21
Ebire ñɩma mba pɛkɛ yomaa yɔ, pɩ-paɣtʋ tɔm
1 Pʋwayɩ lɛ, KƖPAƔLƲ tasɩ yɔɔdʋʋ se, paɣtʋ lɛɛtʋ ndʋ ɛnʋ pɔzʋʋ-ɩ se ɛɖʋ Izirɛɛlɩ ñɩma yɔ, ndʋ́ yɔ. 2 Se, ye payabɩ yom nɛ ɛkɛ Ebɩre tʋ yɔ, pɩnzɩ loɖo ɛkɛɣ yom. Piyele pɩnaɣ lʋbɛ ñɩŋga lɛ, ɛpɩzɩɣ ɛɖɛɛ yem faaa, ɛɛhɛyɩɣ pʋyʋ nɔɔyʋ, ɛwɛɣ ɛ-tɩ yɔɔ. 3 Se, ye ɛɛwɛ e-ɖeke alɩwaatʋ ndʋ ɛkɛ yom yɔ, ɛdɛɣ ɖɔɖɔ e-ɖeke. Se, ye ɛɛkpaɣ halʋ yɔ, ɛ nɛ ɛ-halʋ pɛɖɛɣna. 4 Se, ye ɛ-caa weyi ɛyabɩ-ɩ ɛcanɩ-ɩ halʋ nɛ ɛ́lɛ́ lʋɩ-ɩ piya, abalɩbiya nɛ halɩbiya yɔ, ɖɩnɛ abalʋ ɖeke ɖɛɣna, piyele halʋ nɛ piya pɛkɛ ɛ-caa weyi ɛyabɩ-ɩ yɔ, ɛ-ñɩm. 5 Se, ɛlɛ, ye yom ɛtɔm se, ɛsɔɔlɩ ɛ-caa nɛ ɛ-maɣmaɣ ɛ-halʋ nɛ e-piya nɛ ɛɛcaɣ se ɛɖɛɛ eyele-wɛ nɛ ɛwɛɛ ɛ-tɩ yɔɔ yɔ, 6 ɛ-caa eyele nɛ Ɛsɔ kɛ pa-aseɣɖe tʋ a. Se, ɛ-caa ewoni-i ɛmalɩsɩnɩ nɔnɔɔ yaa ɛ-ɖɩɣa nɔnɔɔ ɖasɩ nɛ ɛtʋlɩ ɛ-nɩŋgbaaŋ nɛ pɩñɛyaɣ. Se, pɩkpaɣʋ nɛ alɩwaatʋ ndʋ lɛ, abalʋ ɛnʋ, ɛwɛɣ ɛ-caa tʋmɩyɛ taa, tam.
7 Se, ye nɔɔyʋ ɛpɛdɩ ɛ-pɛlɛ se ɛkɛ yom yɔ, pɛlɛ ɛnʋ e-yomiye taa lɩʋ ɛɛwɛɣ ɛzɩ abalʋ ɛɛkɛnɩ yom yɔ. 8 Se, ye ɛ-caa nɔɔyʋ ɛyabɩ-ɩ se ɛkɛ ɛ-halʋ nɛ pɩkɔɔ nɛ e-liu fɛyɩ-ɩ yɔ, pʋwɛɛ se ɛpɩsɩnɩ pɛlɛ ɛnʋ ɛ́lɛ́ ñɩnʋ weyi ɛ-cɔlɔ ɛɛyabɩ-ɩ yɔ nɛ cɛlɩ-ɩ e-liidiye. Se, ɛfɛyɩnɩ waɖɛ se ɛkpaɣ-ɩ nɛ ɛpɛdɩnɩ ɛyaa agɔmaa. Se, ɛkpaɣ ɛ́lɛ́ nɛ ɛpɛdɩnɩ ɛyaa agɔma yɔ, ɛlɩ ɛ́lɛ́ wayɩ. 9 Se, ye ɛyabɩ ɛ́lɛ́ se ɛkɛ ɛ-pɩyalʋ halʋ yɔ, ɛlakɩ-ɩ ɛzɩ pʋpɔzʋʋ se pala pɛlaa mba pawalɩɣ yɔ. 10 Se, ye ɛ-caa weyi ɛyabɩ-ɩ yɔ, ɛtasɩ halʋ lɛlʋ kpaɣʋ yɔ, pɩfɛyɩ se ɛnɩɩnɩ ɛ́lɛ́ nɛ pɩkɩlɩ kajalaɣ tʋ paa tɔɔnaɣ haʋ yaa wondu yabʋ yaa halʋ nɛ abalʋ pacaɣʋ hɔɔlʋʋ, pa-taa. 11 Se, ye pɩcɩbɩ-ɩ nɛ ɛtɩnɩɩnɩ halʋ hɔɔlɩŋ naadozo ɛnʋ ɛ-taa yɔ, halʋ pɩzɩɣ ɛɖɛɛ yem faaa, ɛɛhɛyɩɣ pʋyʋ.
