32
1 Tɛʋ fema lɛ, Labaanɩ kʋyɩ tanaŋ cu, nɛ ɛsɛɛ ɛ-pɛlaa nɛ ɛ-sɛyɩnaa, nɛ ɛwazɩ pɔ-yɔɔ, nɛ eheyi-wɛ se, pɩlabɩ wiɖiye, nɛ ɛkpaɣ nʋmɔʋ nɛ ɛpɩsɩ ɛ-tɛ.
Yaakɔɔbʋ ñɔɔzʋʋ ɛ-tɩ se ɛkatɩ e-ɖomɖa Ezaawʋ yɔ
2 Pʋwayɩ lɛ, Yaakɔɔbʋ kpaɣ nʋmɔʋ se ɛɖɛɣ. Ɛɖɛɣaɣ lɛ, Ɛsɔ tiyiyaa nabɛyɛ katɩ-ɩ nʋmɔʋ taa. 3 Ɛtɩna-wɛ lɛ, ɛma kobuka se, Ɛsɔ you laɖaa tikaɣ yɔ! Pʋ-yɔɔ ɛya lone ńɖɩ se, Mahanayim a
4 Pʋ-wayɩ lɛ, Yaakɔɔbʋ tiyi nabɛyɛ se, pɛɖɛɛ-ɩ nɔɔ nɛ powolo e-ɖomɖa Ezaawʋ cɔlɔ. Ɛ́lɛ ñaawɛ Edom ɛjaɖɛ taa, Seyiiri hɔɔlʋʋ taa. 5 Pɛɖɛɣaɣ lɛ, ɛpaɣ-wɛ se, powoba lɛ, peheyi-i se, ɛ-tʋmlaɖʋ Yaakɔɔbʋ tiyi-wɛ se peheyi-i se, ɛnʋ wobi Labaanɩ tɛ, ɛcaɣ nɛ pɩkɔɔ pɩsɩnɩ kɩyakʋ ŋ́gʋ. 6 Se, ɛnʋ wɛnɩ naŋ nɛ kpaŋasɩ nɛ heŋ nɛ pʋŋ nɛ tʋmlaɖaa abalaa nɛ halaa. Se, ɛnʋ tiyi-wɛ se, peheyi-i se, ɛnʋʋ ɛ-caa, ɛ́mʋ ɛnʋʋ ɖeu.
7 Ḿba Yaakɔɔbʋ tiyaa yɔ, pekitaa lɛ, peheyi-i se, powoba nɛ pana e-ɖomɖa Ezaawʋ. Ɛ́lɛ nɛ ɛyaa nasɩnaza (400) pɛwɛɛ pɔɖɔŋ se pakatɩ-ɩ. 8 Peheyi Yaakɔɔbʋ ḿbʋ lɛ, sɔɔndʋ kpa-ɩ pɩŋŋ. Ɖɩnɛɛ ɛtayɩ ɛyaa ḿba paawɛ ɛ-cɔlɔ yɔ́ɔ tɔm naalɛ, nɛ pɩkpɛndɩnɩ heŋ nɛ pʋŋ nɛ naŋ nɛ kʋyʋndʋʋ kpaŋnaŋ. 9 Ɛɛɖʋ ɛ-taa se, ye Ezaawʋ ɛkʋ tindimiye kajalaɣ ñɩnɖɛ taa ñɩma yɔ, lɛɛɖɛ taa ñɩma pɩzɩɣ pese nɛ patʋlɩ.
