3
1 KƖPAƔLƲ yebi-wɛ nɛ pɛwɛɛ ɛjaɖɛ taa mbʋ se, ɛtakɩnɩ Izirɛɛlɩ ñɩma mba pataana you ŋgʋ pamʋnɩ Kanaanɩ ɛjaɖɛ yɔ, kʋ-yɔɔ yɔ. 2 Ɛɛsɔɔlaa se, Izirɛɛlɩ piya kɩfasɩ, kɔzɩ kɔzɩ nzɩ sitoyoda yɔ, sɩkpɛlɩkɩ you. 3 Mba eyebi-wɛ ɛjaɖɛ taa yɔ, mbaa yɔ, Filisitii ñɩma nɛ pa-awiya kagbaanzɩ, nɛ Kanaanɩ ñɩma tɩŋa, nɛ Sidɔɔ ñɩma, nɛ Hivii sɛyɩnaa mba pɛwɛ Liibaɣ pʋŋ taa yɔ, kpaɣnɩ Baalɩhɛɛrɩmɔɔnɩ pʋʋ nɛ piwolo pɩsɩnɩ ɖenɖe payaɣ se Leboohamaatɩ yɔ. 4 KƖPAƔLƲ kɔsɔɔlaa se ɛtɩŋnɩ pɔ-yɔɔ nɛ ɛna se, Izirɛɛlɩ ñɩma ñaŋ paɣtʋ ndʋ ɛtɩŋnɩ Mooyiizi yɔɔ nɛ ɛɖʋ pɔ-cɔzɔnaa yɔ, yaa paañaŋ. 5 Ḿbʋ yebina nɛ Izirɛɛlɩ ñɩma caɣ Kanaanɩ ñɩma nɛ Hɛɛtɩ nɛ Amoorii nɛ Periizii nɛ Hivii nɛ Yeebuusii pe-lila taa ñɩma taa. 6 Ɖɩnɛɛ, powoba pakpaɣ paba pɛlaa, nɛ paha pabaa pɛ-pɛlaa nɛ poluŋuu paba agɔlɩma tɛɛ.
NƆƆƉƐYAA TƆM
Ɔtɩnɩyɛɛlɩ kɛʋ nɔɔɖɛyʋ yɔ
7 Pʋwayɩ lɛ, Izirɛɛlɩ ñɩma la mbʋ pɩtɛkɛdɩnɩ pa-KƖPAƔLƲ Ɛsɔ yɔ. Paha-ɩ siɣye, nɛ poluŋuu agɔlɩma Baalɩwaa nɛ Aserawaa a pɛ-tɛɛ. 8 Pɩlabɩ ḿbʋ lɛ, KƖPAƔLƲ pana kpanɩ Izirɛɛlɩ ñɩma, nɛ ɛkpaɣ-wɛ nɛ ɛɖʋzɩ Mezoopotamii wiyaʋ sɔsɔ Kusaanɩriisaatayim nesi taa, nɛ pɛkɛ ɛ́lɛ yomaa pɩnzɩ lutozo (08). 9 Peeye, pamabɩ kubusi nɛ payaa KƖPAƔLƲ se, ɛsɩnɩ-wɛ, nɛ ɛ́lɛ tiyini-wɛ Kaalɛɛbɩ neu Kenaazɩ pɩyalʋ, Ɔtɩnɩyɛɛlɩ se ɛlɩzɩ-wɛ pɩ-taa. 10 Pɩlabɩ ḿbʋ lɛ, KƖPAƔLƲ Kalɩzaɣ tii Ɔtɩnɩyɛɛlɩ yɔɔ, nɛ piyele ɛkɛ Izirɛɛlɩ samaɣ nɔɔɖɛyʋ. Pʋwayɩ lɛ, Ɔtɩnɩyɛɛlɩ ɖɛɛ you, nɛ KƖPAƔLƲ yele nɛ ɛwa wiyaʋ sɔsɔ Kusaanɩriisaatayim ɛnʋ kpaagbaa kpem. 11 Ɛwabɩ ɛ́lɛ lɛ, Izirɛɛlɩ ñɩma wɛɛ laŋhɛzɩyɛ taa nɛ pɩkɔɔ pɩsɩnɩ ɛ-sɩm. Paawɛ ɖɩ-taa pɩnzɩ nɩɩnaza (40).
