4
Ɛsɔ wɩlʋʋ e-ɖoŋ Mooyiizi yɔ
1 ḿbʋ́ʋ́ Mooyiizi cosi KƖPAƔLƲ se, Izirɛɛlɩ ñɩma ɛɛkaɣ ɛnʋ tɔm mʋ nɛ paakaɣ ɛnʋ nɩnaʋ. Pakaɣ ɛnʋ heyuu se, ɛcɛtɩɣ, se KƖPAƔLƲ talɩzɩ ɛ-tɩ nɛ ɛwɩlɩ-ɩ. 2 Peeye, KƖPAƔLƲ pɔzɩ Mooyiizi se, ɛbɛ ɛɖɔkɩ e-nesi taa? Mooyiizi cosi-i se, ɖaʋ ɛnʋ ɖɔkaa. 3 KƖPAƔLƲ pɔzɩ-ɩ se, ɛpɛɖɩ-kʋ tataa. Ɛ́lɛ́ pɛɖɩ-kʋ tataa lɛ, ɖaʋ pɩsɩ ɖʋm. Pɩlabɩ ḿbʋ́ lɛ, Mooyiizi kiti lɛɛlɛɛ kiŋgiɖe. 4 Ɛlɛ, KƖPAƔLƲ heyi Mooyiizi se, esezi e-nesi nɛ ɛɖɔkɩ ɖʋm suu taa. Mooyiizi sesaa nesi nɛ ɛɖɔkɩ-ɩ lɛ, ɖʋm ɖaɣnɩ ɖaʋ pɩsɩɣ e-nesi taa.
5 Ɛlɛ, KƖPAƔLƲ heyi-i se, ḿbʋ́ ɛkawɩlɩna Izirɛɛlɩ ñɩma se pɔ-cɔzɔnaa Abɩraham nɛ Izaakɩ nɛ Yaakɔɔbʋ pɛ-Ɛsɔ KƖPAƔLƲ ɛnʋ ɛlɩzɩ ɛ-tɩ nɛ ɛwɩlɩ-ɩ yɔ, yɔ lɛ. 6 Ḿbʋ́ʋ́ KƖPAƔLƲ Mooyiizi tasɩ heyuu se, ɛtɩnɩ e-nesi ɛ-laŋɩyɛ taa. Mooyiizi la ḿbʋ ɖɔɖɔ. Ɛlɛ, ɛkɔm ɛlɩzɩ e-nesi lɛ, ɛna se canatʋ kpa-zɩ nɛ sɩhʋlʋmɩ poyi poyi. 7 KƖPAƔLƲ tasɩ-ɩ heyuu se ɛpɩsɩnɩ e-nesi toko tɛɛ ɛ-laŋɩyɛ yɔɔ. Mooyiizi ña nɛ ɛla ɖɔɖɔ ḿbʋ́. Ɛkɔm nɛ ɛlɩzɩ e-nesi lɛ, sɩpɩsaa sɩwɛɛ ɛzɩ sɩɩwɛʋ yɔ. 8 Ḿbʋ́ʋ́ KƖPAƔLƲ heyi-i se, ye Izirɛɛlɩ ñɩma ɛtanɩnɩ-ɩ kajalaɣ hamalakasɩ ɖeɖe yɔ, pakaɣ-ɩ nɩnʋʋ naalɛ ñɩnzɩ ɖeɖe. 9 Se, ye ɛlabɩ hamalakasɩ nzɩ sɩ-naalɛ nɛ pɛwɛɛ nɛ paanɩnɩ-ɩ nɛ paawelesiɣni-i lɛ, ecozi Niili pɔɔ taa lɩm nɛ ɛpɩyɩ-pʋ tataa. Se, ɖɩnɛɛ lɛ, lɩm mbʋ pɩpɩsɩɣ calɩm.
