Luka 22

Patam Yesu yɔɔ nɔɔ yɔ

(Mat 26.1-5,14-16; Mrk 14.1-2,10-11; Yoh 11.45-53)

¹ Izrɛɛlɩ ñɩma Yomiye Taa Lɩʋ *Kazandʋ ndʋ pɔtɔkɩ sɔsɔɔna fɛyɩ tindine yɔ, kɩwɩzaa. ² *Cɔjɔnaa *sɔsaa nɛ paɣtʋ wɩlɩyaa pañɩnɩ ɛzɩma mbʋ paala nɛ pakpa Yesu hɛɛɛ nɛ pakʋ-ɩ yɔ. Mbʋ pʋyɔɔ yɔ, peseɣaɣ ɛyaa samaɣ.

³ Peeye *Kañadʋ Satanɩ lɩmaɣza sʋ Yudaasɩ weyi pakʋm-ɩ hɩɖɛ se Iskarɩyɔɔtɩ yɔ ɛ-taa. Ɛkɛ ɖɔɖɔ Yesu tɔmkpɛlɩkɩyaa hiu nɛ naalɛ taa lɛlʋ. ⁴ Ɛkʋyɩ faŋŋ nɛ ewolo ɛna *cɔjɔnaa *sɔsaa nɛ Ɛsɔ ɖɩɣa yɔɔ cɔnɩyaa ñʋŋ tɩnaa. Ɛna-wɛ nɛ ɛ nɛ wɛ pala lɩmaɣza se pana ɛzɩma mbʋ ɛɛla nɛ ɛkpa Yesu nɛ ɛɖʋzɩ pe-nesi taa yɔ. ⁵ Panɩ mbʋ lɛ, pa-taa la leleŋ pɩŋŋ nɛ paɖʋ se pɛcɛlɩɣ-ɩ liidiye. ⁶ Yudaasɩ tisi nɛ ɛpazɩ ñɩnʋʋ alɩwaatʋ ndʋ ɛyaa ɛɛwɛɣ yɔ se ɛkpa Yesu nɛ ɛɖʋzɩ pe-nesi taa.

Yesu ñɔɔzʋʋ Yomiye Taa Lɩʋ *Kazandʋ yɔ

(Mat 26.17-25; Mrk 14.12-21; Yoh 13.21-30)

⁷ Sɔsɔɔna Fɛyɩ Tindine *Kazandʋ wiye Yuda ñɩma laɣaɣ heɣsi nɛ pɔtɔkɩ po-Yomiye Taa Lɩʋ *Kazandʋ. Kɩyakʋ ŋgʋ kɩtalaa lɛ, ⁸ Yesu tiyi Pɩyɛ nɛ Yohanɛɛsɩ se: “Iwolo ɩlabɩ-ɖʋ kazandʋ tɔɔnaɣ.” ⁹ Peeye pɔpɔzɩ-ɩ se: “Le ŋcaɣ se ɖiwolo ɖɩlabɩ-kɛ?” ¹⁰ Ecosi-wɛ se: “Ɩsʋʋ tɛtʋ taa lɛ, isuluuni abalʋ nɔɔyʋ, ɛsɩɣlɩ lɩm nɛ peɣa. Isuluni-i lɛ, ɩtɩŋ-ɩ nɛ ɩsʋʋ ɖɩɣa ŋga ka-taa ɛsʋʋ yɔ. ¹¹ Ɩsʋwa lɛ, ɩpɔzɩ ɖɩɣa tʋ se: ‘Wɩlɩyʋ tiyini-ɖʋ se ɖɩkɔɔ ŋwɩlɩ-ɖʋ kuduyuu ŋgʋ kɩ-taa ɛ nɛ ɛ-tɔmkpɛlɩkɩyaa pacakɩ nɛ pɔtɔɔ kazandʋ yɔ.’ ¹² Ɖɩɣa tʋ ɛnʋ, ɛwɩlɩɣ-mɩ ɛsɔdaa kuduyuu sɔsɔʋ nakʋyʋ. Kɩ-taa wɛ mbʋ pɩtɩŋa pʋpɔzʋʋ-ɖʋ yɔ. Kɩ-taa peeye ɩlakɩ tɔɔnaɣ.” ¹³ Powoba lɛ, pamaɣnɩ ɛzɩ Yesu keheyuu-wɛ yɔ nɛ pala kazandʋ tɔɔnaɣ peeye.

*Yesu sɩm nɛ e-fem pɔ-yɔɔ tɔzʋʋ sɔnzɩ tɔm

(Mat 26.26-30; Mrk 14.22-26; 1 Kɔr 11.23-25)

¹⁴ Alɩwaatʋ talaa lɛ, Yesu nɛ e-*tiyiyaa powolo pacaɣ tɔɔnaɣ ɖɩtɔɔyɛ.ILLUSTRATION 14

¹⁵ Peeye eheyi-wɛ se: “Ɩcɔnɩ ɩna ɛzɩma mbʋ mɔnsɔɔlaa siŋŋ se ma nɛ mɩ ɖɩtɔɔ kazandʋ tʋnɛ nɛ pʋcɔ mansʋʋ kʋñɔŋ taa yɔ! ¹⁶ Meheyiɣ-mɩ se maatasɩɣ-kʋ tɔɔʋ kaʋ nɛ pʋkɔɔ pɩsɩnɩ kɩyakʋ ŋgʋ Ɛsɔ Kewiyaɣ kɔma yɔ.” ¹⁷ Peeye ɛkpaɣ sʋlʋm nɛ caɖaɣ nɛ ɛsɛɛ pʋ-yɔɔ Ɛsɔ nɛ ɛcɛlɩ-wɛ se: “Ɩmʋ-pʋ nɛ ɩtayɩ ɖama nɛ ɩñɔɔ.” ¹⁸ Mbʋ pʋyɔɔ yɔ, pɩkpaɣʋnɩ lɛɛlɛɛyɔ yɔ, maatasɩɣ sʋlʋm ñɔʋ nɛ pʋkɔɔ pɩsɩnɩ kɩyakʋ ŋgʋ Ɛsɔ Kewiyaɣ kɔŋ yɔ. ¹⁹ Pʋwayɩ lɛ, ɛkpaɣ tindine nɛ ɛsɛɛ ɖɩ-yɔɔ Ɛsɔ nɛ ɛcɩyɩ-ɖɩ nɛ ɛcɛlɩ-wɛ se: “Pʋnɛ lɛ mon-tomnaɣ [ŋga paha mɩ-yɔɔ yɔ. Ɩmʋ ɩtɔɔ nɛ ɩtɔzʋʋnɩ mɔ-yɔɔ.” ²⁰ Pɛtɛm tɔɔʋ lɛ, ɛkpaɣ ɖɔɖɔ sʋlʋm nɛ caɖaɣ nɛ ɛcɛlɩ-wɛ se: “Sʋlʋm pʋnɛ lɛ man-calɩm mbʋ pɩkpɛdɩɣ mɩ-yɔɔ yɔ. Pʋ-yɔɔ Ɛsɔ tɩŋɩɣna nɛ ɛɖʋ *nɔɔ haʋ kɩfam.”]

²¹ Paa mbʋ yɔ, ɩcɔnɩ ɩna: “Weyi ɛkɔŋ-m ɖʋzʋʋ koyindinaa nesi taa yɔ, ma nɛ ɩ ɖɩtɔkɩna cɩnɛ! ²² Toovenim lɛ, pʋwɛɛ se *Ɛyʋ Pɩyalʋ ɛkʋyɩ kedeŋa yɔɔ cɩnɛ ɛzɩ Ɛsɔ ɖʋʋ yɔ. Ɛlɛ, pʋtɔɔ weyi ɛɖʋzʋʋ-ɩ koyindinaa nesi taa yɔ!” ²³ Peeye ɛ-tɔmkpɛlɩkɩyaa pazɩ ɖama pɔzʋʋ se patɩlɩ pa-taa weyi ɛkaɣ labʋ mbʋ yɔ.

