Luka 5

Siimɔɔ nɛ Yakubu nɛ Yohanɛɛsɩ patɩŋʋʋ Yesu wayɩ yɔ

(Mat 4.18-22; Mrk 1.16-20)

¹ Nakʋyʋ wiye Yesu sɩŋ Jeneezaarɛɛtɩ teŋgu nɔɔ nɛ ɛyaa samaɣ ñɩkɩɣ ɖama ɛ-cɔlɔ se panɩɩ Ɛsɔtɔm. ² Peeye ɛna kpɩyɩŋ naalɛ sɩŋ kidiiliŋ yɔɔ nɛ piyiŋ lɔyaa tii nɛ pañalɩɣ pe-piyiŋ. ³ Ɛlɛ Yesu kpa lɛɛkʋ taa, Siimɔɔ tɩnɩ-kʋ. Ɛkpawa lɛ, eheyi-i se etuzi-kʋ lɩm taa pazɩ. Peeye ɛcaɣaɣ nɛ ɛpazɩ ɛyaa samaɣ Ɛsɔtɔm wɩlʋʋ.

⁴ Ɛtɛma lɛ, eheyi Siimɔɔ se: “Tuzi kpɩyʋʋ nɛ ŋwoni-kʋ ɖenɖe lɩm wɛ cʋkaŋ yɔ nɛ ña nɛ ña-taabalaa ɩlɔ mi-piyiŋ nɛ ɩkpa kpakpasɩ.” ⁵ Siimɔɔ cosi-i se: “Wɩlɩyʋ, ɖɩtɛm lɔʋ piyiŋ tɛʋ nɛ kifem nɛ ɖɩwɩɩ, ɖɩtakpa pʋyʋ. Ɛlɛ, ñɔ-yɔɔ lɛ, ɖɩɖaɣnɩɣ-ɩ lɔʋ.”

⁶ Pɔlɔ-ɩ lɛ, pakpa kpakpasɩ pɩtɩɩfɛyɩ, halɩ pe-piyiŋ caɣ cɛbʋ. ⁷ Peeye pahadɩ pa-taabalaa piyiŋ lɔyaa lɛlaa kpɩyʋʋ lɛɛkʋ taa se powolo pasɩnɩ-wɛ. Powoba lɛ, palɩzɩ kpakpasɩ nɛ paɖʋ kpɩyɩŋ ɩnʋ ɩ-naalɛ ɩ-taa nɛ piwiziɣ-i nɛ ɩcaɣ se ɩsʋʋ lɩm tɛɛ. ^8-9 Siimɔɔ Pɩyɛ nɛ mba patɩŋa paawɛ ɛ-cɔlɔ yɔ, pana mbʋ lɛ, sɔɔndʋ kpa-wɛ. Peeye Siimɔɔ ɛnʋ ewobi eluŋ Yesu tɛɛ nɛ ɛtɔ se: “Kɩpaɣlʋ! Yele mɔn-tɔm, mɛnkɛ kɩwɛɛkɩm laɖʋ.” ¹⁰ Sɔɔndʋ kakpa ɖɔɖɔ Zebedee pɩyalaa: Yakubu nɛ Yohanɛɛsɩ, mba lɛ Siimɔɔ taabalaa. Ɛlɛ, Yesu heyi Siimɔɔ ɛnʋ se: “Taasɔɔndɩ! Pɩkpaɣʋnɩ lɛɛlɛɛyɔ yɔ, ɛyaa ŋkaɣ kpaʋ.” ¹¹ Peeye palɩzɩ pa-kpɩyɩŋ kidiiliŋ yɔɔ nɛ peyele mbʋ pɩtɩŋa payɩ paawɛna yɔ nɛ patɩŋ Yesu wayɩ.

Canaɣ nakɛyɛ yɔɔ cɛbʋ yɔ

(Mat 8.1-4; Mrk 1.40-45)

¹² Nakʋyʋ wiye Yesu wobi tɛtʋ natʋyʋ taa. Kʋdɔŋ kɩsɛmʋʋ kɔɖɔkɩ abalʋ nɔɔyʋ tɩ-taa peeye siŋŋ. Pɩkɛdaa lɛ, ɛna Yesu nɛ ewolo ɛ-cɔlɔ nɛ eluŋ ɛ-ɛsɩndaa nɛ etendi-i se: “Kɩpaɣlʋ! Ye ŋtisiɣ yɔ, ŋla nɛ mɔ-yɔɔ cɛ nɛ manpɩsɩ ɛyʋ weyi ɛmʋnaa yɔ.” ¹³ Peeye Yesu posi e-nesi nɛ etukuni-i nɛ eheyi-i se: “Mentisaa, pɩsɩ ɛyʋ weyi ɛmʋnaa yɔ!” Ɛyɔɔdɩ mbʋ lɛ, ɛ-yɔɔ tɩcɛbʋ. ¹⁴ Ɛlɛ Yesu ka ɛ-ñʋʋ taa se: “Taaheyi-tʋ nɔɔyʋ, wolo cɔjɔ cɔlɔ nɛ ɛna se ñɔ-yɔɔ cɛba, nɛ ŋwoni kileku ɛzɩ *Mooyiizi kaɖʋʋ yɔ nɛ pɩwɩlɩ ɛyaa tɩŋa se ñɔ-yɔɔ cɛba.”

