12
Yomiye taa lɩʋ kazandʋ tɔm
1 KƖPAƔLƲ heyi Mooyiizi nɛ Aarɔɔnɩnɩnɩ Ejipiti ɛjaɖɛ taa se, 2 fenaɣ ŋgaa pa-pɩnaɣ pazɩɣna. Se, ŋgaa lɛ, pɩnaɣ taa kacalaɣ fenaɣ. 3 Se, powolo peheyi Izirɛɛlɩ ñɩma tɩŋa se, fenaɣ ŋga ka-kɩyakʋ hiu ñɩŋgʋ wiye lɛ, paa hɔʋ ŋgʋ yaa ɖɩɣa ŋga lɛ, kɩkpaɣ heɣa yaa pimbɩɣa. 4 Se, ye hɔʋ nakʋyʋ ɛnawa se kɩ-ñɩma kɩlɩ kɔzʋʋ nɛ paapɩzɩɣ nɛ pɔtɔɔ kpɩnɛ nɛ pɛtɛm-ɖɛ yɔ, pa nɛ pɔ-cɔlɔ ñɩŋgʋ panɩnɩ ɖama nɛ pɔcɔnɩ pɔɖɔ ɖɔʋ ḿbʋ yɔ. Se, pɔcɔnɩ ḿbʋ paa weyɩ ɛpɩzɩɣ ɛtɔɔ yɔ, nɛ palɩzɩ kpɩnɛ. 5 Se, heɣa yaa pimbɩɣa ŋga pakpaɣkɩ yɔ, kɛ́kɛ́ abalɩñɩŋga ŋga kɛwɛnɩ pɩnaɣ kʋɖʋmaɣ nɛ pɩtɩcam ko-ɖoli yɔ. 6 Se, pazɩɣ-kɛ nɛ powolo pɩtalɩ fenaɣ taa kɩyakʋ hiu nɛ naanza ñɩŋgʋ wiye. Se, kɩyakʋ ŋgʋ kɩ-ɖanaɣ yɔɔ lɛ, páákʋ kpɩnɛ ɖɩ palɩzaa yɔ Izirɛɛlɩ ñɩma kpeekpe ɛsɩndaa. 7 Se, paa ɖɩɣa ŋga ka-taa pɔ́tɔ́kɩ kpɩnaa ana a-taa naɖɩyɛ lɛ, pócózi calɩm ḿbʋ nɛ patapʋ nɔnɔɔ kpoŋgbolonaa kisiɣa nɛ kɩkaɣʋ hayo ñɩŋgʋ, pɔ-yɔɔ. 8 Se, páwɩ́sɩ nandʋ ńdʋ́ nɛ pʋwayɩ ɖoo taa lɛ, pɔtɔɔ-tʋ nɛ sɔsɔɔna fɛyɩ tindine nɛ ñɩtʋ ñaŋ ñɩndʋ. 9 Se, pataatɔɔ nandʋ ńdʋ́ nɛ tɩ-lɛŋ yaa pataatɩzɩ-tʋ. Se, ɛlɛ, kpɩnɛ nɖɩ pawɩsɩ ɖɩ-tɩŋa pɩkpɛndɩnɩ ñʋʋ nɛ nɩŋgbanzɩ nɛ lotu yɔ, ɖi-ɖeke ɖɩ-nandʋ pɔwɛɛ se pɔtɔɔ. 10 Se, pɔtɔɔ pɩ-tɩŋa nɛ nabʋyʋ ɛtaakazɩ nɛ tɛʋ fe. Se, ye nabʋyʋ ɛkazaa yɔ, kifeŋ tanaŋ tɛɛ lɛ, pañaɣzɩ-pʋ miŋ. 11 Se, ɛzɩnɔɔ yɔ pʋwɛɛ se pɔtɔɔ-tʋ, se posuu wondu nɛ pata kitamʋʋ tɩnaɣ taa, nɛ pɛlɛɛ naataŋgbalaa pa-naataŋ tɛɛ, nɛ pɔɖɔkɩ ɖaʋ pe-nesi taa. Se, pɔtɔɔ lɛɛlɛɛ. Se, pɩkɛɣnɩ-wɛ yomiye taa lɩʋ kazandʋ ńdʋ pɔtɔɔkɩ-tʋ KƖPAƔLƲ hɩɖɛ taa yɔ.
