42
Yaakɔɔbʋ tiyuu ɛ-pɩyalaa Ejipiti yɔ
1 Pɩlakaɣ ḿbʋ lɛ, nakʋyʋ wiye Yaakɔɔbʋ nɩɩ se, tɔɔnaɣ wɛ Ejipiti. Peeye ɛpɔzɩ ɛ-pɩyalaa se, pɩlabɩ ɛzɩma nɛ pacaɣ paɖʋ pe-nesi poyo taa nɛ pɔcɔŋnɩ ɖama ḿbʋ? 2 Se, ɛnʋ nɩwa se, tɔɔnaɣ wɛ Ejipiti nɛ pɛpɛdɩɣ. Se, pówolo peeye nɛ payabɩ-wɛ-kɛ nɛ ḿba ɛtaasɩ ñɔɔsɩ. 3 Peeye Yoosɛɛfʋ ɖalaa kʋyɩ Kanaanɩ , pe-hiu se, powoki Ejipiti nɛ paya tɔɔnaɣ. 4 Ɛlɛ, Yaakɔɔbʋ taayele se, Yoosɛɛfʋ neu Bineyaamiini, ɛtɩŋ-wɛ, mbʋ pʋyɔɔ yɔ, ɛmaɣzaɣ se, ɛzaɣtʋ natʋyʋ ɛtaatalɩ ɛ́lɛ. 5 Mbʋʋ Yaakɔɔbʋ pɩyalaa kʋyaa nɛ powolo Ejipiti. Patalɩ alɩwaatʋ ndʋ lɛlaa katalaa se, payakɩ tɔɔnaɣ yɔ. Toovenim lɛ, ñɔɔsɩ kɛwɛ Kanaanɩ ɛjaɖɛ tɩŋa.
Yoosɛɛfʋ nɛ ɛ-ɖalaa pacalʋʋ ɖama katʋʋ yɔ
6 Yoosɛɛfʋ cɔŋaɣnɩnɩ Ejipiti ɛjaɖɛ ñɩm yɔɔ. Ɛnʋ pɛdaɣnɩnɩ ɛyaa tɩŋa tɔɔnaɣ. Ɛ-ɖalaa kɔma patala lɛ, poluŋ ɛ-tɛɛ nɛ papa pɛ-ɛza nɛ tɛtʋ. 7 Ɛtɩna-wɛ lɛ, ɛsɩm-wɛ, ɛlɛ, eteyele se paba ɛsɩm-ɩ. Peeye eholini-wɛ se, palɩnɩ le? Paba cosi-i se, ḿba lɩnɩ ɛjaɖɛ ndɩ payaɣ se Kanaanɩ yɔ, ɖɩ-taa. Se, ḿba ñɩnɩɣ se paya tɔɔnaɣ.
8 Mbʋʋ Yoosɛɛfʋ sɩm ɛ-ɖalaa, ɛlɛ, paba tapɩzɩ pasɩm-ɩ. 9 Ɛsɩm-wɛ ḿbʋ lɛ, ɛtɔzɩ ɖoze wena eeɖozi pɔ-yɔɔ yɔ, a-yɔɔ, nɛ eheyi-wɛ se, pɛkɛ cɔŋɩyaa. Powobi mɛsaɣ tɛɛ se, pana ɖenɖe ɖenɖe ḿba ɛjaɖɛ wɛ ɛjandʋ yɔ. 10 Peeye paya-ɩ se, Caa! Nɛ pɔtɔ se, ḿba tɛkɛ cɔŋɩyaa, se, ḿba kɛ ɛ-tʋmlaɖaa, powoba se paya tɔɔnaɣ. 11 Se, ḿba tɛkɛ cɔŋɩyaa, ɛlɛ, ḿba kɛ ɛyaa kɩbama. Abalʋ kʋɖʋm pɩyalaa ḿba kɛnaa. 12 Yoosɛɛfʋ kitini-wɛ se aayɩ, pɩtɛkɛ ḿbʋ! Se, pɛkɛ cɔŋɩyaa, powobi mɛsaɣ tɛɛ se, pana ɖenɖe ɖenɖe ḿba ɛjaɖɛ wɛ ɛjandʋ yɔ. 13 Peeye paba cosi-i se, mbaa ɛ-tʋmlaɖaa lɛ, pɛkɛ abalʋ kʋɖʋm pɩyalaa. Palʋlɩ mbaa ɛyaa hiu nɛ naalɛ, pa-caa kɛ Kanaanɩ tʋ. Se, ḿba tɩnʋʋ wɛ pa-caa cɔlɔ, ɛlɛ, ḿba taa lɛlʋ fɛyɩ. 14 Yoosɛɛfʋ kitini-wɛ se, mbʋʋ ɛnʋ keheyi-wɛ se pɛkɛ cɔŋɩyaa! 15 Se, ɛnʋ maɣzɩɣ-wɛ nɛ ɛna se toovenim pɔyɔɔdʋʋ yaa we? Se, ɛnʋ ɖuuni Faraawɔɔ se, ye pa-tɩnʋʋ etowolo yɔ, paakaɣ lɩʋ peeye! 16 Se, lɛlaa ɛwɛɛ saɖɩka taa mbʋ, nɛ petiyi pa-taa nɔɔyʋ nɛ ewolo ɛñɩnɩ-ɩ nɛ ewona. Mbʋʋ ɛnʋ pɩzɩɣ ɛnanɩ se toovenim peheyi-i. Pɩtɛkɛ mbʋʋ yɔ, ɛnʋ ɖuuni Faraawɔɔ se, pɛkɛ cɔŋɩyaa toovenim.
