34
Siimeyɔɔ nɛ Leevii pakpaʋ pe-neu yɔ́ɔ kɩmɩyɛ yɔ
1 Nakʋyʋ wiye Yaakɔɔbʋ nɛ Leyaa pɛ-pɛlɛ Diinaa wokaɣ se, ɛna ɛjaɖɛ nɖɩ ɖɩ-taa pɛwɛɛ yɔ, ɖɩ-taa halaa nabɛyɛ. 2 Peeye egeetiye nɖɩ ɖɩ-taa Hiwii liɖe taa ñɩma ñʋʋdʋ Hamɔɔrɩ pɩyalʋ weyi payaɣ se Siicem yɔ, ɛna-ɩ nɛ ɛkpa-ɩ nɛ ɖoŋ nɛ ɛcaa-ɩ. 3 Ɛlɛ, ɛñɔnɩ-ɩ kpam nɛ ɛsɔɔlɩ-ɩ nɛ ɛlʋ se, ɛ́lɛ ɛnɩnɩ-ɩ. 4 Pɩlabɩ ḿbʋ lɛ, ewolo eheyi ɛ-caa Hamɔɔrɩ se, ɛ́lɛ ewolo ɛpɔzɩ pɛlɛ ɛnʋ ɛ-yɔɔ se, ɛnʋ liu wɛɛ se ɛnʋ kpaɣ-ɩ. 5 Pɩkɛdaa lɛ, Yaakɔɔbʋ nɩɩ se, Siicem ɖʋ ɛnʋʋ Yaakɔɔbʋ ɛ-pɛlɛ fɛyɛ. ɛlɛ, ɛ-pɩyalaa kɛwɛ tɛyɛ yɔɔ wondu cɔlɔ. Ɛnɩ ḿbʋ lɛ, esu tamɩyɛ nɛ pɩkɔɔ pɩsɩnɩ pa-pɩsʋʋ. 6 Pɩla ḿbʋ nɛ nakʋyʋ wiye lɛ, Siicem caa Hamɔɔrɩ kʋyɩ nɛ ewolo Yaakɔɔbʋ cɔlɔ se ɛyɔɔdɩnɩ-ɩ. 7 Yaakɔɔbʋ pɩyalaa kɔma palɩnɩ tɛyɛ yɔɔ nɛ patalɩ lɛ, panɩɩ mbʋ pɩlaba yɔ. Panɩwa lɛ, pa-pana kpa pɩtɩɩfɛyɩ, mbʋ pʋyɔɔ yɔ, pɩkɛnɩ-wɛ kʋdʋʋ. Ɖɔɖɔ lɛ, Siicem kpaʋ Yaakɔɔbʋ pɛlɛ nɛ ɖoŋ nɛ ɛ́caa-ɩ yɔ, ɛlabɩ mbʋ pɩtamʋna yɔ. Pɩfɛyɩ se, pala mbʋʋ Izirɛɛlɩ ɛjaɖɛ taa. 8 Ɛlɛ, Hamɔɔrɩ heyi-wɛ se, ɛnʋ pɩyalʋ Siicem sɔɔlɩ pɛ-pɛlɛ ɛnʋ. Se, paha ɛ́lɛ-ɩ nɛ ɛkpaɣ-ɩ. 9 Ɛtɔm se, panɩnɩ ɖama nɛ peyele nɛ pɛ-pɛlaa walɩ ḿba nɛ pɩkazɩ nɛ pakpaɣ ḿba pɛlaa. 10 Pʋbʋ, pakaɣ caɣʋ ḿba cɔlɔ. Se, ḿba mʋʋ-wɛ pe-egeetiye taa nesi naalɛ. Se, papɩzɩɣ pacaɣ ɖɩ-taa, pala pa-tʋma nɛ pehiɣ ñɩm.
11 Pʋwayɩ lɛ, Siicem ɛnʋ ɛ-maɣmaɣ ewolo nɛ eheyi pɛlɛ caa nɛ pɛlɛ ɖalaa se, pana ɛnʋ pʋtɔdɩyɛ, se, ɛnʋ cɛlɩɣ-wɛ mbʋ pe-liu wɛɛ yɔ. 12 Se, papɩzɩɣ pɛpɛlɩ-ɩ kɩmɩyɛ sɔsɔyɛ nɛ pɔpɔzɩ-ɩ se, ɛlabɩ-wɛ kʋjɔŋ sakɩyɛ. Se, ye pañɩtaa petisi se, ɛnʋ ɛkpaɣ pɛlɛ ɛnʋʋ yɔ, ɛnʋ cɛlɩɣ-wɛ mbʋ pɔpɔzʋʋ ɛnʋ yɔ pɩ-tɩŋa payɩ.
13 Ɖenɖe Siicem kaɖʋ Yaakɔɔbʋ pɩyalaa neu Diinaa fɛyɛ lɛ, pocosi ɛ nɛ ɛ-caa Hamɔɔrɩ nɛ ajiitu. 14 Pocosi-wɛ se, ḿba eetisiɣ nɛ pe-neu walɩ kɩdɛpɛlʋʋ. Pɩtɛkɛ mbʋʋ yɔ, pɩkɛɣnɩ mbaa kʋdʋʋ. 15 Se, pʋyʋ kʋɖʋm koŋ yekina nɛ ḿba tisini-wɛ. Mbʋʋ lɛ se, pɛ́pɛlɩ pɛ-tɛ abalaa tɩŋa ɖɔɖɔ ɛzɩ ḿba yɔ. 16 Se, ɖɩnɛ lɛ, ḿba pɩzɩɣ peyele nɛ ḿba pɛlaa walɩ-wɛ, nɛ ḿba pɩzɩ pakpaɣ pa-ñɩma. Se, ḿba kaɣ caɣʋ pɔ-cɔlɔ nɛ pa nɛ wɛ pɛkpɛndɩ pɛkɛ ɛyaa kʋɖʋmaa. 17 Se, ye pekizaa se, pataapɛlɩ-wɛ yɔ, ḿba mʋʋ pe-neu nɛ pɛɖɛɛ.
