43
Yaakɔɔbʋ tisuu se, ɛ-pɩyalʋ Bineyaamiini ewolo Ejipiti yɔ
1 Ñɔɔsɩ kɛwɛɛ sɩkʋʋ ɛyaa Kanaanɩ ɛjaɖɛ taa siŋŋ. 2 Yaakɔɔbʋ hɔʋ taa ñɩma tɛm tɔɔʋ tɔɔnaɣ ŋga payabɩ Ejipiti yɔ lɛ, eheyi ɛ-pɩyalaa se, pekiti nɛ patasɩ yabʋ tɔɔnaɣ pazɩ. 3 Peeye ɛ-pɩyalʋ Yuuda kitini-i se, abalʋ weyi ɛcɔŋnɩ Ejipiti ɛjaɖɛ yɔɔ yɔ, eheyi-wɛ kpayɩ se, ye pápɩsaa powolo nɛ pe-neu ɛfɛyɩ pa-taa yɔ, ɛɛmʋʋ-wɛ. 4 Se, ye etisiɣ se, pa nɛ pe-neu pɛ́ɖɛɛ yɔ, pʋbʋ, powoki nɛ payabɩ-ɩ tɔɔnaɣ. 5 Ɛlɛ, ye ekizaa yɔ, paawoki. Mbʋ pʋyɔɔ yɔ, abalʋ ɛnʋ eheyi-wɛ se, ye ɛtana pe-neu yɔ, ɛɛmʋʋ-wɛ. 6 Ɖɩnɛɛ Yaakɔɔbʋ kitini-wɛ se, pɩlabɩ ɛzɩma nɛ peheyi abalʋ ɛnʋ se, pɩkazɩ pe-neu nɔɔyʋ ɖɩɣa? Se, pasaŋ ɛnʋ kɩcɩkpʋʋ taa. 7 Peeye pocosi-i se, abalʋ ɛnʋ ɛpɔzɩnɩ-wɛ tɔm sakɩyɛ pa nɛ pɔ-hɔʋ pɔ-yɔɔ. Se, ɛtasɩ-wɛ pɔzʋʋ se, pa-caa kpɛndɩ ɛwɛ wezuu na? Se, patasɩ wɛnaʋ neu nɔɔyʋ ɖɔɖɔ yaa we? Se, ɛpɔzɩ-wɛ ḿbʋ lɛ, petisi yem se, ɛɛ. Se, ɛzɩmaa ḿba pɩzaɣ se peɖiɣzina se, ɛpɩzɩɣ ɛheyi-wɛ ḿbʋ se, powoni pe-neu.
8 Pocosi pa-caa ḿbʋ lɛ, ɛ-pɩyalʋ Yuuda heyi-i se, éyele Bineyaamiini nɛ ɛ nɛ ɩ powolo. Se, ye ɛ nɛ wɛ nɛ pɔ-hɔŋ taa ñɩma patɔsɔɔlɩ sɩbʋ nɛ pacaɣ se, pɛwɛɛ wezuu yɔ, pɩwɛɛ se ḿba ɛɖɛɛ. 9 Se, toovenim lɛ, ɛnʋ heyi-i se ɛcɔŋnɩ ɛ́lɛ yɔɔ. Ye nabʋyʋ ɛtalɩ-ɩ yɔ, ɛpɔzɩ ɛnʋ. Ye ɛnʋ ɛtapɩsɩnɩ-ɩ yɔ, ɛnʋʋ Yuuda ɛ-ñʋʋ taa pɩtɛŋ sɔnɔ nɛ cee. 10 Se, ɛ́na, ye pataakɩlɩ lesuu alɩwaatʋ yɔ, pʋbʋ ḿba kɛtɛm wobu Ejipiti tɔm naalɛ, nɛ pekiti. 11 Pɔyɔɔdɩ ḿbʋ lɛ, Yaakɔɔbʋ heyi-wɛ se, ye mbʋʋ yɔ, powoki lɛ, pɛkpɛndɩnɩ mbʋ mbʋ pɩkɩlɩ ɖeu pɛ-ɛjaɖɛ taa yɔ pɩ-taa nabʋyʋ nɛ powona paha abalʋ ɛnʋ. Se, pɔɖɔkɩ tɩŋ ndɩ ndɩ cɩyɩm nɛ tʋŋ nim nɛ sɔzɩŋ nim nɛ tilaaɖi nɛ tɩʋ ŋgʋ payaɣ se Pisitaasɩ yɔ nɛ ŋgʋ payaɣ se Amandɩ yɔ pe-pe. 12 Se, pakpakɩɣ liidiye lɛ, pataasɔɔ nɖɩ paana po-kutokuŋ taa yɔ, ɖɩ-yɔɔ. Paa pɩɩla ɛsɩna, piiyiɣdi-wɛ kiyiɣdu. 13 Se, tɔɔ! Pakpaɣ pe-neu nɛ pekiti abalʋ ɛnʋ ɛ-cɔlɔ. 14 Pʋ-yɔɔ lɛ, Ɛsɔ Ɖoŋ Tɩŋa Tʋ eyele nɛ abalʋ ɛnʋ ɛna pa-pɩtɔdɩyɛ nɛ eyele Siimeyɔɔ nɛ Bineyaamiini nɛ pa nɛ wɛ papɩsɩ! Se, piyele ɛnʋ lɛ, ɛtɛm lesuu pɩɣa lɛɛka, ɛnʋ tasɩɣ lɛɛsɩ lesuu ɖɔɖɔ.
