Room sɔɔja sɔsɔ nɔɔyʋ tʋmlaɖʋ yɔɔ cɛbʋ yɔ
(Mat 8.5-13)
7
1 Yesu tɛm tɔm ndʋ tɩtɩŋa yɔɔdʋʋ lɛ, ɛkʋyɩ ewolo Kapɛrnayum. 2 Room sɔɔja sɔsɔ nɔɔyʋ kɛwɛ peeye. Ɛɛwɛnɩ tʋmlaɖʋ nɛ ɛ-tɔm kɛdɩnɩ-ɩ pɩŋŋ. Tʋmlaɖʋ ɛnʋ, pɩwɩɣaɣ-ɩ sɩbʋ yɔɔ sɩbʋ yɔɔ. 3 Ŋgʋ, sɔɔja sɔsɔ ɛnʋ, ɛɛnɩ pɔyɔɔdɩ Yesu tɔm se ɛlakɩ nɛ kʋdɔndɩnaa yɔɔ cɛkɩ. Pʋ-yɔɔ etiyi *Yuda ñɩma *sɔsaa nabɛyɛ ɛ-cɔlɔ se pewini-i nɛ ɛkɔɔ ɛya ɛ-tʋmlaɖʋ ñʋʋ. 4 Powoba lɛ, pewini-i cɔɔɔ se: “Abalʋ ɛnʋ ɛmʋnaa se ŋsɩnɩ-ɩ. 5 Mbʋ pʋyɔɔ yɔ, ɛsɔɔlɩ Yuda ñɩma ɖa nɛ ɛma-ɖʋ Ɛsɔ ɖɩsɛyɛ.” 6 Peeye Yesu tɩŋ-wɛ nɛ ɛ nɛ wɛ pɛɖɛɛ. Pɔñɔtɩnɩ ɖɩɣa lɛ, sɔɔja ɛnʋ etiyi ɛ-taabalaa se peheyi Yesu se: “Kɩpaɣlʋ, taakʋ ña-tɩ yem, mantamʋna se ŋsʋʋ man-ɖɩɣa taa. 7 Mbʋ labɩna nɛ mantatalɩ man-tɩ tɩŋa ñɔ-cɔlɔ. Pʋ-yɔɔ lɛ, ha nɔɔ nɛ man-tʋmlaɖʋ yɔɔ cɛ. 8 Mbʋ pʋyɔɔ yɔ, ma lɛ, ma-ñʋʋ yɔɔ ñɩma wɛɛ nɛ mañaŋ-wɛ, mɛn-tɛɛ ñɩma wɛɛ ɖɔɖɔ. Meheyi pa-taa nɔɔyʋ se ewolo peeye yɔ yɔ, ewoki. Maya nɔɔyʋ se ɛkɔɔ yɔ, ɛkɔŋ. Meheyi man-tʋmlaɖʋ se ɛla nabʋyʋ yɔ, ɛlɛ ñalakɩ-pʋ.” 9 Powoba nɛ peheyi Yesu mbʋ lɛ, ɛyɩɣyɩ sɔɔja sɔsɔ ɛnʋ nɛ ɛkɛzɩ ɛ-tɩ nɛ ɛyaa samaɣ ŋga katɩŋaɣ-ɩ yɔ kɔ-yɔɔ nɛ ɛtɔ se: “Mankaɖɩɣ-mɩ se paa Izrɛɛlɩ ñɩma taa maɣmaɣ, mantanadɩ weyi ɛwɛnɩ lidaʋ nɛ pɩtalɩ-ɩ yɔ.” 10 Sɔɔja ɛnʋ e-tiyiyaa pɩsɩ ɖɩɣa lɛ, pamaɣnɩ ɛ-tʋmlaɖʋ ɛnʋ ɛ-yɔɔ cɛba.