18 Pɔyɔɔdɩ ḿbʋ lɛ, Hamɔɔrɩ nɛ ɛ-pɩyalʋ Siicem petisini-wɛ. 19 Kpaagbaa ḿbʋ lɛ, evebu pazɩ tɔm ndʋ tʋ-yɔɔ ɖɔm. Mbʋ pʋyɔɔ yɔ, ɛɛsɔɔlɩ Yaakɔɔbʋ pɛlɛ kamaɣ fɛyɩ. Ŋgʋ evebu ɛnʋ, ɛnʋʋ ɛ-hɔʋ taa ñɩma kɩlaɣ seu. 20 Panɩnɩ ɖama ḿbʋ lɛ, Hamɔɔrɩ nɛ ɛ-pɩyalʋ Siicem pakʋyɩ powolo samaɣ ɖikpeɣliye , tɛtʋ nɔnɔɔ taa nɛ pɔyɔɔdɩnɩ pa-samaɣ se, 21 ḿba nɛ ɛyaa ḿba pɩwɛ leleŋ. Se, ḿba mʋ-wɛ nesi naalɛ nɛ pacaɣ ḿba egeetiye taa nɛ pala pa-tʋma. Se, ḿba pɩzɩɣ pakpaɣ pɛ-pɛlaa, nɛ ḿba yele nɛ pakpaɣ ḿba ñɩma. 22 Se, ye ḿba etisaa nɛ pɛpɛlɩ ḿba-tɛ abalaa ɛzɩ ḿba yɔ, pʋbʋ, petisiɣ nɛ pɛwɛɛ ḿba cɔlɔ nɛ ḿba nɛ wɛ pɛkɛ ɛyaa kʋɖʋmaa. 23 Se, ye ḿba etisi pɔ-tɔm yɔ, powoki pɛwɛɛ ḿba cɔlɔ. Pʋbʋ, po-wondu tɩŋa nɛ pa-ñɩm pɛtɛŋnɩ pɩsʋʋ ḿba ñɩmbʋ. 24 Ḿba pa-tɩŋa payɩ paawɛ tɛtʋ nɔnɔɔ taa peeye yɔ, petisi ndʋ Haamɔɔrɩ nɛ ɛ-pɩyalʋ Siicem peheyi-wɛ yɔ, nɛ pɛpɛlɩ tɛtʋ taa abalaa tɩŋa payɩ.
25 Pɛpɛlɩ-wɛ nɛ pɩla kɩyakɩŋ naalɛ lɛ, abalaa tɩŋa wɛɛ wizasɩ taa. Peeye Yaakɔɔbʋ pɩyalaa taa naalɛ, Diinaa ɖalaa, Siimeyɔɔ nɛ Leevii pakpaɣ po-you sɛsɩ nɛ powolo pasʋʋ tɛtʋ taa kaalɛyɩtʋ nɛ pakʋ abalaa tɩŋa payɩ. 26 Pakʋwaɣ-wɛ lɛ, pɛkpɛndɩnɩ Hamɔɔrɩ nɛ ɛ-pɩyalʋ Siicem. Palɩɣaɣ Siicem ɖɩɣa taa lɛ, pɛkpɛndɩnɩ Diinaa nɛ pɛɖɛɛ. 27 Pɩlabɩ ḿbʋ lɛ, Yaakɔɔbʋ pɩyalaa lɛlaa wolo pakpaɣ ḿba pakʋ-wɛ yɔ pa-ñɩm nɛ pamɩlɩ mbʋ pɩwɛ tɛtʋ taa yɔ. Mbʋ pʋyɔɔ yɔ, paɖʋ pe-neu fɛyɛ. 28 Pakpaɣ heŋ nɛ pʋŋ nɛ naŋ nɛ kpaŋasɩ, tobi taa se, mbʋ pɩ-tɩŋa payɩ pɩɩwɛ tɛtʋ taa nɛ tɛyɛ yɔɔ yɔ. 29 Pakpaɣ pa-ñɩm tɩŋa nɛ pɛkpɛndɩnɩ piya tɩŋa nɛ halaa, nɛ pamɩlɩ mbʋ mbʋ pɩɩwɛ ɖɩsɩ taa yɔ pɩ-tɩŋa.
30 Peeye Yaakɔɔbʋ heyi Siimeyɔɔ nɛ Leevii se, pasʋzɩ ɛnʋʋ tɔm nɛ pɛwɛɛkɩ ɛnʋ hɩɖɛ egeetiye taa, Kanaanɩ ñɩma nɛ Peeriizi ñɩma pɛ-ɛsɩndaa. Se, ɖenɖe ɛnʋ ɛyaa tatalɩ pʋyʋ lɛ, ɛyaa ḿba pataŋ nɔɔ nɛ pakʋyɩ ɛnʋ yɔɔ nɛ pɔtɔyɩtɩ ɛnʋ nɛ ɛ-ɖɩɣa taa ñɩma. 31 Ɖɩnɛ pocosi-i se, pɩɩwɛɛ se ɛyʋ ɛnʋ ɛla ḿba neu ɛzɩ ɛ́lɛ kɛ acɛyɛ tʋ yɔ, yaa we?