Yoosɛɛfʋ nɛ ɛ-ɖalaa patasʋʋ ɖama naʋ yɔ
15 Yoosɛɛfʋ ɖalaa ñɔɔzɩ kʋjɔŋ nɛ pakpaɣ liidiye tɔm naalɛ taa nɛ pa nɛ Bineyaamiini powolo Ejipiti. Patalaa lɛ, powolo Yoosɛɛfʋ cɔlɔ. 16 Ɛ́lɛ kɔma ɛna se, pa nɛ Bineyaamiini powobina lɛ, eheyi ɛ-tʋmlaɖaa ñʋʋdʋ se, ewoni-wɛ ɛnʋ tɛ. Se, ɛ́talaa lɛ, eyele nɛ pakʋ kpɩnɛ naɖɩyɛ nɛ palabɩnɩ tɔɔnaɣ. Se, ɛnʋ nɛ ɛyaa ḿba pɔtɔkɩnɩ wɩsɩdaa. 17 Peeye ɛlaba ɛzɩ ɛ-caa yɔɔdʋʋ yɔ. Ewoni ɛyaa ḿba ɛ-caa ɛnʋ ɛ-tɛ. 18 Pɔkɔma payaa-wɛ se pasʋʋ lɛ, sɔɔndʋ kpa-wɛ nɛ pamaɣzɩɣ se, paa pɩɩla ɛsɩna, ḿba kacalɩ wobu nɛ paɖʋ liidiye nɖɩ ḿba kutokiŋ taa yɔ, ɖɩ-yɔɔ. Se, pasʋʋnɩ ḿba peeye se pakʋyɩ ḿba yɔɔ, nɛ panazɩ-wɛ. Se, pakpakɩɣ ḿba kpaŋasɩ nɛ papɩsɩ mbaa yomaa. 19 Pasʋwaɣ ɖɩɣa lɛ, pɔñɔtɩnɩ Yoosɛɛfʋ tʋmlaɖaa ñʋʋdʋ nɛ payaa-ɩ se, 20 Caa! Nɛ peheyi-i se, petendi-i, se, paatɛm wobu peeye nɛ paya tɔɔnaɣ. 21 Se, pekitaɣaɣ lɛ, ɖoó yu-wɛ ɖoli nɔɔyʋ nʋmɔʋ taa nɛ pasʋʋ peeye. Se, pɛhɛɖɩ po-kutokiŋ nɔsɩ lɛ, paa weyi ɛmaɣnɩ liidiye ndɩ ɛɛhɛyaa yɔ, e-kutoku nɔɔ. Se, ḿba kpɛndɩnɩ-ɖɩ ɖeyi ɖeyi nɛ powona. 22 Se, ḿba ɖɔkɩ ɖɔɖɔ liidiye lɛɛɖɛ se payakɩnɩ tɔɔnaɣ. Ɛlɛ, paasɩŋ se, anɩ ñaapɩsɩnɩ liidiye nɖɩ nɛ ɛɖʋ po-kutokiŋ taa? 23 Peeye ɛ́lɛ cosi-wɛ se, pa-laŋa ɛhɛɛ, sɔɔndʋ ɛtaakpa-wɛ nɛ pʋyʋ. Se, Ɛsɔ weyi pa nɛ pa-caa poluŋʋʋ ɛ-tɛɛ yɔ, ɛnʋ ɖʋnɩ liidiye nɖɩɩ po-kutokiŋ taa. Piyele pe-liidiye nɖɩ paayabɩnɩ tɔɔnaɣ yɔ, ɛnʋ mʋ-ɖɩ.
