44
Pakpaʋ Bineyaamiini se, ɛmɩlaa yɔ
1 Pʋwayɩ lɛ, Yoosɛɛfʋ heyi ɛ-tʋmlaɖaa yɔɔ cɔnɩyʋ se, ɛ́ɖʋ ɛyaa ḿba po-kutokiŋ taa tɔɔnaɣ. Se, ɛɖʋ-wɛ mbʋ papɩzɩɣ pakpaɣ yɔ. Se, ɛ́tɛma lɛ, ɛɖʋ paa weyi ɛ-tɔɔnaɣ liidiye e-kutoku taa. 2 Se, piyele pa-tɩnʋʋ ñɩŋgʋ taa lɛ, ɛtaaɖʋ ɛ́lɛ tɔɔnaɣ liidiye ɖeke, ɛlɛ, ɛɖʋ ɖɔɖɔ ɛnʋ caɖaɣ ŋga palabɩnɩ liidiye yɔ. Peeye abalʋ ɛnʋ ɛlaba ɛzɩ Yoosɛɛfʋ heyuu-i yɔ. 3 Tɛʋ tifema lɛ, peyebi-wɛ nɛ pa nɛ pa-kpaŋasɩ pɛɖɛɛ. 4 Pakʋyɩ tɛtʋ taa nɛ pɛɖɛɣ, patatalɩdɩ ɖoli lɛ, Yoosɛɛfʋ heyi ɛ-tʋmlaɖaa yɔɔ cɔnɩyʋ se, ɛ́kʋyɩ nɛ ése ɛyaa ḿba pa-wayɩ nɛ ɛkpa-wɛ. Se, ye ɛkpa-wɛ lɛ, ɛpɔzɩ-wɛ se, pɩlabɩ ɛzɩma nɛ ḿba hʋm-wɛ nɛ hʋnʋʋ nɛ pahʋŋ ḿba nɛ tataɣ? 5 Se, pɩlabɩ ɛzɩma nɛ pamɩlɩ ɛnʋ caa caɖaɣ ŋga ɛñɔʋna nɛ ɛpɔzʋʋnɩ piye yɔ? Se, mbʋ palaba yɔ, pɩwɛ ɖeu lɛ?
6 Peeye ɛ́lɛ kʋyaa ese pa-wayɩ nɛ ehiɣ-wɛ nɛ eheyi-wɛ tɔm ndʋ. 7 Paba cosi-i se, ɛzɩma ɛnʋʋ weyi ɛkɛ pa-caa yɔ, ɛpɩzɩɣ ɛyɔɔdɩ ḿbʋ? Se, ḿba ɛɛpɩzɩɣ pala pɩtɛ lakasɩ nzɩ kaʋ. 8 Se, ɛtɔzɩ se, ḿba lɩnɩ Kanaanɩ nɛ powolo lɛ, paakpɛndɩnɩ liidiye nɖɩ ḿba na ḿba kutokiŋ taa yɔ, nɛ powona. Ɛzɩma ḿba pɩzɩɣ powolo ɛ-caa tɛ nɛ pamɩlɩ liidiye yaa sika? 9 Peeye peheyi-i se, ewili po-kutokiŋ taa, ye pana nɔɔyʋ wondu taa caɖaɣ ŋgaa yɔ, pakʋ pʋdʋ. Piyele mba pɩkazaa yɔ, paba pɩsɩ e-yomaa. 10 Mbʋʋ ɛ́lɛ kitini-wɛ se, tɔɔ! Ɛnʋ lakɩ ɛzɩ pɔyɔɔdʋʋ yɔ. Ɛlɛ, weyi panaɣ e-kutoku taa caɖaɣ ŋ́ga yɔ, e-ɖeke ɛkɛɣnɩ ɛnʋ yom, nɛ pɩkazɩ peyele lɛlaa. 11 Kpaagbaa ḿbʋ lɛ, Yoosɛɛfʋ ɖalaa nɛ e-neu patɩhɛɖʋʋ po-wondu nɛ petisi tataa, nɛ paa weyi ɛhɛɖɩ e-kutoku nɔɔ. 12 Peeye tʋmlaɖaa yɔɔ cɔnɩyʋ ɛnʋ ɛpazɩ kutokiŋ taa wiluu. Ɛpazɩnɩ pɔ-sɔsɔ ñɩŋgʋ, nɛ ɛkɔɔ ɛtɛzɩnɩ pa-tɩnʋʋ ñɩŋgʋ. Pɩkɔma pɩtalɩnɩ pa-tɩnʋʋ Bineyaamiini ñɩŋgʋ lɛ, pana caɖaɣ ŋgaa kɩ-taa. 13 Ɖɩnɛɛ pitili-wɛ yem yɔɔɔ nɛ pacɩyɩ po-tokonaa nɛ paa pa-taa anɩ ɛɖaɣnɩ hɔkʋʋ e-wondu ɛ-kpaŋaɣ yɔɔ nɛ pekiti tɛtʋ taa.
