39
Powonaʋ Yoosɛɛfʋ, Pootiifaarɩ tɛ yɔ
1 Izimayɛɛlɩ liɖe taa ñɩma ḿba, powoni Yoosɛɛfʋ Ejipiti lɛ, pɛpɛdɩnɩ-ɩ Pootiifaarɩ. Abalʋ ɛnʋ, ɛkɛ wiyaʋ sɔsɔ Faraawɔɔ sɔɔjanaa taa sɔsɔ nɔɔyʋ. Ɛkɛ mba paɖaŋɩɣ ɛnʋ ɛ-ɖɩɣa yɔɔ yɔ, pa-ñʋʋdʋ. 2 Ŋgʋ KƖPAƔLƲ kɛwɛ Yoosɛɛfʋ cɔlɔ nɛ piɖeɣni-i ɛ́lɛ pɩtɩŋa pɩ-taa. Halɩ nɛ Yoozɛɛfʋ wolo ɛcaɣ ɛ-caa Ejipiti tʋ ɛnʋ ɛ-tɛ. 3 Pootiifaarɩ nawa se KƖPAƔLƲ wɛ Yoosɛɛfʋ cɔlɔ nɛ eyeki nɛ piɖeɣni ɛ́lɛ mbʋ pɩtɩŋa payɩ ɛlakɩ yɔ, pɩ-taa. 4 Pʋ-yɔɔ Pootiifaarɩ taa hʋlɩmɩnɩ-ɩ, nɛ ɛkpaɣ ɛ-ɖɩɣa nɛ ɛ-ñɩm tɩŋa payɩ nɛ ɛɖʋzɩ e-nesi taa se, ɛcɔnɩ pʋ-yɔɔ. 5 Pootiifaarɩ labɩ ḿbʋ lɛ, KƖPAƔLƲ tɩŋnɩ Yoozɛɛfʋ yɔɔ nɛ ɛwazɩ ɛ-ɖɩɣa yɔɔ. Ɛwazɩ ɛ-ñɩm mbʋ pɩwɛ ɖɩɣa nɛ hayɩm taa yɔ, pɩ-tɩŋa payɩ pʋ-yɔɔ. 6 Peeye ɛkpaɣ ɛ-ñɩm tɩŋa payɩ nɛ ɛɖʋzɩ Yoosɛɛfʋ nesi taa se, ɛ́lɛ ɛcɔnɩ pʋ-yɔɔ. Ɛtatasɩɣ ɖɩɣa taa nabʋyʋ labʋ nɛ pɩtasɩnɩ ɛ-maɣmaɣ ɛ-tɔɔnaɣ tɔɔʋ.
Yoosɛɛfʋ nɛ ɛ-caa halʋ pɔ-tɔm
Ye ŋcɔnɩ Yoosɛɛfʋ, eɖewa kamaɣ fɛyɩ. 7 Yoozɛɛfʋ caa cɛlɩ-ɩ tʋmɩyɛ wayɩ lɛ, ɛ́lɛ halʋ cɔnɩ-ɩ nɛ pɩkɛdɩnɩ-ɩ nɛ eheyi-i se, ɛ nɛ ɩ pasʋʋ. 8 Ɛlɛ, Yoosɛɛfʋ kizi nɛ eheyi-i se, ɛ́cɔnɩ ɛ́na, ɖooo ɛzɩ ɛnʋ wɛʋ peeye yɔ, ɛnʋ caa ɛɛtasɩɣ nabʋyʋ labʋ ɛ-ɖɩɣa taa, ɛlɛ, ɛta ɛnʋ liu nɛ eyebini-i ɛ-ñɩm tɩŋa payɩ se, ɛnʋ ɛcɔnɩ pʋ-yɔɔ. 9 Se, halɩ ɛnʋ caa fɛyɩnɩ ɖoŋ ɖɩɣa ŋ́ga ka-taa nɛ pɩkɩlɩ ɛnʋ. Ɖɔɖɔ lɛ, ɛtaɖaŋ ɛnʋʋ nabʋyʋ yɔɔ nɛ pɩtasɩnɩ ɛnʋʋ ɛ-halʋ. Pʋ-yɔɔ lɛ, ɛzɩmaa ɛnʋ pɩzɩɣ nɛ ɛla ɛzaɣtʋ sɔsɔtʋ ńdʋ nɛ ɛnʋ yʋsɩnɩ Ɛsɔ? 10 Kɩyakɩŋ tɩŋa, ɛwɛɛ ɛcɛyɩɣ Yoosɛɛfʋ ḿbʋ se, ɛ nɛ ɛ́lɛ pasʋʋ, ɛ́lɛ eekeŋni-i.
