22
Daaviidi pɩsʋʋ ɛyaa tikaɣ ñʋʋdʋ yɔ
1 Pɩlabɩ ḿbʋ lɛ, Daaviidi se Gaatɩ peeye nɛ ewolo Aduulam tɛtʋ taa, nɛ ɛmɛlɩ ɛwaɣ pɔʋ taa. Ɛ-ɖalaa nɛ ɛ-hɔʋ taa ñɩma tɩŋa pɔkɔm panɩɩ lɛ, pakʋyɩ nɛ powolo pɛkpɛndɩ ɛ-yɔɔ peeye. 2 Ɖɔɖɔ lɛ, ɛyaa mba paawɛnɩ cɛyɩtʋ yɔ pa-tɩŋa, nɛ kɩmtɔɔyaa tɩŋa, nɛ mba pɔ-hɔ pɩsaa yɔ pa-tɩŋa, paakpeɣlɩ ɛ-cɔlɔ, nɛ ɛnʋ kɛ pa-ñʋʋdʋ. Ɛyaa mba paakpeɣli ɛ-cɔlɔ yɔ, paakpɛndɩ ɛzɩ nazɩnaza (400) yɔ.
3 Daaviidi kɔm ɛkʋyɩ Aduulam lɛ, ewolo Micipee tɛtʋ taa, Mowaabɩ ɛjaɖɛ taa, nɛ eheyi Mowaabɩ wiyaʋ se, ɛ́lɛ ɛ́ha ɛnʋ caa nɛ ɛnʋ ɖoo waɖɛ nɛ powolo pɛwɛɛ ɛ́lɛ tɛ nɛ pɩkɔɔ pɩsɩnɩ alɩwaatʋ ndʋ ɛnʋ na mbʋ Ɛsɔ caɣ se ɛnʋ ɛkɛ yɔ. 4 Ɛ́lɛ ñaha-ɩ waɖɛ lɛ, ɛkpaɣ-wɛ nɛ ewona ɛ́lɛ tɛ nɛ pɛwɛɛ peeye alɩwaatʋ ndʋ tɩ-tɩŋa payɩ ɛnʋʋ Daaviidi ɛɛwɛ ɛ-ɖɩmɛlɩyɛ taa ḿbʋ yɔ. 5 Nakʋyʋ wiye lɛ, lɔɔyaɣdʋ Gaadɩ heyi Daaviidi se, ɛ́taawɛɛ ɛ-ɖɩmɛlɩyɛ taa peeye ḿbʋ. Se, ɛkʋyɩ nɛ ɛpɩsɩ Yuuda ɛjaɖɛ taa. Ḿbʋ yebina nɛ Daaviidi kʋyɩ nɛ ewolo ɛsʋʋ Hɛrɛɛtɩ laʋ a tɛɛ.
Sawʋlɩ yebu nɛ pakʋ Noovi tɛtʋ taa cɔjɔnaa yɔ
6 Nakʋyʋ wiye Sawʋlɩ wɛ Giveyaa tɛtʋ b. Ɛɛɖɔkɩ ɛ-kɩkpɛzɛŋ e-nesi taa nɛ ɛcaɣ tɩʋ nakʋyʋ tɛɛ piyaɣ nakɛyɛ yɔɔ nɛ ɛ-tʋmlaɖaa tɩŋa sɩŋ ɛ-cɔlɔ. Pɩkɛdaa lɛ, ɛnɩɩ se, pana ɖenɖe Daaviidi nɛ ɛ-ɛyaa pɛwɛɛ yɔ. 7 Peeye, eheyi-wɛ se, mbaa Bineyaamiini liɖe taa ñɩma, pewelisi ɖeu nɛ panɩɩ! Ɖɩnɛɛ ɛpɔzɩ-wɛ se, Yeesee pɩyalʋ Daaviidi haɣ pa-tɩŋa payɩ hayɩm nɛ tɩŋ weyi popuu e-pe sʋlʋm yɔ ɛzɩ ɛnʋ yɔ yaa we? Se, ɛkpazɩɣ pa-tɩŋa payɩ nɛ pɛkɛ e-youlaɖaa tikasɩ ñʋndɩnaa naa we? Se, ɛnʋ tasa! 8 Se, ye ḿbʋ, ɛbɛ yɔɔ pa-tɩŋa pataŋ nɔɔ ɛnʋ yɔɔ yɔ? Se, nɔɔyʋ teheyi ɛnʋ se, ɛnʋ pɩyalʋ nɛ Daaviidi panɩnɩ ɖama nɛ paɖʋ taabalɩyɛ. Se, pa-taa nɔɔyʋ ɛɛnɩɣzɩɣ ɛnʋ tɔm tɛ eeheyi ɛnʋ se, ɛnʋ pɩyalʋ yeba nɛ ɛnʋ tʋmlaɖʋ pa ɛnʋ nɛ ɛza nɛ ɛñɩkɩ ɛnʋʋ kpacanaa ɛzɩ pɩwɛʋ kɩyakʋ ŋgʋ yɔ!