17 Peeye Yoosɛɛfʋ ɖʋ patɩŋa payɩ saɖɩka kɩyakɩŋ naadozo. 18 Kɩyakʋ naadozo ñɩŋgʋ wiye lɛ, Yoosɛɛfʋ heyi-wɛ se, ɛnʋ ñaŋ Ɛsɔ, se, pána ḿbʋ eheyiɣ-wɛ se pala nɛ pɛwɛɛ wezuu yɔ. 19 Se, ye pɛkɛ toovenim tɩnaa yɔ, petisi nɛ pa-taa nɔɔyʋ caɣ saɖɩka taa peeye nɛ pɩkazɩ lɛlaa woni pa-ñɩma ḿba ñɔɔsɩ kʋʋ-wɛ yɔ tɔɔnaɣ. 20 Se, Pʋwayɩ lɛ, paakpɛndɩnɩ pe-neu cikpelu nɛ powoni ɛnʋ. Ḿbʋ wɩlɩɣnɩ-ɩ se pɔyɔɔdɩ toovenim, pʋbʋ, paatɛŋɛlɩɣ. Ɛ-ɖalaa tisi tɔm ndʋ. 21 Ɛlɛ, pɔyɔɔdʋʋ pa-taa pe-ɖeke se, aɣhaɣaɣ, paa pɩɩla ɛsɩna, pe-neu weyi paanazɩ-ɩ yɔ, ɛ-kɩmɩyɛ pakpaɣ-wɛ ḿbʋ. Se, alɩwaatʋ ndʋ ḿba nazaɣ-ɩ yɔ, eetendi ḿba se peyebi-i nɛ ḿba tanɩnɩ-ɩ. Pʋ-yɔɔ ḿba sʋ kʋñɔŋ ŋ́gʋ kɩ-taa ḿbʋ. 22 Peeye pa-taa sɔsɔ Ruubɛɛnɩ kitini-wɛ se, ɛnʋ taaheyi-wɛ se pataala Yoosɛɛfʋ mbʋ pɩfɛyɩ ɖeu yɔ, nɛ petewelisini ɛnʋ yaa we? Too! Lɛɛlɛɛyɔ, ɛ-sɩm kɩmɩyɛ pakpaɣ ḿba. 23 Pɔyɔɔdaɣ ḿbʋ lɛ, patana se Yoosɛɛfʋ nɩɣaɣ. Mbʋ pʋyɔɔ yɔ, ɛ́lɛ yɔɔdaɣ nɛ nɔɔyʋ ñɛɖɛzɩɣ-wɛ. 24 Yoosɛɛfʋ nɩ pɔyɔɔdaɣ ḿbʋ lɛ, eposini-wɛ nɛ ewili.
Yaakɔɔbʋ pɩyalaa pɩsʋʋ Kanaanɩ yɔ
Yoosɛɛfʋ tɛm wiluu nɛ ɛpɩsɩ pɔ-cɔlɔ lɛ, eheyi-wɛ se, ɛnʋ kpaɣ pa-taa nɔɔyʋ nɛ ɛsɩɩ. Peeye ɛkpa Siimeyɔɔ nɛ eyele nɛ pɔhɔkɩ ɛ́lɛ pɛ-ɛsɩndaa. 25 Pʋwayɩ lɛ, Yoosɛɛfʋ paɣ ɛ-tʋmlaɖaa se, paɖʋ ɛyaa ḿba po-wondu taa tɔɔnaɣ sakɩyɛ. Ɛtɔm ɖɔɖɔ se, pekitini paa weyi e-liidiye nɛ paɖʋ e-kutoku taa nɛ pɛcɛlɩ-wɛ pa-nʋmɔʋ tɔɔnaɣ, nɛ paba labɩ-wɛ ḿbʋ ɖɔɖɔ. 26 Peeye paa weyi ɛkpaɣ e-wondu nɛ ɛhɔkɩ ɛ-kpaŋaɣ yɔɔ nɛ pakpaɣ nʋmɔʋ nɛ pɛɖɛɛ.
