41
Wiyaʋ Faraawɔɔ ɖoze tɔm
1 Pɩkɔma pɩla pɩnzɩ naalɛ lɛ, Faraawɔɔ ɖozi ɖoó naayɛ taa se, ɛnʋ kasɩŋ pɔɔ ŋga payaɣ se Niili yɔ, kɔ-nɔɔ. 2 Pɩkɛdaa lɛ, ɛna naŋ halɩñɩŋ nɩɩyɩ. Ɛwɛ lʋbɛ (7), ɛlɩnɩ pɔɔ taa nɛ ɛtɔkɩ ñɩtʋ kpaʋ yɔɔ. Naŋ ɛnʋ, ɛpaɣlaa nɛ ɛwɛɛ num nɛ ɛtɛ ɛwɛɛ kɔcɔka. 3 Pʋwayɩ lɛ, ɛna ɖɔɖɔ naŋ halɩñɩŋ lɛɛŋ lʋbɛ (7). Ɛ́lɛ lɩnɩ ka-taa ɖɔɖɔ nɛ ewolo ɛsɩŋ kajalaɣ ñɩŋ cɔlɔ. Ɛwɩlɩ kpɔŋgɔzɔɔ kpɔŋgɔzɔɔ, ŋna-ɩ yɔ, ɛfɛyɩ tɔɔʋ. 4 Kpaagbaa ḿbʋ lɛ, naŋ weyi ɛwɩlɩ kpɔŋgɔzɔɔ kpɔŋgɔzɔɔ yɔ, ɛkpa weyi ɛwɛ kɔcɔka yɔ, nɛ ɛtɔɔ. Peeye wiyaʋ Faraawɔɔ fema.
5 Pʋwayɩ lɛ, wiyaʋ tasɩ hɛnʋʋ nɛ ɛtasɩ ɖozuu se, ɛna tɔɔnaɣ ŋga payaɣ se bilee yɔ, kɔ-lɔtʋ lʋbɛ (7), ɖaʋ kʋɖʋmʋʋ yɔɔ. Lɔtʋ ndʋ tikpeetaa nɛ tɩtɛ tɩwɛɛ kɔcɔka. 6 Lɔtʋ kɔcɔka ñɩndʋ ndʋ, tɩ-lʋbɛ (7) wayɩ lɛ, lɛɛtʋ lʋbɛ ñalɩɩ ɖɔɖɔ. Tʋtʋ tekpeeti, ŋna-tʋ yɔ, tɩfɛyɩ tɔɔʋ, mbʋ pʋyɔɔ yɔ, wɩsɩ heɣlim lɩwa nɛ tɩwɩlɩ. 7 Ɖɩnɛɛ lɔtʋ ndʋ titekpeeti yɔ, tilibi ndʋ tikpeetaa yɔ. Peeye wiyaʋ Faraawɔɔ fema nɛ ɛna se, ñazɩ eɖozuu kuɖozu.
8 Tɛʋ fema lɛ, piliɣtiɣ Faraawɔɔ, nɛ etiyi payaa Ejipiti nayaa tɩŋa nɛ lɔŋsɩnɖaa tɩŋa. Paba woba lɛ, ɛkɛdɩ-wɛ mbʋ eɖozaa yɔ pɩtɩŋa payɩ, ɛlɛ, nɔɔyʋ tapɩzɩ ɛlɩzɩ-ɩ pʋ-tɔbʋʋ. 9 Peeye mba pɛcɛlɩɣ wiyaʋ sʋlʋm yɔ, pa-ñʋʋdʋ kɛzɩ ɛ-tɩ nɛ Faraawɔɔ yɔɔ nɛ ɛyɔɔdɩnɩ-ɩ. Ɛya-ɩ se, Caa! Nɛ ɛtɔ se, pʋwɛɛ se ɛnʋ eheyi-i ɛnʋ kɩwɛɛkɩm. 10 Se, nakʋyʋ wiye ɛnʋʋ pa-Caa ɛ-pana kakpanɩ mbaa ɛ-tʋmlaɖaa nɛ eyele pakpa ḿba nɛ pɛcɛlɩ saɖɩka yɔɔ cɔnɩyʋ nɛ ɛɖʋ mbaa saɖɩka. 11 Se, doó naayɛ taa lɛ, ḿba naalɛ poɖozi. Paa ɖoziye nɖɩ nɛ ɖɩ-tɔbʋʋ. 12 Paaɖɩɣ pa nɛ Ebiree evebu nɔɔyʋ Saɖɩka taa peeye. Ɛɛkɛ wiyaʋ ɖɩɣa yɔɔ ɖaŋɩyaa ñʋʋdʋ yoḿ. Ḿba kɛdɩ-ɩ po-ɖoze lɛ, ɛlɩzɩ paa weyi e-ɖoziye tɔbʋʋ. 13 Toovenim lɛ, pɩtɩŋa payɩ pɩla ɖeyi ɖeyi ɛzɩ ɛ́lɛ keheyuu-wɛ yɔ. Papɩsɩnɩ ɛnʋʋ ɛnʋ tʋmɩyɛ taa nɛ piyele, paɖɩ tɔɔnaɣ yɔɔ cɔnɩyaa ñʋʋdʋ liu tɛɛ nimiye nɛ popuzini ɖaʋ.