Lelu nɔɔyʋ pɩyalʋ sɩbʋ nɛ Yesu fezi-i yɔ
11 Tɛʋ fema lɛ, Yesu kʋyɩ se ewoki tɛtʋ ndʋ payaɣ se Nayɩnɩ yɔ tɩ-taa. Ewokaɣ lɛ, ɛ-tɔmkpɛlɩkɩyaa nɛ ɛyaa samaɣ sɔsɔɔ nakɛyɛ patɩŋɩɣ ɛ-wayɩ. 12 Pɔñɔtɩnɩ-tʋ lɛ, pakatɩ ɛyaa samaɣ nakɛyɛ, kowokaɣnɩ sɩɖʋ nɔɔyʋ pim, ɛɛkɛ lelu nɔɔyʋ pɩɣa ɛgbamɩyɛ. 13 Kɩpaɣlʋ na lelu ɛnʋ lɛ, pɩlabɩ-ɩ pʋtɔdɩyɛ nɛ eheyi-i se: “Taawii!” 14 Peeye Yesu woba etukuni sɩɖʋ kpataya nɛ sɩɣlɩyaa sɩŋ nɛ ɛtɔ se: “Evebu ña! Meheyiɣ-ŋ se ŋkʋyɩ!” 15 Ɛlɛ ɛkʋyɩ ɛcaɣ nɛ ɛpazɩ yɔɔdʋʋ nɛ Yesu cɛlɩ-ɩ e-ɖoo. 16 Peeye sɔɔndʋ kpa patɩŋa nɛ pasaŋ Ɛsɔ nɛ pɔtɔŋ se: “Lɔɔyaɣ tʋ sɔsɔ nɔɔyʋ kɔm ɖɛ-hɛkʋ taa, Ɛsɔ kɔm ɛlɩzɩ ɛ-ɛyaa pɩ-taa.” 17 Mbʋ Yesu laba yɔ, pʋ-tɔm cɔɔ Yudee egeetiye tɩŋa taa nɛ ɖɩ-cɔlɔ hɔɔlɩŋ tɩŋa taa payɩ.
Yesu kɛdʋʋ *Lɩm Sɔʋ Sɔnzɩ Laɖʋ Yohanɛɛsɩ tɔm yɔ
(Mat 11.2-19)
18-19 Yohanɛɛsɩ tɔmkpɛlɩkɩyaa nɩ mbʋ pɩtɩŋa payɩ Kɩpaɣlʋ lakaɣ yɔ lɛ, powolo peheyi-i. Peeye ɛya pa-taa naalɛ nɛ etiyi-wɛ ɛ-cɔlɔ se pɔpɔzɩ-ɩ nɛ pana se ɛnʋ lɛ weyi ɛ-tɔm paayɔɔdaa se ɛkaɣ kɔm yɔ yaa nɔɔyʋ wɛnɩ wayɩ? 20 Patalɩ Yesu cɔlɔ lɛ, peheyi-i se: “*Lɩm Sɔʋ Sɔnzɩ Laɖʋ Yohanɛɛsɩ tiyi-ɖʋ se ɖɩkɔɔ ɖɩpɔzɩ-ŋ nɛ ɖɩna se ña lɛ weyi ɛ-tɔm paayɔɔdaa se ɛkaɣ kɔm yɔ yaa nɔɔyʋ wɛnɩ wayɩ?” 21 Ŋgʋ, alɩwaatʋ ndʋ tɩ-yɔɔ ɖeyi ɖeyi Yesu laba nɛ ɛyaa sakɩyɛ kʋdɔmɩŋ ndɩ ndɩ cɛ nɛ ɛɖɔɔnɩ alewaa nɛ ekuli yʋlʋmaa sakɩyɛ ɛza. 22 Pʋwayɩ lɛ, ecosi-wɛ se: “Iwolo iheyi-i mbʋ ɩnawa nɛ ndʋ ɩnɩwa yɔ: yʋlʋmaa naɣ nɛ tala tɩnaa ɖɔŋ camɩyɛ nɛ canasɩ yɔɔ cɛkɩ nɛ ndamaa nɩɣ nɛ sɩɖaa feŋ, posusi kʋñɔndɩnaa Laŋhɛzɩyɛ Tɔm. 23 Weyi pɩɩtɩŋɩɣnɩ mɔn-tɔm yɔɔ nɛ ɛtɔlɩ Ɛsɔ nʋmɔʋ taa yɔ, ehiɣ ɛ-tɩ.”
