23
1 Nakʋyʋ wiye nɔɔyʋ woba nɛ eheyi Daaviidi se, Filisitii ñɩma kʋyɩ Keyilaa tɛtʋ taa ñɩma yɔɔ nɛ pakʋʋ-wɛ nɛ pamɩlɩɣ pɔ-tɔɔnasɩ. 2 Peeye Daaviidi pɔzɩ KƖPAƔLƲ se, ɛnʋ ewolo nɛ ɛkʋyɩ Filisitii ñɩma ḿba pɔ-yɔɔ yaa we? Ɛ́lɛ cosi-i se, éwolo ɛkʋyɩ pɔ-yɔɔ nɛ eholi Keyilaa ñɩma. 3 Paa mbʋʋ yɔ, ɛyaa ḿba pa nɛ Daaviidi paawɛɛ yɔ, peheyi-i se, ɛtɩlɩ se, ḿba wɛʋ Yuuda hɔɔlʋʋ taa peeye yɔ, sɔɔndʋ kpaɣ ḿba. Se, ye ḿba ewobi Keyilaa nɛ pakʋyɩ Filisitii ñɩma yɔɔ lɛ, pɩɩwɛɛ ɛsɩna yɔ? 4 Peeye Daaviidi tasɩ yɔɔdɩnaʋ KƖPAƔLƲ, nɛ ɛ́lɛ heyi-i se, ɛ́kʋyɩ ɛkpaɣ nʋmɔʋ nɛ éwolo Keyilaa tɛtʋ taa! Se, ɛnʋ kpaɣ Filisitii ñɩma nɛ ɛɖʋzɩ e-nesi taa. 5 Ɖɩnɛɛ Daaviidi nɛ ḿba paawɛ ɛ-cɔlɔ yɔ, pakʋyaa nɛ powolo Keyilaa nɛ pakʋyɩ Filisitii ñɩma ḿba pɔ-yɔɔ, nɛ pɛlɛɣ po-wondu ndʋ pɔɖɔwa yɔ, nɛ pakʋ pa-taa sakɩyɛ. Mbʋʋ Daaviidi yabɩ Keyilaa ñɩma ñʋʋ.
6 Ahiimɛlɛɛkɩ pɩyalʋ Ebiyaataarɩ wokaɣ Daaviidi cɔlɔ Keyilaa se ɛmɛlɩ lɛ, ɛɛkpɛndɩnɩ cɔjɔnaa toko sɔsɔʋ nɛ kɔdaɣ taa wondu ndʋ tɩ-yɔɔ patɩŋɩɣna nɛ pɔyɔɔdʋʋnɩ KƖPAƔLƲ yɔ.
7 Sawʋlɩ kɔma ɛnɩɩ se, Daaviidi wobi Keyilaa tɛtʋ taa lɛ, ɛtɔ se, Ɛsɔ kpa ɛ́lɛ nɛ ɛɖʋzɩ ɛnʋ nesi taa. Mbʋ pʋyɔɔ yɔ, ɛ́lɛ sʋ́ʋ tɛtʋ ndʋ paɖɩkɩ tɩ-nɔnɔsɩ nɛ pakaɖɩɣ yɔ tɩ-taa yɔ, ɛtɔlɩ ɛnʋ kpaca taa. 8 Ḿbʋ yebina nɛ Sawʋlɩ kpeɣli e-youlaɖaa tɩŋa se powolo Daaviidi nɛ ɛ-ɛyaa pa-wayɩ Keyilaa tɛtʋ taa. 9 Pɩlabɩ ḿbʋ lɛ, Daaviidi na se, Sawʋlɩ caɣ se ɛlabɩ-ɩ mbʋ pɩfɛyɩ ɖeu yɔ. Peeye eheyi cɔjɔ Abiyaataarɩ se, ɛkpaɣ kɔdaɣ taa wondu ndʋ patɩŋɩɣnɩ tɩ-yɔɔ nɛ pɔyɔɔdʋʋnɩ Ɛsɔ yɔ, nɛ ewona. 