Yoosɛɛfʋ lɩzʋʋ Faraawɔɔ ɖoze tɔbʋʋ yɔ
14 Ɛyɔɔdɩ ḿbʋ lɛ, Faraawɔɔ ha nɔɔ se, powolo pañɩnɩ-ɩ nɛ powona. Peeye ɛ-tʋmlaɖaa sewa nɛ powolo patɩlɩzɩ-ɩ saɖɩka taa nɛ pahʋm-ɩ nɛ ɛlɛɣzɩ wondu nɛ ewolo Faraawɔɔ cɔlɔ. 15 Yoosɛɛfʋ woba lɛ, Faraawɔɔ heyi-i se, ɛnʋ ɖozi ɖoziye naɖɩyɛ nɛ nɔɔyʋ tapɩzɩ ɛlɩzɩ ɛnʋʋ ɖɩ-tɔbʋʋ. Se, ɛlɛ, ɛnʋ nɩwa se, ye pɛkɛdɩ-ɩ ɖoze naayɛ yɔ, ɛpɩzɩɣ ɛlɩzɩ a-tɔbʋʋ. 16 Yoosɛɛfʋ ñeheyi-i se, pɩtɛkɛ ɛnʋ lɩzɩɣnɩ ɖoze tɔbʋʋ. Se, Ɛsɔ pɩzɩɣna ɛlɩzɩ-ɩ e-ɖoze tɔbʋʋ ɖeyiɖeyi nɛ e-liu sɩ. 17 Peeye Faraawɔɔ heyi-i se, ɛnʋ ɖozaa se, ɛnʋ kasɩŋ Niili pɔɔ nɔɔ. 18 Pɩkɛdaa lɛ, ɛnʋ naɣ naŋ halɩñɩŋ nɩɩyɩ. Ɛwɛ lʋbɛ (7) ɛlɩnɩ pɔɔ taa nɛ ɛtɔkɩ ñɩtʋ kpaʋ yɔɔ. Naŋ ɛnʋ, ɛpaɣlaa, ɛwɛɛ num nɛ ɛtɛ ɛwɛɛ kɔcɔka. 19 Pʋwayɩ lɛ, ɛna ɖɔɖɔ naŋ halɩñɩŋ lɛɛŋ lʋbɛ (07). Ɛ́lɛ lɩnɩ ka-taa ɖɔɖɔ nɛ ewolo ɛsɩŋ kajalaɣ ñɩŋ cɔlɔ. Ɛwɩlɩ kpɔŋgɔzɔɔ kpɔŋgɔzɔɔ, ŋna-ɩ yɔ, ɛfɛyɩ tɔɔʋ. Toovenim lɛ, wiɖiye ɛtana naŋ ɛnʋ ɛ-ɖaɣʋ Ejipiti ɛjaɖɛ taa kaʋ. 20 Kpaagbaa ḿbʋ lɛ, naŋ weyi ɛwɩlɩ kpɔŋgɔzɔɔ kpɔŋgɔzɔɔ yɔ, ɛkpa weyi ɛwɛ kɔcɔka yɔ, nɛ ɛtɔɔ. 21 Paa mbʋʋ yɔ, ɛwɩlɩ mbʋ ɛzɩ ɛɛwɛʋ yɔ, ɛtɛlɛɣzɩ wɛtʋ. Peeye ɛnʋ fema. 22 Se, pʋwayɩ lɛ, ɛnʋ ɖaɣnɩ hɛnʋʋ nɛ ɛtasɩ ɖozuu se, ɛna tɔɔnaɣ ŋga payaɣ se bilee yɔ, kɔ-lɔtʋ lʋbɛ (7), ɖaʋ kʋɖʋmʋʋ yɔɔ. Lɔtʋ ndʋ tikpeetaa nɛ tɩtɛ tɩwɛɛ kɔcɔka. 