27 Pɔkɔma patalɩ ɖoli nɔɔyʋ lɛ, ɖoó yuwa nɛ pasɩŋ se poɖou. Peeye pa-taa lɛlʋ yɛɖɩ e-kutoku nɔɔ se, ɛɖʋʋ ɛ-kpaŋaɣ tɔɔnaɣ, nɛ ɛnaɣ e-liidiye tɩŋa kutoku taa tɔɔnaɣ yɔɔ. 28 Ɖɩnɛɛ eheyi ɛ-taabalaa se, pekitini ɛnʋ liidiye! Nɖɩɩ lɛ ɛnʋ kutoku taa! Peeye pɩlabɩ-wɛ yaa nɛ sɔɔndʋ kpa-wɛ, nɛ pɔpɔzʋʋ dama se, ɛzɩ ɛbɛ Ɛsɔ labɩ mbaa ḿbʋ?
29 Pɔkɔma patalɩ pa-caa Yaakɔɔbʋ cɔlɔ Kanaanɩ lɛ, pɛkɛdɩ ɛ́lɛ mbʋ pɩɩtalɩ-wɛ yɔ pɩtɩŋa payɩ. 30 Pɔtɔm se, abalʋ weyi ɛcɔŋnɩ Ejipiti ɛjaɖɛ yɔɔ yɔ, eholini ḿba, nɛ ɛkpaɣ-wɛ ɛzɩ pɛkɛ cɔŋɩyaa yɔ. 31 Se, ḿba cosi-i se, ḿba tɛkɛ cɔŋɩyaa, se, ḿba kɛ ɛyaa toovenim tɩnaa. 32 Se, ḿba wɛ abalɩbiya hiu nɛ naalɛ (12), ḿba caa kʋɖʋm. Ɛlɛ, ḿba taa lɛlʋ fɛyɩ, ḿba tɩnʋʋ wɛ pa-caa cɔlɔ Kanaanɩ tɛtʋ taa. 33 Se, pɔyɔɔdɩ ḿbʋ lɛ, abalʋ ɛnʋ eheyi ḿba se, ɛnʋ caɣ se ɛñɩnɩ nɛ ɛna se toovenim lɛ, ḿba kɛ ɛyaa toovenim tɩnaa naa we? Se, ḿba eyele ḿba taa kʋɖʋm peeye nɛ pɩkazɩ lɛlaa kpaɣ tɔɔnaɣ nɛ powoni pa-ñɩma mba ñɔɔsɩ kʋʋ-wɛ yɔ. 34 Se, pʋwayɩ lɛ, ḿba ɛkpɛndɩnɩ ḿba neu tɩnʋʋ nɛ powoni ɛnʋ. Mbʋʋ ɛnʋ naɣna se, pɛtɛkɛ cɔŋɩyaa, ɛlɛ, toovenim tɩnaa pɛkɛnaa. Pʋbʋ, ɛnʋ cɛlɩɣ-wɛ Siimeyɔɔ nɛ ɛha-wɛ waɖɛ nɛ pɔcɔɔ ɛjaɖɛ taa nɛ pala mbʋ pe-liu wɛɛ yɔ.
35 Pɛtɛm-ɩ kɛdʋʋ ḿbʋ lɛ, pohuti tɔɔnaɣ ŋga kaawɛ po-kutokiŋ taa yɔ. Pohuti-kɛ lɛ, paa anɩ ɛmaɣnɩ ɛ-ñɩŋgʋ taa huyuu nɛ ki-liidiye. Pana liidiye nɖɩɩ ḿbʋ lɛ, sɔɔndʋ kpa-wɛ, nɛ halɩ pɩkpɛndɩnɩ pa-caa Yaakɔɔbʋ. 36 Peeye ɛ́lɛ kitini-wɛ se, ŋgʋ peyeba nɛ ɛnʋ lesi e-piya naalɛ. Yoosɛɛfʋ fɛyɩ! Siimeyɔɔ ñɛfɛyɩ! Lɛɛlɛɛyɔ, pacaɣ se, pakpaɣ Bineyaamiini, ɛnʋ ñʋʋ taa pɩtɩŋa payɩ pɩtɛŋ. 37 Ɖɩnɛɛ Ruubɛɛnɩ heyi-i se, ye ɛnʋ etowoni-i Bineyaamiini yɔ, ɛ́kʋ ɛnʋ pɩyalaa naalɛ mba ɛnʋ wɛna yɔ. Se, pʋ-yɔɔ lɛ, ɛ́kpaɣ ɛ́lɛ nɛ ɛɖʋzɩ ɛnʋ nesi taa, ɛnʋ pɩsɩɣnɩ-ɩ ɛ́lɛ. 38 Yaakɔɔbʋ pɩsɩna se, pɩlɩ! Ɛnʋ pɩyalʋ fɛyɩ se ɛtɩŋɩɣ-wɛ. Ɛnaɣʋ ɛzɩnɔɔ yɔ, ɛ-ɖalʋ sɩba. E-ɖeke koŋ pɩkazɩ ɛnʋ. Ye pa nɛ ɩ pɛɖɛɣ nɛ nabʋyʋ labɩ-ɩ nʋmɔʋ taa yɔ, pʋbʋ, peyeki nɛ ɛnʋ tii hadɛtɩyɛdaa nɛ laŋpɩsɩyɛ ɛ-akpatɩyɩtʋ ndʋ tɩ-taa.