5
Hendu ndʋ Deboora nɛ Baraakɩ petewa yɔ
1 Puwiye nɖɩɩ Deboora nɛ Aviinowam pɩyalʋ Baraakɩ pete hendu se,
2 Izirɛɛlɩ ɛjaɖɛ taa lɛ,
Youlaɖaa ñɔɔzɩ pa-tɩ ɖeu,
Samaɣ haɣ ka-tɩ nɛ sɔɔlɩm se kalakɩ you,
Ɩsa KƖPAƔLƲ!
3 Mɩ awiya! Iwelisi!
Mɩ samaɣ ñʋndɩnaa! Ɩɖʋ nɩŋgbaaŋ nɛ ɩnɩɩ ɖeu!
Ma, menteɣ KƖPAƔLƲ, hendu,
Ma, mansaŋ KƖPAƔLƲ, Izirɛɛlɩ Ɛsɔ!
4 KƖPAƔLƲ, Ŋlɩnɩ Edom ɛjaɖɛ taa nɛ ŋkɔɔ lɛ,
Ŋlɩnɩ Seyiiri pʋŋ taa nɛ ŋtii lɛ,
Tɛtʋ pazɩ ñamsʋʋ,
Ɛsɔmɩndʋ luli yooo,
Tɛʋ sɔsɔʋ nakʋyʋ lɩnɩ ɛsɔdaa nɛ kitii yooo.
5 Pʋŋ seli ñɛ-ɛsɩndaa kpakpa,
Ñaa Sinaayii KƖPAƔLƲ, Izirɛɛlɩ Ɛsɔ.
6 Anaatɩ pɩyalʋ Samɩgaarɩ nɛ Yaayɛɛlɩ pa-alɩwaatʋ taa,
Ɛyaa takatɩɣ se patasɩ ɛjaɖɛ taa ɖɔm canɖaŋ canɖaŋ.
Nʋmɔŋ kɩ-cɛbɩŋ nʋmɔɖɔnɖaa tɩŋaɣ.
7 Pʋcɔ maa Deboora mɔnkɔɔ
nɛ mɛnkɛ Izirɛɛlɩ ñɩma ɖoo lɛ,
Nɔɔɖɛyʋ nɔɔyʋ kɛwɛɛ?
Nɔɔɖɛyʋ nɔɔyʋ kɛwɛ Izirɛɛlɩ ɛjaɖɛ taa?
8 Izirɛɛlɩ ñɩma luŋaɣ agɔlɩma tɛɛ
nɛ you lɩʋ kpaagbaa.
Kpayʋʋ maɣmaɣ wɛɛ?
Kɩgbɛzɛŋ maɣmaɣ wɛɛ?
Ɛbɛɛ pɛcɛlɩɣ Izirɛɛlɩ youlaɖaa kutokiŋ nɩɩnaza (40.000) yɔ?
9 Mamaɣzɩɣ Izirɛɛlɩ youlaɖaa ñʋndɩnaa yɔɔ,
Mamaɣzɩɣ samaɣ taa ñɩma mba paha pa-tɩ nɛ sɔɔlɩm se palakɩ you yɔ, pɔ-yɔɔ.
Ɩsa KƖPAƔLƲ!
10 Kpaŋasɩ a kʋhʋlʋmsɩ caɣyaa mɩ!
Liidiye pɩsaŋ b yɔɔ caɣyaa mɩ!
Habɛ yɔɔ ɖɔnɖaa c mɩ!
Ɩmaɣzɩ tɔm ndʋ tɩ-yɔɔ ɖeu!
11 Ninɖiyaa wɛ lɩm ɖɩñɔyɛ cɔlɔ
Pɛkɛdɩɣ KƖPAƔLƲ camiyɛ lakasɩ tɔm,
Camɩyɛ lakasɩ nzɩ ɛlabɩ Izirɛɛlɩ nɔɔɖɛyaa yɔ.
Peeye KƖPAƔLƲ samaɣ lɩ tɛtʋ nɔnɔsɩ taa.
12 Deboora! Fe! Fe!
Fe nɛ ŋkalɩ you hendu!
Aviinowam pɩyalʋ Baraakɩ!
Kʋyɩ nɛ ŋpɩsɩnɩ ño-yomaa!
13 Mba patʋlaa yɔ, pɛkpɛndɩ nɔɔɖɛyaa yɔɔ,
KƖPAƔLƲ samaɣ kpeɣli ɖama
ɛ-cɔlɔ ɛzɩ waɖaa yɔ.
14 Mba pawabɩ Amalɛɛkɩ liɖe taa ñɩma yɔ,
palɩnɩ Efirayim cejewiye taa nɛ petii.
Bineyaamiini ñɩnɖɛ taa ñɩma tɩŋ-wɛ
nɛ pesidi po-youlaɖaa taa.
Nɔɔɖɛyaa lɩnɩ Makiiri liɖe taa nɛ petii.
Tɛtʋ ɖɔkɩyaa ñalɩnɩ Zabulɔɔnɩ cejewiye taa.
15 Isaakaarɩ cejewiye taa nɔɔɖɛyaa kpɛndɩ maa, Deboora mɔ-yɔɔ.
Isaakaarɩ cejewiye taa ñɩma lakɩ ɛzɩ Baraakɩ yɔ.
Pakʋyɩ lɛɛlɛɛ nɛ patɩŋ ɛ-wayɩ kɛdɛɛŋa taa.
Ɛlɛ, lila wena awɛ Ruubɛɛnɩ cejewiye taa yɔ, a-taa lɛ,
pɔhɔmnɩ ɖama, kamaɣ fɛyɩ.
