Pɔpɔzʋʋ Yesu se aha-ɩ nɔɔ yɔ
(Mat 21.23-27; Mrk 11.27-33)
20
1 Nakʋyʋ wiye Yesu wɩlaɣ ɛyaa *Laŋhɛzɩyɛ Tɔm Ɛsɔ ɖɩɣa taa mbʋ lɛ, *cɔjɔnaa *sɔsaa nɛ paɣtʋ wɩlɩyaa nɛ *Yuda ñɩma *sɔsaa powolo 2 pɔpɔzɩ-ɩ se: “Aha-ŋ nɔɔ se ŋla lakasɩ nzɩ? Aha-ŋ waɖɛ se ŋla mbʋ?” 3 Peeye Yesu heyi-wɛ se: “Ma ɖɔɖɔ, mɔnpɔzʋʋ-mɩ tɔm kʋɖʋmtʋ. Iheyi-m nɛ mana se 4 Ɛsɔ yaa ɛyaa tiyini Yohanɛɛsɩ se ɛla ɛyaa *lɩm sɔʋ sɔnzɩ?” 5 Ɛlɛ, pɔyɔɔdɩnɩ ɖama se: “Ye ɖicosaa se: ‘Ɛsɔ tiyini-i’ yɔ, ɛpɔzʋʋ-ɖʋ se: ‘Nɛ pɩla ɛzɩma ɖɩtamʋ ɛ-tɔm yɔ?’ 6 Ŋgʋ, ɖɩtɔm se: ‘Ɛyaa tiyini-i’ yɔ, ɛyaa samaɣ tɩŋa yakɩ-ɖʋ pɛɛ nɛ ɖɩsɩ. Mbʋ pʋyɔɔ yɔ, kɛtɛm sɩm se Yohanɛɛsɩ kɛkɛ *lɔɔyaɣ tʋ.” 7 Peeye pocosi Yesu se: “Ɖɩtasɩ weyi etiyi-i yɔ.” 8 Ɛlɛ ñocosi-wɛ se: “Ye mbʋ, ma ɖɔɖɔ maaheyiɣ-mɩ weyi ɛha-m nɔɔ ŋga yɔ.”
Tʋmlaɖaa kañadɩnaa nabɛyɛ tɔm
(Mat 21.33-46; Mrk 12.1-12)
9 Pʋwayɩ lɛ, Yesu pazɩ ɛyaa tuuu eduuye se: “Abalʋ nɔɔyʋ wɛnɩ mbʋ nɛ ɛsɔ *tɩŋ weyi popuu i-pee sʋlʋm yɔ. Ɛtɛma lɛ, ɛkpaɣ ɛyaa se pɔcɔŋnɩ-ɩ ɩ-yɔɔ nɛ ɛɖɛɛ nʋmɔʋ ŋgʋ kɩ-taa eleɖiɣ yɔ. 10 Pɩkɛdaa lɛ, pɩtalɩ pee koyuu. Peeye ɛkʋsɩ e-tiyiyu nɔɔyʋ se ewolo ɛ-tʋmlaɖaa mba pɔ-cɔlɔ nɛ pehiɣ-i pʋyʋ nɛ ewona. Tiyiyu ɛnʋ ɛtalaa lɛ, pakpa-ɩ pamabɩ-ɩ nɛ pɔɖɔɔnɩ-ɩ nɛ ɛpɩsɩ ndaakpasɩ. 11 Pʋwayɩ lɛ, hayɩm tʋ ɛnʋ ɛtasɩ tiyiyu lɛlʋ kʋsʋʋ nɛ etiyi-i. Ɛlɛ, tʋmlaɖaa mba pakpa ɛlɛ ɖɔɖɔ pamabɩ-ɩ nɛ patʋʋ-ɩ nɛ pɔɖɔɔnɩ-ɩ nɛ ɛpɩsɩ ndaakpasɩ. 12 Ɛtasɩ tozo tʋ tiyuu nɛ pama ɛlɛ ɖɔɖɔ nɛ ɛ-yɔɔ lɩɩ calɩm nɛ pɔlɔ-ɩ nɛ hayɩm wayɩ. 13 Peeye hayɩm tʋ ɛnʋ ɛtɔm se: ‘Ɛzɩma malakɩ lee? Mɛntɛzɩɣ tiyuu man-pɩyalʋ kʋsɔɔlʋ. Pʋtɔmaɣ yɔ, paañam-ɩ.’ 14 Ɛlɛ talaa nɛ pana-ɩ lɛ, peheyi ɖama se: ‘Ɩnaɣ weyi ɛkaɣ tɩɣyʋʋ ɛ-caa ñɩm yɔ. Ɖɩkʋ-ɩ nɛ ɖɩtɩɣyɩ-pʋ.’ 15 Peeye pakpa-ɩ palɩzɩ-ɩ nɛ hayɩm mbʋ pʋ-wayɩ nɛ pakʋ-ɩ.
