31
1 Pʋwayɩ lɛ, Yaakɔɔbʋ nɩɩ se, Labaanɩ pɩyalaa tɔŋ se, ɛkpaɣ ḿba caa ñɩm tɩŋa. Se, ḿbʋ yebina nɛ ɛwɛnɩ ñɩm pɩtɩɩfɛyɩ mbʋ. 2 Yaakɔɔbʋ nawa ɖɔɖɔ se, ɛ nɛ Labaanɩ pɛ-hɛkʋ taa lɛ, pɩtatasɩ wɛʋ ɛzɩ ɖooo lɛ yɔ. 3 Peeye, KƖPAƔLƲ heyi Yaakɔɔbʋ se, ɛpɩsɩ ɛ-caanaa tɛ, ɛ-ñɩma cɔlɔ. Se, ɛnʋ wɛɣ ɛ-cɔlɔ.
4 Pʋwayɩ lɛ, Yaakɔɔbʋ tiyi payaa Raasɛɛlɩ nɛ Leyaa nɛ powolo ɛ-cɔlɔ hayɩm taa, ɖenɖe ɛ nɛ wondu paawɛɛ yɔ. 5 Powoba lɛ, eheyi-wɛ se, ɛnʋ nawa se ɛ nɛ pa-caa pɛ-hɛkʋ taa tatasɩ wɛʋ ɛzɩ ɖooo lɛ yɔ. Ɛlɛ, Ɛsɔ weyi ɛnʋ caa luŋuu ɛ-tɛɛ yɔ, ɛwɛ ɛnʋ cɔlɔ. 6 Se, mbaa lɛ, pasɩm camɩyɛ se, ɛlabɩ pa-caa tʋmɩyɛ nɛ e-ɖoŋ kpeekpe. 7 Se, paa mbʋʋ yɔ, emuli ɛnʋ nɛ ɛlɛɣzɩ mbʋ ɛɖʋwa se ɛhɛyɩɣ ɛnʋ yɔ, ɛzɩ tɔm hiu (10) mbʋ yɔ. Ɛlɛ, Ɛsɔ ñeteyebi-i se ɛla ɛnʋʋ ɛzaɣtʋ natʋyʋ. 8 Se, ye pa-caa ɛtɔm se, wondu ndʋ tɩ-yɔɔ wɛ marʋmarʋ yɔ, tɩkɛnɩ ɛnʋ ñɩndʋ yɔ, halɩñɩndʋ tɩŋa lʋlaɣ piya nzɩ sɩ-yɔɔ wɛ maɖʋmaɖʋ yɔ. Se, ye ɛtɔm se, ndʋ tɩ-yɔɔ wɛ canzɩ yɔ, tɩkɛnɩ ɛnʋ ñɩndʋ yɔ, halɩñɩndʋ tɩŋa lʋlaɣ piya nzɩ sɩ-yɔɔ wɛ canzɩ yɔ. 9 Se, mbʋʋ Ɛsɔ mʋ pa-caa wondu nɛ ɛcɛlɩ ɛnʋ. 10 Se, alɩwaatʋ ndʋ tɩ-taa wondu kpaɣ ɖama yɔ, tɩ-taa nakʋyʋ wiye eɖozaa se, ɛkʋsɩ ɛ-ɛza lɛ, ɛna se, kpɩna abalɩñɩna wena akpaɣaɣ wondu yɔ, a-taa naayɛ yɔɔ kɛwɛ canzɩ, nɛ lɛɛna yɔɔ ñɛwɛɛ maɖʋmaɖʋ. 11 Se, ɖoziye ńɖɩ ɖɩ-taa Ɛsɔ tiyiyu ya ɛnʋ se, Yaakɔɔbʋ! Ɛnʋ cosi se, ɛnʋʋ yɔ! 12 Ɛ́lɛ heyi-i se, ɛ́kʋsɩ ɛ-ɛza nɛ ɛna kpɩna abalɩñɩna wena awɛɛ akpaɣ wondu yɔ, a-taa naayɛ yɔɔ wɛ canzɩ, nɛ lɛɛna yɔɔ ñɛwɛɛ maɖʋmaɖʋ. Se, Pɩlabɩ ḿbʋ, mbʋ pʋyɔɔ yɔ, ɛnʋ na ḿbʋ Labaanɩ ɖiɣni-i labʋ yɔ. 13 Se, eheyi-i ɖɔɖɔ se, ɛ́lɛ lɛ, Ɛsɔ weyi ɛwɩlɩ ɛnʋʋ ɛ-tɩ Beetɛɛlɩ yɔ. Se, Peeye ɛnʋ siɣ pɩyɛ nɛ ɖɩkɛ kɔdaɣ taa ñɩnɖɛ, nɛ ɖenɖe ɛnʋ ɖuwaa se ɛlakɩ-ɩ mbʋ ɛnʋ ɖʋwa yɔ a. Se, Lɛɛlɛɛyɔ, ɛnʋ ɛ́kʋyɩ ɛjaɖɛ nɖɩ ɖɩ-taa, nɛ ɛ́pɩsɩ ɛ-ñɩma cɔlɔ. 14 Peeye, Raasɛɛlɩ nɛ Leyaa pocosi Yaakɔɔbʋ se, ḿba tatasɩ wɛnaʋ ñɩm nabʋyʋ pa-caa ɖɩɣa taa. 15 Pɔpɔzɩ-ɩ se, ḿba caa takpaɣ-wɛ ɛzɩ agɔma yɔ yaa we? Mbʋ pʋyɔɔ yɔ, ɛpɛdɩ-wɛ nɛ ɛtɔɔ pe-liidiye. 16 Se, pʋ-yɔɔ lɛ, ñɩm mbʋ pɩtɩŋa payɩ Ɛsɔ mʋ ḿba-caa cɔlɔ yɔ, pɩkɛ ḿba nɛ pe-piya pa-ñɩm. Se, Lɛɛlɛɛyɔ, ɛ́la mbʋ Ɛsɔ heyi-i yɔ pɩ-tɩŋa.
17 Peeye, Yaakɔɔbʋ ñɔɔzɩ ɛ-tɩ nɛ eyele pakpazɩ e-piya nɛ ɛ-halaa kʋyʋndʋʋ kpaŋnaŋ yɔɔ. 18 Pɛɖɛɣaɣ lɛ, ɛ́kpɛndɩnɩ e-wondu tɩŋa nɛ ñɩm mbʋ ehiɣ Mezoopotamii egeetiye taa yɔ pɩ-tɩŋa payɩ, se, ɛpɩsɩɣ Kanaanɩ ɛjaɖɛ taa ɛ-caa Izaakɩ tɛ. 19 Labaanɩ, ñaawobi e-heŋ kpɛm hʋm. Ɛɖɛ ḿbʋ lɛ, Raasɛɛlɩ sʋʋ nɛ ɛmɩlɩ ɛnʋʋ ɛ-caa ɛ-sɩʋkpelisi. 20 Piyele Yaakɔɔbʋ ñɛmɛlɩ Aram tʋ Labaanɩ ɛnʋ nɛ ɛɖɛɛ, eteheyi-i natʋyʋ. 21 Ɛɛkpɛndɩnɩ mbʋ pɩ-tɩŋa payɩ ɛwɛna yɔ, nɛ ese ewolo ɛtɛzɩ Efiraatɩ pɔɔ, nɛ ɛɖɛnɩ Gaalaadɩ pʋŋ taa.
22 Kɩyakʋ tozo ñɩŋgʋ wiye lɛ, nɔɔyʋ heyi Labaanɩ se, Yaakɔɔbʋ sewa. 23 Ɛ́lɛ kpaɣ ɛ-ɛyaa nɛ ɛ nɛ wɛ paɖʋ Yaakɔɔbʋ wayɩ. Halɩ pɔɖɔm kɩyakɩŋ lʋbɛ (7) pilim nɛ pɩcɔ pehiɣ-i Gaalaadɩ pʋŋ taa. 24 Ɛlɛ, pɩcɔ pehiɣ-i lɛ, Ɛsɔ lɩzɩ ɛ-tɩ ɖoó wena aɖɛwa yɔ a-taa nɛ ɛwɩlɩ Aram tʋ Labaanɩ ɖoziye taa, nɛ eheyi-i se, pɩ́taacɩbɩ-ɩ se, ɛyɔɔdʋʋ Yaakɔɔbʋ tɔm ɛzaɣtʋ natʋyʋ.
