13
Yomiye taa lɩʋ paɣtʋ lɛɛtʋ tɔm
1 Pʋwayɩ lɛ, KƖPAƔLƲ heyi Mooyiizi nɛ Aarɔɔnɩnɩnɩ se, 2 Izirɛɛlɩ ñɩma taa kajalaɣ abalɩbiya tɩŋa kɛ ɛnʋ ñɩm. Se, paa halʋ weyi ɛ-abalɩbɩɣa kajalaɣ ñɩŋga nɛ paa kpɩnɛ nɖɩ ɖɩ-kajalɑɣ, pɛkɛ ɛnʋ pʋyʋ a. 3 Ɖɩnɛɛ, Mooyiizi heyi Izirɛɛlɩ ñɩma se, pɔtɔzɩ kɩyakʋ ŋgʋ KƖPAƔLƲ lɩzɩ-wɛ yomiye ɖɩɣa taa Ejipiti yɔ, kʋ-yɔɔ. Se, e-nesi ɖoŋ ɛlɩzɩnɩ-wɛ peeye. Se, pɩfɛyɩ se pɔtɔɔ sɔnzɔna tindine. 4 Se, fenaɣ ŋga payaɣ se Abiibi yɔ ka-kɩyakʋ nakʋyʋ wiye pakʋyaa nɛ pɛɖɛɛ. 5 Se, KƖPAƔLƲ yeki nɛ pasʋʋ Kanaanɩ ñɩma nɛ Hɛɛtɩ liɖe taa ñɩma nɛ Amoorii liɖe taa ñɩma nɛ Hiiwi liɖe taa ñɩma nɛ Yeebuusii ñɩma pɛ-ɛjaɖɛ taa lɛ, pɛwɛɛ palakɩ ḿbʋ fenaɣ ŋga ka-maɣmaɣ ka-taa nɛ pɔtɔzʋʋ pʋ-yɔɔ. Se, ɛjaɖɛ nɖɩ́ KƖPAƔLƲ ɖʋwaa nɛ eheyi pɔ-cɔzɔnaa se ɛcɛlɩɣ-wɛ ɛjaɖɛ nɖɩ ɖɩ-taa naalɩm nɛ tɩŋnum b pɔtɔyaa yɔ. 6 Se, pʋwɛɛ se pɔ́tɔ́ɔ́ sonsɔɔna fɛyɩ tindine kɩyakɩŋ lʋbɛ, nɛ kɩyakʋ lʋbɛ ñɩŋgʋ wiye lɛ, pɔtɔɔ kazandʋ KƖPAƔLƲ hɩɖɛ taa. 7 Se, kɩyakɩŋ ɛnʋ ɛ-taa lɛ, pɩfɛyɩ se pɔtɔɔ tindine nɖɩ ɖɩ-taa wɛ sɔnsɔɔna yɔ. Se, pɛ-ɛjaɖɛ taa lɛ, pɩfɛyɩ se pana sɔnsɔɔna tindine yaa sɔnsɔɔna pa-taa nɔɔyʋ tɛ. 8 Se, kazandʋ alɩwaatʋ taa lɛ, pʋwɛɛ se palɩzɩ pe-piyaa pʋ-tɔbʋʋ. Se, peheyi-sɩ se, mbʋ KƖPAƔLƲ labɩ mbaa alɩwaatʋ ndʋ mbá kʋyɩ Ejipiti ɛjaɖɛ taa yɔ, pʋ-yɔɔ mbá lakɩ mbʋ. 9 Se, KƖPAƔLƲ labɩnɩ ɛ-hama lakasɩ nɛ ɛlɩzɩ-wɛ Ejipiti ɛjaɖɛ taa. Se, kazandʋ ndʋ tɩtɔzʋʋnɩ-wɛ tʋ. Se, tɩ́kɛ́nɩ́-wɛ yʋsaɣ pe-nesi yɔɔ yaa pe-kiɖe taa. 10 Se, paa pɩnaɣ ŋgá lɛ, pʋwɛɛ se pɔɖɔ paɣtʋ ndʋ́ tʋ-yɔɔ alɩwaatʋ ndʋ́ paɖʋwa yɔ yʋ-yɔɔ.