Kɩdɛkɛdɩm mbʋ pʋ-yɔɔ pʋmʋnaa se pakʋ pʋdʋ yɔ
12 Weyi ɛma ɛyʋ nɔɔyʋ nɛ ɛkʋ-ɩ yɔ, pakʋ pʋdʋ b. 13 Se, pakpaɣ se, ɛyʋ ɛnʋ e-liu taawɛɛ se ɛkʋ-ɩ, ɛlɛ, ɛnʋʋ KƖPAƔLƲ ɛhanɩ ɛ́lɛ waɖɛ nɛ asɛyʋʋ tɩŋɩnɩ ɛ-yɔɔ nɛ kʋsʋʋ. Se, pʋbʋ, ɛnʋ wɩlɩɣ-ɩ lone naɖɩyɛ c nɛ weyi ɛ-yɔɔ asɛyʋʋ ŋgʋ kɩtɩŋɩnaa nɛ kʋsʋʋ yɔ, eewolo ɖɩ-taa nɛ ɛɖʋ kʋyʋʋ. 14 Se, ɛlɛ, ye nɔɔyʋ taa ɛwɛna lɛlʋ nɛ ɛkʋ-ɩ nɛ ajiitu yɔ, paa pʋdʋ ɛnʋ eewoba nɛ ɛmɛlɩ ɛnʋ kɩlaŋ ɖɩlayɛd cɔlɔ yɔ, palɩzɩ-ɩ nɛ pakʋ.
15 Se, weyi ɛmaabɩ ɛ-caa yaa e-ɖoo yɔ, pʋwɛɛ se pakʋ-ɩ.
16 Se, weyi ɛmɩlɩ ɛyʋ nɔɔyʋ yɔ, paa pakpa-ɩ nɛ ɛyʋ ɛnʋ yaa ɛtɛm-ɩ pɛdʋʋ yɔ, pʋwɛɛ se pakʋ-ɩe.
17 Se, weyi ɛwɩlɩ ɛ-caa yaa e-ɖoo kpalʋʋ yɔ, pʋwɛɛ se pakʋ-ɩ f.
Ndʋ paɖʋ mabʋ nɛ kɩcɩkpɩŋ pɔ-yɔɔ yɔ
18 Pakpaɣ ɛzɩ you taa, ɛyʋ nɔɔyʋ mabɩ lɛlʋ ŋgulumiye yaa piyɛ, nɛ weyi pamabɩ-ɩ yɔ ɛtasɩ, ɛlɛ, ɛwɛɛ ñalʋʋ yɔɔ, 19 se, ye weyi pamabɩ-ɩ yɔ ɛpɩzɩɣ kʋyʋʋ nɛ ɛɖɔkʋʋ ɖaʋ nɛ ɛlɩɣ yɔ, ɖɩnɛ lɛ, weyi ɛmabɩ-ɩ yɔ paahɔŋ ɛ-nɩŋgbaaŋ. Pɩtɛlɛ, pʋwɛnɩ-ɩ se ɛhɛyɩ kʋdɔndʋ ekuudi ɛ́lɛ tataa kuuduu mbʋ yɔ pʋ-yɔɔ nɛ ɛcɔnɩ ɛ́lɛ yɔɔ piwolo pɩtalɩ ɛ́lɛ yɔɔ cɛba.
