30
1 Leyaa lʋlaɣ piya nɛ Raasɛɛlɩ ñana se, ɛnʋ ɛɛpɩzɩɣ nɛ ɛlʋlɩ lɛ, ɛpazɩ ɛ-kɔɔ sʋsɩ labʋ, nɛ eheyi Yaakɔɔbʋ se, ɛha-ɩ piya, pɩtɛkɛ mbʋʋ yɔ, ɛnʋ sɩkɩ. 2 Peeye, Yaakɔɔbʋ pana kpanɩ-ɩ nɛ ɛpɔzɩ-ɩ se, ɛnʋ kɛ Ɛsɔ yaa we? Ɛ́lɛ ɖaŋɩnɩ-ɩ se ɛtaalʋlɩ. 3 Ɛlɛ, Raasɛɛlɩ cosi-i se, ɛkpaɣ ɛnʋ tʋmlaɖʋ halɩñɩnʋ Bilihaa nɛ ɛ́lɛ lʋlɩ ɛnʋʋ piya. Pɩtɔma yɔ, pɩɩtɩŋɩnɩ ɛ́lɛ yɔɔ, nɛ ɛnʋ hiɣ ɖɔɖɔ piya. 4 Mbʋʋ ɛkpaɣ ɛ-tʋmlaɖʋ halɩñɩnʋ Bilihaa nɛ ɛcɛlɩ Yaakɔɔbʋ se, ɛ́lɛ nɛ ɩ pasʋʋ.
5 Ɛ nɛ ɛ́lɛ pasʋwa lɛ, Bilihaa haɣ hoa, nɛ ɛlʋlɩ Yaakɔɔbʋ abalɩbɩɣa. 6 Pɩlabɩ ḿbʋ lɛ, Raasɛɛlɩ ma kubuka se, Ɛsɔ ɖezi ɛnʋ tɔm. Ewelisini ɛnʋ nɛ ɛha ɛnʋʋ abalɩbɩɣa. Pʋ-yɔɔ ɛya-kɛ se, Daanɩ.a
7 Pʋwayɩ lɛ, Raasɛɛlɩ tʋmlaɖʋ halɩñɩnʋ Bilihaa tasɩ hoa haɣʋ nɛ ɛlʋlɩ Yaakɔɔbʋ abalɩbɩɣa naalɛ ñɩŋga. 8 Pʋ-yɔɔ Raasɛɛlɩ kaɖɩ kpayɩ se, ɛ nɛ ɛ-kɔɔ palʋba siŋŋ nɛ ɛwa ɛ́lɛ. Ɛlɛ, ɛ́yaa pɩɣa ŋ́ga se, Nɛfɩtaalii. b
9 Leyaa ñɔkɔma ɛna se, ɛɛtasɩɣ lʋlʋʋ lɛ, ɛkpaɣ ɛ-tʋmlaɖʋ halɩñɩnʋ Zilipaa nɛ ɛcɛlɩ Yaakɔɔbʋ se ɛ́lɛ ɛ́kɛ ɛ-halʋ. 10 Pacaɣaɣ lɛ, Leyaa tʋmlaɖʋ halɩñɩnʋ Zilipaa haɣ hoa nɛ ɛlʋlɩ Yaakɔɔbʋ abalɩbɩɣa. 11 Peeye, Leyaa mabɩ kubuka se, ñʋʋ leleŋ weyi lɛ! Pʋ-yɔɔ ɛya-kɛ se Gaadɩ. c 12 Pʋwayɩ lɛ, Zilipaa tasɩ lʋlʋʋ Yaakɔɔbʋ abalɩbɩɣa naalɛ ñɩŋga. 13 Ɖɩnɛɛ Leyaa tɔm se, koboyaɣ ŋgaa lɛ, ḿbʋ yɔ! Lɛɛlɛɛyɔ, halaa kpeekpe pɩzɩɣ pɔyɔɔdɩ se, ɛwɛ koboyaɣ taa. Pʋ-yɔɔ ɛya kaka se Asɛɛrɩ. d 14 Pʋkɔma pɩtala tɔɔnaɣ ŋga payaɣ se Bilee yɔ, ka-kʋm alɩwaatʋ lɛ, nakʋyʋ wiye Ruubɛɛnɩ wolo hayɩm taa nɛ ehii sɔɔlɩm cʋcʋla. Ehi-yɛ lɛ, ewona nɛ ɛcɛlɩ e-ɖoo Leyaa. Raasɛɛlɩ nawa lɛ, ɛpɔzɩ Leyaa se, ɛ́lɛ ɛha-ɩ sɔɔlɩm cʋcʋla wena ɛ-pɩyalʋ kɔnaa yɔ a-taa naayɛ. 15 Peeye, Leyaa cosi-i se, ɛmʋ ɛnʋ walʋ, pɩtɔɖɔɔ-ɩ nɛ ɛñɩnɩɣ se ɛtasɩ ɖɔɖɔ ɛnʋ pɩyalʋ sɔɔlɩm cʋcʋla mʋʋ naa we? Raasɛɛlɩ kitini-i se, ye mbʋʋ yɔ, Yaakɔɔbʋ ɛsʋʋ ɛ-cɔlɔ ɖoó wena akɔŋ yɔ, ɛ-pɩyalʋ sɔɔlɩm cʋcʋla wena ɛhaɣ ɛnʋ yɔ, a-lone taa.
