Ejipiti Lɩʋ Tɔm Takayaɣ 33

Ɛsɔ haʋ Mooyiizi nɔɔ se, ɛkʋyɩ nɛ ɛkpaɣ nʋmɔʋ yɔ

¹ Nakʋyʋ wiye KƖPAƔLƲ tasɩ Mooyiizi heyuu se, ɛ nɛ samaɣ ŋga ɛlɩzɩ-kɛ Ejipiti ɛjaɖɛ taa yɔ, pakʋyɩ lone nɖɩ ɖɩ-taa nɛ powolo ɛjaɖɛ nɖɩ ɛnʋ ɖuwaa nɛ eheyi Abɩraham nɛ Izaakɩ nɛ Yaakɔɔbʋ se, ɛnʋ haɣ-ɖɩ pɛ-sɛyɩnaa yɔ, ɖɩ-taa. ² Se, ɛnʋ tiyiɣni-i e-tiyiyu nɔɔyʋ nɛ eɖiyi-wɛ. Se, ɛnʋ ɖɔɔnʋʋ pɛ-ɛsɩndaa Kanaanɩ ñɩma nɛ Amoorii ñɩma nɛ Hɛɛtɩ nɛ Periizii nɛ Hiwii nɛ Yebuusii, pe-lilaa taa ñɩma. ³ Se, ɖɩnɛɛ lɛ, papɩzɩɣ pasʋʋ ɛjaɖɛ nɖɩ ɖɩ-taa naalɩm nɛ tɩŋ num pɔtɔyɩ yem yɔ, ɖɩ-taa. Se, ɛlɛ, pɩtɛkɛ ɛnʋ ɛ-maɣmaɣ ɛkaɣnɩ-wɛ sɩʋ se, ɛ nɛ wɛ powolo ɖɩ-taa. Se, ɖenɖe nɛ ɛzɩ pɛkɛ samaɣ ŋga ka-ñʋʋ taa wɩlaa yɔ, pɩkɛdɩɣ ɛnʋ pana kpanɩ-wɛ nɛ ɛtɔyɩtɩ-wɛ nʋmɔʋ taa ^a. ⁴ Samaɣ nɩ tɔm ńdʋ ḿbʋ lɛ, pitibi-kɛ yɔɔɔ. Halɩ pa-taa nɔɔyʋ tapɩzɩ esuu ɛ-ajana wondu. ⁵ Se, toovenim lɛ, KƖPAƔLƲ kɔtɔm Mooyiizi se eheyi Izirɛɛlɩ ñɩma se, ɛzɩma mbʋ ɛzɩ pa-tɩŋa pɛkɛ ɛyaa mba pa-ñʋŋ taa wɩlaa yɔ, ye ɛnʋ kaatɔm se ɛnʋ sɩɣ-wɛ alɩwaatʋ pazɩ yɔ, pɩɩkɛdaa ɛnʋ pana kpanɩ-wɛ nɛ ɛtɔyɩtɩ-wɛ. Se, pʋ-yɔɔ lɛ, pɔ́lɔ pa-ajana wondu nɛ pʋwayɩ lɛ, ɛnʋ kaana se ɛzɩma ɛkpaɣnɩ-wɛ. ⁶ Izirɛɛlɩ tɩkʋyɩ Horɛɛbɩ pʋʋ yɔɔ lɛ, peyele pa-ajana wondu suu.

Kɩɖanɖʋʋ ŋgʋ kɩ-tɛɛ pakatɩɣ yɔ, kɩ-tɔm

⁷ Alɩwaatʋ ndʋ Izirɛɛlɩ ñɩma sikaɣ kɩɖanɖɩŋ se pɩkɛ pa-ɖikpeɣliye lɛ, Mooyiizi ñesikaɣ Ɛsɔ kɩɖanɖʋʋ nɛ kiposuuni samaɣ ɖikpeɣliye. Payaɣwaɣ-ɖi se kɩɖanɖʋʋ ŋgʋ kɩ-tɛɛ pakatɩɣ yɔ. Pʋ-yɔɔ mba pa-tɩŋa pañɩnɩɣ se pɔpɔzɩ KƖPAƔLƲ natʋyʋ, pakʋyʋʋ ɖikpeɣliye taa nɛ powolo kɩɖanɖʋʋ ŋgʋ kɩ-tɛɛ. ⁸ Se, ye Mooyiizi ɛkʋyɩna nɛ ewoki kɩɖanɖʋʋ ŋgʋ kɩ-tɛɛ pakatɩɣ yɔ yɔ, paa weyi ɛkʋyʋʋ nɛ ɛsɩŋ ɛ-kɩɖanɖʋʋ nɔnɔɔ nɛ ɛcɔŋnɩ Mooyiizi halɩ nɛ ɛlɛ wolo ɛsʋʋ Ɛsɔ kɩɖanɖʋ tɛɛ. ⁹ Mooyiizi tɛŋ kɩ-tɛɛ sʋʋ mbʋ lɛ, ñɔsɩ mɩnʋʋ ^b nakʋyʋ tii nɛ ɛsɔdaa nɛ kɩsɩŋ kɩɖanɖʋʋ ŋgʋ kɩ-nɔnɔɔ, piyele nɛ KƖPAƔLƲ yɔɔdɩnɩ Mooyiizi. ¹⁰ Alɩwaatʋ ndʋ Izirɛɛlɩ ñɩma naɣ ñɔsɩ koloka lɛ, pa-taa paa weyi eluŋ tataa, ɛ-maɣmaɣ ɛ-kɩɖanɖʋʋ nɔnɔɔ taa. ¹¹ KƖPAƔLƲ yɔɔdaɣnɩ Mooyiizi nɛ panaɣ ɖama kaɣlaa ɛzɩ ɛyʋ yɔɔdʋʋnɩ ɛ-taabalʋ yɔ. Pɛtɛŋ yɔɔdʋʋ lɛ, Mooyiizi pɩsɩ ɖikpeɣliye taa, nɛ piyele Nuuni pɩyalʋ Yoosuuwe ñacaɣ Ɛsɔ kɩɖanɖʋʋ tɛɛ.

