6
Maadɩyaanɩ ñɩma nazʋʋ Izirɛɛlɩ piya yɔ
1 Ɛlɛ, Izirɛɛlɩ ñɩma tasɩ labʋ mbʋ pɩtɛkɛdɩnɩ KƖPAƔLƲ yɔ. Pʋ-yɔɔ, Ɛ́lɛ ɖʋzɩ-wɛ Maadɩyaanɩ a ñɩma nesi taa pɩnzɩ lʋbɛ (7). 2 Pɩlabɩ ḿbʋ lɛ, Maadɩyaanɩ ñɩma nazɩ Izirɛɛlɩ ñɩma pɩfɛyɩ yɔɔdʋʋ. Pʋ-yɔɔ paba sewa pakpa pʋŋ taa nɛ pɛmɛlɩ pɔŋ nɛ pɛ hɛɛnzɩ nɛ lona wena a-taa sʋʋ wɛ kaɖɛ yɔ, pa-taa. 3 Paa ɛzɩmtaa Izirɛɛlɩ ñɩma ɛhayaa nɛ poɖuu yɔ, Maadɩyaanɩ ñɩma nɛ Amalɛɛkɩ liɖe taa ñɩma b nɛ wɩsɩ ɖɩlɩyɛ hɔɔlʋʋ taa kacaɣkakʋyɩwaa lɛlaa, powoki nɛ pakʋyʋʋ pɔ-yɔɔ. 4 Powoki lɛ, pacaɣ Izirɛɛlɩ ñɩma tɛ nɛ pɛwɛɛkɩɣ tɔɔnasɩ hayɩm taa nɛ halɩ pɔkɔɔ pɔñɔtɩnɩ Gaazaa tɛtʋ c. Pataakazɩɣ Izirɛɛlɩ ñɩma pʋyʋ se pɔtɔɔ. Pataakazɩɣ heŋ yaa naŋ yaa kpaŋasɩ. 5 Toovenim lɛ, paakpɛndɩnɩ po-wondu nɛ pa-kɩɖanɖɩŋ nɛ powolo peeye sakɩyɛ ɛzɩ kutoloŋ yɔ. Pa nɛ pa-kʋyʋndʋʋ kpaŋnaŋ paaɖɔ pɩtɩɩfɛyɩ, pɛfɛyɩ kalʋʋ. Pasʋwaɣ Izirɛɛlɩ ɛjaɖɛ taa wiii nɛ pɛwɛɛkɩɣ-ɖɩ. 6 Mbʋʋ Maadɩyaanɩ ñɩma yeba nɛ Izirɛɛlɩ ñɩma sʋʋ kʋñɔŋ taa. Pʋ-yɔɔ paba mabɩ kubusi nɛ payaa KƖPAƔLƲ se, ɛlɩzɩ-wɛ pɩ-taa.
7 Izirɛɛlɩ ñɩma ya KƖPAƔLƲ se ɛlɩzɩ-wɛ Maadɩyaanɩ ñɩma nesi taa lɛ, 8 etiyini-wɛ lɔɔyaɣ tʋ nɔɔyʋ nɛ ɛ́lɛ heyi-wɛ se, KƖPAƔLƲ Izirɛɛlɩ Ɛsɔ kaɖɩɣ se, ɛnʋ lɩzɩnɩ-wɛ Ejipiti ɛjaɖɛ nɖɩ ɖɩ-taa paakɛ yomaa yɔ, ɖɩ-taa. 9 Se, ɛnʋ lɩzɩ-wɛ Ejipiti ñɩma nɛ mba pa-tɩŋa payɩ panaɣzaɣ-wɛ yɔ, pe-nesi taa. Se, pɔɖɔŋaɣ powoki lɛ, ɛnʋ ɖɔɔnʋʋ po-koyindinaa nɛ ɛnʋ cɛlɩɣ-wɛ paba-ɛjaɖɛ se ɖɩkɛ pa-ñɩnɖɛ. 10 Se, ɛnʋ tɔzɩ-wɛ se ɛnʋʋ lɛ, pa-KƖPAƔLƲ Ɛsɔ. Se, pɩfɛyɩ se poluŋ Amoorii ñɩma mba pɛwɛ paba ɛjaɖɛ taa yɔ, pa-agɔlɩma tɛɛ. Ɛlɛ, patanɩnɩ ɛnʋ.
