33
Yaakɔɔbʋ katʋʋ Ezaawʋ yɔ
1 Yaakɔɔbʋ ɖɛzɩ pɔɔ ḿbʋ lɛ, ɛna Ezaawʋ, ɛ nɛ ɛyaa nasɩnaza (400) pɔɖɔŋnɩ wobu. Ɖɩnɛɛ, ɛtayɩ piya, Leyaa nɛ Raasɛɛlɩ nɛ tʋmlaɖaa halaa ñɩma naalɛ. 2 Ɛkpaɣ tʋmlaɖaa halaa ñɩma ḿba nɛ pe-piya nɛ ɛɖɛzɩ nɔɔ. Pa-wayɩ lɛ, Leyaa nɛ ɛ́lɛ piya nɛ pɩɖɩɣnɩ Raasɛɛlɩ nɛ Yoosɛɛfʋ. 3 Pʋwayɩ lɛ, ɛ-maɣmaɣ ɛɖɛɛ-wɛ nɔɔ nɛ eluŋ tataa tɔm lʋbɛ (7) nɛ pɩcɔ ɛtalɩ e-ɖomɖa cɔlɔ. 4 Peeye Ezaawʋ sewa nɛ ɛkatɩ-ɩ nɛ ekpiikini-i nɛ pɩwɩlɩ se, ɛsɛ-ɩ se ɛtalɩ ɖeu. Ɖɩnɛɛ pa-naalɛ papazɩ wiluu. 5 Ezaawʋ kɔma ɛna halaa nɛ piya lɛ, ɛpɔzɩ-ɩ se, ɛyaa mba patɩŋɩɣ ɛ-wayɩ mbʋ yɔ, pabaɣ lɛ mba? Yaakɔɔbʋ cosi-i se, pabaɣ lɛ piya nzɩ Ɛsɔ ha ɛnʋ yɔ.
6 Peeye tʋmlaɖaa halaa ñɩma ḿba nɛ pe-piya powobi pɔ-cɔlɔ nɛ poluŋ Ezaawʋ tɛɛ. 7 Leyaa nɛ e-piya paba wolo pɔ-cɔlɔ nɛ pala ḿbʋ ɖɔɖɔ. Paba wayɩ lɛ, Yoosɛɛfʋ nɛ Raasɛɛlɩ. 8 Ɖɩnɛɛ Ezaawʋ pɔzɩ Yaakɔɔbʋ se, ɛbɛ ɛɖʋwa se ɛlakɩnɩ wondu ndʋ tɩ-tɩŋa ɛnʋ katɩ ḿbʋ yɔ? Ɛ́lɛ cosi-i se, ɛnʋ liu wɛɛ se ɛcɛlɩ-ɩ-tʋ nɛ ɛnʋʋ ɛ-caa ɛlabɩ-ɩ ɖeu. 9 Ezaawʋ kitini e-ɖomɖa se, ɛnʋ wɛnɩ ñɩm pɩtɩɩfɛyɩ. Se, ɛsɩɩ ɛ-tɩ ɛ-ñɩm. 10 Yaakɔɔbʋ kízini-i nɛ etendi-i se, ye ɛ-taa ɛfɛyɩnɩ ɛnʋʋ natʋyʋ yɔ, etisi nɛ ɛmʋ kʋjɔʋ ŋgʋ ɛnʋ labɩ-ɩ yɔ. Se, ɛnʋ katɩ-ɩ katʋʋ ḿbʋ yɔ, pɩwɛ ɛzɩ Ɛsɔ ɛnʋ kataa yɔ. Mbʋ pʋyɔɔ yɔ, ɛlabɩ ɛnʋʋ ɖeu kpem. 11 Se, pʋ-yɔɔ lɛ, ɛnʋ tendi-i se etisi nɛ ɛmʋ kʋjɔʋ ŋgʋ ɛnʋ labɩ-ɩ yɔ. Mbʋ pʋyɔɔ yɔ, Ɛsɔ wazɩ ɛnʋ yɔɔ nɛ ɛnʋ hiɣ mbʋ pɩpɔzʋʋ-ɩ yɔ pɩ-tɩŋa payɩ.