10 Powoni-tʋ lɛ, Daaviidi heyi KƖPAƔLƲ Izirɛɛlɩ Ɛsɔ, se, ɛnʋ nɩwa se, Sawʋlɩ wɛɛ ɛñɔɔzʋʋ ɛ-tɩ se ewolo ɛyɔkɩ Keyilaa tɛtʋ, ɛnʋʋ ɛ-tʋmlaɖʋ ɛ-yɔɔ. 11 Ɛyɔɔdɩ ḿbʋ lɛ, ɛpɔzɩ ɛ́lɛ se, Keyilaa ñɩma kɔŋ-ɩ kpaʋ nɛ paɖʋsɩ e-nesi taa yaa we? Se, toovenim se, Sawʋlɩ woki peeye ɛzɩ ɛnʋ nɩʋ yɔ yaa we? Se, ɛnʋ tendi ɛnʋʋ KƖPAƔLƲ Izirɛɛlɩ Ɛsɔ se, ecosi ɛnʋʋ ɛ-tʋmlaɖʋ! Peeye ɛ́lɛ cosi-i se, ɛɛɛ! Se, Sawʋlɩ woki. 12 Daaviidi tasɩ-ɩ pɔzʋʋ se, Keyilaa ñɩma kaɣ kpaʋ ɛnʋ nɛ ɛ-ɛyaa nɛ paɖʋzɩ Sawʋlɩ nesi taa yaa we? KƖPAƔLƲ cosi-i se, ɛɛɛ! Se, pakaɣ-wɛ kpaʋ nɛ paɖʋsɩ ɛ́lɛ nesi taa. 13 Kpaagbaa ḿbʋ lɛ, Daaviidi nɛ ɛ-yaa, pakʋyɩ Keyilaa tɛtʋ taa nɛ pakpaɣ nʋmɔʋ nɛ powolo ɖoli nɔɔyʋ. Paatalɩ ɛzɩ taŋga nɛ mɩnʋʋ (600) yɔ. Pɩlabɩ ḿbʋ lɛ, Sawʋlɩ nɩɩ se, Daaviidi lɩ Keyilaa tɛtʋ taa nɛ ɛtʋlɩ, nɛ eyele wobu peeye se ɛkʋyɩ ɛ-yɔɔ.
14 Daaviidi kɔm ɛtalɩ Ziifu lakʋ a taa lɛ, ɛkpa pʋŋ taa nɛ ɛmɛlɩ kajalanzɩ hɔɔlʋʋ taa. Pɩlabɩ ḿbʋ lɛ, Sawʋlɩ wɛɛ ɛñɩnɩɣ Daaviidi kɩyakɩŋ tɩŋa se ɛkʋ-ɩ. Ɛlɛ, Ɛsɔ teyele se ehiɣ-i. 15 Daaviidi kanawa se, Sawʋlɩ wɛɛ nɛ ɛñɩnɩɣ se ɛkʋ-ɩ. Alɩwaatʋ ndʋ lɛ, Daaviidi kɛwɛ Ziifu lakʋ taa Horesaa hɔɔlʋʋ taa.
16 Nakʋyʋ wiye lɛ, Sawʋlɩ pɩyalʋ Yoonaataanɩ wolo Daaviidi cɔlɔ, Horesaa peeye, se eseɣti-i nɛ ɛtɛzɩ taʋ Ɛsɔ, liu. 17 Ɛwoba lɛ, eheyi-i se, sɔɔndʋ ɛtaakpa-ɩ nɛ pʋyʋ! Se, ɛnʋ caa Sawʋlɩ ɛɛpɩzɩɣ ehiɣ-i. Se, ɛnʋ kaɣnɩ kɛʋ Izirɛɛlɩ ñɩma wiyaʋ, nɛ piyele ɛnʋ ñɛkɛ ɛ-wayɩ tʋ, se, ɛnʋ caa maɣmaɣ sɩma mbʋʋ ɖeu. 18 Peeye pa-naalɛ paɖʋ taabalɩyɛ b KƖPAƔLƲ hɩɖɛ taa. Pʋ-wayɩ lɛ, Yoonaataanɩ pɩsɩ ɛ-tɛ nɛ piyele Daaviidi ñɛwɛɛ Horesaa peeye.