20 Se, ye nɔɔyʋ ɛmaba e-yom abalʋ ñɩnʋ yaa halʋ ñɩnʋ ɖaʋ nɛ ɛ́lɛ fiɣni ɛzɩ ɛsɩ yɔɔ yɔ, pʋwɛɛ se pakʋ-ɩ. 21 Se, ɛlɛ, ye weyi pamabɩ-ɩ yɔ ɛtasɩ labʋ kɩyakʋ kʋɖʋmʋʋ yaa kɩyakɩŋ naalɛ nɛ pɩcɔ ɛsɩ yɔ, ɖɩnɛ lɛ paatasɩɣ weyi ɛmabɩ-ɩ yɔ ɛ-nɩŋgbaaŋ hɔm. Se, mbʋ pʋyɔɔ yɔ, ɛɛkɛ ɛ́lɛ pʋyʋ.
22 Se, ye abalaa nabɛyɛ ɛwɛɛ poyou nɛ pɔyɔkɩ halʋ hoɣa tʋ nɔɔyʋ nɛ e-hoɣa lɩɩ nɛ pɩtala halʋ nabʋyʋ yɔ, weyi ɛyɔka-ɩ yɔ ɛhɛyɩɣ ḿbʋ halʋ walʋ ɖʋwa se pɛhɛyɩ yɔ. 23 Se, ɛlɛ, ye nabʋyʋ ɛlabɩ halʋ yɔ, pɔhɔŋ weyi ɛtɩɣyɩ tɔm yɔ ɛ-nɩŋgbaaŋ, mbʋ pɩlabɩ halʋ yɔ pʋ-nɔɔ taa. 24 Ye halʋ ɛzɩyɛ ɛyɔkɩna yɔ, pɔyɔkʋʋ ɛ-ɛzɩyɛ; ye halʋ keɖe eholina yɔ, poholuu e-keɖe; ye halʋ nesi ɛpɛlɩna yɔ, pɛpɛlɩɣ e-nesi nɛ ye halʋ nɩŋgbáŋaɣ ɛpɛlɩna yɔ, pɛpɛlɩɣ ɛ-nɩŋgbáŋaɣ. 25 Se, ye miŋ ɛñaɣnɩ halʋ yɔ, pañaɣzɩɣ-ɩ miŋ nɛ kɩcɩkpʋʋ paɖʋ halʋ yɔ, paɖʋ-ɩ kɩcɩkpʋʋ nɛ ye ŋgulumiye ɛmabɩ halʋ yɔ, pamakɩ-ɩ ŋgulumiye g.
26 Se, ye nɔɔyʋ ɛmabɩ e-yom, abalʋ ñɩnʋ yaa halʋ ñɩnʋ nɛ ɛyɔkɩ ɛ-ɛsɩyɛ yɔ, ɛsɩyɛ nɖɩ ɛyɔkɩ-ɖɩ yɔ ɖɩ-yɔɔ lɛ, eyeki-i nɛ ɛwɛɛ ɛ-tɩ yɔɔ. 27 Se, ye ɛkpɛzɩ e-keɖe yɔ, e-keɖe nɖɩ ɛkpɛzɩ-ɖɩ yɔ ɖɩ-yɔɔ lɛ, eyeki-i nɛ ɛwɛɛ ɛ-tɩ yɔɔ.