Tɔɔ! Hayɩm tʋ ɛnʋ, ɛbɛ ɛlakɩ ɛ-tʋmlaɖaa mba? 16 Ɛkɔŋ nɛ ɛkʋ-wɛ nɛ ɛcaa ɛyaa kɩfama nɛ pɔcɔŋnɩ-ɩ ɛ-hayɩm mbʋ pʋ-yɔɔ.”
Ɛyaa samaɣ nɩ tɔm ndʋ lɛ, pɔtɔ se: “Kaza! Pɩɩtɩɩlakɩ mbʋ kpem!” 17 Peeye Yesu cɔnɩ pɛ-ɛsɩndaa pɩŋŋ nɛ ɛpɔzɩ-wɛ se: “Ye mbʋ, tɔm ndʋ pama Ɛsɔtɔm Takayaɣ taa se:
‘Pɩyɛ nɖɩ kuduyiŋ mayaa kpaɣaɣ pɔlɔ yɔ,
nɖɩ pɩsɩnɩ ɖɩkɩlɩ wazaɣ atɩŋa payɩ lɛɛlɛɛyɔ’ yɔ,
tɩ-tɔbʋʋ se we? 18 Meheyiɣ-mɩ se: ye pɩcɩbɩ nɔɔyʋ nɛ ɛtɔlɩ pɩyɛ nɖɩ ɖɩ-yɔɔ yɔ, ɛmɩzɩɣ kpɛdɛɛɛ. Ye pɩcɩbɩ nɔɔyʋ nɛ ɖɩtɔlɩ ɛ-yɔɔ yɔ, ɖɩnaŋɩɣ-ɩ naŋa naŋa.”
Pañɩbʋ Yesu nɔɔ cɔlɔ lambuu tɔm yɔ
(Mat 22.15-22; Mrk 12.13-17)
19 Yesu tɩyɔɔdɩ mbʋ lɛ, paɣtʋ wɩlɩyaa nɛ *cɔjɔnaa *sɔsaa pañɩnɩɣ se pakpa-ɩ kpaagbaa. Mbʋ pʋyɔɔ yɔ, pasɩm se mba etuuni eduuye nɖɩ. Ɛlɛ, sɔɔndʋ kpaɣaɣ-wɛ nɛ ɛyaa mba paawɛ peeye yɔ. 20 Peeye papazɩ Yesu cɔŋʋʋ nɛ paɖʋ mba peyiliɣ ɛyaa se pɛkɛ kʋtʋʋzaa yɔ se powolo pañɩ ɛ-nɔɔ cɔlɔ tɔm. Palakaɣ mbʋ se pehiɣ-i pakpa-ɩ nɛ paɖʋzɩ ɛjaɖɛ ñʋŋ tɩnaa nesi taa. 21 Pʋ-yɔɔ peheyi-i se: “Wɩlɩyʋ! Ɖɩsɩm ɖeu se tɔm ndʋ ŋyɔɔdʋʋ nɛ ndʋ ŋwɩlɩɣ yɔ, tɩkɛ toovenim. Ŋtakpaɣ ɛyaa tɔm nɛ ŋlabɩnɩ tʋmɩyɛ. Ɛlɛ, mbʋ Ɛsɔ liu wɛɛ se ɛyaa ɛla yɔ, pu-toovenim ŋwɩlɩɣ. 22 Heyi-ɖʋ nɛ ɖɩna se ɖa-paɣtʋ haɣ waɖɛ se pɛhɛyɩ Room wiyaʋ sɔsɔ lambuu yaa pataahɛyɩ-ɩ?” 23 Ɛlɛ, Yesu ñɛtɛm sɩm pa-ajiitu mbʋ. Pʋ-yɔɔ eheyi-wɛ se: 24 “Ɩkɔnɩ-m liidiye pɔɔyaɣ nakɛyɛ nɛ mana.” Powoni-kɛ lɛ, ɛpɔzɩ-wɛ se: “A-ñʋʋ nɛ a-hɩɖɛ pɛwɛ kɔ-yɔɔ cɩnɛ?” Pocosi-i se: “Room wiyaʋ sɔsɔ.” 25 Peeye Yesu heyi-wɛ se: “Ye mbʋ, ɩcɛlɩ Room wiyaʋ sɔsɔ mbʋ pɩkɛ ɛ-ñɩm yɔ nɛ piyele ɩcɛlɩ Ɛsɔ mbʋ pɩkɛ ɛlɛ ñɩm yɔ.” 26 Tɔm ndʋ Yesu yɔɔdɩ ɛyaa taa mbʋ yɔ, yiliyaa mba patana kawanaɣ nakɛyɛ tɩ-taa. Peeye pɩɖɩɣzɩ-wɛ nɛ Yesu tɔm cosuu nɛ posu ɖiɣ ɖiɣ.