Ɛsɔ yaʋ Jedeyɔɔ yɔ
11 Pʋwayɩ lɛ, KƖPAƔLƲ tiyiyu wolo Ɔfɩraa tɛtʋ taa. Ewoba lɛ, ɛcaɣ Aviyezɛɛrɩ liɖe taa tʋ Yowaasɩ hayɩm taa, tɩʋ sɔsɔʋ tɛɛ. Yowaasɩ pɩyalʋ Jedeyɔɔ ñaawɛ peeye nɛ ɛmakɩ tɔɔnaɣ ŋga payaɣ se bilee yɔ, ɖenɖe pañazɩɣ tɩŋ pee lɩm yɔ. Ɛɛmɛlɩ peeye se, Maadɩyaanɩ ñɩma ɛtaana-ɩ. 12 Pɩkɛdaa lɛ, KƖPAƔLƲ tiyiyu lɩɩ ɛ-yɔɔ nɛ ɛyaa-ɩ se, sɔdɩŋ taa sɔdʋʋ! Nɛ eheyi-i se, KƖPAƔLƲ wɛ ɛ-cɔlɔ. 13 Pʋ-yɔɔ Jedeyɔɔ ya tiyiyu ɛnʋ se, Ɖajaa! Nɛ eheyi-i se, pɩtaawɩzɩ-ɩ, nɛ ɛpɔzɩ-ɩ se, ye KƖPAƔLƲ ɛwɛ ḿba cɔlɔ lɛ, pɩlabɩ ɛzɩma nɛ ḿba wɛɛ kʋñɔŋ taa ḿbʋ yɔ? Se, ḿba cɔzɔnaa kɛdɩ mbaa hama lakasɩ nzɩ KƖPAƔLƲ laba, alɩwaatʋ ndʋ ɛlɩzaɣ-wɛ Ejipiti yɔ, sɩ-tɔm, hama lakasɩ nzɩ sɩwɛ le? Se, toovenim lɛ, lɛɛlɛɛyɔ, KƖPAƔLƲ ha mbaa siɣye nɛ ɛɖʋzɩ mbaa Maadɩyaanɩ ñɩma nesi taa. 14 Ɖɩnɛɛ, KƖPAƔLƲ kɛzɩnɩ Jedeyɔɔ yɔɔ nɛ eheyi-i se, ɛnʋ tiyiɣ-i se ewolo ɛlɩzɩ Izirɛɛlɩ ñɩma Maadɩyaanɩ ñɩma nesi taa nɛ ɖoŋ weyi ɛwɛna yɔ. 15 Peeye Jedeyɔɔ ya-ɩ se, hayɩ KƖPAƔLƲ! Nɛ ɛpɔzɩ-ɩ se, ɛzɩma ɛnʋ pɩzɩɣ nɛ ɛya Izirɛɛlɩ ñɩma ñʋʋ? Se, ɛnʋ liɖe taa ñɩma kɩlɩnɩ ɛjandʋ Manaasee cejewiye taa, ɖɔɖɔ lɛ, ɛnʋ kɔzɩnɩ pɩɣa ɛnʋ caa ɖɩɣa taa. 16 KƖPAƔLƲ cosi-i se, ɛnʋ wɛɣ ɛ-cɔlɔ nɛ eyele ɛwa Maadɩyaanɩ ñɩma ɛzɩ pɛkɛ ɛyʋ kʋɖʋm koŋ yɔ. 17 Jedeyɔɔ ñeheyi-i se, ye toovenim se ɛnɩɣnɩ ɛnʋʋ yɔ, ɛ́la yʋsaɣ nakayɛ nɛ pɩwɩlɩ se ɛnʋʋ KƖPAƔLƲ ɛyɔɔdʋʋnɩnɩ-ɩ. 18 Se, ɛnʋ tendi-i se, ɛcaɣ peeye nɛ pɩkɔɔ pɩsɩɩnɩ alɩwaatʋ ndʋ ɛnʋ woni haɖɛ nɖɩ ɛnʋ liu wɛɛ se ɛhaɣ-ɩ yɔ. KƖPAƔLƲ cosi-i se, ɛnʋ cakɩ peeye nɛ pɩkɔɔ pɩsɩnɩ alɩwatʋ ndʋ ɛpɩsaa yɔ.