25 Labaanɩ hiɣ Yaakɔɔbʋ Gaalaadɩ pʋŋ taa lɛ, ɛ́lɛ tɛm siɣu ɛ-kɩɖanɖʋʋ peeye. Labaanɩ nɛ ɛ-ɛyaa pala ɖɔɖɔ ḿbʋ. 26 Pʋwayɩ lɛ, ɛ́yaa Yaakɔɔbʋ nɛ ɛpɔzɩ-ɩ se, ɛbɛ ɛlabɩ ḿbʋ yɔ? Se, epeɣzi ɛnʋ nɛ ɛkpaɣ ɛnʋ pɛlaa nɛ ɛɖɛnɩ-wɛ ɛzɩ yomaa mba pakpa-wɛ you taa yɔ. 27 Se, ɛbɛ laba nɛ epeɣzi ɛnʋʋ ḿbʋ nɛ ese mɛsaɣ tɛɛ eteheyi ɛnʋʋ natʋyʋ? Se, Ye eeheyi ɛnʋʋ yɔ, pʋbʋ, ɛnʋ kakpaɣ hendu teyaa, nɛ so nɛ cɩmɩŋ pa-maɖaa, nɛ pasɩɩ-ɩ nɛ ɛɖɛnɩ laŋhʋlɩmɩyɛ. 28 Se, ɛtatɩɩyebu ɛnʋ se, ɛnʋ ekpiikini ɛnʋ pɛlaa nɛ ɛnʋ sɛyɩnaa nɛ pɩwɩlɩ se, ɛnʋ sɛ-wɛ se pɩlabɩ wiɖiyi nɛ pɩcɔ pɛɖɛɛ! Se, toovenim lɛ, ɛlabɩ kɩmɛlɛndʋ. 29 Se, ɛnʋ wɛnɩ ɖoŋ se, ɛnʋ pɩzɩɣ ɛlabɩ-ɩ kɩdɛkɛdɩm. Ɛlɛ, ɛ-caa luŋuu Ɛsɔ weyi ɛ-tɛɛ yɔ, eheyi ɛnʋ ɖeɖe ɖoó taa se, pɩtaacɩ ɛnʋ se, ɛlakɩ Yaakɔɔbʋ ɛnʋ pʋyʋ. 30 Too! Lɛɛlɛɛyɔ, ɛɖɛwa se, pikpeɣdesaɣ-ɩ se ɛpɩsɩ ɛ-caa tɛ lɛ, pɩla ɛzɩma nɛ ɛmɩlɩ ɛnʋ sɩʋkpelisi yɔ? 31 Peeye Yaakɔɔbʋ cosi Labaanɩ se, sɔɔndʋ kpaɣaɣ ɛnʋ se, ɛ́lɛ ɛtaakɔɔ ɛmʋ ɛ-pɛlaa. 32 Ɛlɛ, ye ɛna ɛ-sɩʋkpelisi ɛnʋ ñɩma taa nɔɔyʋ cɔlɔ yɔ, pakʋ pʋdʋ. Se, ɛ́cɔnɩ mbʋ pɩ-tɩŋa payɩ pɩwɛ ɛnʋ tɛ yɔ pɩ-taa, ɛ nɛ ɩ pɛ-ɛyaa ɛsɩndaa nɛ ɛ́na, mbʋ pɩkɛ ɛ-ñɩm lɛ, ɛkpaɣ.
Toovenim lɛ, Yaakɔɔbʋ taana se, Raasɛɛlɩ mɩlɩ ɖɩɣa sɩʋkpelisi.
33 Yaakɔɔbʋ yɔ́ɔdɩ ḿbʋ lɛ, Labaanɩ sʋʋ ɛ nɛ Leyaa nɛ tʋmlaɖaa halaa ñɩma ḿba pa-naalɛ pa-kɩɖanɖɩŋ tɛɛ, ɛtana nabʋyʋ. Ɛlɩnɩ Leyaa kɩɖanɖʋʋ tɛɛ lɛ, ɛsʋʋ Raasɛɛlɩ ñɩŋgʋ tɛɛ. 34 Ŋgʋ, Raasɛɛlɩ kakpaɣnɩ ɛ-caa sɩʋkpelisi. Ɛɛmɛsɩ-sɩ kʋyʋndʋʋ kpaŋnɔ yɔɔ kpelaɣ sɔsɔɔ taa nɛ ɛcaɣ pʋ-yɔɔ. Labaanɩ wɛɖɩ kɩɖanɖʋʋ ŋ́gʋ kɩ-tɩnɛ kɩ-tɛɛ, ɛtana nabʋyʋ. 35 Peeye Raasɛɛlɩ heyi ɛ-caa se, ye ɛnʋ ɛtakʋyɩ nɛ ɛsɩŋ ɛ-ɛsɩndaa yɔ, pɩtaawɩzɩ-ɩ. Mbʋ pʋyɔɔ yɔ, ɛnʋ ɖɔŋ halaa tʋmɩyɛ labʋ.