Pɔpɔzʋʋ tɔm sɩɖaa fem yɔɔ yɔ
(Mat 22.23-33; Mrk 12.18-27)
27 Pɩkɛdaa lɛ, *Saduki ɛgbɛyɛ taa ñɩma mba pɔtɔŋ se sɩɖaa eefeŋ yɔ, pa-taa nabɛyɛ wolo Yesu cɔlɔ. Powoba lɛ, peheyi-i se: 28 “Wɩlɩyʋ! *Mooyiizi ma ɛ-paɣtʋ taa se: ‘Ye ɛyʋ ɛwɛnɩ ɖalʋ nɛ ɛ-ɖalʋ ɛnʋ ɛsɩ nɛ eyele ɛ-halʋ nɛ ɛfɛyɩnɩ-ɩ pɩɣa yɔ, pʋwɛɛ se pʋdʋ ɛhɔ lelu ɛnʋ nɛ ehiɣni-i pɩɣa ɛ-ɖalʋ lone taa.’ 29 Tɔɔ! Abalʋ nɔɔyʋ nɛ e-newaa pɛwɛnɩ mbʋ, pɛwɛ lʋbɛ, ɛkpaɣ halʋ. Pɩlabɩ pɩnzɩ cabɩ lɛ, ɛsɩ, ɛlɛ halʋ ɛnʋ ɛfɛyɩnɩ-ɩ pɩɣa. 30 Peeye e-neu hɔm lelu ɛnʋ nɛ ɛsɩ ɖɔɖɔ. 31 Tozo tʋ ñɔhɔm-ɩ nɛ ɛlɛ sɩ ɖɔɖɔ. Pɩla mbʋ nɛ pɔkɔɔ pasɩ pa-lʋbɛ. Halʋ ɛnʋ ɛfɛyɩnɩ pa-taa nɔɔyʋ nɛ pɩɣa. 32 Pa-wayɩ lɛ, halʋ ɛnʋ ɛsɩ ɖɔɖɔ. 33 Lɛɛlɛɛyɔ, ɖɩpɔzʋʋ-ŋ se: sɩɖaa fem wiye lɛ, pa-taa weyi ɛtɩnɩ halʋ ɛnʋ? Ŋgʋ, patɩŋa pakpaɣ-ɩ!”