10 Pʋwayɩ lɛ, Yaakɔɔbʋ sɛɛ Ɛsɔ se, ɛnʋ cɔzɔ Abɩraham nɛ ɛnʋ caa Izaakɩ pɛ-Ɛsɔ heyi ɛnʋ se, ɛnʋ ɛpɩsɩ ɛnʋ ɛjaɖɛ taa, ɛnʋ ñɩma cɔlɔ. Se, ɛkaɣ yebʋ nɛ piɖeni ɛnʋʋ pɩ-tɩŋa pɩ-taa. 11 Se, ɛnʋʋ KƖPAƔLƲ ɛnʋ ɛ-tʋmlaɖʋ, ɛtamʋnɩ camɩyɛ lakasɩ nzɩ sɩ-tɩŋa payɩ ɛlabɩ ɛnʋ ɛzɩ ɛɖʋʋ yɔ . Se, ɛnʋ ɖɛzaɣaɣ Yɔɔrɩdaŋ pɔɔ se, ewolo Labaanɩ cɔlɔ lɛ, ɛnʋ ɖaʋ ɖeke ɛnʋ kɔɖɔkɩ ɛnʋ nesi taa. Se, lɛɛlɛɛyɔ, ɛnʋ nɛ ɛyaa tindima naalɛ papɩsɩɣna. 12 Se, ɛ́lɩzɩ ɛnʋʋ ɛnʋ ɖomɖa Ezaawʋ nesi taa. Mbʋ pʋyɔɔ yɔ, sɔɔndʋ kpáɣ ɛnʋ se, ɛ́lɛ ɛtaakɔɔ ɛkʋ ɛnʋ nɛ ɛnʋ halaa nɛ ɛnʋ piya. 13 Se, ɛtɔzɩ se, eheyi ɛnʋ se, eyeki nɛ piɖeni ɛnʋʋ pɩ-tɩŋa pɩ-taa . Se, eyeki nɛ ɛnʋ sɛyɩnaa huúu pɩɩwɛɣ kalʋʋ ɛzɩ pɔɔ nɔɔ kañɩŋa yɔ a.
14 Yaakɔɔbʋ tɛm Ɛsɔ sɛʋ lɛ, ɛsʋʋ lone ńɖɩ ɖɩ-taa ɖoó ana. Pʋwayɩ lɛ, ɛlɩzɩ kpɩna wena ɛɛwɛna yɔ, a-taa naayɛ se ɛla e-ɖomɖa Ezaawʋ kʋjɔʋ. 15 Ɛlɩzɩ pʋŋ nasɩlɛ (200) nɛ tʋlɩŋ nɩɩlɛ (20), heŋ nasɩlɛ (200) nɛ ɛyaŋ nɩɩlɛ (20), 16 kʋyʋndʋʋ kpaŋnaŋ halɩñɩŋ niidozo (30) nɛ e-piya nzɩ sɩɖɔŋnɩ mʋzʋʋ yɔ, nɛ naŋ halɩñɩŋ nɩɩnaza (40) nɛ abalɩñɩŋ hiu (10) nɛ kpaŋasɩ halɩñɩnzɩ nɩɩlɛ (20) nɛ abalɩñɩnzɩ hiu (10). 17 Ɛ́kpaɣ kpɩna ana ndɩ ndɩ nɛ ɛcɛlɩ ɛ-tʋmlaɖaa nɛ eheyi-wɛ se, pɛɖɛɛ-ɩ nɔɔ. Se, peyele nɛ kpɩna kalakɩŋ posini ɖama. 18 Pʋwayɩ lɛ, eheyi ɛ-tʋmlaɖʋ kajalaɣ ñɩnʋ se, paa pɩɩla ɛzɩma ɛnʋ ɖomɖa katɩɣ-ɩ lɛ, ɛpɔzɩ-ɩ se, ɛkɛ a-ñɩnʋ? Le ewoki? Atɩnɩ kpɩna wena aɖɔŋ ɛ-ɛsɩndaa? 19 Pʋbʋ écosi ɛ́lɛ se, ɛ́lɛ tʋmlaɖʋ Yaakɔɔbʋ tɩna. Se, kʋjɔʋ ŋgʋ etiyini ɛnʋʋ ɛnʋ caa Ezaawʋ yɔ lɛ. Se, ɛnʋ maɣmaɣ, ɛwɛ pa-wayɩ ɛɖɔŋnɩ wobu.
20 Tɔm kʋɖʋmtʋ ndʋʋ eheyi tʋmlaɖʋ naalɛ ñɩnʋ nɛ tozo ñɩnʋ nɛ ḿba pa-tɩŋa payɩ patɩŋaɣ kpɩna wayɩ yɔ. Se, ye pakatɩ Ezaawʋ lɛ, peheyi-i-tʋ. 21 Se, pʋwayɩ lɛ, patasɩ-ɩ heyuu se, ɛ-tʋmlaɖʋ Yaakɔɔbʋ wɛ pa-wayɩ, ɛɖɔŋnɩ wobu.