Labaanɩ wɛɖɩ, ɛtana sɩʋ kpelisi nzɩ. 36 Pɩlabɩ ḿbʋ lɛ, Yaakɔɔbʋ pana kpa, nɛ ɛkʋyɩ Labaanɩ yɔɔ nɛ ɛpɔzɩ-ɩ se, ɛbɛ ɛnʋ yʋsɩnɩ-ɩ? Ɛbɛ ɛnʋ wɛɛkaa nɛ ɛwɛɛ ɛnʋ wayɩ nɛ paabaa titiɖe ḿbʋ? 37 Se, ɛwɛɖʋʋ ɛnʋ wondu tɩŋa taa payɩ yɔ, ɛna ɛ-ɖɩɣa taa wonuu nakʋyʋ yaa we? Se, Ye ɛna nakʋyʋ yɔ, ɛlɩzɩ-kʋ nɛ ɛwɩlɩ ɛ nɛ ɩ pɛ-ɛyaa ɛsɩndaa, nɛ paba hʋʋ ɛ nɛ ɩ pa-naalɛ pɛ-hɛkʋ taa tɔm. 38 Se, ɛnʋ caɣ ɛ-cɔlɔ pɩnzɩ nɩɩlɛ (20), e-heŋ nɛ ɛ-pʋŋ pɔtɔhɔlɔsɩ wiɖiye kaʋ. Ɖɔɖɔ lɛ, wiɖiye ɛnʋ tɔtɔɔ e-wondu taa ɛyaŋ. 39 Se, wiɖiye tɛyɛ wondu takʋ kpɩnɛ naɖɩyɛ nɛ ɛnʋ kpaɣ-ɖɩ ewoni-i. Se, ɛnʋ maɣmaɣ, ɛhɛyaɣaɣ kpɩna wena aleba yɔ a-yɔɔ. Kpɩna wena pamɩlɩ-yɛ yɔ, paa wɩsɩdaa yaa ɖoódaa paamɩlɩ-yɛ yɔ, ɛpɔzaɣ ɛnʋ se, ɛhɛyɩ a-yɔɔ. 40 Se, Soŋaɣ kʋwaɣ ɛnʋʋ wɩsɩdaa, nɛ nikaɣ ñakʋʋ-ɩ ɖoódaa, nɛ ɛnʋ tapɩzɩɣ se ɛkpɩtɩ ɛsɩyɛ. 41 Se, pɩlabɩ pɩnzɩ nɩɩlɛ (20) yɔ, ɛnʋ wɛʋ ɛ-tɛ yɔ. Se, ɛnʋ labɩ-ɩ tʋmɩyɛ pɩnzɩ hiu nɛ naanza (14) ɛ-pɛlaa ḿba pa-naalɛ pɔ-yɔɔ, nɛ pɩnzɩ loɖo (6) e-wondu yɔɔ. Ɛlɛ, ɛlɛɣzɩ mbʋ ɛɛɖʋwa se, ɛhɛyɩɣ ɛnʋ yɔ, tɔm hiu (10). 42 Se, ye pɩtɛkɛ se ɛnʋ cɔzɔ Abɩraham Ɛsɔ, Ɛsɔ weyi ɛlakaɣ nɛ ɛnʋ caa Izaakɩ seliɣ yɔ, ɛɛwɛ ɛnʋ cɔlɔ nɛ ɛsɩnɩ ɛnʋʋ yɔ, pʋbʋ, eeyebi ɛnʋ nɛ ɛnʋ ɖɛɛ ndaakpasɩ. Ɛlɛ, Ɛsɔ ɛnʋ ɛna ɛzɩma mbʋ ɛpɛŋa ɛnʋʋ tɛtɛ yɔ, nɛ tʋmɩyɛ nɖɩ ɛnʋ laba nɛ pɩɖɛɛ ɛnʋ yɔ, nɛ ɛ́lɛ hʋʋ ɛ nɛ ɛnʋ pɔ-tɔm ɖeɖe ɖoó taa. 43 Peeye, Labaanɩ cosi Yaakɔɔbʋ se, pɛlaa ḿba, pɛkɛ ɛnʋ pɛlaa, nɛ pe-piya kɛ ɛnʋ ñɩnzɩ. Se, wondu ńdʋ, ɛnʋ tɩnɩ-tʋ, nɛ mbʋ pɩ-tɩŋa payɩ ɛ́lɛ naɣ yɔ, ɛnʋ tɩna. Ɛlɛ, se, pɩkpaɣʋnɩ puwiye nɖɩ yɔ, ɛnʋ ɛɛpɩzɩɣ ɛtasɩ ɛ-pɛlaa yaa piya nzɩ palʋlaa yɔ́ɔ labʋ nabʋyʋ. 44 Se, lɛɛlɛɛyɔ, pɩtalaa se ɛnʋ nɛ ɩ pa-naalɛ pánɩnɩ ɖama. Se, nabʋyʋ ɛwɛɛ pɛ-hɛkʋ taa nɛ pɩlɩzɩ pa-aseɣɖe.
