35
Yaakɔɔbʋ kʋyʋʋ Siicem se, ewoki Beetɛɛlɩ yɔ
1 Ɛsɔ heyi Yaakɔɔbʋ nakʋyʋ wiye se, ɛ́kpaɣ nʋmɔʋ nɛ ewolo ɛcaɣ Beetɛɛlɩ. Se, ɛ́ma ɛnʋʋ kɩlaŋ ɖɩlayɛ peeye. Se, peeye ɛnʋ lɩzɩ ɛ-tɩ nɛ ɛwɩlɩ-ɩ alɩwaatʋ ndʋ eseɣaɣ e-ɖomɖa Ezaawʋ yɔ.
2 Pʋ-yɔɔ Yaakɔɔbʋ heyi ɛ-hɔʋ taa ñɩma nɛ mba patɩŋa payɩ pɛwɛ ɛ-cɔlɔ yɔ se, pɔ́lɔ sɩɩnaa agɔma mba pɛwɛ pɔ-cɔlɔ yɔ. Se, pɛ́wɛɛ cɩɖɩ cɩɖɩ, pɛlɛɣzɩ wondu. 3 Se, pɔñɔɔzɩ pa-tɩ nɛ ɛ nɛ wɛ powolo Beetɛɛlɩ. Se, patalɩɣ peeye lɛ, ɛnʋ maɣ Ɛsɔ weyi ɛnʋ ya-ɩ kɩyakʋ ŋgʋ ɛnʋ kɛwɛ cɛyɩtʋ taa nɛ ɛ́lɛ cosi-i yɔ, kɩlaŋ ɖɩ-layɛ. Se, ɛ́lɛ sɩnɩnɩ-ɩ paa le ɛnʋ nʋmɔʋ ɖɔm taa. 4 Peeye palɩzɩ lɛlaa tɛ sɩɩnaa agɔma sɩʋ kpelisi nzɩ sɩɩwɛ pɔ-cɔlɔ yɔ, nɛ kokowe wena pɛlɛɣaɣ pa-nɩŋgbaaŋ yɔɔ yɔ, nɛ pɛcɛlɩ Yaakɔɔbʋ. Pɛcɛlɩ-ɩ lɛ, ewoni pɩtɩŋa nɛ epi tɩʋ sɔsɔʋ ŋgʋ kɩwɛ Siicem tɛtʋ cɔlɔ yɔ kɩ-tɛɛ. 5 Yaakɔɔbʋ nɛ e-piya pakʋyaa nɛ pɛɖɛɣ lɛ, Ɛsɔ yele nɛ sɔɔndʋ natʋyʋ kpa tɛtʋ ndʋ tɩñɔtɩnɩ-wɛ yɔ, tɩ-taa ñɩma siŋŋ, nɛ nɔɔyʋ takatɩ se, ɛɖʋ pa-wayɩ.
6 Yaakɔɔbʋ nɛ ḿba patɩŋa patɩŋaɣ-ɩ yɔ, patɩŋa pɔkɔɔ patalɩ Luuzi tɛtʋ taa Kanaanɩ ɛjaɖɛ taa. Payaɣ Luuzi tɛtʋ ndʋ lɛɛlɛɛyɔ se, Beetɛɛlɩa. 7 Patalɩ peeye lɛ, ɛ́ma kɩlaŋ ɖɩlayɛ nɛ ɛyaa lone nɖɩ se, Beetɛɛlɩ Ɛsɔ. Mbʋ pʋyɔɔ yɔ, peeye Ɛsɔ lɩzɩ ɛ-tɩ nɛ ɛwɩlɩ-ɩ alɩwaatʋ ndʋ eseɣaɣ e-ɖomɖa yɔ.
8 Halʋ nɔɔyʋ kɛwɛ pa-taa, payaɣ-ɩ se, Deboora. Ɛɛkɛ Reebeeka pʋnʋʋyʋ. Pɛwɛ Beetɛɛlɩ peeye lɛ, ɛsɩ nɛ pepim-i tɩʋ sɔsɔʋ nakʋyʋ tɛɛ. Pɩkpaɣnɩ kɩyakʋ ŋgʋ yɔ, payaɣ tɩʋ ŋgʋ se, Ɛzɩtɛɣlɩm Tɩʋ.
9 Yaakɔɔbʋ lɩnɩ Mezoopotamii nɛ ɛpɩsɩ Beetɛɛlɩ peeye lɛ, Ɛsɔ ɖaɣnɩ ɛ-tɩ lɩzʋʋ nɛ wɩlɩ-ɩ nɛ ɛwazɩ ɛ-yɔɔ. 10 Eheyi-i se, ɖooo lɛ, payaɣaɣ-ɩ se, Yaakɔɔbʋ. Se, paatasɩɣ-ɩ yaʋ ḿbʋ. Ɛlɛ, payaa-ɩ se, Izirɛɛlɩ. Mbʋʋ Ɛsɔ ya-ɩ se, Izirɛɛlɩ. 11 Pʋwayɩ lɛ, eheyi-i se, ɛnʋʋ lɛ, Ɛsɔ Ɖoŋ Tɩŋa Tʋ. Se, ɛnʋ haɣ-ɩ piya sakɩyɛ se ɛ́kɛ ɛjaɖɛ naɖɩyɛ taa ñɩma cɔzɔ, nɛ halɩ ɛkɛ samaɣ ndɩ ndɩ cɔzɔ. Se, awiya kaɣ lɩʋ ɛ-sɛyɩnaa taa. 12 Se, ɛnʋ haɣ-ɩ ɛjaɖɛ nɖɩ ɛnʋ kaha Abɩraham nɛ Iizaakɩ yɔ, nɛ ɛ-wayɩ lɛ, ɛnʋ ha-ɖɩ ɛ-sɛyɩnaa.