28 Se, ye nɔ abalɩñɩnʋ nɔɔyʋ ɛyɔkɩ abalʋ nɔɔyʋ yaa halʋ nɔɔyʋ nɛ ɛ́lɛ sɩ yɔ, payaɣ-ɩ pɛ nɛ ɛsɩ. Se, pataatɔɔ ɛ-nandʋ. Piyele nɛ nɔ tʋ yɔ, pataakpaɣ se ɛnʋʋ tɔm tɔɔwaa. 29 Se, ɛlɛ, ye nɔ ɛnʋ ɛtɩɩyɔkʋʋ ɛyaa nɛ peheyi ɛ-tʋ nɛ ɛ́lɛ teke tɩ-yɔɔ yɔ yɔ, nɛ ye nɔ ɛnʋ ɛkʋ nɔɔyʋ nɛ ɛ-hɩŋ yɔ, pʋwɛɛ se pakʋ nɔ ɛnʋ ɛ-tʋ nɛ payaɣ nɔ ɛnʋʋ pɛ nɛ ɛsɩ. 30 Se, ɛlɛ, ye pɛpɛlɩ nɔ-tʋ liidiye se ɛhɛyɩ nɛ ɛcaɣ wezuu yɔ, pʋwɛɛ se ɛhɛyɩ mbʋ pɛpɛlɩ-ɩ yɔ, pɩ-tɩŋa. 31 Se, ye nɔ abalɩñɩnʋ ɛyɔkɩ pɩɣa nakɛyɛ, abalɩ ñɩŋga yaa halɩ ñɩŋga, nɛ kasɩ yɔ, kʋɖʋm tʋ ndʋ́ʋ palakɩ. 32 Se, ye nɔ abalɩñɩnʋ ɛyɔkɩ yom abalɩñɩnʋ yaa halɩñɩnʋ nɔɔyʋ nɛ ɛ́lɛ sɩ yɔ, ɛ-tʋ hɛyɩɣ liidiye ñɩɣtʋ niidozo (30) weyi pɩyɔkɩ-ɩ mbʋ nɛ ɛsɩ yɔ ɛ-caa. Piyele nɔ ɛnʋ yɔ, payaɣ-ɩ pɛ nɛ ɛsɩ.
33 Ye nɔɔyʋ ehuyi lɔkɔ nɛ etehuuzi kʋ-yɔɔ, nɛ nɔ nɔɔyʋ yaa kpaŋaɣ nakɛyɛ tɔlɩ kɩ-taa yɔ, 34 kʋ-tʋ hɛyɛɣ kpɩnɛ tʋ liidiye, piyele nɛ ɛkpaɣ kpɩnɛ kɩsɩbɩyɛ nɖɩ nɛ ɖɩkɛ ɛ-ñɩnɖɛ. 35 Se, ye nɔɔyʋ nɔ ɛyɔkɩ lɛlʋ nɔ nɛ nɔ ɛnʋ ɛsɩ yɔ, naŋ ɛnʋ ɛ-ñɩma tayɩɣ nɔ weyi ɛsɩba yɔ ɛ-nandʋ, nɛ pɛpɛdɩɣ nɔ weyi ɛwɛnɩ ɛ-ɛza yɔ nɛ patayɩ ɖɔɖɔ ɛ́lɛ liidiye. 36 Ɛlɛ, ye pɩlaba se, nɔ ɛnʋ ɛyɔkaɣ ɛyaa nɛ ɛ-tʋ teke nɔ ɛnʋ e-ɖeɖe yɔ, ɛ-tʋ ɛnʋ ɛcaɣ nɔ nɛ ɛhɛyɩ, piyele nɛ ɛkpaɣ nɔ weyi ɛsɩba yɔ.
Kpɩna mɩlʋʋ tɔm
37 Se, ye ɛyʋ nɔɔyʋ ɛmɩlɩ nɔ yaa heu yaa pʋnʋ, nɛ pʋwalɩ lɛ, ɛkʋ kpɩnɛ nɖɩ ɛmɩlaa yɔ yaa ɛpɛdɩ-ɖɩ yɔ, pʋwɛɛ se, ɛhɛyɩ ɖɩ-tʋ naŋ kagbaanzɩ yaa heŋ naanza yaa pɩŋ naanza, pu-lone taa.