Yaakɔɔbʋ cɛyɩ Ezaawʋ nɛ pɩnɩɩ ɛ́lɛ nɛ ɛtɛzɩ tisuu, 12 nɛ ɛtɔ se, pákpaɣ nʋmɔʋ nɛ pɛɖɛɛ! Se, ɛnʋ sɩɣ-ɩ. 13 Ɛlɛ, Yaakɔɔbʋ yaa-ɩ se caa nɛ ekitini-i se, ɛna ɖeu ḿbʋ se, piya tɔm wɛ kaɖɛ. Ɖɔɖɔ lɛ, pɩpɔzʋʋ se pɔɖɔkɩ heŋ nɛ naŋ weyi pɩɖɔŋnɩ-ɩ mʋzʋʋ yɔ́ɔ nesi naalɛ. Se, ye ḿba ɛtɔm se, pataŋgasɩɣ-wɛ paa kɩyakʋ kʋɖʋmʋ maɣmaɣ yɔ, pʋbʋ heŋ nɛ pʋŋ pasɩkɩ. 14 Se, pʋ-yɔɔ lɛ, ɛnʋʋ caa ɛɖɛɛ ɛnʋʋ nɔɔ nɛ piyele ɛnʋ ɖɔ ɛ-nʋmɔʋ hɛɛɛ ɛzɩ e-wondu nɛ e-piya pɔɖɔŋʋʋ yɔ nɛ ɛnʋ kɔɔ ɛtalɩ ɛ-cɔlɔ Seyiiri ɛjaɖɛ taa. 15 Peeye, Ezaawʋ heyi-i se, ɛnʋ yekini-i ɛyaa mba pasɩ ɛnʋ yɔ pa-taa nabɛyɛ. Yaakɔɔbʋ pɔzɩ-ɩ se, eyeki-wɛ se pala we? Se, ɛnʋʋ caa ɛñɩtʋʋ ɛmʋ ɛnʋʋ nesi naalɛ yɔ, pɩɖɔ ɛnʋ.
16 Yaakɔɔbʋ nɛ e-ɖomɖa panɩnɩ ɖama ḿbʋ lɛ, Ezaawʋ kpaɣ nʋmɔʋ ɛpɩsɩ Seyiiri kɩyakʋ ŋgʋ ki-wiye. 17 Piyele Yaakɔɔbʋ ñowolo ɛcaɣ Suukooti. Ɛ́ma ɛ-tɩ ɖɩɣa peeye nɛ ésiɣ e-wondu coka. Pʋ-yɔɔ paya lone nɖɩ se Suukooti, pʋ-tɔbʋʋ se, coka.
Yaakɔɔbʋ wobuu Siicem yɔ
18 Yaakɔɔbʋ kɔma ɛkʋyɩ Labaanɩ tɛ Mezoopotamii lɛ, ɛpɩsɩ Kanaanɩ ɛjaɖɛ taa, Siicem tɛtʋ taa nɛ alaafɩya. Ɛtalaa lɛ, esiɣ kɩɖanɖɩŋ tɛtʋ ndʋ tɩ-ɛsɩndaa nɛ ɛ nɛ ɛ-halaa nɛ e-piya pacaɣ, 19 nɛ piyele ɛya Hamɔɔrɩ sɛyɩnaa cɔlɔ tɛtʋ, liidiye ñɩɣtʋ mɩnʋʋ (100) nɛ esiɣ ɛ-kɩɖandʋʋ tʋ-yɔɔ. Hamɔɔrɩ calɩnɩ wɛʋ Siicem tɛtʋ taa. 20 Peeye ɛ́ma kɩlaŋ ɖɩlayɛ nɛ ɛyaa-ɖɩ se, Ɛsɔ lɛ, Izirɛɛlɩ Ɛsɔ.