40
1-2 Yoosɛɛfʋ wɛ saɖɩka taa ḿbʋ lɛ, nakʋyʋ wiye Ejipiti wiyaʋ sɔsɔ kaɖɩsɩ sɔsɔsɩ naalɛ yʋsɩnɩ wiyaʋ ɛnʋ. Kaɖɩsɩ nzɩ sɩkɛ aleɣna. Lɛɛka kɛ mba pɛcɛlɩɣ wiyaʋ sʋlʋm yɔ, pa-ñʋʋdʋ nɛ lɛɛka kɛ mba palakɩ wiyaʋ tɔɔnaɣ yɔ, paba ñʋʋdʋ. Peeye Faraawɔɔ pana kpanɩ ɛ-aleɣna ana, 3 nɛ ɛkpa-yɛ nɛ ɛɖʋ saɖɩka Yoosɛɛfʋ cɔlɔ, wiyaʋ ɖɩɣa yɔɔ cɔnɩyaa ñʋʋdʋ saɖɩka taa. 4 Paɖɩɣ-yɛ ḿbʋ lɛ, wiyaʋ ɖɩɣa yɔɔ cɔnɩyaa ñʋʋdʋ ɛnʋ ɛkpaɣ-yɛ nɛ ɛɖʋzɩ Yoosɛɛfʋ nesi taa nɛ pɛwɛɛ peeye alɩwaatʋ natʋyʋ nɛ ɛ́lɛ cɔŋnɩ pɔ-yɔɔ.
Yoozɛɛfʋ lɩzʋʋ wiyaʋ saɖɩka tɩnaa naalɛ ɖoze tɔbʋʋ yɔ
5 Ɖoó naayɛ taa lɛ, mba pɛcɛlɩɣ Ejipiti wiyaʋ sʋlʋm yɔ, pa-ñʋʋdʋ nɛ mba paba ñalakɩ-ɩ tɔɔnaɣ yɔ, pa-ñɩnʋ, pa-naalɛ, poɖozi saɖɩka taa peeye. Paa weyi e-ɖoziye nɛ ɖɩ-tɔbʋʋ. 6 Tɛʋ fem tanaŋ tɛɛ nɛ Yoosɛɛfʋ woba se ɛnaɣ-wɛ lɛ, ɛ́maɣnɩ pɛ-ɛza ñɩŋaa. 7 Ɛpɔzɩ-wɛ se, ɛbɛ laba nɛ pɛ-ɛza ñɩŋ pu-wiye nɖɩɩ ḿbʋ? 8 Pocosi-i se, paa pa-taa weyi eɖozi ɖoziye naɖɩyɛ nɛ nɔɔyʋ ɛɛpɩzɩɣ se, ɛlɩzɩ-wɛ a-tɔbʋʋ. Pɔyɔɔdɩ ḿbʋ lɛ, ɛ́lɛ ɛpɔzɩ-wɛ se, pɩtɛkɛ Ɛsɔ lɩzɩɣnɩ ɖoze tɔbɩŋ naa we? Se, péheyi ɛnʋʋ paa weyi eɖoziye.