23 Lɔtʋ kɔcɔka ñɩndʋ ńdʋ, tɩ-lʋbɛ wayɩ lɛ, lɛɛtʋ lʋbɛ ñalɩɩ ɖɔɖɔ. Tʋtʋ tekpeedi, ŋna-tʋ yɔ, tɩfɛyɩ tɔɔʋ, mbʋ pʋyɔɔ yɔ, wɩsɩ heɣlim lɩwa nɛ tɩwɩlɩ. 24 Ɖɩnɛɛ lɔtʋ ndʋ titekpeedi yɔ, tilibi ndʋ tikpeedaa yɔ. Se, ɛnʋ kɛdɩ nayaa nɛ lɔŋsɩnɖaa, mbʋ pɩtɩŋa payɩ ɛnʋ ɖozaa yɔ. Ɛlɛ, nɔɔyʋ tapɩzɩ ɛlɩzɩ-ɩ pʋ-tɔbʋʋ.
25 Faraawɔɔ heyi Yoosɛɛfʋ ḿbʋ lɛ, ɛ́lɛ yaa-ɩ se, Caa! Nɛ eheyi-i se, e-ɖoze ana a-naalɛ, a-tɔbʋʋ kʋɖʋmʋʋ. Se, Ɛsɔ wɛɛ nɛ ɛlɩzɩɣ mbʋ ɛ́lɛ caɣ labʋ yɔ nɛ ɛwɩlɩɣ-ɩ. 26 Peeye ɛtɔm se, naŋ halɩñɩŋ weyi ekpeetaa yɔ, ɛ-lʋbɛ (7) nɛ lɔtʋ ndʋ tikpeetaa yɔ, tɩ-lʋbɛ pɛkɛ pɩnzɩ lʋbɛ. Toovenim lɛ, ɖoze ana a-naalɛ, akɛ ɖoziye kʋɖʋmɖɩyɛ. 27 Ɖɔɖɔ lɛ, naŋ halɩñɩŋ lʋbɛ (7) weyi ɛwɩlɩ kpɔŋgɔsɔɔ kpɔŋgɔsɔɔ nɛ ɛfɛyɩ kɔcɔka yɔ, nɛ lɔtʋ lʋbɛ ndʋ titekpeeti, nɛ heelim lɩwa nɛ tɩwɩlɩ yɔ, pɛkɛ ɖɔɖɔ pɩnzɩ lʋbɛ. Ɛlɛ, sɩkɛɣ ñɔɔsɩ ñɩnzɩ. 28 Se, ndʋʋ ɛnʋ heyaɣ-ɩ se, Ɛsɔ wɛɛ nɛ ɛlɩzɩɣ mbʋ ɛ́lɛ caɣ labʋ yɔ nɛ ɛwɩlɩɣ-ɩ. 29 Se, pɩnzɩ lʋbɛ (7) nzɩ sɩkɔŋ yɔ, tɔɔnaɣ lakɩ Ejipiti ɛjaɖɛ tɩŋa taa siŋŋ. 30 Se, sɩ-wayɩ lɛ, pɩnzɩ lɛɛsɩ lʋbɛ (7) ñɔkɔŋ ɖɔɖɔ. Sɩsɩ ñɛkɛɣ ñɔɔsɩ ñɩnzɩ. Se, ñɔɔsɩ ńzɩ siyeki nɛ ɛjaɖɛ taa ñɩma wɛɛ tanɩm taa nɛ halɩ pɔsɔɔ alɩwaatʋ ndʋ tɔɔnaɣ kɛwɛ sakɩyɛ yɔ tɩ-yɔɔ. 31 Se, ñɔɔsɩ ńzɩ, sɩkpaɣ ɖoŋ siŋŋ nɛ ɛyaa sɔɔ se, tɔɔnaɣ kalabɩ sakɩyɛ ɛjaɖɛ taa. 32 Se, ye wiyaʋ eɖozi ɖoze naalɛ nɛ a-tɔbʋʋ kɛ kʋɖʋmʋʋ yɔ, pɩwɩlɩɣ se, Ɛsɔ ɖʋna se ɛlakɩ mbʋ wiyaʋ ɖozaa yɔ. Piileɖiɣ nɛ pɩcɔ ɛlabɩ-pʋ . 33 Se, pʋ-yɔɔ lɛ, pɩwɛɛ se, Faraawɔɔ ɛñɩnɩ ɛyʋ weyi ɛwɛ lɛɣtʋ nɛ ɛtɛ ɛwɛɛ lɔŋ yɔ nɛ ɛha-ɩ waɖɛ se, ɛcɔnɩ Ejipiti ɛjaɖɛ yɔɔ. 34 Se, pɩwɛɛ se, wiyaʋ ɛñɩnɩ ɖɔɖɔ nabɛyɛ nɛ paba la tʋmɩyɛ pɩnzɩ lʋbɛ (7) nzɩ tɔɔnaɣ lakɩ siŋŋ yɔ sɩ-taa. Pa-tʋmɩyɛ lɛ se, patayɩ tɔɔnaɣ ŋga pakʋŋ ɛjaɖɛ taa pɩnzɩ nzɩ sɩ-taa yɔ, tɔm kagbaanzɩ nɛ pakpaɣ hɔɔlʋʋ kʋɖʋmʋʋ nɛ pɛmɛzɩ. 35 Se, pékpeɣli tɔɔnasɩ nzɩ pɛmɛsɩɣ pɩnzɩ lʋbɛ nzɩ sɩkɔŋ yɔ sɩ-taa yɔ, nɛ pasɩɩ-kɛ wiyaʋ Faraawɔɔ hɩɖɛ taa, e-kpoŋ taa tɛtʋ tɩŋa taa. 36 Se, palakɩ ḿbʋ se, Ejipiti samaɣ ɛwɛnɩ tɔɔnaɣ nɛ kataaŋɛlɩ pɩnzɩ lʋbɛ (7) nzɩ tɔɔnaɣ ɛɛlakɩ yɔ sɩ-taa.
Yoosɛɛfʋ pɩsʋʋ Ejipiti komina ñʋʋdʋ yɔ
37 Yoosɛɛfʋ yɔɔdɩ ḿbʋ lɛ, pɩkɛdɩnɩ Faraawɔɔ nɛ ɛ-cɔlɔ tʋmlaɖaa tɩŋa. 38 Peeye Faraawɔɔ heyi tʋmlaɖaa ḿba se, Ɛsɔ Kalɩzaɣ suni ɛyʋ ɛnʋ ɖó. Nɛ ɛpɔzɩ-wɛ se, ḿba pɩzɩɣ pana nɔɔyʋ ɛzɩ ɛ́lɛ yɔ yaa we? 39 Pʋwayɩ lɛ, eheyi Yoosɛɛfʋ se, Ɛsɔ wɩlɩnɩ-ɩ pɩtɩŋa ḿbʋ. Se, nɔɔyʋ ɛɛpɩzɩɣ ɛwɛɛ lɛɣtʋ nɛ lɔŋ ɖɔɖɔ ɛzɩ ɛnʋ yɔ. 40 Ye ḿbʋ, ɛnʋʋ Yoosɛɛfʋ ɛkɛɣnɩ ɛnʋ ɛjaɖɛ komina ñʋʋdʋ. Se, ɛnʋ samaɣ tɩŋa ɖɔŋ ɛnʋʋ Yoosɛɛfʋ ɛ-paɣtʋ tɩŋa yɔɔ. Se, ɛnʋʋ Faraawɔɔ lɛ, e-kewiyaɣ ɖeke ɛnʋ kɩlɩnɩ-ɩ. 41 Ɖɩnɛɛ Faraawɔɔ heyi Yoosɛɛfʋ se, ɛ́na, ɛnʋ haɣ-ɩ waɖɛ se ɛcɔnɩ Ejipiti ɛjaɖɛ tɩŋa yɔɔ. 42 Ɛyɔɔdɩ ḿbʋ lɛ, ɛlɩzɩ e-niye yɔɔ kokoye nɖɩ ɛñɩkɩɣnɩ nesi yɔ, nɛ ɛlɛɛ Yoosɛɛfʋ ñɩnɖɛ yɔɔ. Eyeba ɖɔɖɔ nɛ posuu ɛ́lɛ ñɩɣlɩm wondu nɛ ɛlɛɛ ɛ́lɛ liu tɛɛ sika lɩyʋʋ. 43 Pʋwayɩ lɛ, eyele nɛ pakpaɣ-ɩ you lɔɔɖɩyɛ nɖɩ kpaŋnaŋ hɔŋ yɔ ɖɩ-taa. Pɔñɔɔzɩ-ɖɩ nɛ pasɩɩ ɛ-tʋmlaɖʋ weyi ɛkɩla-ɩ ñɔtɩnaʋ yɔ. Pakpaɣ-ɩ ḿbʋ lɛ, ɛyaa ɖɛɛ nɔɔ nɛ pokou nɛ pɔtɔŋ se, pɛ́wɛsɩ! pɛ́wɛsɩ! c.
Mbʋʋ Faraawɔɔ ha Yoosɛɛfʋ waɖɛ, Ejipiti ɛjaɖɛ tɩŋa yɔɔ.
44 Pʋbʋ wayɩ lɛ, Faraawɔɔ tasɩ Yoosɛɛfʋ heyuu se, ɛnʋʋ Faraawɔɔ lɛ, Ejipiti ɛjaɖɛ tɩŋa wiyaʋ. Paa mbʋʋ yɔ, pɩfɛyɩ se nɔɔyʋ ɛla pʋyʋ nɛ ɛtɔpɔzɩ ɛnʋʋ Yoosɛɛfʋ nʋmɔʋ. 45 Peeye ɛya Yoosɛɛfʋ Ejipiti hɩɖɛ. Nɖɩ lɛ, Cafɩnaatɩ Paaneyaa d nɛ ɛha-ɩ halʋ. Payaɣ ɛ́lɛ se, Asɩnaatɩ, ɛ́lɛ caa lɛ, Pootiifeeraa a. Ɛ́lɛ kɛnɩ tɛtʋ ndʋ payaɣ se Ɔɔnɩ yɔ, tɩ-taa cɔjɔ. Pʋwayɩ lɛ, Yoosɛɛfʋ cɔɔ Ejipiti ɛjaɖɛ tɩŋa nɛ ɛna. 46 Powoni Yoosɛɛfʋ Ejipiti wiyaʋ Faraawɔɔ cɔlɔ lɛ, ɛɛwɛnɩ pɩnzɩ niidozo (30).