Sawʋlɩ wɛʋ Daaviidi wayɩ yɔ
19 Nakʋyʋ wiye Ziifu tɛtʋ taa ñɩma nabɛyɛ woba Sawʋlɩ cɔlɔ Giveyaa tɛtʋ taa nɛ pɔpɔzʋʋ-ɩ se, ɛtana se Daaviidi wobi ḿba tɛ egeetiye taa, nɛ ɛmɛlɩ Horesaa kajalanzɩ hɔɔlʋʋ taa, Hakiilaa piyaɣ ŋga kɛwɛ lakʋ taa nɛ hadɛ kiŋ yɔ yaa we? 20 Se, ye ɛñɩnɩɣ se etudi-i yɔ, éwolo. Se, ḿba lɛ, ḿba ɖʋzʋʋ-ɩ e-nesi taa. 21 Peeye, Sawʋlɩ tɔm se, KƖPAƔLƲ ɛwazɩ pɔ-yɔɔ, se, pana ɛnʋ pʋtɔdɩyɛ. 22 Se, lɛɛlɛɛyɔ, powolo paɖaɣnɩ naʋ ndʋ péheyi ɛnʋ yɔ, nɛ pana ɖenɖe ɛwɛɛ kpem yɔ, nɛ weyi ɛna-ɩ peeye yɔ. Mbʋ pʋyɔɔ yɔ, peheyɩ ɛnʋ se ɛwɛ ajiitu pɩtɩɩfɛyɩ. 23 Se, pɔcɔnɩ ɖenɖe ɖenɖe ɛpɩzaɣ se ɛmɛlɩ yɔ, pɩ-tɩŋa pɩ-taa nɛ pana ɖenɖe ɛwɛɛ yɔ. Se, ye pana-ɩ lɛ, papɩsɩ peheyi ɛnʋ nɛ ɛnʋ nɛ wɛ powolo peeye. Se, ye ɛwɛ ɛjaɖɛ taa lɛ, ɛnʋ ñɩnɩ Yuuda hɔɔlɩŋ tɩŋa taa nɛ ɛnʋ na-ɩ.
24 Peeye Ziifu ñɩma kʋyɩ Sawʋlɩ cɔlɔ nɛ papɩsɩ pɛ-tɛ. Alɩwaatʋ ńdʋ lɛ, Daaviidi kɛwɛ Maawɔɔ lakʋ taa kɛdɛɛŋa nɛ hadɛ kiŋ. 25 Pɩlabɩ ḿbʋ lɛ, Sawʋlɩ nɛ e-youlaɖaa powolo se pañɩnɩɣ Daaviidi. Ɛlɛ, nɔɔyʋ wolo nɛ eheyi ɛ́lɛ, nɛ ɛ́lɛ ñowolo nɛ ɛcaɣ Maawɔɔ lakʋ taa pʋŋ taa. Sawʋlɩ kɔm ɛnɩɩ lɛ, ɛɖʋ ɛ-wayɩ egeetiye ńɖɩ ɖɩ-taa. 26 Sawʋlɩ nɛ e-youlaɖaa pɔɖɔŋaɣ piyaɣ hɔɔlʋʋ lɛɛkʋ yɔɔ nɛ piyele Daaviidi nɛ ɛ́lɛ ɛgbaadɩnaa paba ñɔɖɔŋ kɔ-hɔɔlʋʋ lɛɛkʋ yɔɔ. Paba kpetesaɣ se patʋlɩ Sawʋlɩ. Ɛñɩnaɣ se, ɛ nɛ e-youlaɖaa pɔcɔɔ-wɛ nɛ pata nɛ piyele pakpa-wɛ. 27 Pɩkɛdaa lɛ, nɔɔyʋ wolo Sawʋlɩ cɔlɔ nɛ ɛyaa-ɩ se, ɛpɩsɩ lɔŋ se Filisitii ñɩma kʋyɩ ɛ-ɛjaɖɛ taa ñɩma yɔɔ. 28 Kpaagbaa ḿbʋ lɛ, Sawʋlɩ yele Daaviidi ɖɔɔnʋʋ nɛ ɛpɩsɩ ɛkʋyɩ Filisitii ñɩma yɔɔ. Pʋ-yɔɔ paya peeye se, Tayʋʋ ɛwaɣ.