Yuuda lʋbʋ Bineyaamiini yɔɔ yɔ
14 Yuuda nɛ ɛ-ɖalaa nɛ e-newaa patalɩ Yoosɛɛfʋ tɛ lɛ, pamaɣnɩ-ɩ ɖenɖe ɛɛwɛɛ yɔ. Peeye poluŋ ɛ-tɛɛ nɛ papa pɛ-ɛza nɛ tɛtʋ. 15 Ɖɩnɛɛ Yoosɛɛfʋ pɔzɩ-wɛ se, pɩlabɩ ɛzɩma nɛ pala ḿbʋ? Patana se, ɛnʋ wɛʋ yɔ, ɛwɛnɩ ɖoŋ se ɛna mbʋ ɛyaa lakɩ mɛsaɣ tɛɛ yɔ, yaa we? 16 Ɛyɔɔdɩ ḿbʋ lɛ, Yuuda yaa-ɩ se, Caa! Nɛ ɛtɔ se, ḿba fɛyɩnɩ natʋyʋ se pɔyɔɔdʋʋ. Se we ḿba yɔɔdʋʋ nɛ palɩɩ pɩ-taa? Ɛsɔ maɣmaɣ kulini ḿba wayɩ, se, ḿba tɔm sɩba. Pʋ-yɔɔ lɛ, ḿba nɛ weyi pana e-kutoku taa ñɩɣlɩm caɖaɣ yɔ, pa-tɩŋa papɩsɩɣnɩ e-yomaa. 17 Peeye Yoosɛɛfʋ kitini-i se, aayɩ, ɛnʋ fɛyɩ se ɛlakɩ ḿbʋ! Weyi pana ɛ-cɔlɔ caɖaɣ ŋ́ga yɔ, e-ɖeke koŋ ɛkɛɣnɩ ɛnʋ yom. Piyele mbaa lɛ, pékpemni laŋhɛzɩyɛ pa-caa cɔlɔ.
18 Ɛyɔɔdɩ ḿbʋ lɛ, Yuuda ñɔtɩnɩ́-ɩ nɛ ɛtɔ se, ɛnʋʋ ɛ-caa, ɛwɛ ɛzɩ wiyaʋ Faraawɔɔ yɔ. Pʋ-yɔɔ ɛnʋ tendiɣ-i se, ɛha ɛnʋʋ nʋmɔʋ nɛ ɛnʋ yɔɔdɩnɩ-ɩ pazɩ. Ɛlɛ, ɛnʋʋ ɛ-caa ɛ-pana ɛtaakpanɩ ɛnʋ. 19 Se, ḿba calɩ wobu lɛ, ɛpɔzɩ ḿba se, ḿba-caa wɛnɩ ɛ-ɛza na? Se, ḿba tasɩ ɖalʋ nɔɔyʋ yaa neu nɔɔyʋ wɛnaʋ na? 20 Se, ḿba cosi se, ḿba-caa wɛɛ, ɛlɛ, ɛkpadɩyaa. Se, ḿba wɛnɩ ɖɔɖɔ neu tɩnʋʋ nɔɔyʋ, ɛlʋlɩ-ɩ ɛ-akpadɩyɩtʋ taa. Se, ḿba-caa sɔɔlɩ-ɩ siŋŋ, mbʋ pʋyɔɔ yɔ, ɛ́lɛ ɖalʋ sɩba nɛ pɩkazɩ e-ɖeke koŋ ɛ-halʋ weyi ɛkɩlɩ-ɩ sɔɔlʋʋ yɔ, ɛ-cɔlɔ. 21 Se, ḿba yɔɔdɩ ḿbʋ lɛ, eheyi ḿba se, ḿba ewolo powoni pe-neu ɛnʋ nɛ ɛna-ɩ nɛ ɛ-ɛza. 22 Se, ḿba cosi-i se, pɩɣa ŋ́ga, kaapɩzɩɣ kowolo ɖoli nɛ keyele ka-caa, pɩtɛkɛ mbʋʋ yɔ, ɛ́lɛ ñasɩkɩ. 