19 Peeye, Jedeyɔɔ woba ɛkʋ pimbiɣa nɛ ɛtɩzɩ-kɛ nɛ ɛmaɣzɩ mʋlʋm ɛzɩ kiiloonaa niidozo (30) yɔ, nɛ ɛlabɩnɩ sɔsɔɔna fɛyɩ tindine. Ɛtɛma lɛ, ɛɖʋ nandʋ ɖɔkʋ nakʋyʋ taa nɛ yom ñanaɣ nakɛyɛ taa nɛ ɛkpaɣ ewoni ɛsɔtiyiyu cɔlɔ tɩʋ sɔsɔʋ tɛɛ. 20 Ewonaa lɛ, tiyiyu ɛnʋ eheyi-i se, ewoni nandʋ nɛ tindine ɛsɩɩ ɛwaɣ ŋga yɔ kɔ-yɔɔ, nɛ ɛpɩyɩ yom pʋ-yɔɔ. Eheyi Jedeyɔɔ ḿbʋ lɛ, ɛ́lɛ la ɛzɩ ɛyɔɔdʋʋ yɔ. 21 Ɖɩnɛɛ KƖPAƔLƲ tiyiyu sezi ɖaʋ ŋgʋ ɛɖɔkɩ e-nesi taa yɔ, nɛ etukuni nandʋ ńdʋ nɛ tindine ńɖɩ. Etukunaa lɛ, miŋ lɩnɩ ɛwaɣ taa nɛ ɛñaɣ nandʋ nɛ tindine. Pʋwayɩ lɛ, tiyiyu ɛnʋ ɛmʋʋ kpɛ. 22 Peeye Jedeyɔɔ nawa se pɩkɛ KƖPAƔLƲ tiyiyu, nɛ ɛma kubuka nɛ ɛyaa KƖPAƔLƲ Ɛsɔ se, pɩtɔɔ ɛnʋ! Mbʋ pʋyɔɔ yɔ, ɛnʋ na e-tiyiyu ɛsindaa nɛ ɛnʋ ɛza. 23 Ɛlɛ, KƖPAƔLƲ heyi-i se, ɛwɛɛ laŋhɛzɩyɛ taa, sɔɔndʋ ɛtaakpa-ɩ, ɛɛsɩkɩ!
24 Peeye Jedeyɔɔ ma KƖPAƔLƲ, kɩlaŋ ɖɩlayɛ, lone ńɖɩ ɖɩ-taa nɛ ɛyaa-ɖɩ se, KƖPAƔLƲ lɛ, laŋhɛzɩyɛ. Kɩlaŋ ɖɩlayɛ ńɖɩ, ɖɩwɛ Aviyezɛɛrɩ liɖe taa, Ɔfɩraa tɛtʋ cikpetu taa halɩ nɛ sɔnɔ.