24 Peeye Yohanɛɛsɩ tɔmkpɛlɩkɩyaa mba pɛɖɛwa nɛ Yesu pazɩ ɛyaa samaɣ kɛdʋʋ Yohanɛɛsɩ ɛnʋ ɛ-tɔm nɛ ɛpɔzɩ-wɛ se: “Ɛbɛ iwobi naʋ lakʋ taa? Kɩñɩŋgbaɖɛ nɖɩ heɣlim ciɣdaɣ yɔ yaa we? Mantasa. 25 Ɛlɛ, ɛbɛ iwobi naʋ kpem? Nɔɔyʋ suni wondu kɩbandʋ nɛ ɛwɛɛ peeye naa we? Ŋgʋ, mba posuu ñɩɣlɩm wondu nɛ pɛwɛnɩ pɩtɩŋa yɔ, pɛwɛɣ awiya ɖɩsɩ taa. 26 Ɛbɛ kpem iiwobi naʋ? Lɔɔyaɣ tʋ nɔɔyʋ yaa we? Toovenim lɛ, meheyiɣ-mɩ se ɩna weyi yɔ, ɛkɩlɩ *lɔɔyaɣ tʋ. 27 Yohanɛɛsɩ ɛnʋ, ɛ-tɔm Ɛsɔ yɔɔdaa nɛ pama ɛ-Takayaɣ taa se:
‘Na! Mancalɩɣ men-tiyiyu tiyuu nɛ
ɛñɔɔzɩ ña-nʋmɔʋ.’ ”
28 Yesu tasɩ yɔɔdʋʋ se: “Mankaɖɩɣ-mɩ se ɖooo yɔ, patalʋlɩdɩ nɔɔyʋ nɛ ɛkɩlɩ Yohanɛɛsɩ ɛnʋ. Paa mbʋ yɔ, weyi ɛwɛ Ɛsɔ Kewiyaɣ taa nɛ patakpaɣ-ɩ payaa pʋyʋ yɔ, ɛlɛ kɩlɩ-ɩ. 29 Izrɛɛlɩ ɛjaɖɛ taa ɛyaa tɩŋa welesaɣ Yohanɛɛsɩ tɔm, halɩ pɩkpɛndɩnɩ *tikee mʋyaa maɣmaɣ. Pʋ-yɔɔ petisaa nɛ palabɩ-wɛ *lɩm sɔʋ sɔnzɩ. Palabɩ mbʋ nɛ pɩwɩlɩ se Ɛsɔ tʋʋzaa. 30 Ɛlɛ, Farɩsɩ ñɩma nɛ paɣtʋ wɩlɩyaa pekizi se ɛtaalabɩ-wɛ-sɩ. Mbʋ pawɩlɩnaa se pekizi mbʋ Ɛsɔ ñɩnaɣnɩ-wɛ yɔ.”
31 Yesu tasɩ yɔɔdʋʋ ɖɔɖɔ se: “Ɛbɛ mɛnkɛdɩɣnɩ pɩtɛ ɛyaa mba lee? Ɛzɩma pɛwɛɛ? 32 Pɛwɛ ɛzɩ piya nzɩ sɩcaɣ ɛyaa samaɣ ɖikpeɣliye nɛ sikou ɖama yɔɔ se: ‘Ɖɩhʋlɩ-mɩ hɩsɩ se ɩpaa nɛ ikizi. Ɖitee kʋñɔŋ hendu nɛ itewii.’ 33 Mbʋ pʋwɛɛ: ‘Lɩm Sɔʋ Sɔnzɩ Laɖʋ Yohanɛɛsɩ kɔma, ɛɛtɔkɩ tɔɔnaɣ, ɛɛñɔʋ sʋlʋm. Ɛlɛ, ɩtɔŋ se ekem alewaa.’ 34 Piyele Ɛyʋ Pɩyalʋ ñɔkɔma nɛ ɛtɔkɩ nɛ ɛñɔʋ lɛ, ɩɖaɣnɩɣ yɔɔdʋʋ se: ‘Ɩnaɣʋ ɛyʋ ɛnɛ yɔ, tɔkɩyɛ nɛ ñɔtʋ pɔ-yɔɔ ɖeke ɛmaɣzɩɣ. Ɛkɛ ɖɔɖɔ *tikee mʋyaa nɛ kɩwɛɛkɩm laɖaa lɛlaa pa-taabalʋ.’ 35 Ɛlɛ, mba patɩŋa palakɩ mbʋ Ɛsɔ liu wɛɛ yɔ, pa-lakasɩ wɩlɩɣnɩ se ɛwɛnɩ lɔŋ siŋŋ.”
