ɛnʋ, ewobi Samaarɩɩ tɛtʋ ndʋ tɩ-taa nɛ ɛkɛdɩ mbʋ pɩtɩŋa payɩ Yesu labɩ-ɩ yɔ lɛ, ɛyaa sakɩyɛ wɛnɩ lidaʋ ɛlɛ yɔɔ. 40 Pʋ-yɔɔ alɩwaatʋ ndʋ Samaarɩɩ ñɩma wobi ɛ-cɔlɔ lɛ, petendi-i se ɛcaɣ pɔ-cɔlɔ nɛ etisi ɛcaɣ kɩyakɩŋ naalɛ peeye.
41 Ɛ-tɔm maɣmaɣ yɔɔ lɛ, ɛyaa lɛlaa sakɩyɛ tasɩ wɛnaʋ lidaʋ ɛ-yɔɔ. 42 Peeye peheyi halʋ ɛnʋ se: “Lɛɛlɛɛyɔ, pɩtɛkɛ tɔm ndʋ ŋheyi-ɖʋ yɔ, ti-ɖeke tɩ-yɔɔ ɖɩwɛnɩ lidaʋ Yesu yɔɔ. Ɛlɛ, ɛyɔɔdaa nɛ ɖa-maɣmaɣ ɖɩnɩɩ nɛ ɖɩna se toovenim ɛkɛ ɛyaa tɩŋa payɩ ñʋʋ yaɖʋ, pʋ-yɔɔ ɖɩwɛnɩ lidaʋ ɛ-yɔɔ.”
Karɩka sɔsɔɔ nakɛyɛ pɩyalʋ yɔɔ cɛbʋ yɔ
(Luk 7.1-10)
43 Yesu caɣ kɩyakɩŋ naalɛ Samaarɩɩ tɛtʋ ndʋ tɩ-taa peeye lɛ, ɛkʋyɩ ɛɖɛɛ Galilee egeetiye taa. 44 Ŋgʋ, Yesu kɔyɔɔdaa se: “Patakpaɣ *lɔɔyaɣ tʋ se ɛkɛ pʋyʋ ɛ-maɣmaɣ ɛ-tɛ.” 45 Ɛlɛ, ɛtalɩ Galilee lɛ, peeye ñɩma mʋ-ɩ ɖeu. Mbʋ pʋyɔɔ yɔ, paawobi ɖɔɖɔ Yeruusalɛm kazandʋ tɔɔʋ nɛ pana mbʋ pɩtɩŋa payɩ ɛɛlaba yɔ.
46 Peeye ɛpɩsɩ Kana tɛtʋ taa Galilee ɖenɖe ɛɛlaba nɛ lɩm pɩsɩ sʋlʋm yɔ. Karɩka sɔsɔɔ nakɛyɛ kɛwɛ peeye, pɩwɩɣaɣ ka-pɩyalʋ. Ɛɛwɛ Kapɛrnayum tɛtʋ taa. 47 Karɩka ŋga, kanɩwa se Yesu lɩnɩ Yudee egeetiye taa nɛ ewolo Galilee ñɩnɖɛ taa lɛ, kowolo ɛ-cɔlɔ nɛ ketendi-i se ewolo Kapɛrnayum nɛ ɛla nɛ ka-pɩyalʋ weyi pɩkazɩ-ɩ fezuu ɖalaa yɔ, ɛ-yɔɔ cɛ. 48 Peeye Yesu pɔzɩ-kɛ se: “Ye ɩtana Ɛsɔ hama lakasɩ nɛ kawɩlɩsɩ, ɩɩpɩzɩɣ ɩwɛnɩ lidaʋ mɔ-yɔɔ kaʋ yaa we?” 49 Ɛlɛ kocosi-i se: “Kɩpaɣlʋ! Wolo mɛn-tɛ nɛ pʋcɔ man-pɩɣa sɩ.” 50 Peeye Yesu heyi-kɛ se: “Kpe! Ña-pɩyalʋ yɔɔ cɛba.” Ɛlɛ ketisi se Yesu tɔm ndʋ tɩkɛ toovenim nɛ kacaŋ kɛɖɛɛ.
51 Kekpeŋaɣ lɛ, ka-tʋmlaɖaa katɩ-kɛ nɛ peheyi-kɛ se: “Ña-pɩɣa yɔɔ cɛba!” 52 Kɔpɔzɩ-wɛ se alɩwaatʋ ndʋʋ pɩpazɩ-kɛ labʋ wee wee? Pocosi se: “Ɖeɖe wɩsɩ taa ñɩɣyʋʋ kʋɖʋmʋʋ yɔɔ ka-kɩnamɩyɛ cɛba.” 53 Peeye kɔtɔzaa se alɩwaatʋ ndʋ tɩ-yɔɔ ɖeyi ɖeyi Yesu keheyi-kɛ se: “Ña-pɩyalʋ yɔɔ cɛba.” Pʋ-yɔɔ ka nɛ kɔ-hɔʋ taa ñɩma tɩŋa payɩ pɛwɛnɩ lidaʋ Yesu yɔɔ.
54 Hama lakasɩ naalɛ ñɩnzɩ Yesu labɩ Galilee ɛzʋnɔ. Ɛlɩnaʋ Yudee nɛ ɛpɩsɩ yɔ ɛlabɩ-sɩ.