16 Pɩlabɩ ɛzɩma nɛ ɩcaɣ wondu kalakɩŋ cɔlɔ
nɛ iwelesiɣ ninɖiyaa yaɣʋ po-wondu yɔ?
Toovenim, Ruubɛɛnɩ cejewiye taa yɔ,
pɔhɔmnɩ ɖama, kamaɣ pɩfɛyɩ.
17 Gaalaadɩ, Yɔɔrɩdaŋ pɔɔ wɩsɩ ɖɩlɩyɛ hɔɔlʋʋ taa lɛ,
pe-cejewiye taa ñɩma totuu nɩŋgbaŋaɣ.
Daanɩ cejewiye taa ñɩma ñaacaɣ teŋgu nɔɔ, pɛ-mɛlɛnaa cɔlɔ.
Asɛɛrɩ ñɩnɖɛ taa ñɩma ñaacaɣ ɖɔɖɔ
teŋgu nɔɔ, pɛ-mɛlɛnaa ɖɩsɩŋɩyɛ.
18 Piyele Zabulɔɔnɩ cejewiye taa ñɩma lɛ,
paba tisaa nɛ pocoɖi sɩm you taa
ɛzɩ Nɛfɩtaalii cejewiye taa ñɩma yɔ.
19 Koyindinaa awiya, Kanaanɩ awiya
kʋyɩ ɖɔ-yɔɔ Taanakɩ tɛtʋ cɔlɔ,
Megiidoo d tɛtʋ hila cɔlɔ,
ɛlɛ, patakpaɣ paa ñɩm yaa liidiye.
20 Tɩɩnzɩ kʋyɩnɩ ɖooo ɛsɔdaa nɛ sɩla you.
Sɩtɩŋ sɩ-nʋmɔŋ nɛ sɩkʋyɩ Siseraa yɔɔ.
21 Kisooni pɔɔ kpaɣ-wɛ
Kisooni pɔɔ, lɔndaa pɔɔ.
Man-ciyam! Ɖɔ́mnɩ abalɩtʋ!
22 Peeye, kpaŋnaŋ kpaɣ seya
nɛ ɛ-acaa wiɣ tataa cigidim cigidim.
23 KƖPAƔLƲ tiyiyu tɔŋ se,
Páwɩlɩ Meeroozi tɛtʋ kpalʋʋ,
páwɩlɩ-tʋ kpalʋʋ, páwɩlɩ tɩ-taa ñɩma kpalʋʋ!
Potowolo paɖʋ KƖPAƔLƲ nesi,
pa nɛ pɔ-sɔdɩŋ, potowolo paɖʋ-ɩ nesi.
24 Pawazɩ Kenii tʋ Hɛbɛɛrɩ halʋ Yaayɛɛlɩ yɔɔ
nɛ pɩkɩlɩ halaa tɩŋa!
Toovenim, pawazɩ ɛ-yɔɔ
nɛ pɩkɩlɩ halaa mba pasʋʋ kɩɖanɖʋʋ tɛɛ yɔ, pa-tɩŋa!
25 Siseraa sʋlʋm-ɩ lɩm,
ɛha ɛlɛɛ naalɩm
pɩ nɛ pɩ-naanim, eyiɣa kɩbaŋga nakɛyɛ taa.
26 Ɛlɛ, Yaayɛɛlɩ sezi ɛkpaɣ kaŋgamaɣ nɛ ɛ-nɩmɩyɛ,
nɛ ɛkpaɣ tʋmlaɖʋ hama nɛ ɛ-nɩwaŋ.
Ɛma Siseraa ñʋʋ nɛ kɩyɔkɩ,
ɛmabɩ-kʋ, nɛ kʋtʋlɩ.
27 Siseraa yele ɛ-tɩ nɛ ɛtɔlɩ Yaayɛɛlɩ ɛsɩndaa.
Ɛhɛnɩ tataa cɔmm, ɛ́lɛ nɩŋgbanzɩ tɛɛ.
Eyebi ɛ-tɩ nɛ ɛtɔlɩ, ɛsɩba.
28 Siseraa ɖoo wɛɛ ɛcɔŋnɩnɩ muntoɖebɔʋ,
ɛwɛɛ peeye nɛ ekpiɖiɣ se,
pɩlabɩ ɛzɩma nɛ ɛ-pɩyalʋ youlɔɔɖɩyɛ ɛɛkɔŋ lɔŋ?
Pɩlabɩ ɛzɩma nɛ ɛɛkɔŋ lɔŋ?
29 Ɛ-taabalaa mba pakɩlɩ lɔŋ yɔ, pocosi-i,
nɛ ɛwɛɛ ɛyɔɔdʋʋ ndʋ pocosi-i yɔ, se,
30 paa pɩɩla ɛzɩma, youlaɖaa wɛɛ patayɩɣ
mbʋ pehiɣ you taa yɔ.
Paa weyi ɛkpakɩɣ pɛlɛ kʋɖʋm yaa naalɛ.
Siseraa ñehiɣ pɩsaŋ,
Peli-i tɔlɩm nɛ pacanɩ-ɩ.
Toovenim lɛ, pacanɩ nakʋyʋ ɖeu.
Popuzuu-kʋ waɖʋ liu tɛɛ.
31 KƖPAƔLƲ! Ño-koyindinaa tɩŋa
ɛsɩ ɛzɩ Siseraa yɔ!
Ɛlɛ, ñɛ-ɛgbaadɩna ɛwɛɛ ɖoŋ
ɛzɩ wɩsɩ lɩɣʋ nɛ sɩwɛɣ yɔ!
Pɩlabɩ ḿbʋ lɛ, Izirɛɛlɩ ɛjaɖɛ taa ñɩma wɛɛ laŋhɛzɩyɛ taa pɩnzɩ nɩɩnaza (40).