Ehuudi kɛʋ nɔɔɖɛyʋ yɔ
12 Pʋwayɩ lɛ, Izirɛɛlɩ ñɩma tasɩ labʋ mbʋ pɩtɛkɛdɩnɩ KƖPAƔLƲ yɔ. Pʋ-yɔɔ ɛ́lɛ yeba nɛ Mowaabɩ b wiyaʋ Ɛgɩlɔɔnɩ kʋyɩ pɔ-yɔɔ. 13 Peeye Ɛgɩlɔɔnɩ woba nɛ ɛ nɛ Amoonii nɛ Amalɛɛkɩ pa-ñɩma c pata nɔɔ, nɛ pakʋyɩ Izirɛɛlɩ ñɩma yɔɔ nɛ pamʋ paŋ tɛtʋ d. 14 Pɩlabɩ ḿbʋ lɛ, Izirɛɛlɩ ñɩma wɛɛ Mowaabɩ wiyaʋ Ɛgɩlɔɔnɩ nesi taa pɩnzɩ hiu nɛ lutozo (18). 15 Peeye, Izirɛɛlɩ ñɩma mabɩ kubusi nɛ payaa KƖPAƔLƲ se, ɛlɩzɩ-wɛ pɩ-taa. Ɛ́lɛ nɩɩ po-kubusi nɛ etiyini-wɛ ñʋʋyaɖʋ nɔɔyʋ. Ɛnʋʋ lɛ, Bineyaamiini liɖe taa tʋ Geraa pɩyalʋ Ehuudi. Ehuudi kɛ nɩmɩyɛ tʋ.
Ɛnʋʋ Izirɛɛlɩ ñɩma tiyaa nɛ ewoni Mowaabɩ wiyaʋ lambuu ŋgʋ pamʋwa yɔ. 16 Ehuudi ɛnʋ eeyeba nɛ polubi-i sɩɣa ŋga kɛwɛ lɔŋ cenje yɔ, nɛ ɛmɛsɩ-kɛ e-wondu tɛɛ ɛ-nɩwaŋ yuye yɔɔ. Sɩɣa ŋ́ga, ka-ɖaɣlɩkɩŋ wɛ ɛzɩ mɛta hɔɔlʋʋ yɔ. 17 Pʋwayɩ lɛ, Ehuudi woni Mowaabɩ wiyaʋ Ɛgɩlɔɔnɩ lambuu. Ɛgɩlɔɔnɩ keki yem mʋkʋdʋm. 18 Ehuudi tɛm-ɩ cɛlɩɣ lambuu lɛ, Ehuudi ɛnʋ ɛsɩɩ ɛyaa mba paasɩɣlɩ-kʋ yɔ. 19 Pɔkɔm patalɩ Giligaalɩ e ɛgɔlɩmɩyɛ sɩʋkpelisi cɔlɔ lɛ, eyebi-wɛ nɛ ɛpɩsɩ wiyaʋ cɔlɔ. Ɛpɩsɩ ɛ́lɛ cɔlɔ lɛ, eheyi-i se, ɛnʋ caɣ se eheyi-i mɛsaɣ tɛɛ tɔm natʋyʋ. Peeye, wiyaʋ heyi ɛ-tʋmlaɖaa se, peyele ɛnʋ, paba ñalɩɩ ɖɔɖɔ. 20 Alɩwaatʋ ńdʋ lɛ, wiyaʋ kacaɣ ɛ-ɛsɔdaa kuduyuu tɛɛ, kɩ-tɛɛ keniɣdi ɖeu. Peeye Ehuudi ñɔtɩnɩ-ɩ nɛ ɛtɔ se, tɔm ndʋ ɛnʋ caɣ-ɩ heyuu yɔ, tɩlɩnɩ Ɛsɔ cɔlɔ. Ɛyɔɔdɩ ḿbʋ lɛ, wiyaʋ kʋyɩnɩ ɛ-ɖɩcaɣyɛ taa kpaka. 21 Ɖɩnɛɛ Ehuudi kpɛ sɩɣa ŋga ɛɛɖʋ e-nesi kɩbanzɩ yuye yɔɔ yɔ nɛ nɩmɩyɛ nɛ ɛsɔ wiyaʋ lotu taa cuɖu. 22 Ɛsɔbɩ-ɩ ḿbʋ lɛ, sɩɣa caŋ ka-tɩŋa wiyaʋ lotu taa, halɩ pɩkpɛndɩnɩ toɖe. Eyebi-kɛ nɛ nim huuzi kɔ-yɔɔ nɛ ɛcaŋ ɛlɩɩ. 23 Pʋcɔ nɛ ɛlɩɩ lɛ, ɛkaɖɩ ɛsɔdaa kuduyuu ŋ́gʋ kʋ-nɔnɔsɩ nɛ ɛtɩŋnɩ nɔnɔɔ lɛɛka nɛ ɛɖɛɛ.