¹⁵ Yesu hɩɖɛ tɛzaɣ sɛʋ paa le nɛ ɛyaa samaɣ kpeɣliɣ ɛ-cɔlɔ sɔsɔm se panɩɩ ndʋ eheyiɣ-wɛ yɔ nɛ ɛla nɛ pa-kʋdɔmɩŋ cɛ. ¹⁶ Ɛlɛ, Yesu yeki-wɛ nɛ ɛɖɛɣ lakʋ taa nɛ ɛsɛɣ Ɛsɔ.

Kalɩkalaɣ nakɛyɛ yɔɔ cɛbʋ yɔ

(Mat 9.1-8; Mrk 2.1-12)

¹⁷ Kɩyakʋ nakʋyʋ Yesu wɩlaɣ Ɛsɔtɔm. *Farɩsɩ ɛgbɛyɛ taa ñɩma nɛ paɣtʋ wɩlɩyaa mba palɩnɩ Galilee nɛ Yudee pɛ-tɛtʋ tɩŋa taa nɛ Yeruusalɛm yɔ, paacaɣ ɛ-cɔlɔ. Kɩpaɣlʋ ɖoŋ kɛwɛ ɛ-yɔɔ se ɛla nɛ kʋdɔndɩnaa yɔɔ cɛ. ¹⁸ Peeye nabɛyɛ kpaɣ kalɩkalaɣ nakɛyɛ nɛ ka-ñalʋʋ nɛ pañɩnɩɣ se powoni-kɛ Yesu cɔlɔ kuduyuu tɛɛ ɖenɖe ɛɛwɛɛ yɔ. ¹⁹ Ɛyaa samaɣ yɔɔ lɛ, paanaɣ se patɩŋnɩ le nɛ patanɩ-kɛ. Ɛlɛ pakpanɩ-kɛ kuduyuu ñʋʋ taa nɛ pakʋ pɔʋ nɛ petisi-kɛ nɛ ka-ñalʋʋ ɛyaa samaɣ hɛkʋ taa Yesu cɔlɔ.ILLUSTRATION 13

²⁰ Peeye Yesu nawa se pɛwɛnɩ lidaʋ ɛ-yɔɔ nɛ eheyi kalɩkalaɣ ŋga se: “Man-taabalʋ! Menkpeɣ-ŋ ña-kɩwɛɛkɩm.” ²¹ Ɛlɛ paɣtʋ wɩlɩyaa nɛ Farɩsɩ ñɩma papazɩ miduu pe-liŋ tɛɛ nɛ pɔpɔzʋʋ ɖama se: “Ɛnɛ ɛkɛ anɩ nɛ ɛwɛɛkɩɣ Ɛsɔ hɩɖɛ mbʋ? Apɩzɩɣ nɛ ekpeɣ kɩwɛɛkɩm nɛ pɩtasɩnɩ Ɛsɔ?”

²² Yesu na pa-lɩmaɣza mbʋ lɛ, ɛpɔzɩ-wɛ se: “Pɩlabɩ ɛzɩma ɩhʋʋ mɩ-taa mbʋ? ²³ Ye meheyi kalɩkalaɣ ŋga se menkpeɣ-kɛ ka-kɩwɛɛkɩm yaa kakʋyɩ kɔɖɔ, tɩ-naalɛ tɩ-taa lɛ, ndʋ tɩfɛyɩ kaɖɛ? ²⁴ Mancaɣ mawɩlɩ-mɩ se Ɛyʋ Pɩyalʋ wɛnɩ ɖoŋ se ekpeɣ ɛyaa pa-kɩwɛɛkɩm kedeŋa yɔɔ cɩnɛ.” Peeye eheyi kalɩkalaɣ ŋga se: “Ña! Kʋyɩ ŋkpaɣ ña-ñalʋʋ nɛ ŋkpe.” ²⁵ Peeye katɩkʋyɩ patɩŋa pɛ-ɛsɩndaa nɛ kakpaɣ ka-ñalʋʋ nɛ kasaŋ Ɛsɔ kpem yɔɔ. ²⁶ Ɛyaa mba pana mbʋ lɛ, pɩɖɩɣzɩ patɩŋa payɩ nɛ sɔɔndʋ kpa-wɛ nɛ pasaŋ Ɛsɔ nɛ pɔyɔɔdʋʋ se: “Sɔnɔ ɖɩna mbʋ wiɖiyi ɖɩtana kaʋ yɔ.”

