29
Yaakɔɔbʋ katʋʋ Raasɛɛlɩ yɔ
1 Pʋwayɩ lɛ, Yaakɔɔbʋ kpaɣ nʋmɔʋ se, ɛɖɛɣ ajɛɛ wena awɛnɩ wɩsɩɖɩlɩyɛ taa yɔ, a-hɔɔlʋʋ taa. 2 Ɛkɔma ɛtalɩ tɛyɛ yɔɔ lone naɖɩyɛ taa lɛ, ɛna lɔkɔ nakʋyʋ. Heŋ nɛ pʋŋ, paawɛ peeye kalakɩŋ naadozo nɛ pɛhɛzɩɣ. Peeye powokaɣni wondu nɛ tɩñɔʋ lɩm. Paaɖɩɣ pɩyɛ sɔsɔɖɛ naɖɩyɛ kʋ-nɔɔ. 3 Pɩkɔŋ nɛ wondu kpeɣli tɩ-tɩŋa lɛ, pepilisi pɩyɛ ńɖɩ nɛ pɩkazɩ polu lɩm nɛ paɖʋ-tʋ nɛ tɩñɔɔ. Pʋwayɩ lɛ, papɩsɩnɩ pɩyɛ ɖi-lone taa. 4 Peeye, Yaakɔɔbʋ ya ninɖiɣyaa nɛ ɛsɛɛ-wɛ nɛ ɛpɔzɩ-wɛ se, le palɩnaa? Paba cosi-i se, palɩnɩ Haraanɩ tɛtʋ taa peeye. 5 Ɛtasɩ-wɛ pɔzʋʋ se, pasɩm Naahɔɔrɩ pɩyalʋ, Labaanɩ yaa we? Petisi se, ɛɛɛ. 6 Ɛtasɩ-wɛ pɔzʋʋ se, ɛ́lɛ wɛ alaafɩya? Pocosi-i se, ɛwɛ alaafɩya, nɛ peheyi-i se, ɛ́lɛ pɛlɛ Raasɛɛlɩ nɛ e-heŋ peɖiɣna wobuu pɔ-cɔlɔ peeye. 7 Yaakɔɔbʋ heyi-wɛ se pɩtahanda, alɩwaatʋ tɩtalɩda se pekpeɣli wondu. Se, paɖʋ wondu lɩm nɛ tɩñɔɔ nɛ patɩŋ-tʋ. 8 Paba cosi-i se, ye ninɖiyiyaa tɩŋa etekpeɣli po-wondu yɔ, ḿba ɛɛpɩzɩɣ nɛ pala ḿbʋ. Patɩŋa pekpeɣliɣ-tʋ lɛ, pepilisi lɔkɔ nɔɔ pɩyɛ nɛ polu lɩm nɛ paɖʋ-tʋ nɛ tɩñɔɔ.
9 Yaakɔɔbʋ yɔɔdaɣnɩ-wɛ ḿbʋ lɛ, Raasɛɛlɩ nɛ ɛ-caa wondu patɩtalʋ, mbʋ pʋyɔɔ yɔ, ɛɛkɛ ninɖiɣyu. 10 Yaakɔɔbʋ tɩna e-ɖoo ɖalʋ Labaanɩ pɛlɛ Raasɛɛlɩ nɛ e-wondu lɛ, ewolo epilisi lɔkɔ nɔɔ pɩyɛ, nɛ elu lɩm nɛ ɛɖʋ-tʋ nɛ tɩñɔɔ. 11 Pʋwayɩ lɛ, Yaakɔɔbʋ kpiikini Raasɛɛlɩ nɛ ɛ-taa hʋlɩmɩ nɛ ɛ-ɛsɩtɛɣlɩm kpe. 12 Peeye eheyi Raasɛɛlɩ se, ɛnʋ kɛ ɛ-caa ñɩnʋ, ɛkɛ Reebeeka pɩyalʋ. Ɖɩnɛɛ, ɛ́lɛ sewa nɛ ewolo eheyi ɛ-caa ndʋ Yaakɔɔbʋ heyi-i yɔ. 13 Eheyi ɛ́lɛ se, pɩkɛ ɛ́lɛ neu halɩñɩnʋ pɩyalʋ Yaakɔɔbʋ lɛ, ɛtɩlɩʋ nɛ ese nɛ ɛkatɩ-ɩ nɛ ekpiikini-i nɛ ɛkpaɣ-ɩ nɛ ewoni ɖɩɣa. Pʋwayɩ lɛ, Yaakɔɔbʋ kɛdɩ Labaanɩ mbʋ pɩtalɩ ɛnʋ yɔ pɩ-tɩŋa payɩ. 14 Ɖɩnɛɛ Labaanɩ heyi-i se, toovenim lɛ, ɛkɛ ɛnʋ ñɩnʋ, ɛ nɛ ɩ pɛkɛ calɩm kʋɖʋmɩm. Pɩlabɩ ḿbʋ lɛ, Yaakɔɔbʋ cáɣ Labaanɩ tɛ fenaɣ nɛ kɛ-tɛɛ.