Sɔsɔtʋ yɔɔ tɔm hɔm

²⁴ Pʋwayɩ lɛ, Yesu tɔmkpɛlɩkɩyaa pazɩ ɖama hɔmnaʋ se pana pa-taa weyi pɔcɔŋnɩ se pɔ-sɔsɔ yɔ. ²⁵ Peeye eheyi-wɛ se: “Ɛyaa lɛlaa awiya nuutuuni-wɛ nɛ pɔsɔɔlɩ se payaa-wɛ se kɩbama. ²⁶ Ɛlɛ, pɩtamʋnɩ se pʋwɛɛ mbʋ mɩ-hɛkʋ taa. Pʋwɛɛ se mɩ-taa sɔsɔ ɛpɩsɩ ɛ-tɩ ɛzɩ mɩ-taa pɩɣa yɔ. Weyi ɛlɛ kɛ wiyaʋ yɔ, ɛpɩsɩ ɛzɩ mɩ-tʋmlaɖʋ yɔ. ²⁷ Weyi ɛtɔŋ se palabɩ-ɩ tɔɔnaɣ yɔ nɛ ɛ-tʋmlaɖʋ weyi ɛlakɩ-kɛ yɔ, akɩlaa? Pɩtɛkɛ weyi ɛtɔŋ se palabɩ-ɩ-kɛ yɔ, ɛnʋ kɩlɩna naa we? Mbʋ ɖɔɖɔ mɛwɛ mɩ-hɛkʋ taa, mɛwɛ ɛzɩ tʋmlaɖʋ yɔ.

²⁸ Mɩ lɛ, mɩɩwɛnɩ mɔn-cɔlɔ alɩwaatʋ kpeekpe man-kʋñɔmɩŋ tɩŋa taa. ²⁹ Pʋ-yɔɔ lɛ, mɛncɛlɩɣ-mɩ kewiyaɣ ɛzɩ man-Caa cɛlʋʋ-m-kɛ yɔ. ³⁰ Ɩkɔŋ caɣʋ awiya kpelisi yɔɔ nɛ ɩhʋʋnɩ *Izrɛɛlɩ ñɩma cejewee hiu nɛ naalɛ. Ɖɔɖɔ lɛ, mɔnkɔŋ-mɩ yaʋ nɛ ma nɛ mɩ ɖɩcaɣ nɛ ɖɩtɔɔ nɛ ɖɩñɔɔ men-Kewiyaɣ taa.”

Yesu yɔɔdʋʋ se Pɩyɛ kɔŋ kpɛzʋʋ se ɛtasɩm-ɩ yɔ

(Mat 26.31-35; Mrk 14.27-31; Yoh 13.36-38)

³¹ Peeye Yesu heyi Pɩyɛ se: “Siimɔɔ! Siimɔɔ! Tɩlɩ se *Kañadʋ Satanɩ pɔzɩ Ɛsɔ nʋmɔʋ se ɛtakɩ-mɩ ɛzɩ pafalʋʋ mɩla yɔ nɛ ɛna. ³² Ɛlɛ, mɛnsɛ Ɛsɔ ñɔ-yɔɔ se ŋtaalesi lidaʋ ŋgʋ ŋwɛnɩ mɔ-yɔɔ yɔ. Ŋkɔm ŋpɩsɩnɩ mɔ-yɔɔ lɛ, ŋla nɛ ña-taabalaa kpa ɖoŋ.” ³³ Peeye Pɩyɛ cosi-i se: “Kɩpaɣlʋ! Mɛntɛm man-tɩ ñɔɔzʋʋ. Paa salaka yɔ, paɖʋ ma nɛ ŋ nɛ ye sɩm yɔ, ma nɛ ŋ ɖɩsɩ.” ³⁴ Ɛlɛ Yesu heyi-i se: “Pɩyɛ! Meheyiɣ-ŋ se: pʋcɔ kalɩmɔʋ koo sɔnɔ lɛ, ŋkpɛzɩɣ tɔm naadozo se ŋtasɩm-m.”