12 Se, ɖoo ana a-taa ɛ́nʋ kaɣ cɔʋ Ejipiti ɛjaɖɛ tɩŋa payɩ taa nɛ ɛ́nʋ kʋ paa kajalaɣbɩɣa ŋga lɛ, pɩkpaɣʋ ɛyaa puwolo pɩsɩɩnɩ kpɩna yɔ, pa-taa. Se, ḿbʋ́ʋ́, ɛ́nʋ KƖPAƔLƲ ɛkʋyʋʋ Ejipiti sɩwaa yɔɔ. 13 Se, ɛlɛ, pɩkazɩ ɖɛsɩ nzɩ sɩ-taa pɛwɛɛ yɔ sɩ-yɔɔ lɛ, calɩm kɛɣnɩ-wɛ yʋsaɣ ŋga kaɖaŋɩɣ pɔ-yɔɔ yɔ. Se, ɛ́nʋ naɣ calɩm lɛ, ɛ́nʋ ɖɛɛ pɔ-yɔɔ nɛ ɛ́nʋ ɛɛsɩŋɩɣ pɛ-tɛ. Se, ḿbʋ́ʋ́, pakaɣ lɩʋ kʋñɔŋ ŋgʋ ɛ́nʋ ɖʋwa se ɛ́nʋ wɩlɩɣ Ejipiti ñɩma yɔ, kɩ-taa.
14 Se, paa pɩnaɣ ŋga pɔtɔkɩ kazandʋ sʋsɔtʋ KƖPAƔLƲ hɩɖɛ taa lɛ, pala ḿbʋ́ʋ́ nɛ pɔtɔzɩ kɩyakʋ ŋgʋ kɩ-yɔɔ. Se, pɩkɛnɩ-wɛ paɣtʋ nɛ pɩkɛnɩ-wɛ kɩcɛyʋʋ se pɔɖɔ tʋ-yɔɔ, tam.
Sɔsɔɔna fɛyɩ tindine tɔm
15 Pʋwayɩ lɛ, KƖPAƔLƲ tasɩ-wɛ heyuu se, pakpaɣ kɩyakɩŋ lʋbɛ nɛ pɔtɔɔnɩ sɔsɔɔna fɛyɩ tindine kazandʋ. Se, pɩkpaɣʋnɩ kɩyakʋ kajalaɣ ñɩŋgʋ wiye yɔ, pɩfɛyɩ se sɔsɔɔna ɛwɛɛ pa-taa nɔɔyʋ cɔlɔ. Se, ye nɔɔyʋ ɛtɔɔ sɔsɔɔna tindine kɩyakɩŋ lʋbɛ ɛnʋ ɛ-taa yɔ, pʋdʋ ɛ́nʋ pʋwɛɛ se palɩzɩ-ɩ nɛ ɛtaatasɩ wɛʋ Izirɛɛlɩ ñɩma hɛkʋ taa. 16 Se, kɩyakʋ kajalaɣ ñɩŋgʋ nɛ lʋbɛ ñɩŋgʋ pe-wiye lɛ, puwɛɛ se pekpeɣli ɛ́nʋ hɩɖɛ taa. Se, pifɛyɩ se pala tʋmɩyɛ naɖɩyɛ kɩyakɩŋ ɛnʋ ɛ-taa. Se, paa weyi ɛ-tɔɔnaɣ ɖeke papɩzɩɣ patɩzɩ.