16 Ɖanaɣ ɖanaa nɛ Yaakɔɔbʋ lɩnɩ hayɩm nɛ ɛtalɩ lɛ, Leyaa lɩɩ ɛkatɩ-ɩ nɛ ɛkaɖɩ-ɩ kpayɩ se, ɛsʋʋ ɛ-cɔlɔ ɖoó ana. Mbʋ pʋyɔɔ yɔ, ɛmʋ waɖɛ nɖɩɩ, ɛnʋ pɩyalʋ sɔɔlɩm cʋcʋla lone taa. Pʋ-yɔɔ, Yaakɔɔbʋ woba nɛ ɛ nɛ ɩ pasʋʋ ɖoó ana. 17 Ɛsɔ nɩɩ Leyaa tenduu. Ɛ́lɛ ñahaɣ hoa nɛ ɛlʋlɩ Yaakɔɔbʋ abalɩbɩɣa kagbaanzɩ ñɩŋga. 18 Peeye, Leyaa mabɩ kubuka se, Ɛsɔ hɛyɩ ɛnʋʋ ɛkpaɣʋ ɛ-tʋmlaɖʋ halɩñɩnʋ nɛ ɛcɛlɩ ɛ-walʋ yɔ pʋ-yɔɔ. Pʋ-yɔɔ ɛya ɛ-pɩyalʋ ɛnʋ se Isaakaarɩe.
19 Pʋwayɩ lɛ, Leyaa tasɩ ɖɔɖɔ hoa haɣʋ nɛ ɛlʋlɩ Yaakɔɔbʋ ɛ-pɩyalʋ loɖo ñɩnʋ. 20 Ɛlʋlɩ-ɩ lɛ, ɛyɔɔdɩ se, Ɛsɔ labɩ-ɩ kʋjɔʋ kɩbaŋgʋ. Lɛɛlɛɛyɔ, ɛ-walʋ kaɣ-ɩ hɩɖɛ dʋʋ, mbʋ pʋyɔɔ yɔ, ɛnʋ lʋlɩ-ɩ abalɩbiya loɖo. Pʋ-yɔɔ, ɛya ɛ-pɩyalʋ loɖo ñɩnʋ se Zabulɔɔnɩ f 21 Pʋwayɩ lɛ, ɛlʋlɩ halɩbɩɣa nɛ ɛyaa-kɛ se, Diinaa.
22 Pɩlakaɣ ḿbʋ lɛ, Ɛsɔ taasɔɔ Raasɛɛlɩ yɔɔ. Ɛnɩ e-tenduu nɛ ɛha-ɩ lʋlʋʋ. 23 Ɛ́lɛ haɣ hoa nɛ ɛlʋlɩ abalɩbɩɣa. Ɛkaɖɩ kaɣlaa se, Ɛsɔ lɩzɩ ɛnʋʋ ɛ-fɛyɛ taa. 24 Ɛyaa ɛ-pɩyalʋ se, Yoosɛɛfʋ g nɛ ɛyɔɔdɩ se, KƖPAƔLƲ ɛtasɩ-ɩ haʋ abalɩbɩɣa.