Ɛsɔ lɩzʋʋ Aarɔɔnɩnɩnɩnɩ se ɛ́sɩ́nɩ́ Mooyiizi yɔ
10 Pʋwayɩ lɛ, Mooyiizi heyi KƖPAƔLƲ se, ɛnʋ tendi-i se ɛna ɛnʋ pʋdɔdɩyɛ! Se, ɛnʋ ɛɛpɩzɩɣ yɔɔdʋʋ. Se, ɖooo ɛ-pɩcatʋ taa nɛ halɩnɩ sɔnɔ, ɛnʋ ɛɛpɩzɩɣ yɔɔdʋʋ. Se, ɖooo ɛpazʋʋ ɛnʋ́ʋ́ yɔɔdɩnaʋ yɔ, nabʋyʋ tɛlaɣzɩ. Se, ɛnʋ ŋsʋlʋmɩyɛ ɛɛpɩsɩɣ camɩyɛ se ɛyɔɔdɩ ndʋ ɛnʋ caɣ yɔɔdʋʋ yɔ. 11 Peeye KƖPAƔLƲ kitini-i se, aha ɛyʋ nɔɔ? Se, apɩzɩɣ nɛ ɛla nɛ ɛyʋ pɩsɩ kaayɔɔdaɣ yaa tandam yaa yʋlʋm yaa weyi ɛnaɣ yɔ? Se, pɩtɛkɛ ɛnʋ́ KƖPAƔLƲ yaa we? 12 Se, lɛɛlɛɛyɔ lɛ ewolo. Se, ɛnʋ́ wɛɣaɣ ɛ-cɔlɔ alɩwaatʋ ńdʋ ɛyɔɔdʋʋ yɔ nɛ ɛnʋ́ heyi-i ńdʋ ɛɛyɔɔdɩ yɔ. 13 Mooyiizi kitini KƖPAƔLƲ se, ɛnʋ tendi-i se etiyi nɔɔyʋ!
14 Peeye, KƖPAƔLƲ kɔ Mooyiizi nɛ pana nɛ eheyi-i se ɛ-ɖalʋ Leevii liɖe taa tʋ Aarɔɔnɩ wɛɛ. Se, ɛnʋ sɩma se ɛlɛ yɔɔdʋʋ camɩyɛ. Se, ɛlɛ wɛɛ nɛ ɛkatɩɣ-ɩ. Se, ɛlɛ katɩɣ-ɩ lɛ, ɛlɛ taa lakɩ leleŋ pɩtɩɩfɛyɩ. 15 Se, ɛɛyɔɔdɩnɩ ɛ́lɛ́ nɛ eheyi-i ńdʋ pʋwɛɛ se ɛ́lɛ́ ɛyɔɔdɩ yɔ. Se, paakɔŋ se pɔyɔɔdʋʋ lɛ, ɛ́nʋ maɣmaɣ wɛɣ pa-taa paa weyi lɛ ɛ-cɔlɔ nɛ ɛwɩlɩ-wɛ ḿbʋ pʋwɛɛ se pala yɔ. 16 Se, ɛpɩsɩɣ ɛzɩ Ɛsɔ weyi ɛñandɩɣ ɛ́lɛ́ yɔ, piyele nɛ ɛ́lɛ́ kɛ ɛ-tɔm yɔɔdɩyʋ. Se, ɛ́lɛ́ kaɣnɩ yɔɔdɩnʋʋ samaɣ e-lone taa. 17 Se, ɖɔɖɔ lɛ, ɛkpaɣaɣ ɖaʋ ŋgʋ nɛ ɛɖɔkɩ e-nesi taa. Se, ŋgʋ́ʋ́ ɛkaɣnɩ labʋ hama lakasɩ.
Mooyiizi pɩsɩɣʋʋ ɛ-samaɣ cɔlɔ yɔ
18 Pʋwayɩ lɛ, Mooyiizi pɩsɩ ɛ-yɩtɩ Yetiroo cɔlɔ nɛ eheyi-i se, pʋwɛɛ se ɛ́nʋ ɛpɩsɩ ɛ́nʋ ñɩma cɔlɔ nɛ ɛna se pɛkpɛndɩ pɛwɛ wezuu naa? Yetiroo cosi-i se, pʋwɛ ɖeu se, ewolo. 