9 Ɛyɔɔdaɣ ḿbʋ lɛ, Edom tʋ Dowɛɛgɩ kɛwɛ ɛ-tʋmlaɖaa taa. Peeye ɛ́lɛ heyi-i se, nakʋyʋ wiye ɛnʋ na Yeesee pɩyalʋ, ewobi Noovi tɛtʋ taa, Ahiituuvi pɩyalʋ Ahiimɛlɛɛkɩ cɔlɔ c. 10 Ɛ́lɛ yɔɔdɩnɩ Ɛsɔ nɛ ɛ-nɔɔ, nɛ ɛha-ɩ tɔɔnaɣ, nɛ ɛcɛlɩ-ɩ Filisitii tʋ Gooliyaatɩ you sɩɣa d.
11 Pɩlabɩ ḿbʋ lɛ, wiyaʋ tiyi nabɛyɛ se, powolo payaa cɔjɔ Ahiimɛlɛɛkɩ nɛ ɛ-hɔʋ taa ñɩma ḿba paakɛ cɔjɔnaa ɖɔɖɔ Noovi yɔ. Paya-wɛ lɛ, pakʋyɩ pa-tɩŋa nɛ powolo wiyaʋ cɔlɔ. 12 Powoba ḿbʋ lɛ, Sawʋlɩ yaa Ahiimɛlɛɛkɩ se, Ahiituuvi pɩyalʋ nɛ ɛ́lɛ sɛɛ se, Ɖajaa! Se ɛnʋʋ yɔ! Nɛ Sawʋlɩ eheyi-i se, ewelisi ɖeu nɛ ɛnɩɩ! 13 Sawʋlɩ pɔzɩ-ɩ se, pɩlabɩ ɛzɩma nɛ ɛ nɛ Yeesee pɩyalʋ pata nɔɔ ɛnʋ yɔɔ? Se, ɛha ɛlɛɛ tɔɔnaɣ nɛ you sɩɣa, nɛ ɛyɔɔdɩnɩ Ɛsɔ ɛ́lɛ tɔm se, ɛ́lɛ ɛkʋyɩ ɛnʋ yɔɔ nɛ ɛɖʋ-ɩ kpacanaa ɛzɩ pɩwɛʋ kɩyakʋ ŋ́gʋ yɔ. 14 Peeye Ahiimɛlɛɛkɩ ya-ɩ se, Ɖajaa! Nɛ ɛpɔzɩ-ɩ se, ɛ-tʋmlaɖaa taa nɔɔyʋ lakɩ mbʋ ɛɖʋwa yɔ nɛ pɩkɩlɩ Daaviidi yaa we? Se, ɛ́lɛ kɛ ɛ-yɩtɩ nɛ ɛtɛ ɛkɛ youlaɖaa mba pɔcɔŋnɩ ɛ-maɣmaɣ ɛ-yɔɔ yɔ pa-ñʋʋdʋ, nɛ paɖʋʋ-ɩ hɩɖɛ siŋŋ ɛnʋʋ wiyaʋ ɛ-ɖɩɣa taa. 15 Se, pɩtɛkɛ kajalaɣ ñɩm lɛ ɛnʋ yɔɔdɩnaʋ Ɛsɔ ɛ́lɛ tɔm kɩyakʋ ŋ́gʋ yɔ. Se, pɩtatɩɩkɔm ɛnʋ taa se ɛnʋʋ wiyaʋ ɛ-wayɩ ɛlɩɣ. Se, ɛ́taaɖʋ ɛnʋʋ ɛ-tʋmlaɖʋ yaa ɛnʋ hɔʋ taa tʋ nɔɔyʋ tɔm. Se, toovenim lɛ, ɛnʋ tatɩɩsɩm tɔm ńdʋ tʋ-yɔɔ kaʋ. 16 Ahiimɛlɛɛkɩ tɛm yɔɔdʋʋ ḿbʋ lɛ, wiyaʋ kaɖɩ-ɩ se, ɛnʋʋ Ahiimɛlɛɛkɩ lɛ, ɛ nɛ ɛ-hɔʋ taa ñɩma tɩŋa pasɩkɩ.