11 Tɔɔ! Nakʋyʋ wiye Yoosɛɛfʋ wobi ɖɩɣa se, ɛlakɩ ɛ-tʋmɩyɛ. Tʋmlaɖaa lɛlaa taa nɔɔyʋ taawɛɛ pu-wiye nɖɩ. 12 Pɩkɛdaa lɛ, halʋ sezi ɛkpa Yoosɛɛfʋ toko nɛ ɛɖɔkɩ cɩŋ nɛ eheyi-i se, ɛ nɛ ɛ́lɛ pasʋʋ. Peeye ɛ́lɛ yebini-i e-toko nɛ ese ɛlɩɩ. 13 Yoosɛɛfʋ yebini halʋ e-toko nɛ ese ḿbʋ lɛ, 14 ɛ́lɛ ma kubuka nɛ ɛ́yaa tʋmlaɖaa se, pówolo pána! Paba woba lɛ, eheyi-wɛ se, weyi ɛnʋ walʋ woni-wɛ yɔ, ɛcaɣ se ɛpɛŋɩ mbaa tɛtɛ. Ebiree tʋ lɛ ḿbʋ yɔ! Se, ewoba se ɛ nɛ ɛnʋ pasʋʋ nɛ ɛnʋ kizi nɛ ɛnʋ ma kubuka ɖoŋ. 15 Se, ɛnʋ tɩmabɩ kubuka ḿbʋ lɛ, eyebini ɛnʋʋ e-toko nɛ ese ɛlɩɩ.
16 Dɩnɛɛ halʋ ɛnʋ ɛsɩ Yoosɛɛfʋ toko se ɛ-walʋ ɛtala ɛmaɣna. 17 Ɛ́lɛ kɔma ɛtalɩ lɛ, ɛkɛdɩ ɛ́lɛ tɔm kʋɖʋmtʋ ndʋ. Ndʋʋ lɛ se, yom Ebiree tʋ weyi ewoni-wɛ yɔ, ewobi ɛnʋ cɔlɔ se, ɛnʋ nɛ ɩ pacaɣ nɛ ɛɖʋ ɛnʋʋ fɛyɛ. 18 Se, Alɩwaatʋ ndʋ ɛnʋ mabɩ kubuka ɖoŋ nɛ ɛ́yaa ɛyaa lɛ, ɛtɩkʋyɩ nɛ ese ɛlɩɩ nɛ eyele e-toko ɛnʋ cɔlɔ. 19 Yoosɛɛfʋ caa ɛnʋ ɛ-halʋ kɛdɩ-ɩ mbʋ Yoosɛɛfʋ laba yɔ lɛ, ɛ-pana kpa. 20 Peeye eyeba nɛ pakpa Yoosɛɛfʋ nɛ paɖʋ-ɩ saɖɩka, wiyaʋ saɖɩkadɩnaa cɔlɔ.
Paɖʋʋ Yoozɛɛfʋ saɖɩka yɔ
Ye ḿbʋ, mbʋʋ paɖʋ Yoozɛɛfʋ saɖɩka. 21 Paa ḿbʋ yɔ, KƖPAƔLƲ wɛ ɛ-cɔlɔ peeye ɖɔɖɔ nɛ ɛwɩlɩ-ɩ ɛ-camɩyɛ lakasɩ. Toovenim lɛ, eyeba nɛ Yoosɛɛfʋ tɔm kɛdɩnɩ saɖɩka ñʋʋdʋ. 22 Peeye ɛ́lɛ kpaɣ saɖɩkadɩnaa lɛlaa tɩŋa nɛ ɛɖʋzɩ Yoosɛɛfʋ nesi taa. Ɛnʋʋ pɩwɛɛ se ɛcɔnɩ saɖɩkadɩnaa lɛlaa yɔɔ tʋma wena pɩpɔzaa se pala yɔ, a-tɩŋa payɩ a-taa. 23 Saɖɩka ñʋʋdʋ taatasɩɣ cɔnaʋ tʋma wena ɛɖʋzɩ Yoosɛɛfʋ nesi taa yɔ, a-taa naɖɩyɛ yɔɔ. Mbʋ pʋyɔɔ yɔ, KƖPAƔLƲ kɛwɛ Yoosɛɛfʋ cɔlɔ nɛ eyeki nɛ piɖeɣni-i mbʋ pɩtɩŋa payɩ ɛlakɩ yɔ, pɩ-taa.