17 Se, paa pɩnaɣ ŋga lɛ, pɛwɛɛ pɔtɔkɩ sɔsɔɔna fɛyɩ tindine kazandʋ ńdʋ nɛ pɩtɔzʋʋ-wɛ kɩyakʋ ŋgʋ kɩ-maɣmaɣ ɛ́nʋ lɩzɩ-wɛ nɔɔ kʋɖʋmaɣ Ejipiti ɛjaɖɛ taa yɔ. Se, pɩkɛnɩ-wɛ paɣtʋ nɛ pɩkɛnɩ-wɛ kɩcɛyʋʋ se pɔɖɔ tʋ-yɔɔ, tam yɔɔ. 18 Se, pɩkpaɣnɩ kajalaɣ fenaɣ kɩyakʋ hiu nɛ naanza ñɩŋgʋ ɖanaɣ yɔɔ, puwolo pɩsɩɩnɩ kɩyakʋ nɩɩlɛ nɛ kʋɖʋmʋʋ ñɩŋgʋ ɖanaɣ yɔɔ lɛ, pʋwɛɛ se pɔtɔɔ sɔsɔɔna fɛyɩ tindine. 19 Se, pɩfɛyɩ se sɔsɔɔna ɛwɛɛ pa-taa nɔɔyʋ cɔlɔ, kɩyakɩŋ lʋbɛ ɛnʋ ɛtaa. Se, paa Izirɛɛlɩ tʋ yaa ɛgɔm nɔɔyʋ ɛtɔɔ sɔsɔɔna tɔɔnaɣ nakɛyɛ yɔ, pʋdʋ ɛnʋ palɩzɩɣ-ɩ nɛ ɛtaasɩɣ wɛʋ Izirɛɛlɩ ñɩma hɛkʋ taa. 20 Se, pɩfɛyɩ se pa-taa nɔɔyʋ ɛtɔɔ sɔsɔɔna tɔɔnaɣ nakɛyɛ. Se, paa le pɛwɛɛ yɔ, pʋpɔzʋʋ se pɔtɔɔ sɔsɔɔna fɛyɩ tindine.
Pɔñɔzʋʋ yomiye taa lɩʋ kazandʋ tɔɔnaɣ yɔ
21 Pɩlabɩ ḿbʋ́ lɛ, Mooyiizi kpeɣli Izirɛɛlɩ ñɩma taa sɔsaa tɩŋa nɛ eheyi-we se, powolo pañɩnɩ pɔ-hɔŋ heɣsi yaa pimbisi nɛ pakʋ-sɩ nɛ pɔtɔɔnɩ yomiye taa lɩʋ kazandʋ. 22 Se, pakpaɣ ñɩtʋ ńdʋ payaɣ se iizoopi yɔ nɛ pɔhɔkɩ-tʋ cobi nɛ pelii kpinɛ nɖɩ pakʋwa yɔ ɖɩ-calɩm ḿbʋ pʋwɛ ñɩnaɣ taa yɔ pɩ-taa. Se, pataa calɩm ḿbʋ́ʋ́ nɔnɔɔ kpoŋgbolonaa kisiɣa nɛ kɩkaɣʋ hayo ñɩŋgʋ, pɔ-yɔɔ. Se, pʋwayɩ lɛ, pacaɣ pɑ-ɖɩsɩ taa, pa-taa nɔɔyʋ ɛtaafɛyɩ nɩŋgbaŋaɣ awayɩ se ewoki ɖoli halɩ nɛ tɛʋ kɔɔ kife. 23 Se, KƖPAƔLƲ kaɣ cɔʋ Ejipiti ɛjaɖɛ taa se ɛhɔ ɖɩ-taa ñɩma nɩŋgbaaŋ. Se, ɛlɛ, ye ɛna calɩm nɔnɔsɩ kpoŋgbolonaa kisiɣa nɛ kɩkaɣʋ hayo ñɩŋgʋ, pɔ-yɔɔ yɔ, ɛɖɛɛ ɖɩsɩ nzɩ sɩ-yɔɔ nɛ ɛɛhaɣ kʋyʋʋ nʋmɔʋ se ɛsʋʋ sɩ-taa. 24 Se, pa nɛ pɛ-sɛyɩnaa pɔɖɔkɩ paɣtʋ ńdʋ nɛ pɔɖɔ tʋ-yʋʋ tam. 25 Se, pɔkɔm pasʋʋ tɛtʋ ńdʋ́ KƖPAƔLƲ ɖʋwa se ɛhaɣ-wɛ yɔ tɩ-taa lɛ, pɔɖɔkɩ sɔnzɩ nzɩ nɛ pɔdɔŋ sɩ-yɔɔ. 26 Se, ye pe-piya ɛpɔzʋʋ-wɛ se, sɔnzɩ nzɩ sɩ-tɔbʋʋ lɛ se we lɛ, 27 pocosi-wɛ se, pɩkɛnɩ kɩlaʋ ŋgʋ ḿbá la KƖPAƔLƲ yomiye taa lɩʋ kazandʋ alɩwaatʋ taa yɔ. Se, alɩwaatʋ ńdʋ́ Izirɛɛlɩ ñɩma kaawɛ Ejipiti ɛjaɖɛ taa yɔ, nakʋyʋ wiye KƖPAƔLƲ cɔwa nɛ ɛkʋ Ejipiti ñɩma. Se, ɛlɛ, ɛwɛsɩ ḿba ɖɩsɩ ɛtasʋʋ sɩ-taa nɛ ɛɖaŋ ḿba yɔɔ.
Izirɛɛlɩ ñɩma nɩ ḿbʋ́ lɛ, poluzi pa-tɩ tɛtaa nɛ poluŋ KƖPAƔLƲ tɛɛ. 28 Pʋwayɩ lɛ, Izirɛɛlɩ ñɩma ɖɛɛ powolo pala ńdʋ KƖPAƔLƲ keheyi Mooyiizi nɛ Aarɔɔnɩnɩnɩ yɔ.
Ejipiti piya kajalaɣ ñɩnzɩ sɩm tɔm
29 Pɩkɔm ɛzɩ ɖoo hɛkʋ lɛ, KƖPAƔLƲ la nɛ Ejipiti ñɩma taa kajalaɣbiya tɩŋa sɩ, pɩkpaɣʋnɩ Ejipit wiyaʋ Farawɔɔ pɩyalʋ kajalaɣ tʋ weyi ɛkɔŋaɣ e-kiwiyaɣ kpelaɣ yɔɔ caɣʋ yɔ, pɩkpɛndɩnɩ saɖɩka tʋ weyi ɛwɛɛ saɖɩka taa yɔ ɛ-kajalaɣbɩɣa puwolo pɩsɩɩnɩ paa kpɩnɛ nɖɩ lɛ ɖɩ-kajalaɣbɩɣa. 30 Farawɔɔ nɛ ɛ-cɔlɔ ñɩma nɛ Ejipiti ñɩma tɩŋa pefe ɖoo ana a-taa nɛ pamakɩ kubusi Ejipiti ɛjaɖɛ tɩŋa taa. Ḿbʋ́ pʋyɔɔ yɔ, pɩdaakazɩ ɖɩɣa nakɛyɛ se, sɩɖʋ fɛyɩ ka-taa. 31 Pɩlabɩ ḿbʋ́ lɛ, Farawɔɔ tiyini ɖoo nɛ payaa Mooyiizi nɛ Aarɔɔnɩnɩnɩ. Paba woba lɛ, eheyi-wɛ se, pa nɛ Izirɛɛlɩ ñɩma palɩɩ lɔŋ ɛ́nʋ ɛjaɖɛ taa