Liidiye nɛ huyuu nɛ sɩɣa kɩɖaɣlaɣ pɔ-tɔm

³⁵ Pʋwayɩ lɛ, Yesu pɔzɩ-wɛ se: “Maatiyuu-mɩ ndaakpasɩ, ɩtɔɖɔkɩ liidiye yaa huyuu yaa naataŋgbala yɔ, nabʋyʋ tɛɖɩ-mɩ yaa we?” Pocosi-i se: “Aayɩ, nabʋyʋ tɛtɛɖɩ-ɖʋ.” ³⁶ Peeye eheyi-wɛ se: “Lɛɛlɛɛyɔ lɛ, weyi ɛwɛnɩ liidiye yɔ, pʋwɛɛ se ɛɖɔkɩ-ɖɩ. Weyi ɛwɛnɩ huyuu yɔ, ɛlɛ ɛkpaɣ-kʋ. Weyi ɛfɛyɩnɩ sɩɣa kɩɖaɣlaɣ yɔ, ɛpɛdɩ e-toko nɛ ɛyabɩ-kɛ. ³⁷ Mbʋ pʋyɔɔ yɔ, mankaɖɩɣ-mɩ se pʋwɛɛ se pɩtɩŋnɩ mɔ-yɔɔ nɛ tɔm ndʋ paama Ɛsɔtɔm Takayaɣ taa yɔ, tɩla. Ndʋ lɛ se: ‘Azaɣa hɛkʋ taa paɖʋʋ-ɩ.’ Toovenim lɛ, mɔn-tɔm ndʋ paamawa yɔ, tɩlakɩ mbʋ.” ³⁸ Peeye ɛ-tɔmkpɛlɩkɩyaa heyi-i se: “Kɩpaɣlʋ! Ɖɩwɛnɩ sɛsɩ kɩɖaɣlɩsɩ naalɛ.” Ɛlɛ ecosi-wɛ se: “Pɩmaɣaɣ.”

Yesu sɛɣʋ Ɛsɔ *Somiŋ Pʋʋ yɔɔ yɔ

(Mat 26.36-46; Mrk 14.32-42)

³⁹ Pʋwayɩ lɛ, Yesu lɩɩ se ewoki *Somiŋ Pʋʋ yɔɔ ɛzɩ etiiwokuu yɔ nɛ ɛ-tɔmkpɛlɩkɩyaa tɩŋ ɛ-wayɩ. ⁴⁰ Patalaa lɛ, eheyi-wɛ se: “Itendi Ɛsɔ se ɛtaayele nɛ pɩtakɩ-mɩ.” ⁴¹ Eheyi-wɛ mbʋ lɛ, eyebi-wɛ nɛ eposi ɛ-tɩ pazɩ nɛ eluŋ ɛ-nɩmbɔla yɔɔ nɛ etendi Ɛsɔ se: ⁴² “Hayɩ Man-Caa! Ye ŋtisiɣ yɔ, ŋlɩzɩ-m man-kʋñɔŋ sɔsɔʋ kʋnɛ kɩ-taa. Ɛlɛ, la mbʋ ñe-liu wɛɛ yɔ, taala mbʋ me-liu wɛɛ yɔ.” [\v 43 Peeye Ɛsɔ *tiyiyu nɔɔyʋ lɩ ɛ-yɔɔ nɛ ɛsɔzɩ-ɩ ɖoŋ. ⁴⁴ Paa mbʋ yɔ, Yesu laŋɩyɛ kɛwɛɛkɩ sɔsɔm nɛ ɛ-ɛzɩyɛ sɛnɩ Ɛsɔ sɛʋ kaŋ kaŋ. Soŋaɣ kalɩ ɛ-yɔɔ ɛzɩ pʋkʋʋ ɛyʋ nɛ calɩm lɩɣ yɔ nɛ kotosuu tataa ɖoyi ɖoyi.]

⁴⁵ Ɛtɛm Ɛsɔ sɛʋ lɛ, ɛkʋyɩ ɛpɩsɩ ɛ-tɔmkpɛlɩkɩyaa cɔlɔ nɛ ɛmaɣnɩ pɔɖɔŋ ɖou, mbʋ pʋyɔɔ yɔ, pɔ-hɔ pɩsaa. ⁴⁶ Ɛmaɣnɩ-wɛ mbʋ lɛ, ɛpɔzɩ-wɛ se: “Ɛbɛ laba nɛ iɖou mbʋ? Ɩkʋyɩ itendi Ɛsɔ se ɛtaayele nɛ pɩtakɩ-mɩ.”