Yaakɔɔbʋ kpaɣʋ halaa naalɛ yɔ
15 Nakʋyʋ wiye Labaanɩ ya Yaakɔɔbʋ nɛ eheyi-i se, ɛkɛ ɛnʋ ñɩnʋ. Ɛlɛ, pɩtɛkɛ pʋ-yɔɔ pɩwɛɛ se, ɛla ɛnʋʋ tʋmɩyɛ falaa. Ɛpɔzɩ ɛ́lɛ se, ɛbɛɛ ɛ́lɛ caɣ se ɛnʋ ɛhɛyɩ-ɩ?
16 Ŋgʋ, Labaanɩ kɛwɛnɩ pɛlaa naalɛ. Payaɣ sɔsɔ se, Leyaa, nɛ cikpelu se, Raasɛɛlɩ. 17 Leyaa ɛsɩndaa taatʋ, piyele, Raasɛɛlɩ ñeɖe kamaɣ fɛyɩ. 18 Yaakɔɔbʋ kɔsɔɔlɩ Raasɛɛlɩ. Pʋ-yɔɔ eheyi Labaanɩ se, ɛnʋ lakɩ-ɩ tʋmɩyɛ pɩnzɩ lʋbɛ (7), nɛ ɛnʋ kpaɣ ɛ-pɛlɛ cikpelu Raasɛɛlɩ. 19 Peeye, Labaanɩ tisaa nɛ eheyi-i se, pɩkɩlɩ ɛnʋʋ ɖeu se, ɛkpaɣ-ɩ ɛzɩ nɔɔyʋ kakpaɣnɩ-ɩ yɔ. Se, ɛ́caɣ ɛnʋ cɔlɔ.
20 Ḿbʋ yebina nɛ Yaakɔɔbʋ la Raasɛɛlɩ yɔɔ tʋmɩyɛ pɩnzɩ lʋbɛ (7). Pɩnzɩ nzɩ sɩɩɖɛ ɛ-ɛsɩndaa lɔŋ kɛlɛʋ, ɛzɩ kɩyakɩŋ nɩɩyɩ yɔ. Mbʋ pʋyɔɔ yɔ, ɛɛsɔɔlɩ ɛ́lɛ pɩtɩɩfɛyɩ.
21 Pʋwayɩ lɛ, Yaakɔɔbʋ heyi Labaanɩ se, alɩwaatʋ ndʋ ɛ nɛ ɩ paɖʋwa yɔ, tɩtɛma. Se, ɛ́cɛlɩ ɛnʋʋ ɛnʋ halʋ. Ɛnʋ caɣ se ɛkpaɣ-ɩ.