nɛ pɛɖɛɛ. Se, powolo páláá KƖPAƔLƲ kɩlaʋ, ɛzɩ pɔpɔzʋ yɔ. 32 Se, pakpaɣ pɛkpɛndɩnɩ po-wondu tɩŋa ɛzɩ pɔyɔɔdʋ yɔ nɛ pɛɖɛɛ ɛ́nʋ yɔɔ. Se, patɩmɩnɩ pɛ-Ɛsɔ se ɛ́lɛ́ ɛwazɩ ɛ́nʋ yɔɔ. 33 Ejipiti ñɩma maɣzaɣ se pasɩkɩ pa-tɩŋa. Ḿbʋ yebina nɛ pɛwɛɛ pataŋasɩɣ Izirɛɛlɩ ñɩma se, palɩɩ lɛɛlɛɛ ḿbá ɛjaɖɛ taa nɛ pɛɖɛɛ. 34 Pɩ-maɣmaɣ pʋ-yɔɔ Izirɛɛlɩ ñɩma ɖɛwaɣ lɛ, pɛkpɛndɩnɩ somtu ńdʋ tɩtatɩɩkpata yɔ. Paahɔkɩ kpɔnɔ mɩzasɩ po-wondu taa nɛ pakpaɣ-sɩ pɔhɔɔlɩ pa-hazasɩ yɔɔ.
35 Izirɛɛlɩ ñɩma kaalaba ɖeyi ɖeyi ńdʋ Mooyiizi keheyi-wɛ se pala yɔ. Pa sʋlʋmɩ Ejipiti ñɩma wondu ńdʋ polubini sika yaa liidiye ñɩɣyʋʋ yɔ, nɛ wondu ńdʋ posuu yɔ. 36 KƖPAƔLƲ kaayeba nɛ Ejipiti ñɩma labɩ-wɛ ɖeu nɛ pɛcɛlɩ-wɛ ḿbʋ́ ḿbʋ́ paasʋlʋmɩ paba yɔ. Ḿbʋ́ʋ́, Izirɛɛlɩ ñɩma lazɩ Ejipiti ñɩma ñɩm nɛ pɛɖɛna.
37 Pʋwayɩ lɛ, Izirɛɛlɩ ñɩma kʋyɩ Ramɩsɛɛsɩ tɛtʋ taa nɛ pakpaɣaɣ nʋmɔʋ se powoki Suukoti ñɩndʋ taa. Paakpɛndɩ ɛzɩ ɛyaa kutokiŋ tanga nɛ mɩnʋʋ (600000) yɔ, patɩkalɩnɩ halaa nɛ piya nɛ ḿba pakpadɩyɩ koŋgonoo yɔ. 38 Pa nɛ ɛyaa samaɣ ḿba palɩnɩ hɔɔlɩŋ ndɩ ndɩ yɔ, pɛɖɛna. Pɛɖɛwaɣ lɛ, pɛkpɛndɩnɩ heŋ nɛ pʋŋ nɛ naŋ kalakɩŋ sakɩyɛ. 39 Pɩsa nɛ pasaa mʋtʋ lɛ, pakpaɣ somtu ńdʋ pɛkpɛndɩnɩ Ejipiti ɛjaɖɛ taa nɛ pɛdɛɛ yɔ nɛ palabɩni sɔsɔɔna fɛyɩ tindine. Toovenim lɛ, paaɖɔɔnɩ-wɛ Ejipiti ɛjaɖɛ taa nɛ pataahiɣ aliwaatʋ se paɖaŋ nɛ somtu kpa nɛ patɩpɩzɩ nɛ pɔñɔzɩn tɔɔnaɣ ŋga paatɔɔ nʋmɔʋ taa yɔ.