Ɛzɩma mbʋ Yaakɔɔbʋ pɩsɩ ñɩm tʋ yɔ
25 Raasɛɛlɩ lʋlɩ Yoosɛɛfʋ lɛ, Yaakɔɔbʋ heyi Labaanɩ se, éyele ɛnʋ nɛ ɛpɩsɩ ɛnʋ ɛjaɖɛ taa ɛnʋ tɛ. 26 Se, éyebi-i nɛ ɛnʋ kpɛndɩnɩ ɛnʋ halaa nɛ ɛnʋ piya. Mbʋ pʋyɔɔ yɔ, ɛ-maɣmaɣ ɛna tʋmɩyɛ nɖɩ ɛnʋ labɩ-ɩ pɔ-yɔɔ yɔ. 27 Labaanɩ cosi-i se, ɛnʋ tendi-i se, ewelisini-i camɩyɛ. Ɛnʋ agɔlɩma wɩlɩ ɛnʋ se, ɛ-yɔɔ KƖPAƔLƲ wazɩ ɛnʋ yɔɔ. 28 Ɛpɔzɩ Yaakɔɔbʋ se, ɛsɩna e-liu wɛɛ se ɛnʋ ɛhɛyɩ-ɩ? 29 Ɛ́lɛ heyi-i se, ɛna tʋmɩyɛ nɖɩ ɛnʋ labɩ-ɩ yɔ ɖeu nɛ ɛsɩna mbʋ pɩtɩŋnɩ ɛnʋ yɔɔ nɛ e-wondu kalakʋ huúu yɔ. 30 Se, mbʋ ɛɛwɛnɩ pazɩ nɛ pɩcɔ ɛnʋ wolo yɔ, pihuwaa pɩtɩɩfɛyɩ. Se, KƖPAƔLƲ wazɩ ɛ-yɔɔ kpaɣ ɖooo ɛzɩ ɛnʋ sʋʋ ɛ-tɛ yɔ. Se, lɛɛlɛɛyɔ alɩwaatʋ tatalɩda se ɛnʋ ɖɔɖɔ ɛla ɛ-maɣmaɣ ɛ-hɔʋ tʋmɩyɛ naa we? 31 Labaanɩ tasɩ-ɩ pɔzʋʋ se, ɛbɛ pɩwɛɛ se ɛnʋ ɛhɛyɩ-ɩ? Yaakɔɔbʋ cosi-i se, ɛtaahɛyɩ ɛnʋʋ pʋyʋ. Ɛlɛ, ye etisaa se ɛlakɩ-ɩ mbʋ ɛnʋ pɔzʋʋ-ɩ yɔ́ɔ yɔ, pʋbʋ, ɛnʋ ɖaɣnɩɣ e-wondu kalakʋ yɔɔ cɔnaʋ ɛzɩ ɖooo yɔ. 32 Se, sɔnɔ maɣmaɣ ɛnʋ ɖɔŋ e-heŋ nɛ ɛ-pʋŋ pa-kalakɩŋ taa, nɛ ɛnʋ lɩzɩ heŋ kɩkpɛdɩŋ nɛ wondu ndʋ tɩ-yɔɔ wɛ maɖʋmaɖʋ yɔ, tɩ-tɩŋa payɩ, nɛ ɛnʋ kɛzɩ-wɛ kɩcaʋ. Ɛnʋ, kɩhɛyʋʋ lɛ. 33 Se, pʋwayɩ lɛ, ɛpɩzɩɣ ewolo nɛ ɛcɔnɩ ɛnʋ wondu taa nɛ ɛna se ndʋ ɛnʋ yɔɔdaa yɔ, ndʋʋ ɛnʋ laba yaa pɩtɛkɛ ndʋ? Se, ye ɛna wondu ndʋ tɩ-yɔɔ fɛyɩ maɖʋmaɖʋ yaa heŋ weyi ɛtɛkɛ kɩkpɛdɩŋ yɔ́ɔ ɛnʋ wondu taa lɛ, pʋbʋ ɛnʋ mɩlɩ-wɛ. 34 Peeye, Labaanɩ cosi-i se, pɩwɛ ɖeu! Pɩla ɛzɩ ɛyɔɔdʋʋ yɔ.