Toovenim lɛ, Yaakɔɔbʋ maɣzaɣ se etiyiɣni-i kʋjɔŋ nɛ ɛhɛzɩnɩ ɛ-laŋɩyɛ nɛ pɩcɔ ɛnʋ kaatalɩ ɛ-cɔlɔ. Se, ɛnʋ taɣ liu se paa pɩɩla ɛzɩma yɔ, ɛmʋʋ ɛnʋʋ ɖeu. 22 Mbʋʋ kpɩna ɖɛ-ɩ nɔɔ nɛ piyele ɛnʋ maɣmaɣ ɛcaɣ pɩlʋʋ ŋ́gʋ kɩ-taa ɖoó ana a-taa.
Yaakɔɔbʋ nɛ Ɛsɔ palʋbʋ yɔ
23-24 Pɩkɛdaa lɛ, Yaakɔɔbʋ kʋyɩ ɖoó ana a-taa nɛ ɛkpaɣ ɛ-halaa ḿba pa-naalɛ, nɛ ɛ-tʋmlaɖaa halaa ñɩma ḿba pa-naalɛ, nɛ e-piya hiu nɛ kʋɖʋm (11) nɛ ɛkpɛndɩna mbʋ pɩ-tɩŋa payɩ ɛwɛna yɔ nɛ ɛɖɛzɩnɩ pɔɔ ŋga payaɣ se Yaabɔɔkɩ yɔ. 25 Ɛɖɛzɩnɩ-wɛ ḿbʋ nɛ pɩkazɩ e-ɖeke lɛ, nɔɔyʋ wolo nɛ ɛ nɛ ɩ palʋ nɛ pɩkɔɔ pɩñandɩ. 26 Ɛ nɛ weyi palʋkaɣ yɔ, ɛ́lɛ nawa se ɛ́lɛ ɛɛpɩzɩɣ ɛwabɩ-ɩ lɛ, ɛma Yaakɔɔbʋ takɩtayaɣ taa, nɛ pɩmɛɣzɩ-ɩ. 27 Peeye, eheyi Yaakɔɔbʋ se, ɛ́lɛ eyebi-i nɛ ɛɖɛɛ, mbʋ pʋyɔɔ yɔ, pɩcaɣ ñandʋʋ. Yaakɔɔbʋ cosi-i se, ye ɛtawazɩ ɛnʋ yɔɔ yɔ, ɛnʋ eeyeki-i nɛ ɛɖɛɛ. 28 Ɛ́lɛ pɔzɩ-ɩ se, payaɣ-ɩ se we? Ecosi ɛ́lɛ se, payaɣ-ɩ se Yaakɔɔbʋ. 29 Peeye, ɛ́lɛ kitini-i se, pataatasɩ-ɩ yaʋ se Yaakɔɔbʋ, ɛlɛ, payaa-ɩ se, Izirɛɛlɩ. Mbʋ pʋyɔɔ yɔ, ɛ nɛ Ɛsɔ nɛ ɛyaa palʋba nɛ ɛwabɩ-wɛ. 30 Yaakɔɔbʋ pɔzɩ-ɩ se, payaɣ-ɩ se we? Ɛ́lɛ kitini-i se, ɛbɛ yɔɔ ɛpɔzʋʋ ɛnʋʋ ɛnʋ hɩɖɛ? Peeye, ɛwazɩ Yaakɔɔbʋ yɔɔ. 31 Ɖɩnɛɛ Yaakɔɔbʋ kaɖaa se, ɛnʋ na Ɛsɔ nɛ ɛnʋ ɛza nɛ ɛnʋ tɛ ɛwɛɛ wezuu. Pʋ-yɔɔ ɛya lone nɖɩ se, Penuwɛɛlɩ. Pʋ-tɔbʋ se, Ɛsɔ ɛsɩndaa. 32 Wɩsɩ kɔma sɩkpa lɛ, Yaakɔɔbʋ tɛm ɖɛsʋʋ Penuwɛɛlɩ pɔɔ. Ɛɛwɛɛ eɖuki ɖakayɩ ɖakayɩ, mbʋ pʋyɔɔ yɔ, pɩmɛɣzɩ ɛ-takɩtayaɣ taa. 33 Pʋ-yɔɔ halɩ nɛ sɔnɔ Izirɛɛlɩ ñɩma ɛɛtɔkɩ taɖɩyɛ yɔɔ nandʋ ndʋ tɩkpaɣ takɩtayaɣ taa yɔ. Mbʋ pʋyɔɔ yɔ, Yaakɔɔbʋ takɩtayaɣ taa nandʋ ndʋ tɩ-yɔɔ paamaba nɛ pɩcam-ɩ.