34 Peeye Yesu cosi-wɛ se: “Kedeŋa yɔɔ cɩnɛ abalaa kpakɩɣ halaa nɛ halaa ñawalɩɣ abalaa. 35 Ɛlɛ, ɛyaa mba pamʋnaa se pefemni sɩm taa nɛ pasʋʋ Kewiyaɣ ŋga kakaɣ kɔm yɔ ka-taa yɔ, halɩkpaɣyɛ ɛɛtasɩɣ wɛʋ pɛ-hɛkʋ taa. 36 Paatasɩɣ sɩbʋ ɖɔɖɔ, mbʋ pʋyɔɔ yɔ, pɛwɛɣ ɛzɩ Ɛsɔ *tiyiyaa yɔ. Ɛsɔ kɔŋ-wɛ kpaɣʋ ɛzɩ e-piya yɔ, mbʋ pʋyɔɔ yɔ, pasɩba nɛ pefe. 37 Piyele sɩɖaa fem tɔm lɛ, *Mooyiizi maɣmaɣ kɛtɛm pʋ-tɔm yɔɔdʋʋ ɛ-takayaɣ taa ɖenɖe ɛma hɔɖaɣ miŋ mʋʋ tɔm yɔ. Ɛyɔɔdaa se Kɩpaɣlʋ lɛ *Abraham nɛ Izaakɩ nɛ Yakɔɔbʋ pɛ-Ɛsɔ. 38 Pʋ-yɔɔ lɛ, Ɛsɔ tɛkɛ sɩɖaa Ɛsɔ, ɛlɛ, wezuu tɩnaa ñɩnʋ ɛkɛnaa. Mbʋ pʋyɔɔ yɔ, ɛ-ñɩma tɩŋa payɩ wɛ wezuu.” 39 Peeye paɣtʋ wɩlɩyaa taa nabɛyɛ tɔm se: “Wɩlɩyʋ! Ŋyɔɔdɩ camɩyɛ.” 40 Pɔyɔɔdɩ mbʋ, mbʋ pʋyɔɔ yɔ, patakatɩɣ se patasɩ-ɩ tɔm natʋyʋ pɔzʋʋ.
*Weyi Ɛsɔ Lɩzaa Yɔ nɛ Daaviidi pɔ-tɔm
(Mat 22.41-46; Mrk 12.35-37)
41 Pʋwayɩ lɛ, Yesu pɔzɩ-wɛ se: “Pɩlabɩ ɛzɩma nɛ pɔtɔŋ se *Weyi Ɛsɔ Lɩzaa Yɔ ɛkɛ *Daaviidi sayɩ? 42 Ŋgʋ, Daaviidi maɣmaɣ ma Keɣsi Takayaɣ taa se:
‘Kɩpaɣlʋ Ɛsɔ heyi man-Kɩpaɣlʋ se:
caɣ mɔn-cɔlɔ lone kɩbanɖɛ taa
43 nɛ pʋkɔɔ pɩsɩnɩ alɩwaatʋ ndʋ moluzi ño-koyindinaa ñɛ-tɛɛ kpem yɔ.’
44 *Daaviidi maɣmaɣ ñayaɣ *Weyi Ɛsɔ Lɩzaa Yɔ se Kɩpaɣlʋ. Ɛzɩma ɛtasɩɣ kɛʋ Daaviidi ɛnʋ ɛ-sayɩ ɖɔɖɔ yɔ?”
Tɩ kpazʋʋ tɔm
(Mat 23.1-36; Mrk 12.38-40)
45 Ɛyaa samaɣ tɩŋa welesaɣ Yesu tɔm mbʋ lɛ, eheyi ɛ-tɔmkpɛlɩkɩyaa se: 46 “Ɩɖɔkɩ mɩ-tɩ nɛ paɣtʋ wɩlɩyaa. Mbʋ pʋyɔɔ yɔ, pɔsɔɔlɩ tokonaa sɔsaa suu nɛ pɔcɔʋ. Pɔsɔɔlaa ɖɔɖɔ se pɛsɛɣ-wɛ nɛ ñamtʋ ɛyaa ɖikpeɣliye taa. Pañɩnɩɣ se pacaɣ ɖɩjaɣyɛ sɔsɔɖɛ taa Ɛsɔ ɖɩsɛyɛ ndɩ ndɩ nɛ kazandʋ pa-taa. 47 Mba ɖɔɖɔ hɔɔzʋʋnɩ lelaa nesi taa mbʋ pɩtɩŋa payɩ pɛwɛna yɔ. Pɛsɛɣ Ɛsɔ nɛ pɩɖaɣlɩɣ se pɩwɩlɩ se mba lɛ ɛyaa kɩbama. Meheyiɣ-mɩ se kɩyakʋ ŋgʋ Ɛsɔ kɔŋ se ɛhʋnɩ ɛyaa yɔ, ɛɖʋʋ-wɛ kʋñɔŋ ŋgʋ kɩfɛyɩ ɖaɣʋ yɔ.”