Pakpaʋ Yesu yɔ

(Mat 26.47-56; Mrk 14.43-50; Yoh 18.3-11)

⁴⁷ Yesu yɔɔdaɣ mbʋ lɛ, Yudaasɩ weyi ɛkɛ ɛ-tɔmkpɛlɩkɩyaa hiu nɛ naalɛ taa lɛlʋ yɔ, ɛɖɛɛ ɛyaa samaɣ nakɛyɛ nɔɔ nɛ ɛ nɛ wɛ patalɩ. Patalaa lɛ, ewolo se ɛmʋzɩ ɛ-laɣzaɣ yɔɔ. ⁴⁸ Peeye Yesu pɔzɩ-ɩ se: “Yudaasɩ! Laɣzaɣ yɔɔ mʋzʋʋ ŋwɩlɩɣnɩ koyindinaa se pakpa *Ɛyʋ Pɩyalʋ ma naa we?” ⁴⁹ Yesu tɔmkpɛlɩkɩyaa mba pɛwɛ ɛ-cɔlɔ yɔ, pana mbʋ pacaɣ labʋ yɔ lɛ, pɔpɔzɩ-ɩ se: “Kɩpaɣlʋ! Ɖɩsɔbɩ-wɛ sɛsɩ naa we?” ⁵⁰ Kpaagbaa mbʋ lɛ, pa-taa lɛlʋ sɛtɩ *cɔjɔnaa ñʋʋ tʋ tʋmlaɖʋ nesi kɩbanzɩ nɩŋgbaŋʋʋ. ⁵¹ Ɛlɛ Yesu heyi-wɛ se: “Iyele mbʋ, pɩmaɣaɣ.” Peeye etukuni nɩŋgbaŋʋʋ ŋgʋ ku-lone taa nɛ kɩpɩsɩ ɛzɩ kɩɩwɛʋ yɔ.

⁵² Pʋwayɩ lɛ, Yesu pɔzɩ *cɔjɔnaa *sɔsaa nɛ Ɛsɔ ɖɩɣa yɔɔ cɔnɩyaa ñʋŋ tɩnaa nɛ *Yuda ñɩma *sɔsaa mba powobi-i kpaʋ yɔ se: “Ma mɩlʋ nɛ ɩkɔɔ se ɩkpaɣ-m nɛ sɛsɩ kɩɖaɣlɩsɩ nɛ pɔla naa we? ⁵³ Ma nɛ mɩ ɖɩɩwɛ Ɛsɔ ɖɩɣa taa kɩyakɩŋ tɩŋa, ɛlɛ mɩ-taa nɔɔyʋ taañɩnɩ se ɛkpa-m. Ɛlɛ, lɛɛlɛɛyɔ, mɩ nɛ cɩkpɛndʋʋ tɛɛ wiyaʋ mɩ-alɩwaatʋ talɩna yɔ.”

Pɩyɛ kpɛzʋʋ se ɛtasɩ Yesu yɔ

(Mat 26.57-58,69-75; Mrk 14.53-54,66-72; Yoh 18.12-18,25-27)