KƖPAƔLƲ nɛ Mooyiizi pɔyɔɔdʋʋnɩ ɖama yɔ

¹² Nakʋyʋ wiye Mooyiizi yɔɔdaɣnɩ KƖPAƔLƲ nɛ eheyi-i se, ewelesini-i. Se, ɛtɔm ɛnʋ se ɛnʋ eɖiyi ɛ-samaɣ, ɛlɛ, ɛ́lɛ́ tɩwɩlɩ-ɩ weyi ɛtiyiɣni ɛnʋ se pʋdʋ ɛsɩnɩ-ɩ yɔ. Se, pɩtɛ lɛ, ɛlɩzɩ ɛnʋ nɛ ɛla ɛnʋʋ ɖeu, ɛ-maɣmaɣ ɛyɔɔdɩnɩ mbʋ. ¹³ Se, tɔɔ! Ɖenɖe ɛlabɩ ɛnʋʋ ɖeu yɔ, ɛwɩlɩ ɛnʋʋ mbʋ mbʋ ɛcaɣ labʋ yɔ. Se, pʋbʋ, toovenim lɛ, ɛnʋ tɛzɩɣ-ɩ sɩm camiyɛ, nɛ ɛtɛzɩ ɛnʋʋ nɩnaʋ ɖeu. Se, ɛ́taasɔɔ se, samaɣ ŋga kɛkɛ ɛ-ñɩŋga.

¹⁴ Pʋ-yɔɔ KƖPAƔLƲ eheyi-i se, sɔɔndʋ ɛtaakpa-ɩ, se ɛ-maɣmaɣ ɛkaɣ wobu pɔ-cɔlɔ.

¹⁵ Ɖɩnɛɛ, Mooyiizi kitini-i se, ye ɛ-maɣmaɣ eewoki pɔ-cɔlɔ yɔ, ɛtaaheyi mba se pakʋyɩ peeye nɛ pɛɖɛɛ. ¹⁶ Se, toovenim lɛ, ye ɛtasɩɩ mba, ɛsɩna papɩzɩɣ peɖiɣzini se ɛlabɩ ɛ-samaɣ nɛ ɛnʋʋ ɖeu. Se, ye ɛwɛɛ pɔ-cɔlɔ yɔ, pi-ɖeke koŋ pɩpɩzɩɣ pɔɖʋ tʋkaɣ pa nɛ samaɣ ndɩ ndɩ nzɩ sɩwɛ ɛjaɖɛ yɔɔ yɔ, pɛ-hɛkʋ taa. ¹⁷ Ɖɩnɛɛ KƖPAƔLƲ heyi Mooyiizi se, ɛnʋ lakɩ-ɩ ɖeu, se ɛnʋ lakɩ nɛ ɛkpɛndɩnɩ ńdʋ ɛ́lɛ́ yɔɔdaa yɔ. Se, ḿbʋ pʋyɔɔ yɔ, ɛnʋ ɛlɩzɩ nɩ-ɩ.

¹⁸ Pʋwayɩ lɛ, Mooyiizi heyi KƖPAƔLƲ se, eyele nɛ ɛnʋ na ɛ́lɛ́ koboyaɣ. ¹⁹ Peeye, KƖPAƔLƲ heyi-i se, ɛnʋ woki nɛ ɛɖɛɛ ɛ-ɛsɩndaa nɛ ɛnʋ wɩlɩ-ɩ ɛnʋ ɖeu tɩŋa nɛ ɛnʋ yaa ɛnʋ hɩɖɛ se, KƖPAƔLƲ. Se, weyi ɛnʋ liu wɛɛ se ɛnʋ naɣ ɛ-pʋtɔdɩyɛ nɛ ɛlabɩ-ɩ ɖeu yɔ, ɛnʋ naɣ ɛ-pʋtɔdɩyɛ nɛ ɛlabɩ-ɩ ɖeu ^c . ²⁰ Ɛtasɩ yɔɔdʋʋ se, paa mbʋʋ yɔ, ɛɛpɩzɩɣ nɛ ɛna ɛnʋ ɛsɩndaa. Se, ḿbʋ pʋyɔɔ yɔ, ɛyʋ nɔɔyʋ ɛɛpɩzɩɣ ɛna ɛnʋ ɛsɩndaa nɛ ɛtɛ ɛcaɣ wezuu. ²¹ KƖPAƔLƲ heyi-i se, ɛwaɣ nakɛyɛ wɛ ɛnʋ cɔlɔ peeye. Se, ewolo ɛsɩŋ kɔ-yɔɔ. ²² Se pʋbʋ, ɛnʋ kɔŋ se ɛɖɛɣ nɛ ɛwɩlɩɣ e-koboyaɣ lɛ, ɛnʋ mɛsɩ-ɩ ɛwaɣ ŋ́ga kɔ-pɔʋ taa. Se, ɛnʋ huzuu e-nesi ɛ́lɛ yɔɔ alɩwaatʋ ńdʋ ɛnʋ kɔŋ se ɛɖɛɣ yɔ. ²³ Se ɛnʋ tɛŋ ɛɖɛʋ wayɩ lɛ, ɛnʋ kʋsɩ e-nesi nɛ ɛkaɣ-ɩ naʋ nɛ ɛ-wayɩ. Piyele, nɔɔyʋ ɛɛpɩzɩɣ ɛna ɛnʋ ɛsɩndaa.