40 Izirɛɛlɩ ñɩma caɣʋ Ejipiti ɛjaɖɛ taa yɔ, pɩkpɛndɩ pɩnzɩ nasɩnaza nɛ niidozo (430). 41 Pɩnzɩ nzɩ sɩtɛm kɩyakʋ ŋgʋ yɔ, ki-wiye maɣmaɣ , pɩ-tɔbʋʋ se kɩyakʋ hiu nɛ naanza ñɩŋgʋ wiye kajalaɣ fenaɣ taa, KƖPAƔLƲ yeba nɛ Izirɛɛlɩ lɩɩ nɔɔ kʋɖʋmaɣ Ejipiti ɛjaɖɛ taa. 42 Ɖɔɖɔ ɛzɩ KƖPAƔLƲ caɣʋ nɛ ɛ-ɛza ɖoo ana a-taa nɛ ɛla nɛ Izirɛɛlɩ ñɩma lɩɩ Ejipiti ɛjaɖɛ taa nɛ pɛɖɛɛ yɔ, ḿbʋ́ ɖɔɖɔ pʋwɛɛ se Izirɛɛlɩ ñɩma ɛcaɣnɩ pɛ-ɛza ɖoo ana, ḿbʋ pʋyɔɔ yɔ akɛ KƖPAƔLƲ ñɩna.
Paɖʋʋ paɣtʋ se pɔtɔɔ yomiye taa lɩʋ kazandʋ yɔ
43 Pʋwayɩ lɛ, KƖPAƔLƲ tasɩ Mooyiizi nɛ Aarɔɔnɩnɩnɩ heyuu se, pana ɛzɩma pʋwɛɛ se pɔtɔɔ yomiye taa lɩʋ kazandʋ yɔ:
Se, pɩtaha caɣyʋ weyɩ ɛtɩkɛ Izirɛɛlɩ tʋ yɔ nʋmɔʋ se, ɛtɔɔ yomiye taa lɩʋ kazandʋ tɔɔnaɣ.
44 Se, yom weyi payabɩ-ɩ nɛ pɛpɛlɩ-ɩ yɔ, ɛnʋ ɛpɩzɩɣna nɛ ɛtɔɔ pɩ-tɛ kazandʋ tɔɔnaɣ.
45 Se, pɩtaha nʋmɔʋ caɣyʋ yaa abaa laɖʋ se ɛtɔɔ pɩ-tɔɔnaɣ.
46 Se, ɖɩɣa ŋga ka-taa pawɩsɩ kpɩnɛ nɖɩ pakʋwa yɔ, pɔtɔkɩ ɖɩ-nandʋ. Se, pɩfɛyɩ se nɔɔyʋ ɛkpaɣ nandʋ ndʋ nɛ ɛkpɛndɩnɩ ɛlɩnɩ awayɩ. Se, pɩfɛyɩ se pasalɩ kpɩnɛ nɖɩ ɖɩ-mɔɔ.
47 Se, Izirɛɛlɩ ñɩma tɩŋa payɩ tɔkɩnɩ kazandʋ ndʋ.
48 Se, ye caɣyʋ nɔɔyʋ ɛwɛɛ pɛ-hɛkʋ taa nɛ e-liu wɛɛ se ɛtɔɔ yomiye yaa lɩʋ kazandʋ KƖPAƔLƲ hɩɖɛ taa yɔ, pʋwɛɛ se pɛpɛlɩ-ɩ nɛ pɩkpɛndɩnɩ ɛ-ɖɩɣa taa abalɩbiya tɩŋa nɛ pɩcɔ. Se, pʋwayɩ lɛ, ɖɔɖɔ ɛzɩ Izirɛɛlɩ ñɩma yɔ, ɛpɩzɩɣ nɛ ɛtɔɔ kazandʋ ndʋ.
Se, kɩtepɛlʋʋ nakʋyʋ ɛɛpɩzɩɣ nɛ kɩtɔɔ tɔɔnaɣ ŋga.
49 Se, paɣtʋ ndʋ Izirɛɛlɩ ñɩma nɛ caɣyaa ḿba pɛwɛ pɛ-ɛjaɖɛ taa yɔ, paɖʋ-tʋ.