⁵⁴ Yesu tɛm yɔɔdʋʋ mbʋ lɛ, pakpa-ɩ se powokini-i *cɔjɔnaa ñʋʋ tʋ tɛ nɛ Pɩyɛ tɩŋɩɣ pa-wayɩ, ɛlɛ, eeposini-wɛ. ⁵⁵ Ɛtalaa lɛ, ɛmaɣnɩ paɖʋ miŋ taɣ hɛkʋ taa nɛ ewolo ɛcaɣ mba pohoyaɣ-ɩ yɔ pɔ-cɔlɔ. ⁵⁶ Pɩkɛdaa lɛ, tiyiyu halʋ ñɩnʋ nɔɔyʋ na-ɩ nɛ ɛcɔnɩ-ɩ pɩŋŋ nɛ ɛtɔ se: “Abalʋ ɛnɛ, ɛtɩŋaɣ Yesu wayɩ ɖɔɖɔ!” ⁵⁷ Peeye Pɩyɛ kpɛzaa se: “Halʋ ña! Mantasɩm-ɩ kaʋ.” ⁵⁸ Pɩlabɩ fele lɛ, abalʋ nɔɔyʋ na-ɩ ɖɔɖɔ nɛ ɛlɛ tɔ se: “Ña ɖɔɖɔ, ŋkɛ ɛyaa panɛ pa-taa lɛlʋ.” Ɛlɛ, Pɩyɛ cosi-i se: “Aayɩ! Mɛnfɛyɩ pa-taa.” ⁵⁹ Pɩtasɩ labʋ ɛzɩ ñɩɣyʋʋ kʋɖʋmʋʋ yɔ lɛ, abalʋ lɛlʋ yɔɔdɩnɩ abalɩtʋ se: “Abalʋ ɛnɛ, ɛtɩŋaɣ Yesu wayɩ toovenim, mbʋ pʋyɔɔ yɔ, ɛkɛ Galilee tʋ.” ⁶⁰ Ɛlɛ Pɩyɛ cosi-i se: “Abalʋ ña! Mantasɩ tɔm ndʋ ŋcaɣ yɔɔdʋʋ yɔ. Ɛtɩyɔɔdaɣ mbʋ lɛ, kalɩmɔʋ koo.” ⁶¹ Kuko mbʋ lɛ, Kɩpaɣlʋ kisi nɛ ɛcɔnɩ Pɩyɛ nɛ ɛlɛ tɔzɩ tɔm ndʋ eeheyi-i se: “Pʋcɔ kalɩmɔʋ koo sɔnɔ lɛ, ŋkpɛzɩɣ tɔm naadozo se ŋtasɩm-m” yɔ tɩ-yɔɔ. ⁶² Peeye ɛkʋyaa ɛlɩɩ nɛ ewili ɛzɩ pɛcɛbɩ e-liu tɛɛ yɔ.

Pamabʋ Yesu nɛ patʋʋ-ɩ yɔ

(Mat 26.67-68; Mrk 14.65)

^63-64 Alɩwaatʋ ndʋ lɛ, ɛyaa mba pɔɖɔkɩ Yesu yɔ, powoŋuu-i nɛ pohuuzuu ɛ-ɛza yɔɔ nɛ pamakɩ-ɩ nɛ pɔpɔzʋʋ-ɩ se: “Kpeɣ se amabɩ-ŋ?” ⁶⁵ Paatʋ-ɩ ɖɔɖɔ siŋŋ.

Yuda ñɩma hʋʋnɩ Yesu yɔ

(Mat 26.59-66; Mrk 14.55-64; Yoh 18.19-24)

⁶⁶ Tɛʋ fema lɛ, Yuda ñɩma *sɔsaa nɛ pa-paɣtʋ wɩlɩyaa nɛ *cɔjɔnaa *sɔsaa pekpeɣli ɖama se powoni Yesu pɔ-tɔm hʋyaa cɔlɔ. ⁶⁷ Powoni-i lɛ, pɔpɔzɩ-ɩ se: “Heyi-ɖʋ nɛ ɖɩna se ña lɛ *Weyi Ɛsɔ Lɩzaa Yɔ yaa we?” Peeye Yesu cosi-wɛ se: “Paa meheyi-mɩ yɔ, iitisiɣni-m. ⁶⁸ Paa mɔnpɔzɩ-mɩ natʋyʋ yɔ, iicosuu-m ɖɔɖɔ. ⁶⁹ Ɛlɛ, pɩkpaɣʋnɩ lɛɛlɛɛyɔ yɔ, *Ɛyʋ Pɩyalʋ cakɩ lone kɩbanɖɛ taa Ɛsɔ Ɖoŋ Tɩŋa Tʋ cɔlɔ.” ⁷⁰ Peeye pɔpɔzɩ-ɩ patɩŋa se: “Ye mbʋ, ŋkɛ Ɛsɔ Pɩyalʋ?” Ecosi-wɛ se: “Ɩyɔɔdɩ camɩyɛ, ma lɛ ɛnʋ.” ⁷¹ Ecosi-wɛ mbʋ lɛ, pɔtɔ se: “Ɛbɛ yɔɔ ɖɩtasɩɣ ñɩnʋʋ aseɣɖe tɩnaa yɔ? Pɩlɩ ɛ-nɔɔ taa nɛ ɖa-maɣmaɣ ɖɩnɩɩ.”