Jedeyɔɔ yɔkʋʋ ɛgɔlɩmɩyɛ Baalɩ kɩlaŋ ɖɩlayɛ yɔ
25 Ɖoó ana a-taa lɛ, KƖPAƔLƲ heyi Jedeyɔɔ se, ɛ́kpaɣ ɛ-caa nɔ abalɩñɩnʋ naalɛ ñɩnʋ d weyi ɛwɛnɩ pɩnzɩ lʋbɛ (07) yɔ. Se, ɛ́yɔkɩ ɛ-caa kɩlaŋ ɖɩlayɛ nɖɩ ɖɩ-taa ɛ́lɛ laɣ ɛgɔlɩmɩyɛ Baalɩ yɔ, nɛ ɛ́sɛtɩ kɔdaɣ taa ɖaʋ e ŋgʋ pesiɣ kɩlaŋ ɖɩlayɛ ńɖɩ ɖɩ-cɔlɔ yɔ. 26 Se, pʋwayɩ lɛ, ɛ́ma ɛnʋʋ ɛ-KƖPAƔLƲ Ɛsɔ, kɩlaŋ ɖɩlayɛ kɩbanɖɛ naɖɩyɛ, piyaɣ ñʋʋ taa. Se, ɛ́kpaɣ nɔ abalɩñɩnʋ nɛ ɛlaa nɛ ɛhɔbɩnɩ kɔdaɣ taa ɖaʋ ŋgʋ ɛsɛtɩɣ yɔ, kɩ-ɖasɩ nɛ pɩñaɣ. 27 KƖPAƔLƲ heyi Jedeyɔɔ ḿbʋ lɛ, ɛ́lɛ wolo ɛlɩzɩ ɛ-tʋmlaɖaa taa, ɛyaa hiu (10) nɛ ɛ nɛ wɛ pala ɛzɩ eheyuu-i yɔ. Ɛlɛ, esewaɣ ɛ-hɔʋ taa ñɩma nɛ ɛ-tɛtʋ taa ñɩma, pʋ-yɔɔ ɛlabɩ mbʋ nɛ ɖoó. 28 Tɛtʋ taa ñɩma kʋyɩ tanaŋ cu lɛ, pamaɣnɩ pɔyɔkɩ ɛgɔlɩmɩyɛ Baalɩ kɩlaŋ ɖɩlayɛ, nɛ pɛsɛtɩ kɔtaɣ taa ɖaʋ ŋgʋ paasiɣ ɖɩ-cɔlɔ yɔ. Pamaɣnɩ ɖɔɖɔ pala nɔ abalɩñɩnʋ naalɛ ñɩnʋ, kɩlaŋ ɖɩlayɛ nɖɩ pama ɖoó taa yɔ, ɖɩ-yɔɔ, nɛ pɔhɔ nɛ pɩñaɣ. 29 Pamaɣnɩ ḿbʋ lɛ, pɔpɔzʋʋ ɖama se, ɛzɩ alabɩ mbʋ? Pɔpɔzaa nɛ pañɩnɩ lɛ, pana se, Yowaasɩ pɩyalʋ Jedeyɔɔ labɩnɩ mbʋ. 30 Peeye peheyi Yowaasɩ se, ewoni-wɛ ɛ-pɩyalʋ nɛ pakʋ-ɩ. Mbʋ pʋyɔɔ yɔ, ɛyɔkɩ ɛgɔlɩmɩyɛ Baalɩ kɩlaŋ ɖɩlayɛ, nɛ ɛsɛtɩ kɔdaɣ taa ɖaʋ ŋgʋ pesiɣ ɖɩ-cɔlɔ yɔ. 31 Ɖɩnɛɛ Yowaasɩ pɔzɩ pa-tɩŋa se, mbaa pʋwɛɛ se palʋ Baalɩ yɔɔ nɛ pasɩnɩ-ɩ yaa we? Se, weyi ɛlʋkɩ Baalɩ yɔɔ yɔ, pʋwɛɛ se pakʋ pʋdʋ nɛ pʋcɔ tɛʋ fe. Se, ye Baalɩ ɛkɛ Ɛsɔ yɔ, ɛ́lʋ ɛ-maɣmaɣ ɛ-yɔɔ, mbʋ pʋyɔɔ yɔ, ɛ-kɩlaŋ ɖɩlayɛ pɔyɔkaa! 32 Pɩkpaɣʋnɩ alɩwaatʋ ńdʋ yɔɔ, paya Jedeyɔɔ se, Yeruubaalɩ. Pʋ-tɔbʋʋ se, Baalɩ ɛ́lʋ ɛ-maɣmaɣ ɛ-yɔɔ! Payaɣ-ɩ ḿbʋ, mbʋ pʋyɔɔ yɔ, Yowaasɩ yɔɔdaa se, pʋwɛɛ se Baalɩ ɛ́lʋ ɛ-maɣmaɣ ɛ-yɔɔ. Mbʋ pʋyɔɔ yɔ, ɛ-kɩlaŋ ɖɩlayɛ, pɔyɔkaa.
