4
Deboora nɛ Baraakɩ pɔ-tɔm
1 Ehuudi sɩm wayɩ lɛ, Izirɛɛlɩ ñɩma ɖaɣnɩ labʋ mbʋ pɩtɛkɛdɩnɩ KƖPAƔLƲ yɔ. 2 Palabɩ ḿbʋ lɛ, KƖPAƔLƲ ɖʋzɩ-wɛ Kanaanɩ wiyaʋ Yaabiini nesi taa. Ɛ́lɛ kɛwɛ Hacɔɔrɩ tɛtʋ taa. E-youlaɖaa ñʋʋdʋ lɛ Siseraa, nɛ ɛ́lɛ ñɛwɛɛ Haroosɛɛtɩhagooyim tɛtʋ taa. 3 Yaabiini kɛwɛnɩ youlɔɔɖa ñɩɣtʋ ñɩna a taŋga nɛ nasɩnaza (900). Ɛnazɩ Izirɛɛlɩ ñɩma siŋŋ pɩnzɩ nɩɩlɛ (20). Peeye pamabɩ kubusi nɛ payaa KƖPAƔLƲ se ɛlɩzɩ-wɛ pɩ-taa.
4 Ŋgʋ, Lapiidooti halʋ Deboora kɛkɛ Ɛsɔ lɔɔyaɣ tʋ alɩwaatʋ ńdʋ tɩ-taa. Ɛɛkɛ Izirɛɛlɩ ñɩma nɔɔɖɛyʋ. 5 Pɔʋ nakʋyʋ tɛɛ ɛcakaɣ nɛ ɛhʋʋ tɔm. Pɔkɔɔ pɛtɛmnɩ-kʋ yaʋ se Deboora pɔʋ. Kɩwɛ Ramaa tɛtʋ nɛ Beetɛɛlɩ ñɩndʋ pɛ-hɛkʋ taa, Efiraayim pʋŋ egeetiye taa. Peeye Izirɛɛlɩ ñɩma wokaɣ ɛ-cɔlɔ nɛ pahʋʋ tɔm. 6 Nakʋyʋ wiye, Deboora tiyaa se payaa Baraakɩ. Baraakɩ kɛkɛ abalʋ weyi payaɣ se Aviinowam yɔ, ɛ-pɩyalʋ. Ɛ́lɛ ñɛkɛ Nɛfɩtaalii hɔɔlʋʋ taa Kɛdɛɛsɩ tɛtʋ taa tʋ. Baraakɩ woba lɛ, eheyi-i nɛ KƖPAƔLƲ Izirɛɛlɩ Ɛsɔ nɔɔ se, ewolo Nɛfɩtaalii nɛ Zabulɔɔnɩ pe-cejewe taa nɛ ɛlɩzɩ abalaa kutokiŋ hiu (10.000), nɛ ekpeɣli-wɛ Tabɔɔrɩ pʋʋ b ñʋʋ taa. 7 Se, ɛnʋʋ Ɛsɔ, eseɣtiɣ Yaaviini youlaɖaa ñʋʋdʋ Siseraa nɛ ɛkpaɣ e-youlɔɔɖaa nɛ ɛ-ɛyaa tɩŋa nɛ powolo pakʋyɩ ɛ-yɔɔ Kisooni pɔɔ nɔɔ. Ɛlɛ, ɛnʋʋ Ɛsɔ, ɛɖʋzʋʋ-wɛ e-nesi taa. 8 Peeye Baraakɩ cosi Deboora se, ye ɛ nɛ ɩ powokina yɔ, ɛnʋ woki. Ɛlɛ, ye eewoki yɔ, ɛnʋ ñaawoki ɖɔɖɔ. 9 Pʋ-yɔɔ Deboora kaɖɩ-ɩ kpayɩ se, ɛnʋ sɩɣ-ɩ. Ɛlɛ, ɛ-hɩɖɛ ɛɛsɛɣ ɛ-nʋmɔʋ ŋ́gʋ kɩ-taa. Mbʋ pʋyɔɔ yɔ, halʋ nesɩ taa KƖPAƔLƲ ɖʋzʋʋ Siseraa.
Peeye Deboora nɛ Baraakɩ pakʋyaa se powoki Kɛdɛɛsɩ tɛtʋ taa. 10 Pɛɖɛɣaɣ lɛ, Baraakɩ kpeɣli Nɛfɩtaalii nɛ Zabulɔɔnɩ pe-cejewe taa ñɩma nɛ abalaa kutokiŋ hiu (10.000) ɖʋ pa-taa se patɩŋɩɣ-ɩ. Halɩ Deboora maɣmaɣ tɩŋ-ɩ nɛ ɛ nɛ ɩ powolo. 11 Abalʋ nɔɔyʋ kɛwɛ Kɛdɛɛsɩ tɛtʋ cɔlɔ, payaɣ-ɩ se Hɛbɛɛrɩ. Ɛkɛ Kenii liɖe taa tʋ. Ɛɛlɩzɩ ɛ-tɩ Kenii liɖe taa ñɩma taa lɛlaa taa nɛ ewolo esiɣ ɛ-kɩɖanɖʋʋ Caananiim tɩʋ sɔsɔʋ cɔlɔ. Lɛlaa mba pɛkɛ Mooyiizi yɩtɩ Hobaabɩ liɖe taa ñɩma.