17 Pʋwayɩ lɛ, ɛyɔɔdɩnɩ e-youlaɖaa mba paɖaŋɩɣ ɛ-yɔɔ yɔ. Paasɩŋ ɛ-cɔlɔ. Eheyi-wɛ se, powolo pakʋ KƖPAƔLƲ cɔjɔnaa ḿba, mbʋ pʋyɔɔ yɔ, paba ɖɔɖɔ sɩnɩ Daaviidi. Se, panawa se Daaviidi seɣaɣ nɛ peteheyi ɛnʋ. Ɛlɛ, pa-taa nɔɔyʋ tetisi se ɛkʋʋ cɔjɔnaa ḿba. 18 Peeye wiyaʋ heyi Edom tʋ Dowɛɛgɩ se, ɛ́lɛ ewolo nɛ ɛkʋ-wɛ.
Dowɛɛgɩ wolo ɛ-maɣmaɣ nɛ ɛkʋ cɔjɔnaa ḿba . Kɩyakʋ ŋ́gʋ, ɛkʋ ɛyaa nɩɩnʋwa nɛ niidozo nɛ kagbaanzɩ (85) mba posuwaɣ cɔjɔnaa wondu yɔ. 19 Piyele cɔjɔnaa ḿba pɛ-tɛtʋ, Noovi taa lɛ, Sawʋlɩ yele nɛ pakʋ halaa nɛ abalaa nɛ piya sɔsɔsɩ nɛ pɩcɩɩcɩɩm waa. Halɩ pɩkpɛndɩnɩ naŋ nɛ kpaŋasɩ nɛ heŋ nɛ pʋŋ. 20 Ahiimɛlɛɛkɩ pɩyalʋ weyi ɛkɛ Ahiituuvi sɛyɩ yɔ, e-ɖeke koŋ esena nɛ ɛtʋlɩ nɛ ɛkɔɔ ɛtalɩ Daaviidi cɔlɔ. Payaɣ-ɩ se, Abiyaataarɩ. 21 Ɛtalaa lɛ, eheyi Daaviidi se, Sawʋlɩ kʋ KƖPAƔLƲ cɔjɔnaa. 22 Eheyi Daaviidi ḿbʋ lɛ, ɛ́lɛ ñeheyi-i se, ɛnʋ kana ɖeu se, kɩyakʋ ŋ́gʋ, Edom tʋ Dowɛɛgɩ kɛwɛ Noovi peeye. Se, paapɩɩla ɛsɩna, ewokuu yɔ, ɛkɛdɩɣ Sawʋlɩ pɩ-tɩŋa. Se, ye ḿbʋ, ɛnʋʋ Daaviidi yebina nɛ ɛ́lɛ hɔʋ taa ñɩma tɩŋa sɩ. 23 Se, ɛ́lɛ ɛcaɣ ɛnʋ cɔlɔ, se, sɔɔndʋ ɛtaakpa-ɩ nɛ pʋyʋ. Se, Sawʋlɩ kʋɖʋm ɛnʋ ɛñɩnɩɣna se ɛkʋ ɛnʋ nɛ ɩ. Se, ye ɛcaɣ ɛnʋ cɔlɔ yɔ, pʋyʋ ɛɛlakɩ-ɩ.