Jedeyɔɔ pɔzʋʋ Ɛsɔ se ɛwɩlɩ kawɩlasɩ nasɩyɩ nɛ ɛna yɔ
33 Nakʋyʋ wiye, Maadɩyaanɩ liɖe taa ñɩma nɛ Amalɛɛkɩ ñɩnɖɛ taa ñɩma nɛ wɩsɩ ɖɩlɩyɛ hɔɔlʋʋ taa kacaɣkakʋyɩwaa lɛlaa f, panɩnɩ ɖama nɛ pekpeɣli nɛ pɛɖɛzɩ Yɔɔrɩdaŋ pɔɔ. Pɛɖɛzaa lɛ, powolo pacaɣ Yizireyɛɛlɩ kɛdɛɛŋa g taa. 34 Pɛwɛ peeye ḿbʋ lɛ, KƖPAƔLƲ Kalɩzaɣ tii Jedeyɔɔ yɔɔ nɛ ɛ́yaa nɔndɔʋ nɛ Aviyezɛɛrɩ liɖe taa ñɩma lɩɩ nɛ patɩŋ ɛ-wayɩ. 35 Pɩlabɩ ḿbʋ lɛ, etiyi nabɛyɛ Manaasee tɛtʋ hɔɔlɩŋ tɩŋa taa se payaa ɛ́lɛ cejewiye taa ñɩma nɛ patɩŋ ɛ-wayɩ ɖɔɖɔ. Etiyi ɖɔɖɔ nabɛyɛ Asɛɛrɩ nɛ Zabulɔɔnɩ nɛ Nɛfɩtaalii pe-cejewe taa, nɛ a-taa ɛyaa lɩɩ nɛ patɩŋ ɛ-wayɩ.
36 Peeye Jedeyɔɔ heyi Ɛsɔ se, ɛtɔm se ɛtɩŋɩɣnɩ ɛnʋ yɔɔ nɛ eholi Izirɛɛlɩ ñɩma. 37 Se, ye mbʋ, ɛnʋ pɔʋ heu tɔnɛ, lone nɖɩ ɖɩ-taa pamakɩ tɔɔnaɣ ŋga payaɣ se bilee yɔ. Se, ye ɖoó taa, ɖoluu ɛkpa tɔnɛ nɖɩ ɖi-ɖeke ɖɩ-yɔɔ, nɛ piyele tataa ñawɩlɩ waɣ waɣ yɔ, ɖɩnɛ lɛ, ɛnʋ naɣ toovenim se, ɛtɩŋɩɣnɩ ɛnʋ yɔɔ se eholi Izirɛɛlɩ ñɩma, ɛzɩ ɛyɔɔdʋʋ yɔ. 38 Tɛʋ fema lɛ, Jedeyɔɔ wolo nɛ ɛmaɣnɩ pɩlabɩ ɛzɩ ɛyɔɔdʋʋ yɔ. Ɛkpaɣ tɔnɛ nɖɩ nɛ ɛñazɩ nɛ lɩm lɩɩ nɛ pisu ñanaɣ. 39 Peeye eheyi Ɛsɔ se, ɛnʋ tasɩ-ɩ natʋyʋ pɔzʋʋ, ɛlɛ, ɛnʋ tendiɣ-i se, ɛ-pana ɛtaakpanɩ ɛnʋ. Se, ɛnʋ liu wɛɛ se ɛmaɣzɩ nabʋyʋ nɛ tɔnɛ nɖɩ kpaagbaa maɣzʋʋ. Se, lɛɛlɛɛyɔ, ɛnʋ liu wɛɛ se tɔnɛ ɖeke ɛwɛɛ waɣwaɣ, nɛ pɩkazɩ ɖoluu wɛɛ tataa tɔnɛ cɔlɔ kpɛɛɛ! 40 Ɛsɔ yele nɛ mbʋ Jedeyɔɔ pɔzaa yɔ, pɩla ɖoó ana a-taa. Eyeba nɛ tɔnɛ wɛɛ waɣ waɣ, nɛ ɖoluu ñɛwɛɛ tataa tɔnɛ cɔlɔ kpɛɛɛ.