19 Ḿbʋ́ʋ́, KƖPAƔLƲ heyi Mooyiizi Maadiyaanɩ ɛjaɖɛ taa se, ɛwolo ɛpɩsɩ Ejipiti ɛjaɖɛ taa. Se, ḿbʋ pʋyɔɔ yɔ, ḿbá pañɩnaɣ se pakʋ-ɩ yɔ, pasɩba pa-tɩŋa. 20 Ɖɩnɛɛ, Mooyiizi kpaɣ ɛ-halʋ nɛ e-piya nɛ ɛcaɣzɩ-wɛ ɛ-kpaŋaɣ yɔɔ nɛ pɛɖɛɛ se powoki Ejipiti ɛjaɖɛ taa. Ɛɛdɔkɩ e-nesi taa ɖaʋ ŋgʋ́ Ɛsɔ keheyi-i se ɛkpaɣaɣ yɔ. 21 KƖPAƔLƲ tasɩ-ɩ heyuu se, ɛ́nʋ ha-ɩ ɖoŋ se ɛla hama lakasɩ tɩŋa. Se, ɛkɔm nɛ ɛpɩsɩ E jipiti ɛjaɖɛ taa lɛ, ɛtaasɔɔ se ɛlakɩ hama lakasɩ nzɩ́ Farawɔɔ ɛsɩndaa. Se, ɛlɛ, ɛ́nʋ lakɩ nɛ ɛ́lɛ́ laŋɩyɛ wɛɛ kpɩzɩŋ nɛ ɛɛkaɣ samaɣ yebu se pɛɖɛɛ. 22 Se, eheyi Farawɔɔ se ɛ́nʋ́ʋ́ KƖPAƔLƲ tɔŋ se, Izirɛɛlɩ samaɣ kɛ ɛ́nʋ pɩyalʋ, ɛ́nʋ pɩyalʋ kajalaɣ ñɩnʋ. 23 Se, ɛ́nʋ keheyi-i se eyele ɛ́nʋ pɩyalʋ kajalaɣ ñɩnʋ nɛ ewolo ɛlaa ɛ́nʋ́ʋ́ kɩlaʋ nɛ ekizi eteyeli-i se ewolo. Too! Se, pʋyɔɔ lɛ, ɛ́nʋ kʋʋ ɛ-pɩyalʋ kajalaɣ ñɩnʋa.
24-26 Pɛwɛɛ pɛɖɛɣ lɛ, pasʋʋ ɖoli ɖoo naayɛ taa. Peeye, KƖPAƔLƲ kɔm ekpibi-i nɛ ɛñɩɣnɩɣ se ɛkʋ-ɩ. Ɖɩnɛɛ Ciporaa kpaɣ pɩyɛ lɔŋñɩnɖɛ nɖɩ payaɣ se Siilɛsɩ yɔ nɛ ɛpɛlɩ ɛ-pɩyalʋ nɛ ɛkpaɣ tɔnʋʋ ŋgʋ ɛsɛtaa yɔ nɛ etukini Mooyiizi abalʋtʋb nɛ ɛtɔ se, ɛkɛ-ɩ walʋ weyi ɛ nɛ ɩ paka calɩm yɔ. Ɖɩnɛɛ KƖPAƔLƲ yebi-i nɛ eposi ɛ-tɩ nɛ-ɩ. Ciporaa yɔɔdaɣ ɛkɛ-ɩ walʋ weyi ɛ nɛ ɩ paka calɩm yɔ, pɛlʋʋ yɔɔ ɛyɔɔdaɣ ḿbʋ.
27 Pʋwayɩ lɛ, KƖPAƔLƲ heyi Aarɔɔnɩnɩnɩ se, ewolo nɛ ɛkatɩ Mooyiizi lakʋ taa. Aarɔɔnɩnɩnɩ ɖɛɛ ewolo ɛmaɣnɩ-ɩ Ɛsɔ pʋʋ yɔɔ, ɛñɔtɩnɩ-ɩ nɛ ekpiikini-i. 28 Peeye, Mooyiizi kɛdɩ Aarɔɔnɩnɩnɩ ńdʋ tʋ-yɔɔ KƖPAƔLƲ tiyi-i tɩ-tɩŋa, nɛ hama lakasɩ nzɩ ɛpɔzɩ-ɩ se ɛla yɔ, sɩ-tɩŋa. 29 Pʋwayɩ lɛ, pa-naalɛ pɛɖɛɛ powolo pekpeɣli Izirɛɛlɩ ñɩma taa sɔsaa tɩŋa. 30 Pekpeɣli-wɛ ḿbʋ́ lɛ, kɛdɩ-wɛ ndʋ ndʋ KƖPAƔLƲ heyi Mooyiizi yɔ, nɛ pala hama lakasɩ nzɩ́ Izirɛɛlɩ ñɩma ɛsɩndaa nɛ paba na. 31 Paba na ḿbʋ lɛ, petisi se KƖPAƔLƲ na kʋñɔŋ ŋgʋ pawɩlaɣ-wɛ yɔ nɛ ɛkɔŋ se ɛya pa-ñʋʋ. Ɖɩnɛɛ, pahini tɛtaa se poluŋ ɛ-tɛɛ.