12 Tɔɔ! Pɩlabɩ ḿbʋ lɛ, peheyi Siseraa se, Aviinowam pɩyalʋ Baraakɩ kpa Tabɔɔrɩ pʋʋ taa. 13 Peheyi-i ḿbʋ lɛ, ekpeɣli e-youlɔɔɖaa ñɩɣtʋ ñɩna taŋga nɛ nasɩnaza (900) nɛ ɛ-ɛyaa tɩŋa, Haroosɛɛtɩhagooyim tɛtʋ taa. Pʋwayɩ lɛ, pakʋyɩ peeye nɛ powolo Kisooni pɔɔ nɔɔ. 14 Ɖɩnɛɛ Deboora heyi Baraakɩ se, pakpaɣ nʋmɔʋ! Se, kɩyakʋ ŋgʋʋ KƖPAƔLƲ ɖʋzʋʋ Siseraa e-nesi taa. Se, KƖPAƔLƲ maɣmaɣ ɖɛɣ-ɩ nɔɔ. Peeye, Baraakɩ ɖɛ ɛ-ɛyaa kutokiŋ hiu (10.000) nɔɔ nɛ petii Tabɔɔrɩ pʋʋ. 15 Petiba nɛ papazɩ you lɛ, KƖPAƔLƲ yele nɛ Siseraa nɛ e-youlɔɔɖaa nɛ ɛ-ɛyaa papazɩ seu Baraakɩ ɛsɩndaa yem yem. Pɩkɛdaa lɛ, Siseraa lɩɩ e-youlɔɔɖɩyɛ taa nɛ ɛpazɩ seu nɩŋgbanzɩ. 16 Baraakɩ ɛnʋ ɛɖɔɔnɩ Siseraa youlɔɔɖaa nɛ ɛ-ɛyaa nɛ ɛkɔɔ ehiɣ-wɛ Haroosɛɛtɩhagooyim tɛtʋ taa. Pakʋ Siseraa ɛyaa tiŋa, pɩtakazɩ paa kʋɖʋm.
17 Pɩlakaɣ ḿbʋ lɛ, Siseraa kpaɣ seya nɛ ewokini Kenii liɖe taa tʋ Hɛbɛɛrɩ halʋ Yaayɛɛlɩ kɩɖanɖʋʋ yɔɔ. Mbʋ pʋyɔɔ yɔ, Hɛbɛɛrɩ hɔʋ nɛ Siseraa ɛnʋ ɛ-ñʋʋdʋ, Hacɔɔrɩ wiyaʋ Yaabiini pɩɩwɛ leleŋ. 18 Ɛkɔm ɛtalɩ kɩɖanɖʋʋ ŋ́gʋ kʋ-cɔlɔ lɛ, Yaayɛɛlɩ lɩɩ ɛkatɩ-ɩ nɛ ɛyaa-ɩ se Ɖajaa! Nɛ eheyi-i se, ɛsʋʋ ɛnʋ tɛ, sɔɔndʋ ɛtaakpa-ɩ. Siseraa wolo ɛsʋʋ ɛmɛlɩ Yaayɛɛlɩ kɩɖanɖʋʋ tɛɛ, nɛ ɛ́lɛ kpaɣ pɩsaʋ nakʋyʋ nɛ ehuusi ɛ-yɔɔ. 19 Ɖɩnɛɛ Siseraa heyi-i se, lɔkɔtʋ ɖɛ ɛnʋ, se ɛha ɛnʋʋ lɩm pazɩ nɛ ɛñɔɔ. Peeye Yaayɛɛlɩ kuli naalɩm tokaɣ yɔɔ nɛ ɛcɛlɩ-ɩ nɛ ɛñɔɔ. Ɛtɛm ñɔʋ lɛ, ɛ́lɛ ɖaɣnɩ ɛ-yɔɔ huuzuu. 20 Pʋwayɩ lɛ, ɛtasɩ halʋ heyuu se, ɛ́sɩŋ kɩɖanɖʋʋ nɔnɔɔ taa. Se, ye nɔɔyʋ ewoba nɛ ɛpɔzɩ-ɩ se, nɔɔyʋ wobi ɛmɛlɩ peeye naa we lɛ, ecosi pʋdʋ se, aayɩ!
21 Pʋwayɩ lɛ, Siseraa hɛnɩ nɛ eɖou. Mbʋ pʋyɔɔ yɔ, pɩɩnɩ-ɩ pɩtɩɩfɛyɩ. Eɖowaɣ lɛ, Hɛbɛɛrɩ halʋ Yaayɛɛlɩ kpaɣ kɩɖanɖʋʋ kaŋgamaɣ nakɛyɛ nɛ hama nɛ ɛɖɔ ɖaa ɖaa nɛ ɛsʋʋ ɛ-cɔlɔ. Ɛsʋwa lɛ, ɛkam-kɛ ɛ́lɛ ñʋʋ taa, nɛ kalɩnɩ wayɩ nɛ kakamnɩ tɛtʋ, nɛ ɛ́lɛ sɩ. 22 Pɩkɛdaa lɛ, Baraakɩ weyi ɛɖɔɔnaɣ Siseraa yɔ, ɛtalɩ. Ɛtalaa lɛ, Yaayɛɛlɩ lɩɩ ɛkatɩ-ɩ nɛ eheyi-i se, ewolo nɛ ɛnʋ wɩlɩ-ɩ ɛyʋ weyi ɛñɩnɩɣ yɔ. Baraakɩ sʋ kɩɖanɖʋʋ tɛɛ lɛ, ɛmaɣnɩ Siseraa tataa, ɛsɩba, kaŋgamaɣ ɛ-ñʋʋ taa.