Alɩwaatʋ ndʋ ɛkʋyɩ wiyaʋ Faraawɔɔ cɔlɔ yɔ́ɔ, ɛ́pazɩ Ejipiti ɛjaɖɛ tɩŋa cɔʋ. 47 Pɩnzɩ lʋbɛ (7) nzɩ tɔɔnaɣ lakɩ siŋŋ yɔ, sɩtalaa lɛ, tɔɔnaɣ pazɩ kala ɖɔɖɔ ɛjaɖɛ tɩŋa pɩfɛyɩ yɔɔdʋʋ. 48 Pɩnzɩ nzɩ sɩ-taa lɛ, Yoosɛɛfʋ yele nɛ pekpeɣli Ejipiti ɛjaɖɛ taa tɔɔnasɩ nzɩ sɩkazaa yɔ sɩ-tɩŋa. Pekpeɣli paa tɛtʋ sɔsɔtʋ ndʋ tɩ-taa tɔɔnasɩ nzɩ pakʋm tɛtʋ cikpetu ndʋ tɩcɔ-tʋ nɛ tɩta yɔ, tɩ-taa yɔ. 49 Mbʋʋ Yoosɛɛfʋ yeba nɛ pekpeɣli tɔɔnaɣ ŋga payaɣ se bilee yɔ́ɔ, sakɩyɛ. Kɔɖɔwa pɩfɛyɩ yɔɔdʋʋ ɛzɩ pɔɔ nɔɔ kañɩŋa yɔ, halɩ patapɩzɩɣ se patasɩ-kɛ kalʋʋ.
50 Pʋcɔ nɛ ñɔɔsɩ nzɩ sɩtalɩ lɛ, Yoosɛɛfʋ halʋ Ɔɔnɩ tɛtʋ taa cɔjɔ ɛnʋ ɛ-pɛlɛ Asɩnaatɩ lʋlɩ abalɩbiya naalɛ. 51 Yoosɛɛfʋ ya kajalaɣ ñɩŋga se, Manaasee,b nɛ ɛtɔ se, Ɛsɔ yeba nɛ ɛnʋ sɔɔ ɛ-kʋñɔmɩŋ tɩŋa nɛ ɛ nɛ ɛ-hɔʋ taa ñɩma payasʋʋ ɖama yɔ, pʋ-tɔm. 52 Piyele ɛyaa ɛ́lɛ neu se, Efiraayim c. Se, mbʋ pʋyɔɔ yɔ, Ɛsɔ ha ɛnʋʋ piya, ɛjaɖɛ ńɖɩ ɖɩ-taa ɛnʋ kɛwɛ pʋtɔtɩyɛ taa kpem yɔ.
53 Pɩkɔma lɛ, pɩnzɩ lʋbɛ (7) nzɩ tɔɔnaɣ labɩ siŋŋ yɔ, sɩtɛ Ejipiti ɛjaɖɛ taa. 54 Peeye ñɔɔsɩ ñɩnzɩ lʋbɛ (7) ñapazaa ɛzɩ Yoosɛɛfʋ kɔyɔɔdʋʋ yɔ. Ñɔɔsɩ ńzɩ, sɩkɔɔ sɩtalɩ ajɛɛ tɩŋa payɩ taa, ɛlɛ, Ejipiti ñɩnɖɛ tɩŋa taa tɔɔnaɣ ñaawɛɛ. 55 Pɩkɔma nɛ ñɔɔsɩ pazɩ kʋʋ Ejipiti ɛjaɖɛ tɩŋa taa ñɩma lɛ, powolo pɔpɔzʋʋ Faraawɔɔ se, ḿba ɛtɔɔ we? Peeye ɛ́lɛ heyi-wɛ se, powolo pana Yoosɛɛfʋ nɛ pala ndʋ ɛ́lɛ heyiɣ-wɛ yɔ. 56 Toovenim lɛ, ñɔɔsɩ ńzɩ, sɩɩtalɩ ɛjaɖɛ hɔɔlɩŋ tɩŋa payɩ. Powobi pana Yoosɛɛfʋ lɛ, ɛha nɔɔ se, pókuli tɔɔnaɣ ŋga paamɛsɩ tɛtʋ sɔsɔtʋ sɔsɔtʋ taa yɔ, kɔ-yɔɔ, nɛ pɛpɛdɩnɩ Ejipiti ñɩma. Ŋgʋ ñɔɔsɩ tɛzaɣ kpaʋ ɖoŋ kɩkpaʋ Ejipiti ɛjaɖɛ taa. 57 Ɛyaa lɩaɣnɩ ajɛɛ lɛɛna tɩŋa taa nɛ powoki payakɩ tɔɔnaɣ Yoosɛɛfʋ cɔlɔ, mbʋ pʋyɔɔ yɔ, ñɔɔsɩ kasa miŋ paa le.