10
Tolaa nɛ Yayiiri pɛkɛʋ nɔɔɖɛyaa yɔ
1 Abimelɛɛkɩ sɩm wayɩ lɛ, Puwa pɩyalʋ Tolaa wolo nɛ ɛya Izirɛɛlɩ samaɣ ñʋʋ. Ɛkɛ Dodoo sɛyɩ, nɛ ɛtɛ ɛkɛ Isaakaarɩ liɖe taa tʋ. Ɛɛwɛ Samiiri tɛtʋ taa, Efirayim pʋŋ egeetiye taa. 2 Tolaa ɖɛ Izirɛɛlɩ samaɣ nɔɔ pɩnzɩ nɩɩlɛ nɛ naadozo (23). Ɛsɩba lɛ, pepim-i Samiiri tɛtʋ taa.
3 Ɛ-wayɩ lɛ, Gaalaadɩ egeetiye taa tʋ Yayiiri. Ɛ́lɛ ɖɛ Izirɛɛlɩ ñɩma nɔɔ pɩnzɩ nɩɩlɛ nɛ naalɛ (22). 4 Ɛɛwɛnɩ pɩyalaa niidozo (30). Paa weyi nɛ ɛ-kpaŋaɣ nɛ ɛ-tɛtʋ, Gaalaadɩ egeetiye taa. Halɩnɩ sɔnɔ, payaɣ tɛtʋ ńdʋ tɩ-tɩŋa se, Yayiiri tɛtʋ. 5 Yayiiri kɔm ɛsɩ lɛ, pepim-i Kamɔɔnɩ tɛtʋ taa.
Amoonii ñɩma kʋyʋʋ Izirɛɛlɩ ñɩma yɔɔ yɔ
6 Izirɛɛlɩ ñɩma wɛɛ lɛ, paɖaɣnɩ pazʋʋ labʋ mbʋ pɩtɛkɛdɩnɩ KƖPAƔLƲ yɔ. Poluŋaɣ agɔlɩma Baalɩwaa nɛ Asɩtaarɩɩtɩwaa a pɛ-tɛɛ. Poluŋ ɖɔɖɔ Sirii nɛ Sidɔɔ nɛ Mowaabɩ nɛ Amoonii nɛ Filisitii pa-ñɩma ñɩna tɛɛ. Paha KƖPAƔLƲ siɣye nɛ peyele ɛ-tɛɛ luŋuu. 7 Pʋ-yɔɔ, KƖPAƔLƲ pana kpanɩ Izirɛɛlɩ ñɩma nɛ ɛɖʋzɩ-wɛ Filisitii nɛ Amoonii pa-ñɩma nesi taa. 8 Pɩkpaɣʋnɩ pɩnaɣ ŋ́ga yɔ́ɔ, paba pazɩ nazʋʋ Izirɛɛlɩ ñɩma mba paawɛ Gaalaadɩ egeetiye taa, Yɔɔrɩdaŋ pɔɔ nɛ wɩsɩ ɖɩlɩyɛ hɔɔlʋʋ taa yɔ nɛ pɛwɛɛ pa-wayɩ kaŋ kaŋ. Ɖooo lɛ, pɩɩkɛ Amoorii ñɩma ɛjaɖɛ. Palabɩ-wɛ mbʋʋ pɩnzɩ hiu nɛ lutozo (18). 9 Halɩ Amoonii ñɩma pɩzaa pɛɖɛzɩ Yɔɔrɩdaŋ pɔɔ nɛ pakʋyɩ Yuuda nɛ Bineyaamiini nɛ Efirayim pe-cejewee taa ñɩma yɔɔ nɛ piyele Izirɛɛlɩ ñɩma sʋʋ kʋñɔŋ sɔsɔʋ nakʋyʋ taa. 10 Peeye paya KƖPAƔLƲ se ewolo ɛsɩnɩ-wɛ. Peheyi-i se, ḿba yʋsɩnɩ-ɩ, mbʋ pʋyɔɔ yɔ, ḿba ha ɛnʋʋ pɛ-Ɛsɔ siɣye nɛ poluŋuu agɔlɩma Baalɩwaa tɛɛ. 11 Ɖɩnɛɛ, KƖPAƔLƲ pɔzɩ-wɛ se, alɩwaatʋ ndʋ Ejipiti nɛ Amoorii nɛ Amoonii nɛ Filisitii nɛ 12 Sidɔɔ nɛ Amalɛɛkɩ nɛ Mewuuni pa-ñɩma kanazɩ-wɛ nɛ payaa ɛnʋ se, ɛsɩnɩ-wɛ yɔ, ɛnʋ talɩzɩ-wɛ pe-nesi taa yaa we? 13 Se, ɛlɛ, ḿba yɔ, pahaɣaɣ ɛnʋʋ siɣye, nɛ piyele poluŋuu agɔlɩma tɛɛ. Se, pʋ-yɔɔ lɛ, ɛnʋ ɛɛtasɩɣ-wɛ lɩzʋʋ. 14 Se, páyaa agɔlɩma wena palɩzaa yɔ nɛ asɩnɩ-wɛ. Se, anaa pʋwɛɛ se, alɩzɩ-wɛ kʋñɔŋ taa. 15 Peeye Izirɛɛlɩ ñɩma tasɩ heyuu KƖPAƔLƲ se, ḿba yʋsaa. Se, ɛ́labɩ-wɛ ɛzɩ ɛsɔɔlʋʋ yɔ. Se, ɛlɛ, ɛ́tasɩ-wɛ lɩzʋʋ pɩ-taa puwiye ńɖɩ. 16 Pʋwayɩ lɛ, pɔ́lɔ agɔlɩma agɔma wena poluŋaɣ a-tɛɛ yɔ, nɛ papɩsɩ paɖaɣnɩɣ luŋuu KƖPAƔLƲ tɛɛ. Pʋ-yɔɔ ɛ́lɛ naɣaɣ pa-kʋñɔŋ nɛ pɩcɛyɩɣ-ɩ.
17 Pɩlabɩ ḿbʋ lɛ, Amoonii ñɩma yaa ɖama nɛ powolo pekpeɣli Gaalaadɩ egeetiye taa. Piyele Izirɛɛlɩ ñɩma ñayaa ɖama nɛ powolo pekpeɣli Micipaa b tɛtʋ taa. 18 Peeye Izirɛɛlɩ cejewee wena a-taa ñɩma nɛ pa-awiya pacaɣ Gaalaadɩ egeetiye taa yɔ, pɔpɔzɩ ɖama se, akaɣ kʋyʋʋ Amoonii ñɩma yɔɔ? Se, pʋdʋ kaɣnɩ kɛʋ Gaalaadɩ ñɩma tɩŋa payɩ wiyaʋ.