Pʋwayɩ lɛ, Yoosɛɛfʋ tʋmlaɖaa ñʋʋdʋ ɛnʋ, eyele palɩzɩ Siimeyɔɔ saɖɩka taa. 24 Ɖɩnɛɛ ɛkpaɣ-wɛ nɛ ɛsʋnɩ Yoosɛɛfʋ tɛ nɛ ɛha-wɛ lɩm se, pɔkɔ pa-nɩŋgbanzɩ nɛ ɛtɛ ɛɖʋ pa-kpaŋasɩ tɔɔnaɣ. 25 Pɛtɛma lɛ, pɔñɔɔzɩ pa-kʋjɔŋ weyi powonaa yɔ, nɛ paɖaŋnɩ Yoosɛɛfʋ wɩsɩdaa se, ewoba lɛ, pɛcɛlɩ-ɩ. Mbʋ pʋyɔɔ yɔ, peheyi-wɛ se, pa nɛ ɩ pɔtɔkɩnɩ tɔɔnaɣ wɩsɩdaa. 26 Yoosɛɛfʋ tɩtalaa nɛ ɛsʋʋ lɛ, pɛcɛlɩ-ɩ pa-kʋjɔŋ nɛ poluŋ ɛ-tɛɛ nɛ papa pɛ-ɛza nɛ tɛtʋ. 27 Peeye ɛpɔzɩ-wɛ se, pɛwɛ alaafɩya? Se, pa-caa akpadɩyʋ weyi peheyi-i ɛ-tɔm yɔ, ɛwɛ alaafɩya? Ɛ nɛ ɛ-ɛza hantɛnɩ sɔnɔ? 28 Paba cosi se, ɛ-tʋmlaɖʋ, ḿba caa, wɛ wezuu nɛ alaafɩya. Pocosi-i ḿbʋ lɛ, patasɩ luŋuu nɛ papa pɛ-ɛza nɛ tɛtʋ. 29 Yoosɛɛfʋ kʋsɩ ɛ-ɛza lɛ, ɛna e-neu Bineyaamiini, ɛ nɛ ɩ po-ɖoo kʋɖʋm. Peeye ɛpɔzɩ-wɛ se, ye ḿbʋ, pa-tɩnʋʋ ŋgʋ pɔyɔɔdɩ kʋ-tɔm yɔ́ɔ lɛ? Ɖɩnɛɛ ɛya ɛ́lɛ se, ɛ-pɩyalʋ nɛ ɛtɔ se, Ɛsɔ ɛ́wazɩ ɛ-yɔɔ.
30 Yoosɛɛfʋ na e-neu ḿbʋ lɛ, pɩɖɩɣzɩ-ɩ yem ɖɩɣ ɖɩɣ nɛ ɛ-ɛzɩtɛɣlɩm kilimi. Peeye ɛtɩlɩwa nɛ ɛcaŋnɩ ɛ-ɖaŋ taa se ewili. 31 Ɛtɛm wiluu lɛ, ɛkɔ ɛ-ɛza lɩm nɛ ɛpɩsɩ pɔ-cɔlɔ. Ɛɖɔkɩ ɛ-tɩ nɛ ɛtɔ se, patayɩ tɔɔnaɣ. 32 Paasɩ Yoosɛɛfʋ nɛ nɖeke, ɛ-ɖalaa nɛ e-neu nɛ nɖeke, nɛ Ejipiti ñɩma mba paya-wɛ yɔ nɛ pe-nɖeke ɖɔɖɔ. Mbʋ pʋyɔɔ yɔ, Ejipiti ñɩma ɛsɔdɛɛluŋuu paɣtʋ taaha-wɛ nʋmɔʋ se, pa nɛ Ebiree ñɩma pɛkpɛndɩ pɔtɔɔ e. Se, palabɩ mbʋʋ yɔ, pɩkɛnɩ-wɛ kigiluu pʋyʋ. 33 Paasɩ Yoosɛɛfʋ ɖalaa nɛ e-neu ɛ-ɛsɩndaa. Pacaɣzɩ-wɛ sʋsɔtʋ yɔɔ, kpaɣ kajalaɣ tʋ piwolo pɩsɩnɩ tɩnʋʋ. Pazɩ-wɛ ḿbʋ lɛ, pɩɖɩɣzɩ-wɛ yem ɖɩɣ ɖɩɣ nɛ pɛwɛɛ pacaɣ ɖama ɛsɩndaa ɛza. 34 Pʋwayɩ lɛ, Yoosɛɛfʋ yele nɛ paɖʋ-wɛ tɔɔnaɣ ŋga kaawɛ ɛ-cɔlɔ yɔ. Ɛlɛ, eeyeba nɛ paɖʋ Bineyaamiini nɛ pɩkɩlɩ ɛ-ɖalaa ñɩŋga tɔm kagbaanzɩ, nɛ pa nɛ ɩ pɔñɔɔ sʋlʋm nɛ pɩtalɩ-wɛ.