35 Ɛlɛ, kɩyakʋ ŋgʋʋ, Labaanɩ lɩzɩ e-wondu taa ndʋ tɩ-tɩŋa tʋ-yɔɔ wɛ maɖʋmaɖʋ yɔ, nɛ heŋ kɩkpɛdɩŋ tɩŋa, nɛ ɛɖʋzɩ ɛ-pɩyalaa nesi taa. 36 Ɛcɛlɩ-wɛ-tʋ lɛ, pakpaɣ-tʋ nɛ pɔɖɔ kɩyakɩŋ naadozo nɛ poposi pa-tɩ siŋŋ nɛ Yaakɔɔbʋ. Piyele Yaakɔɔbʋ ñɛwɛɛ nɛ ɛtɩŋɩɣ Labaanɩ wondu ndʋ tɩkazaa yɔ.
37 Peeye, Yaakɔɔbʋ kpaɣ tɩŋ ndɩ ndɩ naadozo pilinzi lɛŋ ñɩnzɩ, nɛ ɛlɩyɩ sɩ-yɔɔ tɔnaɣ tɔnaɣ nɛ pɩnaɣ hʋlʋmɩŋ. 38 Ɛkpaɣ pilinzi nzɩ ɛlɩyɩ sɩ-yɔɔ ḿbʋ yɔ, nɛ ɛɖʋ-sɩ wondu lɩm ɖɩñɔyɛ tɩ-ɛsɩndaa. Mbʋ pʋyɔɔ yɔ, wondu woki lɩm ñɔʋ lɛ, tɩkpaɣ ɖama peeye. 39 Ɛlabɩ ḿbʋ lɛ, wondu kpa ɖama pilinzi lɛŋ ñɩnzɩ ńzɩ sɩ-ɛsɩndaa, nɛ tɩlʋlɩ piya nzɩ sɩ-yɔɔ wɛ canzɩ nɛ nzɩ sɩ-yɔɔ wɛ maɖʋmaɖʋ yɔ. 40 Piyele heŋ weyi Yaakɔɔbʋ kalɩzaa nɛ ɛkɛzɩ kɩcaʋ yɔ, ɛkɛzɩ ɛ́lɛ ɛza nɛ Labaanɩ heŋ kɩkpɛdɩŋ kalakʋ yɔɔ.
Mbʋʋ ɛ́laba nɛ ehiɣ ɛ-maɣmaɣ e-wondu kalakɩŋ, etesidi-i Labaanɩ wondu taa. 41 Ɖɔɖɔ lɛ, paa ɛsɩmtaa wondu ndʋ tikpeetaa yɔ, tiwoki se tɩkpaɣ ɖama lɛ, Yaakɔɔbʋ sɩɩ tɩ-ɛsɩndaa pilinzi lɛŋ ñɩnzɩ nzɩɩ wondu lɩm ɖɩñɔyɛ se, tɩkpa ɖama sɩ-ɛsɩndaa. 42 Ɛlɛ, ye wondu ndʋ tɩkpaɣ ɖama yɔ, tɩwɩlaa yɔ, ɛɛsɩɣ pilinzi ńzɩ. Mbʋʋ pɩlaba nɛ kpɩna wena awɩlaa yɔ, akɛ Labaanɩ ñɩna, nɛ wena alɛ kpeetaa yɔ, akɛ Yaakɔɔbʋ ñɩna.
Yaakɔɔbʋ seu Labaanɩ tɛ yɔ
43 Pɩlabɩ ḿbʋ lɛ, Yaakɔɔbʋ hiɣ ñɩm pɩtɩɩfɛyɩ. Ɛɛwɛnɩ heŋ nɛ pʋŋ sakɩyɛ sakɩyɛ, nɛ tʋmlaɖaa halɩñɩma nɛ abalɩñɩma, nɛ kʋyʋndʋʋ kpaŋnaŋ nɛ kpaŋasɩ.