22 Pʋ-yɔɔ, Labaanɩ ya peeye ñɩma kpeekpe nɛ pa nɛ ɩ pɔtɔɔ halɩkpaɣyɛ kazandʋ. 23 Tɔɔ! Ɖóo kɔma se puyuu lɛ, Labaanɩ ñakpaɣ ɛ-pɛlɛ Leyaa nɛ ewoni Yaakɔɔbʋ cɔlɔ se ɛ́lɛ nɛ ɩ pacaɣ. 24 Ɖóo ana a-taa ɖɔɖɔ Labaanɩ kakpaɣ ɛ-tʋmlaɖʋ halɩñɩnʋ Zilipaa nɛ ɛcɛlɩ ɛ-pɛlɛ Leyaa, se, ɛ́kɛ ɛ́lɛ tʋmlaɖʋ. 25 Kifema tanaŋ tɛɛ lɛ, Yaakɔɔbʋ na se Leyaa pɛcɛlɩ-ɩ. Peeye, ɛpɔzɩ Labaanɩ se, ɛbɛɛ ɛlabɩ-ɩ ḿbʋ? Pɩtɛkɛ Raasɛɛlɩ yɔɔ, ɛnʋ labɩ-ɩ tʋmɩyɛ naa we? Pɩlabɩ ɛzɩma nɛ ɛcɛtɩ-ɩ mbʋ? 26 Labaanɩ cosi-i se, ḿba tɛ sɔɔnzɩ taa lɛ, neu ɛɛpɩzɩɣ ɛwalɩ nɛ ɛ-kɔɔ kpɛndɩ ɛwɛɛ. 27 Ɛtasɩ-ɩ heyuu se, tɔɔ! Ɛ nɛ sɔsɔ pɛtɛzɩ pa-halɩkpaɣyɛ kazandʋ tɔɔʋ kpɩtaʋ. Se, pʋwayɩ lɛ, ḿba kɛcɛlɩ-ɩ neu ɖɔɖɔ. Ɛlɛ, pɩwɛɛ se ɛtasɩ ɛnʋ tʋmɩyɛ labʋ pɩnzɩ lʋbɛ (7) nɛ ɛsɔzɩ. 28 Peheyi Yaakɔɔbʋ ḿbʋ lɛ, ɛ́lɛ tisi nɛ ɛ nɛ Leyaa pɛtɛzɩ pa-halɩkpaɣyɛ kazandʋ kpɩtaʋ. Kpɩtaʋ ŋ́gʋ, kɩtɛma lɛ, Labaanɩ cɛlɩ-ɩ ɛ-pɛlɛ cikpelu Raasɛɛlɩ. 29 Pu-wiye ńɖɩ ɖɔɖɔ Labaanɩ kpaɣ ɛ-tʋmlaɖʋ halɩñɩnʋ Bilihaa nɛ cɛlɩ ɛ-pɛlɛ Raasɛɛlɩ se, ɛ́kɛnɩ ɛ́lɛ tʋmlaɖʋ. 30 Yaakɔɔbʋ nɛ Raasɛɛlɩ pacaɣ, nɛ ɛsɔɔlɩ ɛ́lɛ nɛ pɩkɩlɩ Leyaa. Ɛ́lɛ yɔɔ lɛ, ɛtasɩ ɖɔɖɔ Labaanɩ tʋmɩyɛ labʋ pɩnzɩ lʋbɛ (7).
Yaakɔɔbʋ piya tɔm
31 KƖPAƔLƲ nawa se Yaakɔɔbʋ tɔsɔɔlɩ Leyaa ɛzɩ ɛsɔɔlʋʋ Raasɛɛlɩ yɔ lɛ, ɛha ɛlɛɛ piya nɛ eyele nɛ Raasɛɛlɩ kɛ kaalʋlaɣ. 32 Pɩlabɩ ḿbʋ lɛ, Leyaa haɣ hoa nɛ ɛlʋlɩ abalɩbɩɣa nɛ ɛyaa-kɛ se, Ruubɛɛnɩ a Mbʋ pʋyɔɔ yɔ, ɛmaɣzaɣ se, KƖPAƔLƲ na ɛ-fɛyɛ, lɛɛlɛɛyɔ ɛ-walʋ kaɣ-ɩ sɔɔlʋʋ! 33 Pʋwayɩ lɛ, Leyaa tasɩ hoa haɣʋ nɛ ɛlʋlɩ abalɩbɩɣa naalɛ ñɩŋga. Ɛkaɖɩ kpayɩ se, toovenim lɛ, KƖPAƔLƲ nawa se, pataasɔɔlɩ ɛnʋ, nɛ ɛ́lɛ ñaha-ɩ abalɩbɩɣa lɛɛka, nɛ ɛyaa kaka se Siimeyɔɔb. 34 Ɛtasɩ ɖɔɖɔ hoa haɣʋ nɛ ɛlʋlɩ abalɩbɩɣa naadozo (3) ñɩŋga nɛ ɛtɔ se, lɛɛlɛɛyɔ, paa pɩɩla ɛzɩma, ɛnʋ walʋ nɩɣnɩ-ɩ, mbʋ pʋyɔɔ yɔ, ɛnʋ lʋlɩ-ɩ abalɩbiya naadozo (3). Pʋ-yɔɔ ɛya kaka se Leevii. c 35 Ɛtasɩ ɖɔɖɔ hoa haɣʋ nɛ ɛlʋlɩ abalɩbɩɣa naanza (4) ñɩŋga. Ɛkaɖɩ kpayɩ se, lɛɛlɛɛyɔ, ɛnʋ saŋ KƖPAƔLƲ. Pʋ-yɔɔ ɛya kaka se Yuuda. d.
Pʋwayɩ lɛ, eyele lʋlʋʋ.