13 Pʋwayɩ lɛ, Ɛsɔ posi ɛ-tɩ nɛ lone nɖɩ ɖɩ-taa ɛɛyɔɔdɩnɩ Yaakɔɔbʋ yɔ. 14 Yaakɔɔbʋ kpaɣ pɩyɛ nɛ esiɣ-ɖɩ peeye nɛ ɛpɩyɩ ɖɩ-ñʋʋ taa num nɛ sʋlʋm nɛ ɖɩkɛnɩ-ɩ kɔdaɣ taa pɩyɛ. 15 Piyele ɛ́yaa lone nɖɩ ɖɩ-taa Ɛsɔ kalɩzɩ ɛ-tɩ nɛ ɛwɩlɩ-ɩ yɔ, se Beetɛɛlɩ. Pʋ-tɔbʋ se, Ɛsɔ Ɖɩɣa.
Raasɛɛlɩ lʋlʋ́ʋ Bineyaamiini nɛ ɛsɩ yɔ
16 Pʋwayɩ lɛ, Yaakɔɔbʋ nɛ ɛ-hɔʋ taa ñɩma pakʋyɩ Beetɛɛlɩ se pɛɖɛɣ. Pɩkɔma pɩkazɩ pazɩ se, patalɩ Efiraataa tɛtʋ taa lɛ, Raasɛɛlɩ lʋlɩ pɩɣa. Pɩɣa ŋ́ga ka-lʋlʋʋ kalabɩ kaɖɛ. 17 Raasɛɛlɩ wɩɣaɣnɩ lʋlʋʋ ḿbʋ lɛ, halʋlɩsɩyʋ heyi-i se, sɔɔndʋ ɛtaakpa-ɩ. Se, abalɩbɩɣa ɛtasɩɣ lʋlʋʋ. 18 Raasɛɛlɩ kefiɣnaa. Ɛtɛzaɣ kɛdɛzaɣ fezuu tisuu lɛ, ɛ́yaa pɩɣa ŋ́ga se, Bɛɛnɩ Onii. Pʋ-tɔbʋʋ se, kʋñɔŋ pɩɣa. Ɛlɛ, ka-caa ñayaa-kɛ se, Bineyaamiini. Pʋ-tɔbʋʋ se, nesikɩbanzɩ yɔɔ pɩɣa. 19 Raasɛɛlɩ sɩba lɛ, pepimi-i Efiraataa tɛtʋ habɩyɛ nɔɔ. Lɛɛlɛɛyɔ payaɣ-tʋ se, Bɛtɩlɛhɛm. 20 Pepimi-i lɛ, Yaakɔɔbʋ kpaɣ pɩyɛ naɖɩyɛ nɛ esiɣ ɛ-pɩlaʋ yɔɔ. Halɩ nɛ sɔnɔ, pɔdɔŋnɩ-ɖɩ yaʋ se, Raasɛɛlɩ pɩlaʋ Pɩyɛ.
21 Yaakɔɔbʋ kʋyɩ peeye lɛ, ewolo esiɣ ɛ-kɩɖanɖʋʋ Migidaalɩ Edɛɛrɩ tɛtʋ wayɩ. 22 Yaakɔɔbʋ wɛ hɔɔlʋʋ ŋgʋ kɩ-taa ḿbʋ lɛ, ɛ-pɩyalʋ Ruubɛɛnɩ wolo ɛcaa ɛ-halʋ cikpelu Bilihaa. Pɩlabɩ ḿbʋ lɛ, Yaakɔɔbʋ ñanɩɩ b.
Yaakɔɔbʋ wɛnɩ abalɩbiya hiu nɛ naalɛ (12). 23 Leyaa lʋlɩnɩ-ɩ ɛ-pɩyalʋ sɔsɔ Ruubɛɛnɩ. Pʋwayɩ lɛ, ɛlʋlɩ Siimeyɔɔ nɛ Leevii nɛ Yuuda nɛ Isaakaarɩ nɛ Zabulɔɔnɩ. 24 Raasɛɛlɩ ñalʋlɩ-ɩ Yoosɛɛfʋ nɛ Bineyaamiini. 25 Raasɛɛlɩ tʋmlaɖʋ halɩñɩnʋ Bilihaa ñalʋlɩ-ɩ Daanɩ nɛ Nɛfɩtaalii. 26 Leyaa tʋmlaɖʋ halɩñɩnʋ Zilipaa ñalʋlɩ-ɩ Gaadɩ nɛ Asɛɛrɩ. Tɔɔ! Mbaa lɛ, Yaakɔɔbʋ pɩyalaa mba palʋlɩ-wɛ Mezoopotamii yɔ.
27 Yaakɔɔbʋ kɔma ɛkʋyɩ Migidaalɩ Edɛɛrɩ tɛtʋ wayɩ lɛ, ewolo ɛ-caa Iizaakɩ tɛ, Mamiree. Pɩñɔtɩnɩ Kiriyaatɩ Arɩbaa tɛtʋ. Payaɣ-tʋ lɛɛlɛɛyɔ se, Hɛbɩrɔɔnɩ. Abɩraham nɛ Iizaakɩ paacaɣ peeye. 28 Iizaakɩ kɛwɛnɩ pɩnzɩ mɩnʋʋ nɛ nɩɩnʋwa nɛ niidozo (180) 29 nɛ pʋcɔ ɛsɩ. Ye ḿbʋ, ɛɛkpadɩyɩ kuŋgu nɛ pɩcɔ ɛsɩ nɛ ewolo sɔsaa cɔlɔ. Ɛsɩba lɛ, ɛ-pɩyalaa Ezaawʋ nɛ Yaakɔɔbʋ pepim-i.