23 Se, pɔyɔɔdɩ ḿbʋ lɛ, ɛkaɖɩ ḿba kpayɩ se, ye ḿba etowoni pe-neu yɔ, ḿba ɛɛpɩzɩɣ patasɩ-ɩ naʋ. 24 Se, ŋgʋ, ḿba pɩsɩ ḿba-caa weyi ɛñaŋ-ɩ yɔ, ɛ-cɔlɔ lɛ, ḿba heyi-i pɩtɩŋa payɩ. 25 Se, eheyi ḿba se, pekiti nɛ patasɩ yabʋ tɔɔnaɣ pazɩ lɛ, 26 ḿba heyi-i se, páapɩsɩɣ peeye. Ye eyeki pa-tɩnʋʋ se, kɩtɩŋ-wɛ yɔ, kalɩ pi-ɖeke. Ye ɛ́lɛ ɛtatɩŋ-wɛ yɔ, ḿba ɛɛpɩzɩɣ patasɩ ɛnʋʋ ɛjaɖɛ ñɩm yɔɔ cɔnɩyʋ naʋ. 27 Se, pa-caa cosi ḿba se, pana ɖeu se, abalɩbiya naalɛ ɖeke ɛ-halʋ Raacɛɛlɩ lʋlɩ-ɩ. 28 Ɛlɛ, pa-taa lɛlʋ fɛyɩ. Se, paa pɩɩla ɛzɩma, tɛtɛ kpɩnɛ naɖɩyɛ cɩyɩɩ-ɩ nanʋʋ nanʋʋ nɛ ɖɩtɔɔ. Toovenim lɛ, halɩ nɛ sɔnɔ ɛtatasɩ-ɩ naʋ. 29 Se, pañɩnɩɣ se pɛtɛzɩ ɛ́lɛ kpaɣʋ na! Ye pa nɛ ɩ pɛɖɛwa nɛ nabʋyʋ labɩ-ɩ nʋmɔʋ taa yɔ, pʋbʋ, payʋsʋʋ, piyeki nɛ ɛnʋ tii hadɛdɩyɛdaa nɛ laŋpɩsɩyɛ ɛnʋ akpatɩyɩtʋ taa. 30 Pʋ-yɔɔ lɛ, lɛɛlɛɛyɔ, ɛnʋ ɛɛpɩzɩɣ ɛpɩsɩ ɛ-caa cɔlɔ nɛ ɛtɛkpɛndɩnɩ pɩɣa ŋ́ga. Ŋ́ga wɛna nɛ ɛ́lɛ wɛɛ wezuu halɩ nɛ sɔnɔ. 31 Ye papɩsaa nɛ pa-caa ɛtana-kɛ yɔ, ɛtɛzɩɣ sɩbʋ. Pʋbʋ, ḿba ñʋʋ taa pɩtɛŋ se, peyeba nɛ pa-caa tii hadɛdɩyɛdaa nɛ laŋpɩsɩyɛ ɛ-akpadɩyɩtʋ taa. 32 Ɖɔɖɔ lɛ, ɛnʋ heyi pa-caa se, ɛnʋ cɔŋnɩ pɩɣa ŋ́ga kɔ-yɔɔ. Se, ye ɛnʋ ɛtapɩsɩnɩ-ɩ-kɛ yɔ, ɛnʋ ñʋʋ taa pɩtɛŋ. 33 Ɛtɛm-ɩ kɛdʋʋ lɛ, eheyi-i se, ye ḿbʋ, ɛnʋ tendi-i se, eyele pɩɣa ŋ́ga nɛ ka nɛ ka-ɖalaa lɛlaa pekpe, nɛ piyele ɛnʋ kɛ e-yom ko-lone taa. 34 Se, toovenim lɛ, ɛzɩma ɛnʋ pɩzɩɣ ekpe ɛnʋ caa cɔlɔ nɛ ɛtɛkpɛndɩnɩ-kɛ? Se, ɛnʋ pɩzɩɣ ɛna kʋñɔŋ ŋgʋ ɛnʋ caa kaɣ caɣʋ yɔ yaa we?