45 Peeye, Yaakɔɔbʋ kpaɣ pɩyɛ nɛ esiɣ-ɖɩ. 46 Pʋwayɩ lɛ, eheyi ɛ-ɛyaa se, pɔtɔzɩ pɛ. Paba tɔzɩ-yɛ nɛ pakaa kamaʋ. Pʋbʋ wayɩ lɛ, patɩŋa pɔtɔɔ tɔɔnaɣ kʋ-yɔɔ peeye. 47 Labaanɩ yaa kamaʋ ŋgʋ se, Yeegaarɩ Sahatuutaa, nɛ Yaakɔɔbʋ ñayaa-kʋ se, Gaaleyɛɛdɩ. b 48 Ɛlɛ Laabaani kaɖɩ kpayɩ se, kamaʋ ŋgʋ kɩlɩzɩɣnɩ ɛ nɛ ɩ pa-aseɣɖe kɩyakʋ ŋgʋ. Pʋ-yɔɔ paya-kʋ se, Gaaleyɛɛdɩ. Pʋ-tɔbʋʋ se, aseɣɖe kamaʋ. 49 Patasɩ-kʋ ɖɔɖɔ se, Micipaa. Pʋ-tɔbʋʋ se, ɖenɖe pacakɩ nɛ pefeŋiɣ yɔ. Mbʋ pʋyɔɔ yɔ, Labaanɩ kaɖʋwa se, KƖPAƔLƲ efeŋ-wɛ alɩwaatʋ ndʋ paatasɩɣ ɖama cɔlɔ wɛʋ yɔ. 50 Eheyi-i se, ye ɛpɛɛŋɩ ɛnʋ pɛlaa tɛtɛ yaa ɛtasɩɣ kpaɣʋ halaa lɛlaa yɔ, ɛ́kpa ɛ-tɩ camɩyɛ. Mbʋ pʋyɔɔ yɔ, Ɛsɔ maɣmaɣ kɛnɩ pa-aseɣɖe tʋ, pɩtɛkɛ ɛyʋ.
51 Pʋwayɩ lɛ, Labaanɩ heyi Yaakɔɔbʋ se, ɛ́cɔnɩ ɛna kamaʋ ŋgʋ ɛnʋ ka ɛ nɛ ɩ pɛ-hɛkʋ taa yɔ, nɛ pɩyɛ nɖɩ pesiɣaa yɔ. 52 Kamaʋ ŋ́gʋ nɛ pɩyɛ ńɖɩ palɩzɩɣnɩ pa-aseɣɖe. Pɩfɛyɩ se ɛnʋ ɛmanɩ kʋ-yɔɔ nɛ ewobini ɛ-yɔɔ se ɛlakɩ-ɩ kɩdɛkɛdɩm. Ɛ́lɛ ɖɔɖɔ ɛtaamanɩ kʋ-yɔɔ nɛ ewobini ɛnʋ yɔɔ se ɛlakɩ-ɩ kɩdɛkɛdɩm. 53 Se, Abɩraham Ɛsɔ nɛ Naahɔɔrɩ ñɩnʋ, páhʋʋ ɛ nɛ ɩ pɔ-tɔm.