Yesu nɛ halʋ kɩwɛɛkɩm laɖʋ Siimɔɔ tɛ
36 Nakʋyʋ wiye *Farɩsɩ tʋ nɔɔyʋ ya Yesu se ewolo ɛ-tɛ nɛ pɔtɔɔ tɔɔnaɣ. Ɛlɛ Yesu wolo nɛ ɛcaɣ tɔɔnaɣ ɖɩtɔɔyɛ. 37 Halʋ kɩwɛɛkɩm laɖʋ nɔɔyʋ kɛwɛ tɛtʋ ndʋ tɩ-taa nɛ ɛnɩɩ mbʋ. Peeye ɛkpaɣ tɩlaaɖɩ fiɣa kɩñɩlɩzaɣ nakɛyɛ taa ɖo 38 nɛ ewolo ɛsɩŋ nɛ wayɩ Yesu naŋgbanzɩ*fb* cɔlɔ nɛ ewiɣ nɛ ɛ-ɛzɩtɛɣlɩm kpeŋ sɩ-yɔɔ. Pikpema lɛ, ɛhɛzɩ-pʋ nɛ ɛ-ñɔsɩ nɛ ɛkpa-sɩ, nɛ pɩwɩlɩ se ɛñam-ɩ nɛ ɛpɩɩ sɩ-yɔɔ tɩlaaɖɩ. \fm b \fr (7.38) \fk Naŋgbanzɩ: \f Yuda ñɩma tɛ lɛ, hʋyʋʋ yɔɔ pɛwɛlaɣ nɛ pɔtɔkɩ. Mbʋ hanɩ halʋ ɛnʋ waɖɛ se ɛla mbʋ. 39 *Farɩsɩ tʋ weyi ɛya Yesu yɔ, ɛna mbʋ lɛ, ɛmaɣzɩ ɛ-taa se: “Ye abalʋ ɛnɛ ɛɛkɛ *lɔɔyaɣ tʋ yɔ, ɛɛsɩm halʋ weyi etukuuni-i mbʋ yɔ nɛ ɛzɩma mbʋ ɛ-wɛtʋ wɛɛ yɔ: ɛkɛ kɩwɛɛkɩm laɖʋ.” 40 Ɛlɛ Yesu heyi *Farɩsɩ tʋ ɛnʋ se: “Siimɔɔ! Mɛwɛnɩ tɔm natʋyʋ se meheyiɣ-ŋ.” Siimɔɔ cosi-i se: “Wɩlɩyʋ! Yɔɔdɩ.” 41 Peeye Yesu kɛdɩ-ɩ se: “Abalʋ nɔɔyʋ kɛwɛnɩ kɩndɩnaa naalɛ nabɛyɛ: kajalaɣ tʋ kɩndɩ liidiye pɔɔyɩsɩ taŋga nɛ lɛlʋ pɔɔyɩsɩ nɩɩnʋwa. 42 Pa-taa nɔɔyʋ tapɩzɩɣ se ɛhɛyɩ-ɩ nɛ ɛtɛzɩ pa-naalɛ kpeɣu se pataatasɩ-ɩ hɛyʋʋ. Pa-naalɛ pa-taa lɛ, akɩlɩɣ-ɩ sɔɔlʋʋ?” 43 Peeye Siimɔɔ cosi-i se: “Mamaɣzɩɣ se weyi ɛ-kɩmɩyɛ kɩlɩ paɣlʋʋ yɔ.” Ɛlɛ Yesu heyi-i se: “Ŋwɛnɩ toovenim.” 44 Pʋwayɩ lɛ, ɛkɛzɩ ɛ-tɩ nɛ halʋ ɛnʋ ɛ-yɔɔ nɛ eheyi Siimɔɔ se: “Ŋnaɣ halʋ ɛnɛ? Mansʋʋ ña-ɖɩɣa taa cɩnɛ yɔ, ŋtaha-m lɩm se pɔkɔ ma-naŋgbanzɩ. Ɛlɛ, halʋ ɛnɛ ɛlɛ kɔ ma-naŋgbanzɩ nɛ ɛ-ɛzɩtɛɣlɩm nɛ ɛhɛzɩ sɩ-yɔɔ nɛ ɛ-ñɔsɩ. 45 Mɔnkɔm ñɛ-tɛ yɔ, ŋtamʋ-m nɛ ŋsɛ-m ɛzɩ pʋpɔzʋʋ yɔ. Ɛlɛ, halʋ ɛnɛ ɛlɛ mʋ-m nɛ halɩ ɛwɛɛ ɛkpaɣ ma-naŋgbanzɩ. 46 Ŋtataa ma-ñʋʋ taa sɔzɩŋ num. Ɛlɛ, halʋ ɛnɛ ɛlɛ pɩyɩ ma-naŋgbanzɩ yɔɔ tɩlaaɖɩ. 47 Pʋ-yɔɔ mankaɖɩɣ-ŋ se sɔɔlɩm sɔsɔm tʋmɩyɛ nɖɩ ɛlaba yɔ, ɖɩwɩlɩɣ se pɛtɛm-ɩ kpeɣu ɛ-kɩwɛɛkɩm sakɩyɛ mbʋ ɛlaba yɔ. Ɛlɛ, weyi pekpeɣiɣ-i kɩwɛɛkɩm pazɩ yɔ, ɛwɛɣnɩ sɔɔlɩm pazɩ.” 48 Peeye Yesu heyi halʋ ɛnʋ se: “Menkpeɣ-ŋ ña-kɩwɛɛkɩm.” 49 Ɛlɛ ɛ nɛ mba paawɛ ɖɩtɔɔyɛ yɔ, pamaɣzɩɣ pa-taa se: “Anɩ lɛ ɛnɛ nɛ ɛkatɩ nɛ ɛtɔŋ se ekpeɣ kɩwɛɛkɩm?” 50 Ɛlɛ Yesu heyi halʋ ɛnʋ se: “Lidaʋ ŋgʋ ŋwɛna yɔ, kɩyabɩ ña-ñʋʋ. Kpemni laŋhɛzɩyɛ.”