Yesu yaʋ *Leevi yɔ

(Mat 9.9-13; Mrk 2.13-17)

²⁷ Pʋwayɩ lɛ, Yesu lɩɩ nɛ ɛna *tikee mʋyʋ weyi payaɣ se *Leevi yɔ, ɛcaɣ ɛ-tʋmɩyɛ taa. Peeye Yesu heyi-i se: “Kʋyɩ ŋtɩŋ-m.” ²⁸ Ɛlɛ kʋyɩ eyele pɩtɩŋa nɛ ɛtɩŋ-ɩ.

²⁹ Pʋwayɩ lɛ, Leevi la kazandʋ ɛ-tɛ nɛ ɛyaa Yesu nɛ *tikee mʋyaa sakɩyɛ nɛ ɛyaa lɛlaa sakɩyɛ nɛ powolo pacaɣ tɔɔnaɣ ɖɩtɔɔyɛ. ³⁰ Peeye pɩtɛkɛdɩnɩ Farɩsɩ ñɩma nɛ paɣtʋ wɩlɩyaa mba pɛkɛ pɔ-hɔɔlʋʋ taa ñɩma yɔ nɛ pɔpɔzɩ Yesu tɔmkpɛlɩkɩyaa se: “Pɩlabɩ ɛzɩma mɩ nɛ tikee mʋyaa nɛ kɩwɛɛkɩm laɖaa lɛlaa ɩkpɛndɩ ɩtɔkɩ nɛ ɩñɔʋ?” ³¹ Yesu cosi-wɛ se: “Pɩtɛkɛ alaafɩya tɩnaa pʋpɔzʋʋ se powolo fɛɖaa tɛ, kʋdɔndɩnaa pʋpɔzʋʋ se powolo. ³² Pɩtɛkɛ mba pamaɣzɩɣ se pɛkɛ kʋtʋʋzaa yɔ, pa-wayɩ mɔnkɔma. Ɛlɛ, mba pasɩm pa-tɩ se pɛkɛ kɩwɛɛkɩm laɖaa yɔ, pa-wayɩ mɔnkɔm se pɛlɛɣzɩ wɛtʋ.”

*Nɔɔ hɔkʋʋ tɔm

(Mat 9.14-17; Mrk 2.18-22)

³³ Pʋwayɩ lɛ, ɛyaa mba paɖaɣnɩ Yesu pɔzʋʋ se: “Pɩlabɩ ɛzɩma Farɩsɩ ñɩma tɔmkpɛlɩkɩyaa nɛ Lɩm Sɔʋ Sɔnzɩ Laɖʋ Yohanɛɛsɩ ñɩma pɔhɔkʋʋ *nɔɔ ɖoŋ ɖoŋ nɛ pɛsɛɣ Ɛsɔ nɛ ña-ñɩma ñaahɔkʋʋ?” ³⁴ Peeye Yesu cosi-wɛ se: “Ɩmaɣzɩɣ se ɩpɩzɩɣ ɩcɛyɩ ɛyaa mba payaɣ-wɛ se powolo halɩkpaɣyɛ kazandʋ ɖeɖe yɔ se pacaɣ ñɔɔsɩ halʋ kɩfalʋ walʋ ɛsɩndaa yaa we? Pɩɩlakɩ mbʋ. ³⁵ Ɛlɛ, pɔkɔŋ lɩzʋʋ walʋ ɛnʋ pɛ-hɛkʋ taa alɩwaatʋ natʋyʋ. Tɩ-taa pɔkɔŋ nɔɔ hɔkʋʋ.”

³⁶ Pʋwayɩ lɛ, etuu-wɛ eduuye se: “Paacɩyɩɣ wonuu kɩfalʋʋ hɔɔlaɣ nɛ pɔtɔnɩ kɩbɩnʋʋ. Palabɩ mbʋ yɔ, pɛwɛɛkɩɣ kɩfalʋʋ. Piyele hɔɔlaɣ kɩfalaɣ ɛɛmʋʋnɩ wonuu kɩbɩnʋʋ ɖɔɖɔ. ³⁷ Paasuu sʋlʋm pɛŋ*fa* weyi ɩtɔwaa yɔ ɩ-taa. Pɩtɛkɛ mbʋ, pʋkɔŋ se pɩpɩɣ yɔ, pɩyasɩɣ-ɩ nɛ sʋlʋm wɛɛkɩ pikpe tataa yem nɛ pɛŋ ñala asayʋʋ ɖɔɖɔ. \fm a \fr (5.37) \fk Pɛŋ: \f ɩcɔnɩ Mrk 2.22. ³⁸ Pɛŋ weyi ɩtɔtɔɔ yɔ, ɩ-taa posuu. ³⁹ Nɔɔyʋ fɛyɩ se ɛñɔʋ sʋlʋm kɩpɩbɩm nɛ ɛtasɩ awula. Mbʋ pʋyɔɔ yɔ, ɛtɔŋ se kɩpɩbɩm kɩlɩ ɖeu.”