11 Mooyiizi tasɩ Izirɛɛlɩ samaɣ heyuu se, KƖPAƔLƲ ɛkɔŋ ewoni-wɛ Kanaanɩ ɛjaɖɛ taa nɛ ɛcɛlɩ-wɛ-ɖɩ, ɛzɩ ɛɛɖʋʋ se ɛcɛlɩɣ-ɖɩ́ pa nɛ pɔ-cɔzɔnaa yɔ lɛ, 12 pɛ́cɛ́lɩ́-ɩ pa-kajalaɣ abalɩbiyaa tɩŋa nɛ po-wondu piyaa abalɩ ñɩnzɩ kajalaɣ ñɩnzɩ tɩŋa. Mbʋ́ pʋyɔɔ yɔ, pa-tɩŋa pɛkɛ KƖPAƔLƲ pʋyʋ. 13 Se, ɛlɛ, ye pɩkɛ kpaŋaɣ c pɩɣa abalɩ ñɩŋga kajalaɣ ñɩŋga yɔ, pɛlɛɣzɩ-kɛ nɛ heɣa yaa pɩmbɩya yaa palɛzɩɣ-kɛ yɔ, pama ke-nimaɣ wayi nɛ kasɩ. Piyele nɛ pa-samaɣ taa abalɩbiyaa kajalaɣ ñɩnzɩ yɔ d, pɛlɛɣzɩ-sɩ. 14 Se, pe-piyaa ɛkɔm pɔpɔzʋʋ-wɛ se, ɛbɛ yɔɔ palakɩ ḿbʋ́ lɛ? Pocusi-wɛ se, KƖPAƔLƲ labɩ ɛ-hama lakasɩ nɛ ɛlɩzɩ ḿbaa Ejipiti ɛjaɖɛ taa ɖenɖe ḿba kaakɛ yomaa yɔ. 15 Se, toovenim lɛ, Farawɔɔ kaalabɩ ñʋʋ taa ɖoŋ nɛ ekizi eteyele ḿba se pɛɖɛɛ. Peeye, KƖPAƔLƲ yeba nɛ kajalaɣ abalɩbiyaa tɩŋa payɩ sɩ Ejipiti ɛjaɖɛ taa, pɩkpaɣʋnɩ ɛyaa piwolo pɩsɩɩnɩ wondu yɔ. Se, pʋ-yɔɔ ḿba laɣ KƖPAƔLƲ paa kpɩnɛ nɖɩ lɛ, ɖɩ-kajalaɣ pɩɣa abalɩ ñɩŋga, piyele nɛ paa pa- kajalaɣ pɩɣa abalɩ ñɩŋga ŋga lɛ, pɛlɛɣzɩ-kɛ. 16 Se, KƖPAƔLƲ labɩnɩ ɛ-hama lakasɩ nɛ ɛlɩzɩ-wɛ Ejipiti ɛjaɖɛ taa. Se, kɩlaŋ ɛnʋ́ ɛtɔzʋʋnɩ-wɛ tʋ. Se, ɛkɛ́nɩ́-wɛ yʋsaɣ pe-nesi yɔɔ yaa pe-kiɖe taa.
Ɛsɔ ɖɛʋ ɛ-samaɣ nɔɔ nɛ eɖiyiɣ-kɛ kɔ-ɖɔnɛ taa yɔ
17 Paa nɛ nʋmɔʋ ŋgʋ kɩtɩŋɩɣnɩ Fiilisitii ñɩma ɛjaɖɛ taa kɩwɛ tobi yɔ, Farawɔɔ kɔm eyele Izirɛɛlɩ ñɩma se pɛɖɛɛ lɛ, Ɛsɔ teyele se patɩŋ nʋmɔʋ ŋgʋ. Toovenim lɛ, ɛmaɣzaɣ se pɩtaakɔɔ nɛ you sɛɛ ɛsɩyɛ lɛ, sɔɔndʋ kpa ɛ-saamaɣ nɛ kɛlɛɣzɩ lɩmaɣza se kapɩsɩɣ Ejipiti ɛjaɖɛ taa. 18 Pʋ-yɔɔ, ɛtɩŋɩnɩ-wɛ nʋmɔʋ kikotu ŋgʋ kɩtɩŋɩɣnɩ lakʋ taa nɛ kiwokini kañɩŋgbala teŋgu hɔɔlʋʋ taa yɔ. Izirɛɛlɩ ñɩma kʋyɩ Ejipiti ɛjaɖɛ taa se pɛɖɛɣ lɛ, paawɛnɩ you wondu sakɩyɛ e. 19 Pakʋyaa se pɛɖɛɣ lɛ, Mooyiizi kuu Yoosɛfʋ mɔɔ nɛ ɛkpɛndɩna. Ɛlabɩ mbʋ, mbʋ pʋyɔɔ yɔ, ɛ́lɛ́ ñaatɔm se, Ɛsɔ kɔŋ-wɛ lɩzʋʋ pɩ-taa. Se, poɖuu se, pokuu ɛ-mɔɔ nɛ pɛkpɛndɩ pɛɖɛɛ f.
20 Pʋwayɩ lɛ, Izirɛɛlɩ ñɩma kʋyɩ tɛtʋ ndʋ payaɣ se Suukoti g yɔ tɩ-taa nɛ powolo pesiɣ pa-kɩɖadɩŋ Eyitam ñɩndʋ taa, wɩlɩŋ tɛtʋ cɔlɔ. 21 KƖPAƔLƲ maɣmaɣ kɛɖɛ-wɛ nɔɔ nɛ ɛwɩlɩɣ-wɛ nʋmɔʋ. Wɩsɩ taa lɛ, ɛwɛ ñɔsɩ mɩnʋʋ h taa nɛ ɛwɩlɩɣ-wɛ nʋmɔʋ nɛ piyele ɖoo taa lɛ, ɛwɛɛ ñalɩmɩyɛ naɖɩyɛ taa nɛ ɛñadɩɣ-wɛ. Pʋbʋ, papɩzɩɣ pɔɖɔ wɩsɩ nɛ ɖoo, 22 wiɖiye fɛyɩ se, ñɔsɩ mɩnʋʋ yebi-wɛ ɖɛʋ nɔɔ wɩsɩ taa yaa ñalɩmɩyɛ ñeyebi-wɛ ɖɛʋ nɔɔ ɖoo taa.