24 Ɛɖɛ ḿbʋ lɛ, wiyaʋ tʋmlaɖaa ñowolo nɛ pamaɣnɩ pakaɖɩ nɔnɔsɩ, nɛ pɔtɔŋ se, paa pɩɩla ɛzɩma, wiyaʋ ɖɔŋnɩ lɩʋ hɩm pɩ-taa. 25 Paɖaŋaa nɛ pɩnɩɩ-wɛ nɛ wiyaʋ ɛɛtʋlʋʋ nɔnɔsɩ lɛ, pakpaɣ ñɩmɩyɛ nɛ patʋlɩ pa-maɣmaɣ. Patʋlaa lɛ, pamaɣnɩ pa-caa tataa, ɛsɩba. 26 Pɛwɛ peeye nɛ pelesiɣ alɩwaatʋ ḿbʋ lɛ, Ehuudi ñɛtɛm seu nɛ ɛɖɛɛ Giligaalɩ ɛgɔlɩmɩyɛ sɩʋkpelisi yɔɔ se ewolo ɛmɛlɩ Seyiiraa egeetiye taa. 27 Ɛkɔm ɛtalɩ peeye Efirayim pʋʋ egeetiye f taa lɛ, ɛ́yaa nɔndɔʋ nɛ ekpeɣli Izirɛɛlɩ ñɩma nɛ ɛɖɛɛ-wɛ nɔɔ nɛ petii pʋʋ. 28 Eheyi-wɛ se, patɩŋ ɛnʋ wayɩ. Mbʋ pʋyɔɔ yɔ, KƖPAƔLƲ ɖʋzɩ po-koyindinaa Mowaabɩ ñɩma pe-nesi taa. Mbʋʋ, patɩŋ Ehuudi wayɩ nɛ paɖɩɣ Mowaabɩ ñɩma nʋmɔŋ ɖenɖe ɖenɖe patɩŋɩɣ nɛ pɛtɛzɩɣ Yɔɔrɩdaŋ pɔɔ nɩŋgbanzɩ yɔ, peteyele se nɔɔyʋ ɛpɩzɩ ɛɖɛzɩ pɔɔ. 29 Alɩwaatʋ ńdʋ tɩ-taa, pakʋ Mowaabɩ ñɩma sɔdɩŋ taa sɔdɩŋ ɛzɩ kutokiŋ hiu (10.000) yɔ. Pa-taa nɔɔyʋ tapɩzɩ ɛtʋlɩ. 30 Pɩkpaɣʋnɩ puwiye yɔ́ɔ, Mowaabɩ ñɩma luzi pa-tɩ Izirɛɛlɩ ñɩma tɛɛ, nɛ Izirɛɛlɩ ɛjaɖɛ wɛɛ laŋhɛzɩyɛ taa pɩnzɩ nɩɩnʋwa nɛ niidozo (80).
Samɩgaarɩ kɛʋ nɔɔɖɛyʋ yɔ
31 Ehuudi wayɩ lɛ, Anaatɩ pɩyalʋ Samɩgaarɩ kɛnɩ Izirɛɛlɩ ñɩma nɔɔɖɛyʋ. Ɛ́lɛ ñakpaɣ ɖaʋ ŋgʋ kʋ-nɔɔ taa nɛ ñɩmɩyɛ nɛ pɔsɔkɩ naŋ nɛ ɛɖɔŋ yɔ nɛ ɛkʋnɩ Filisitii ñɩma ɛyaa taŋga nɛ mɩnʋʋ (600). Mbʋʋ, ɛ́lɛ ɖɔɖɔ yabɩ Izirɛɛlɩ samaɣ ñʋʋ.