9 Peeye mba pɛcɛlɩɣ wiyaʋ sʋlʋm yɔ, pa-ñʋʋdʋ kɛdɩ Yoosɛɛfʋ e-ɖoziye. Se, ɛna tɩʋ ŋgʋ popuu ki-pe sʋlʋm yɔ a ɛnʋ ɛsɩndaa. 10 Tɩʋ ŋ́gʋ kɩyɛzɩ pilinzi naadozo (3). Kɩnɛɣdaa nɛ kɩlɩɩ hɛtʋ nɛ kʋlʋlɩ pe nɛ asɛɛ. 11 Alɩwaatʋ ńdʋ lɛ, ɛnʋ kɔɖɔkɩ wiyaʋ caɖaɣ nɛ ɛnʋ koyi pe ana nɛ ɛñazɩ a-lɩm ka-taa nɛ ɛnʋ cɛlɩ-ɩ. 12 Ɛtɛma lɛ, Yoosɛɛfʋ heyi-i se, ɛ́na e-ɖoziye tɔbʋʋ! Se, pilinzi ńzɩ, sɩ-naadozo sɩkɛ kɩyakɩŋ naadozo. 13 Se, pɩkazɩ kɩyakɩŋ naadozo nɛ Faraawɔɔ kpazɩ-ɩ lone sɔsɔɖɛ taa. Se, ɛ́pɩsɩɣnɩ-ɩ ɛ-tʋmɩyɛ taa. Se, eyeki nɛ ɛcɛlɩɣ ɛ́lɛ sʋlʋm ɛzɩ ɛtɩɩlakʋʋ yɔ. 14 Ɛlɛ, se, ye pɩkɔma piɖeni-i lɛ, ɛ́taasɔɔ ɛnʋ yɔɔ. Se, ɛla ɛnʋʋ ɖeu nɛ eheyi Faraawɔɔ ɛnʋ tɔm nɛ ɛ́lɛ lɩzɩ ɛnʋʋ saɖɩka ŋ́ga ka-taa. 15 Se, pakpa ɛnʋ nɛ ɖoŋ Ebiree ñɩma ɛjaɖɛ taa nɛ powoni peeye. Se, halɩ peeye ɖɔɖɔ lɛ, paɖʋ ɛnʋ saɖɩka ɖulum.
16 Wiyaʋ tɔɔnaɣ laɖaa ñʋʋdʋ nawa se, Yoosɛɛfʋ lɩzɩ ɖoziye tɔbʋʋ lɩzʋʋ mbʋ yɔ, pɩwɛ ɖeu lɛ, eheyi-i se ɛnʋ ɖɔɖɔ eɖozaa se, ɛnʋ sɩɣlɩ ɛ-ñʋʋ taa ɖɔkɩŋ naadozo (3) ɛ-taa nɛ tɔɔnaɣ. 17 Tɔɔnasɩ ndɩ ndɩ nzɩ sɩkɩlɩ kɛdɩnaʋ Faraawɔɔ yɔ, sɩ-ɖɔkʋ kɛwɛnɩ pʋ-yɔɔ nɛ sumasɩ woki siloŋ kɩ-taa ɛnʋ ñʋʋ taa. 18 Ɛtɛma lɛ, Yoosɛɛfʋ heyi-i se, ɛ́na e-ɖoziye tɔbʋʋ! Se, ɖɔkɩŋ ɛnʋ ɛ-naadozo (3) ɩkɛ kɩyakɩŋ naadozo. 19 Se, pɩkazɩ kɩyakɩŋ naadozo, Faraawɔɔ kpazɩɣ-ɩ lone ndɩ ɖɩ-taa ɛtaɖʋna yɔ. Se, eyeki nɛ paɖɩ e-liu tɛɛ nimiye nɛ popuzini tɩʋ nɛ sumasi woki nɛ sɩtɔkɩ ɛ-nandʋ.
20 Pɩkɔma pɩla kɩyakɩŋ naadozo lɛ, Faraawɔɔ tɔkaɣ ɛ-lʋlʋʋ kɩyakʋ yɔɔ tɔzʋʋ kazandʋ nɛ pala tɔɔnaɣ sakɩyɛ nɛ ɛ́yaa ɛyaa mba pa-tɩŋa payɩ pɔñɔtɩnɩ-ɩ yɔ. Paba woba pekpeɣli lɛ, ɛkpazɩ mba pɛcɛlɩɣ-ɩ sʋlʋm yɔ, nɛ mba palakɩ-ɩ tɔɔnaɣ yɔ, pa-ñʋʋndɩnaa. 21 Ɛpɩsɩnɩ kajalaɣ-tʋ ɛ-tʋmɩyɛ taa se ɛ́lɛ ɛɖaɣnɩ-ɩ sʋlʋm cɛlʋʋ. 22 Pɩkazɩ eyele paɖɩ lɛlʋ liu tɛɛ nimiye nɛ popuzini tɩʋ. Mbʋʋ ndʋ Yoosɛɛfʋ yɔɔdaa yɔ, tɩlaba. 23 Paa mbʋʋ yɔ, mba pɛcɛlɩɣ wiyaʋ sʋlʋm yɔ, pa-ñʋʋdʋ tatɩɩtɔzɩ Yoosɛɛfʋ yɔɔ, paa ñɩɩ.